یوحنّا روایت 1
1
کلمه ائنسان اولدی
1باشلانیشدا کلمه وار ائدی، کلمه تارینین یانیندا ائدی و کلمه تاری ائدی. 2او، باشلانیشدا تارینین یانیندا ائدی. 3هر شی اونون واسئطه‌سی ائنن یاراندی و اولموش اولانلاردان هچ بئری اونسوز اولمادی.
4اوندا حیات وار ائدی و او حیات ائنسانلارا نور ائدی. 5او نور قارانلیقدا پاریلداییر. آمّا قارانلیق اونا ظفر تاپماییب.
6تاری طرفئندن گؤندَ‌رئلمئش بئر کئشی وار ائدی، آدی یحیا ائدی. 7او، شاهئد ائدی و نور حاقّیندا شهادت ورمک اوچون گلدی کی، اونون واسئطه‌سی ائنن بوتون ائنسانلار ائمان گتئرسئنلر. 8او اؤزی، او نور دیئلدی، بلکی گلدی کی، او نور حاقّیندا شهادت ورسئن. 9او حقئقی نور ائدی کی، دونیایا گلئب بوتون ائنسانلاری ائشیقلاندیریر.
10او، دونیادا ائدی و دونیا اونون واسئطه‌سی ائنن یاراندی، آمّا دونیا اونی تانیمادی. 11او اؤزونونکولرئن یانینا گلدی، آمّا اؤزونونکولر ده اونی قبول اله مه‌دئلر. 12آمّا اونی قبول اِله ینلرئن هامیسینا، یعنی اونون آدینا ائمان گتئرنلره بو حاقّی وردی کی، تارینین اؤولادلاری اولسونلار. 13اَت و قاندان دوغولموش اولان اؤولادلار یوخ، نفسئن ائسته‌دئیئندن دوغولموش اولان اؤولادلار یوخ، ائنسانین ائراده‌سئندن دوغولموش اولان اؤولادلار یوخ، بلکی تاریدان دوغولدولار.
14کلمه، ائنسان اولوب بئزئم آرامیزدا ساکئن اولدی و بئز اونون جلالینی گؤردوک، آتانین بئری-بئردانه اوغلونون جلالینی. او، فیض و حقئقت ائنن دولی ائدی. 15یحیا اونون حاقّیندا شهادت وردی و اوجا سس ائنن ددی: «بودور او ددئیئم آدام، مندن سورا گلن آدام کی، مندن موقدّمدئر. چونکی من اولمامیشدان، او وار ائدی.» 16اونون دولولوغوندان هامیمیز فیض اوستونه فیض آلدیق. 17شرئعت موسانین واسئطه‌سی ائنن ورئلمئشدی. فیض و حقئقت عئسا مسئحئن واسئطه‌سی ائنن گلدی. 18هچ کس تارینی هچ بئر زامان گؤرمه‌یئب. آمّا آتانین یانیندا اولان او بئری-بئردانه اوغول اونی تانیتدی.
یحیانین شهادتی
19بودور یحیانین شهادتی، او زامان کی، یهودئلرئن ریئسی اورشلئم شهرئندن کاهئنلری و لاوئلی‌لری یحیانین یانینا گؤندَردئلر کی، اوندان سوروشسونلار: «سن کئمسن؟» 20یحیا آچیقجا ائقرار اله‌دی. او ائقرار اله‌دی کی، «من وعده ورئلن مسئح دیئلم.» 21اولار سوروشدولار: «بس کئمسن؟ ائلیا؟» ددی: «دیئلم.» سوروشدولار: «آیا او پیغمبرسن؟» جاواب وردی: «دیئلم!» 22اوندان سوروشدولار: «بس کئمسن؟ اؤز حاقّیندا نه دیئرسن کی، بئزی گؤندَ‌رَنلره جاواب آپاراق؟» 23یحیا جاواب وردی: نجه کی اِشَعیا پیغمبر دیئب،
«من چؤلده جار چکن بئرئنئن سسی‌یَم کی، دیئر:
”ربّئن یولونی دوز اله‌یئن.“»
24او آداملار کی فرئسی عالئملری طرفئندن گؤندَ‌رئلمئشدئلر، 25یحیادان سوروشدولار: «اگر سن نه مسئحسن، نه ائلیا‌سان، نه ده او پیغمبرسن، بس نه اوچون تعمئد ورئرسن؟» 26یحیا جاواب وردی: «من سو ائنن تعمئد ورئرم، آمّا سئزئن آرازدا بئری دوروب کی، سئز اونی تانیمیرسیز. 27او، همن او آدامدیر کی مندن سورا گلئر و من اونون آیاق قابیسینین باغینی دا آچماغا بله لایئق دیئلم.»
28بو احوالات اوردون چایینین او تاییندا، بیت‌عنیا کندئنده، یحیانین تعمئد وردئیی یرده باش‌وردی.
