John 16
16
1“Anau eme aku okou nakakala nei, pela okou isekiaꞌi nahakina okou la. 2Nakama hamakua la mehaoki okou ikaha ma nahale loku. Kena imuli, alakama meikaa okou nomake, kena ihakaꞌoko pela lakou epena hea Keakua hihai. 3Nakama la meipena namea nei, maikinimea lakou semakino maua haikamana. 4Anau eme aku nakakala nei. Ia kena keualoko nakama la meihuli aku okou namenei, okou meimanaku mai muli nakakala anau nei. Anau seme aku okou nakakala nei imua, maikinimea anau oinoho maꞌokou.
Kipukipu Keanana Kapu
5“Keualoko nei, anau ukapili ivaꞌai muli kekama kela ehaunalia mai anau la. Ia anau emasalo pela sehikama okou evasili mai keꞌina anau mehaele la. 6Ia okou meialoha haeꞌo hea anau ekakala aku okou. 7Ia anau ekakala aku okou kehamaoni. Kaualeꞌa pela anau ihaele ikaha maꞌokou. Maikinimea, poi anau ehaele ikaha maꞌokou, kena anau mehaunalia iho kelaa kama ihapoꞌi okou la. Kena kama la mehaele iho nonoho maꞌokou. 8Kena keualoko kama la mehaele iho, kama la meihuli aꞌe nakama kemaalama nei nahaisala lakou la. Imakino lakou nakipukipu ekonu, ia imakino lakou hoi pela Keakua mehakonukonu namea hakoa. 9Kama la meihuli aꞌe nakama la pela lakou ehaisala, maikinimea lakou sehakina i anau. 10Kena kama la meihuli aꞌe lakou nakipukipu ekonu, maikinimea anau meihaele Kamana anau la, kena okou meiselavaa keꞌike anau. 11Kama la mehuli aꞌe pela Keakua mehakonukonu namea hakoa, ia Keakua nahakonukonu avale kekama hamakua kemaalama ilalo nei.*f22*
12“Anau ekomaꞌi namea ekakala aku i okou. Ia keualoko nei, okou mehainakaa kehalono. 13Ia keualoko Keanana hamaoni la mehaele iho, kama la mehuli aku okou namea hamaoni la hakoa. Kama la mesehuli aku nakakala aia soia. Kama la meme aku okou hea aia elono Keakua ekakala la. Imakino okou namea meiapihi mai imuli. 14Kama la mehuli aku nakipukipu anau, imakino okou namahi anau. 15Namea hakoa kela Kamana eisi, ana nimea anau hoi. Kela hea anau emea ma Keanana Kapu emakino nakipukipu anau la, kena mehuli aku okou namela.”
Kealoha mehuli sia nohihia
16Kena Jesus eme aꞌe hoi, “Ame kama saika okou meseꞌike anau. Ia kama saika imuli, okou meꞌike anau hoi.”
17Ko nakama kaukali Jesus la ivasisili solakou, “Kama la eme mai kakou pela ma kama saika kakou meseꞌike aia, ia kena meꞌike aia hoi. Ia kama la emea hoi maia mehaele Kamana aia.” 18Kena nakama la evasisili hoi ma, “Kama saika emea maea? Kakou semakino hea kama nei ekakala la.”
19Jesus emakino pela ma nakama la hihai ivasili aꞌe aia, kena iko ime aꞌe nakama la, “Okou evasisili soꞌokou kehakaꞌoko nakakala anau la ma, kama saika okou meiseꞌike anau, ia kama saika imuli, okou meiꞌike anau hoi. 20Anau eme aku okou kehamaoni. Okou meialoha nokani hamaloa. Ia nakama kemaalama nei meihihia oia. Okou meialoha, ia kealoha okou meihuli sia nohihia. 21Kemenei ehau poi kehine kela ekapili ihanau kamaliꞌi aia. Kehine la amesehihia, maikinimea kehalono lihu aia la. Ia keualoko kama la uoki kehanau kememea aia la, kama la usili nahalono lihu aia la, maikinimea kama la uhihia kememea aia ehanau iho iloko kemaalama nei la. 22Ia okou eme pela hoi. Okou amealoha vahonei. Kena imuli, anau mevaꞌai mai noꞌike okou, ihihia hakoa. Ia selavaa hekama keko kehihia la ikaha maꞌokou. 23Keualoko la, okou mesevasisili mai anau. Anau eme aku okou kehamaoni. Okou iainoa aꞌe Kamana anau la i kemale anau, kena kama la meihoꞌi aku okou. 24Imua, okou seainoa aꞌe Kamana nimea i kemale anau. Ia vahonei, okou iainoa aku nia okou hihai, kena okou meiko namela, pela okou mehihia hamaoni.
Namahi Jesus elaꞌa iluna namahi kemaalama nei
25“Imua, anau ekakala aku i okou nakakala hulihuli. Ia anau mesekakala aku pela hoi. Anau meikakala kahi aku nakipukipu Kamana. 26Keualoko na, anau meseainoa aꞌe Kamana hea okou ehihai. Okou soꞌokou meainoa aꞌe kama la i kemale anau. 27Kamana soia ehaikama laoi okou, maikinimea okou elaoi anau, nohakina pela anau ehamai Keakua. 28Anau ehamai Kamana, nokae kemaalama nei. Ia vahonei anau mekiaꞌi kemaalama nei novaꞌai muli Kamana.”
29Kena iko nakama kaukali Jesus la ime aꞌe, “Vahonei, aꞌoe ukakala kahi mai makou, ia usekakala hulihuli. 30Makou umakino pela aꞌoe uailoa namea hakoa. Niaina hekama sevasili aku aꞌoe, aꞌoe namakino avale kehakaꞌoko kama la. Kela hea makou ehakina pela aꞌoe ehamai Keakua.”
31Ko Jesus ime aꞌe nakama la, “Okou ehakaꞌoko pela ma okou ehakina hamaoni? 32Okou hakoa ukapili imaseu nohulo i namakaꞌina okou la, kena ukiaꞌi anau ikuu sonau. Ia anau sekuu sonau. Anau ekuu ma Kamana anau la.
33“Anau ekakala aku okou penei, pela okou isuꞌui manau inoho laoi. Keualoko okou enoho iloko kemaalama nei, naola okou mehainakaa. Ia okou isekipuaina. Maikinimea namahi anau elaꞌa iluna namahi kemaalama nei.”
Iliyochaguliwa sasa
John 16: ojv
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 1999, Wycliffe Bible Translators, Inc. All rights reserved.