Génesis 39
39
José soc yinam Potifar
1Te José c'ot ta Egipto te bit'il la yiq'uic bael te ismaeletique. Tey manot yu'un jtul egipcio-winic te Potifar sbiile, te ay yat'el ta stojol te faraón, ay ta comandante yu'un te jcanantaywanejetique. 2Ja'uc me to, te Cajwaltic sjoinej te José.#Hch 7.9. Jich mero lec a c'ot ta loq'uel te ay ta sna te yajwal te egipcio-winique. 3Te yajwal la sna' stojol te joinbil yu'un Cajwaltic te José, jich yu'un lec a c'ot ta loq'uel ta spisil te bila la spase. 4Jich te José lec yo'tan yu'un te yajwale. La yac'bey yat'el ta mayordomo ta sna, soc la yac'bey swentain spisil sbiluc. 5Te c'alal och ta swenta José spisil sbiluc, soc spisil sna te yajwale, jich chicnaj bendición ta stojol te egipcio-winic ta swenta bit'il sjoinej te José. Ta sna soc ta sq'uinal ay bendición ta stojol yu'un te Cajwaltique. 6La yac'bey swentain José spisil te bila ay yu'un. Ma'yuc bi la snop ta yo'tan yu'un, ja' nax bajt' ta yo'tan te we'ele.
Te José buen t'ujbil ta winiquil, mero snujp' nax ta ilel. 7Jich yu'un c'unc'un mulanot yu'un te yinam yajwale. La yalbey te José:
—Joinawon ta wayel —xi'.
8Ja'uc me to, ma la sc'an stuquel te José. La yalbey te yinam te yajwale:
—Te cajwale yac'ojbon ta jwenta spisil bitic ay yu'un. Ma'yuc bi ya snop ta yo'tan yu'un sbiluc ta sna. 9Ma'yuc xan yan cajal a te bit'ilone. Te cajwal ma'yuc bi ma yac'ojbon ta jwenta, ja' nax te bit'il yinamat te ja'ate. Ma xju' te ya jpastic jich. ¿Ma bal yacuc jta jmul ta stojol cajwal teme jich ya jpase? Soc ya me jta jmul ta stojol Dios —xi'.
10Jujun c'aal laj ta wulilayel te José; ja'uc me to, ma la xch'uunbey. 11Ay jun c'aal och ta yutil na, yu'un c'an ba at'ejuc, ma'yuc mach'a tey a. 12Jich te antse la stsacbey sc'u' te José, la yalbey:
—Joinawon ta wayel —xi'.
Ja'uc me to, te José la yijq'uitay jilel te sc'u'e, loc' ta anel. 13C'alal la yil te ants te loc' ta anel te José, ja' nax stsacojbey jilel te sc'u'e. 14Jich la yic' ochel tel te yantic abatetic ta na, la yalbey yaiyic:
—Te jmamlal la yic' ochel tel jtul hebreo-winic, pero ta ora to ya yuts'inotiquix. Och yilon, c'an sjoinon ta wayel; ja'uc me to tulan awunon. 15C'alal la yil te tulan awunone, jich loc' bael ta anel ta animal, soc ma la sna'ix bael te sc'u' yu'une —xi'.
16Jich yu'un la sq'uejbey te sc'u'e, ja' to c'alal jul tel te smamlale. 17Jich nix jul yalbey te smamlale:
—Ilawil te hebreo-winic anajc'anej, och ta jcuarto, c'an yuts'inon. 18Ja'uc me to tulan awunon, jich loc' ta anel, c'otsol jilel sc'u' ta jts'eel. 19Jich c'an spasbon te amozoe —xi'.
C'alal la yaiy stojol te yajwal te José te bila la yal te yiname, bayal ilin yu'un. 20Jich yu'un la sticun bael ta chucjibal, ta banti ay yantic jchuqueletic yu'un te ajwalile. Tey ac'ot ochel ta chuquel a. 21Ja'uc me to, sjoinej Cajwaltic te José,#Hch 7.9. c'uxtaybil yu'un tey a, soc la yac' ta c'uxtayel yu'un te jcanan-chucjibale. 22Jich te jcanan-chucjibale la yac'bey swentain José spisil te jchuqueletic te ayic ta chuquel soque. Spisil te bila ay ta pasel tey a, ja' chican stuquel te José. 23Te jcanan-chucjibale, ma'yuc bi la snop ta yo'tan yu'un ta spisil te bila la yac'bey ta sc'ab José, melel sjoinej Cajwaltic stuquel, lec c'ot ta loq'uel yu'un Cajwaltic ta spisil te bila la spase.
Iliyochaguliwa sasa
Génesis 39: TZOXCH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Biblia en Tzeltal de Oxchuc y Tenejapa © Sociedad Bíblica de México, A.C., 2001.