عئسا، تارینین قوزوسی
29او گونون صاباحیندا، یحیا عئسانین اونون یانینا گلمه‌سئنی گؤرَ‌نده ددی: «بودور تارینین قوزوسی! دونیانین گوناهینی اورتادان گؤتورن! 30بودور او آدام کی، اونون حاقّیندا دمئشدئم؛ مندن سورا بئر کئشی گلئر کی، مندن موقدّمدئر. چونکی من اولمامیشدان، او وار ائدی. 31من اؤزوم ده اونی تانیمیردیم، آمّا بونون اوچون گلئب سودا تعمئد ورمه‌یی باشلادیم کی، او اؤزونی ائسرایئله ظاهئر اله‌سئن.» 32و یحیا شهادت ورئب ددی: «من تارینین موقدّس روحونی گؤردوم کی، گؤیدن گؤیرچئن شکلئنده اِندی و اونون اوستونه قوندی. 33من اونی تانیمیردیم، آمّا سو ائنن تعمئد ورمک اوچون منی گؤندَ‌رَن، منه دمئشدی؛ ”کئمئن اوستونه تارینین روحونون انئب قالدیغینی گؤره‌سن، بئل کی موقدّس روح ائنان تعمئد ورن او اؤزودور.“ 34من گؤرموشم و شهادت ورئرم کی بودور تارینین اوغلی!»
عئسانین ائلک شاگئردلری
35او گونون صاباحی، یحیا گئنه شاگئردلرئنئن ائکئسی ائنن دورموشدی. 36عئسا گَزنده، یحیا اونی گؤروب ددی: «بودور تارینین قوزوسی!» 37او ائکی شاگئرد اونون ددئیئنی اشئدئب عئسانین دالیسیجا گتدئلر. 38عئسا دؤندی و اولارین اؤز دالیسیجا گلدئکلرئنی‌گؤروب اولارا ددی: «نه ائسته یئرسئز؟» اولار اونا ددئلر: «رابّی، هاردا منزئل اله‌یئبسن؟ رابّی یعنی اوستاد.» 39عئسا اولارا ددی: «گلئن، گؤررسئز.» بله ده اولار دا گلئب عئسانین هاردا منزئل اله‌دئیئنی گؤردولر و او گون اونونان قالدیلار. او واخت ناهاردان سورا ساعات دؤرده یاخین ائدی.
40او ائکی آدامدان بئری کی، یحیانین سؤزلرئنی اشئدئب عئسانین دالیسیجا گتمئشدی، شمعون پطروسون قارداشی آندریاس ائدی. 41او، اوّل اؤز قارداشی شمعونی تاپیب اونا ددی: «بئز وعده ورئلن مسئحی تاپمیشیق.» 42آندریاس، شمعونی عئسانین یانینا گتئردی. عئسا اونا باخدی و ددی: «سن یونا اوغلی شمعونسان. سن کئفا چاغیریلاجاقسان. کئفا یعنی قایا.»
عئسا فئلئپوس و نَته‌ناعئلی چاغیریر
43او گونون صاباحی عئسا ائسته‌دی کی، جلئل وئلایتئنه گتسئن. او فئلئپوسی تاپیب اونا ددی: «دالیمجا گل.» 44فئلئپوس دا آندریاس و پطروسون شهری بیت‌صیدادان ائدی. 45فئلئپوس، نَته‌ناعئلی تاپدی و اونا ددی: «بئز موسانین تؤوراتیندا یازیلدیغی و پیغمبرلرئن اوندان یازدیغی آدامی تاپمیشیق! او یوسئفئن اوغلی ناصئره‌لی عئسا دیر.» 46نَته‌ناعئل اونا ددی: «مگر ناصئره‌دن ده یاخشی بئر شی چیخار؟!» فئلئپوس اونا ددی: «گل، اؤزون گؤر!»
47عئسا نَته‌ناعئلئن اونون یانینا گلمه‌سئنی گؤرنده، اونون حاقّیندا ددی: «بودور ائچئنده حئیله‌سی اولمایان حقئقی بئر ائسرایئل‌لی!» 48نَته‌ناعئل اونا ددی: «سن منی هاردان تانی‌ییرسان؟» عئسا اونا جاواب ورئب ددی: «فئلئپوس سنی حله چاغیرمامیشدان قاباق، انجئر آغاجینین آلتیندا اولاندا سنی گؤردوم.» 49نَته‌ناعئل اونا ددی: «اوستاد، سن تارینین اوغلوسان! سن ائسرایئلئن پادشاهی‌سان!» 50عئسا اونا جاواب ورئب ددی: «آیا او سببدن ائنانیرسان کی، سنی انجئر آغاجینین آلتیندا گؤردویومی ددئم؟! بولاردان داها بؤیوک شیلر گؤره‌جکسن.» 51عئسا اونا ددی: «دوغروسونی سئزه دیئرم؛ گؤی اورتاسینین آچیلدیغینی و ائنسان اوغلونون اوستونه تاری ملکلرئنئن قالخیب اندئکلرئنی گؤره‌جکسئز.»
Iliyochaguliwa sasa
یوحنّا روایت 1: CAB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
@ 2024 Korpu Company