یوحنّا روایت 2
2
عئسا سویی شرابا دؤندَ‌رئر
1اوچونجی گون، جلئل وئلایتئنئن قانا کندئنده بئر توی وار ائدی و عئسانین آناسی دا اوردا ائدی. 2عئسا دا شاگئردلری ائنن بو تویا چاغیریلمیشدی. 3شرابین اسکئک گلدئیی زامان، عئسانین آناسی اونا ددی: «شرابلاری یوخدور.» 4عئسا آناسینا ددی: «من ائنن ائشئن اولماسین آنا، منئم واختیم حله یتئشمه‌یئب.»
5آناسی خئدمت اله‌ینلره ددی: «سئزه نه دسه، اونی اِله یئن.» 6یهودئلرئن طهارت رسمئنه گؤره، سو اوچون اوردا آلتی داش کوپ وار ائدی و هر بئرئسی تقرئبن یوز لئتر سو توتوردی. 7عئسا خئدمت اله‌ینلره ددی: «کوپلری سو ائنن دولدورون.» اولار دا کوپلری آغیزلارینا قدر دولدوردولار. 8عئسا اولارا ددی: «ائندی اولاردان بئر آز چکئن و ضئیافت ریئسئنه آپارین.» اولار دا چکئب آپاردیلار. 9ضئیافت ریئسی بو شرابین هاردان گلدئیئنی بئلمئردی، آنجاق سویی چکن خئدمتچئلر بئلئردئلر. پس شرابا دؤنموش سویی دادیب، بَیی چاغیردی. 10و اونا ددی: «هر کس اوّل یاخشی شرابی گتئرر و ائچئب کفلی اولاندان سورا یاوا شرابی. سن بو لاپ یاخشی شرابی ائندئیه کئمی ساخلاییبسان!»
11بو، عئسانین مؤجوزه‌لرئنئن باشلانماسی ائدی کی، جلئلئن قانا کندئنده اله‌یئب بوجور اؤز جلالینی ظاهئر اله‌دی. و شاگئردلری اونا ائمان گتئردئلر.
12اوندان سورا عئسا، آناسی، قارداشلاری و شاگئردلری ائنن بئرلئکده کفرناحوم شهرئنه گتدی و بئر نچه گون اوردا قالدی.
عئسا آلیش-ورئش اله ینلری معبددن قووور
13یهودئلرئن مایاسیز چؤرک پاسخا بایرامی یاخینلاشیردی و عئسا اورشلئم شهرئنه گتدی. 14معبدده اؤکوز، قویون، گؤیرچئن ساتانلار، و صرّافلیغا اوتوران صرّافلاری گؤردی. 15عئسا ائپلردن بئر شالّاق دوزَلدئب اولارین هامیسینی، قویونلاری و اؤکوزلری ائنن برابر معبددن قوودی. صرّافلارین پوللارینی دا داغیدیب، مئزلرئنی چوئردی، 16و گؤیرچئن ساتانلارا ددی: «بولاری بوردان آپارین. آتامین اِوئنی آلیش-ورئش اِوئنه دؤندَرمه‌یئن.» 17اونون شاگئردلری خاطیرلادیلار کی، یازیلیب: «سنئن اِوئن اوچون اولان قیرتئم منی یاندیریب تؤکر.» 18یهودئلر اونا ددئلر: «نه مؤجوزه بئزه گؤرسدئرسن کی، بله اله‌یئرسن؟» 19عئسا جاواب ورئب اولارا ددی: «بو معبدی ییخین. من اوچ گونده اونی آیاغا قالخیزارام.» 20یهودئلر ددئلر: «بو معبدئن بئنا اولونماسی قیرخ‌آلتی ائل چکئب و سن اونی اوچ گونده قالخیزاجاقسان؟» 21حال بو کی، عئسا معبد دمکده اؤز بدنئندن دانیشیردی. 22اؤلولردن دئرئلندن سورا، شاگئردلری عئسانین بو ددئیئنی خاطیرلادیلار و موقدّس کئتابا و عئسانین ددئیی سؤزلره ائمان گتئردئلر.
23عئسا پاسخا بایرامیندا اورشلئمده اولاندا، چوخ آداملار اونون اله‌دئیی مؤجوزه‌لری گؤروب اونا ائمان گتئردئلر. 24آمّا عئسا اولارا اعتئماد اله مئردی، چونکی بوتون ائنسانلاری تانی‌ییردی. 25اونون ائنسان حاقّیندا هچ کسئن شهادتئنه احتئیاجی یوخ ائدی، چونکی ائنسانین ائچئنده نه اولدوغونی بئلئردی.
Iliyochaguliwa sasa
یوحنّا روایت 2: CAB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
@ 2024 Korpu Company