Éxodo 27
27
Scajtijib ta chiq'uel milbil majt'anil pasbil ta bronce
(Ex 38.1-7)
1“Pasbon scajtijib ta chiq'uel milbil jmajt'an ta acacia. Pajal me sp'isol ta xchanxujc'ul, cheb metro soc jo'eb xcha'winic centímetro (2.25) te jujun xujc', jun metro soc jo'eb xcha'winic centímetro (1.25) te stoylejale. 2Pasbeya chaneb xulubil ta xchanebal xujc'. Tey me ya xloc' ta pasel awu'un a, soc ya me apac' ta potsel ta bronce. 3Te bitic ya xtuun ta bay scajtijib ta chiq'uel milbil jmajt'an, spisil me pasbil ta bronce, ja' te yawil stanul, te spalail, te muc'ul tazaetic, te trincheetic soc te yawil ac'ale. 4Ya me apasbey srejail ta bronce. Ac'beya chaneb xch'ocowil pasbil ta bronce ta jujun xujc' te rejae. 5Tey me xawac' ta yet'al sti'il ta yolil stoylejal scajtijib te jmajt'ane. 6Ya me apasbey ste'el sq'uechjibal te scajtijib jmajt'an ta acacia, soc ya me apac' ta potsel ta bronce. 7Te ste'el sq'uechjibale tey me ya axij c'axel ta ch'ocowiletic yu'un te ay ta jujun xujc' te scajtijib ta chiq'uel jmajt'ane, swenta yu'un jich me ya yich' bael q'uechel a. 8Te scajtijib jmajt'ane pujul me soc pasbil me ta te', jich me te bit'il nix la awil ta witse.
Yamac'ul Nailpac' Templo
(Ex 38.9-20)
9“Pasbeya yamac'ul te Nailpac' Templo. Te amac' ya me awac'bey scorralil-pac' te pasbil ta ts'otbil lino. Ya me yich' lich'el bael jo'eb yoxwinic (45) metro ta stojol sur. 10Jtab me yoyal soc jtab me snactijib te pasbil ta bronce. Ya me alucanlabey staq'uinal soc xch'ocowil ta plata te jujune. 11Jich nix me ta stojol norte ya me awac'bey spac'ul, jo'eb me yoxwinic (45) metro te snajt'ile. Jtab me ta jch'ix te yoyal soc jtab snactijib te pasbil ta bronce. Ya me alucanlabey staq'uinal soc xch'ocowil ta plata te jujune. 12Ta stojol smalib c'aal ay me cheb xcha'winic metro soc olil (22.5) te paq'ue. Ja' me ya xmajc' bael a te sjamalul te amaq'ue, lajunch'ix me yoyal soc lajuneb snactijib. 13Ta stojol sloq'uib c'aal ja' ni me jich cheb xcha'winic metro soc olil (22.5) te sjamalule. 14Te yochibal juqueb metro te paq'ue, oxeb yoyal soc oxeb snactijib. 15Te yan spate ja' ni me jich juqueb metro te spac'ule, oxeb yoyal soc oxeb snactijib. 16Tey nix ta yochibal te yamac'ul Nailpac' Templo, ay me baluneb metro ya yich' smajq'uil-pac'ul te ch'albil ta ts'isel ta naubil stsotsil chij te bonbil ta morada, púrpura soc tsaj, soc ta ts'otbil lino, chaneb me yoyal soc chaneb me snactijib. 17Spisil te yoyal ta sjoyobal te corrale, ya me yich' xch'ocowil pasbil ta plata, soc te staq'uinal te lucajtic te pasbil ta plata, soc snactijib ta bronce. 18Te sp'isol te corral jo'eb me yoxwinic (45) metro te snajt'ile, cheb xcha'winic metro soc olil (22.5) te sjamalule, jich me ta xchebal te spate, soc cheb metro soc jo'eb xcha'winic (2.25) centímetro te stoylejale. Te paq'uetic te scorralile ts'otbil lino me, bronce me te snactijibe. 19Spisil te bitic ya xtuun yu'un te ch'ul awilal, ta puro bronce me ya yich' pasel. Jich nix me spisil te estacaetic ta bay spat te Nailpac' Templo soc ta bay scorralil.
Aceite yu'un c'ajq'uetic
(Lv 24.1-4)
20“Pasa ta mandal te israeletic, ac'a yich'ic tel lequil aceite te loq'uem ta sit olivo, swenta yu'un jich ma xcom ta tilel te c'ajq'uetique. 21Te Aarón soc te snich'nab ja' me ya swentainic xchajbanel te c'ajq'uetique. Ya me stilesic sjunal ajc'ubal ta jtojol jo'on te Ajwalilon, ta Nailpac' te bay ya quich' c'oponele. Ja' me ta spat te pac' smacoj scajonil te tratoe. Ja' jmandal ta sbajt'el q'uinal ta stojol te israeletic soc te sts'umbalique.
Iliyochaguliwa sasa
Éxodo 27: TZOXCH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Biblia en Tzeltal de Oxchuc y Tenejapa © Sociedad Bíblica de México, A.C., 2001.