یوحنّا روایت 3
3
عئسا و نئقودئموس
1فرئسی عالئملرئندن، نئقودئموس آدیندا بئر یهود ریئسی وار ائدی. 2بو آدام گجه عئسانین یانینا گلئب اونا ددی: «اوستاد، بئز بئلئرئک کی، سن تارینین طرفئندن گؤندَ‌رئلمئش بئر موعلّئمسن، چونکی هچ کس سنئن اله‌دئیئن علامتلری گؤرسه‌ده بئلمز، مگر کی تاری اونونان اولسون.» 3عئسا جاوابیندا اونا ددی: «دوغروسونی سنه دیئرم؛ بئر کس تزه‌دن دوغولمایینجا، تارینین پادشاهلیغینی گؤره‌بئلمز.» 4نئقودئموس اونا ددی: «بئر آدام قوجا اولان حالدا نجه تزه‌دن دوغولا بئلر؟ مگر اولار کی، آناسینین قارنینا گئرئب ائکئنجی دفه دوغولسون؟!» 5عئسا جاواب وردی: «دوغروسونی سنه دیئرم؛ هچ کس سودان و تارینین موقدّس روحوندان دوغولمایینجا، تارینین پادشاهلیغینا گئره بئلمز. 6جئسمدن دوغولان، جئسمدئر؛ آمّا روحدان دوغولان، روحدور. 7تعجّوب اله مه کی ددئم، ”تزه‌دن دوغولماغیز لازیمدیر“. 8یل ائسته‌دئیی یرده اَسر. اونون سسئنی اِشئده‌رسن، آمّا هاردان گلئب هارایا گتدئیئنی بئلمزسن. تارینین روحوندان دوغولموش اولان آدام دا بله‌دئر.» 9نئقودئموس جاواب ورئب اونا ددی: «بو شیلر نجه اولا بئلر؟» 10عئسا جاواب ورئب اونا ددی: «سن ائسرایئلئن موعلّئمی اولان حالدا، بو شیلری بئلمئرسن؟! 11دوغروسونی سنه دیئرم؛ بئز بئلدئیئمئزی دیئرئک و گؤردویوموزه شهادت ورئرئک آمّا سئز بئزئم شهادتئمئزی قبول اله مئرسئز. 12یره عایید اولان شیلردن سئزه دیئرم، ائنانمیرسیز. گؤیه عایید اولان شیلردن دانیشسام، نجه ائناناجاقسیز؟! 13گؤیدن اِنمئش ائنسان اوغلوندان باشقا، هچ کئم گؤیه چیخماییب. 14نجه کی، موسا چؤلده ائلانی یوخاری قالخیزدی، ائنسان اوغلی دا بوجور یوخاری قالخیزیلمالی‌دیر کی، 15اونا ائمان گتئرن هر کس هلاک اولماییب، ابدی حیاتی اولسون.
16«چونکی تاری دونیانی اله سِودی کی، اؤز بئری-بئردانه اوغلونی فدا اله‌دی. اونا گؤره کی، اونا ائمان گتئرن هرکس هلاک اولماییب، ابدی حیاتی اولسون. 17چونکی تاری اوغلونی گؤندَ‌رمه‌دی کی، دونیانی موحاکئمه اله‌سئن بلکی گؤندَ‌ردی کی، دونیا اونون واسئطه‌سی ائنن نئجات تاپسین. 18اونا ائمان گتئرن آدام محکوم اولماز آمّا اونا ائمان گتئرمه‌ین اله ائندئدن محکوم اولوب، چونکی تارینین بئری-بئردانه اوغلونا ائمان گتئرمه‌یئب. 19و حؤکم بودور؛ نور دونیایا گلدی، آمّا ائنسانلار قارانلیغی نوردان داها آرتیق سودئلر، چونکی عمللری پئس ائدی. 20چونکی پئس ائشلر گؤرن هر آدامین نوردان نئفرتی وار و اونا یاخین گلمز، اولمایا کی ائشلری آشکار اولسون. 21آمّا حقئقت ائنن یاشایان آدام نورا یاخین گلر کی، عمل‌لرئنئن تاریدان ائطاعت اله‌مک ائنن یرئنه یتئشدئیی آشکار اولسون.»
عئسانین باره‌سئنده یحیانین شهادتی
22بوندان سورا عئسا و شاگئردلری یهودئیه دئیارینا گلدئلر. عئسا بئر مودّت شاگئرلری ائنن اوردا قالیب خالقی تعمئد ورئردی. 23یحیا دا سالئم شهرئنئن یاخینلیغیندا، عِینون کندئنده تعمئد ورئردی چونکی اوردا سو چوخ ائدی و خالق گلئب اوندان تعمئد آلیردیلار. 24اوندا یحیا حله زئندانا سالینمامیشدی. 25بئر دفه طهارت حاقّیندا، یحیانین شاگئردلری ائنن بئر یهودی آراسیندا بحث دوشدی. 26اولار یحیانین یانینا گلئب اونا ددئلر: «اوستاد، اوردون چایینین او بئری تاییندا سن ائنن اولان و اونون حاقّیندا شهادت وردئیئن آدام، ائندی اؤزی تعمئد ورئر و هامی دا اونون یانینا گلئر.» 27یحیا جاواب ورئب ددی: «ائنسان هچ بئر شی آلا بئلمز، مگر کی گؤیدن اونا ورئلمئش اولسون. 28سئز اؤزوز شاهئدسئز کی، من ددئم؛ من مسئح دیئلم، بلکی اوندان قاباق گؤندَ‌رئلمئشم. 29گلئنی آلان، بَی‌دئر. آمّا بَیئن یانیندا دوران و اونا قولاق آسان دوستی، اونون سسئندن چوخ سِوئنَر. من ده بله سوئنئرم و ائندی بو شادلیق کامئل اولوبدور. 30او گرک آرتسین، آمّا من گرک اسکئلم.
31او کی یوخاریدان گلئر هامیدان باشدیر، او کی دونیاداندیر دونیانینکی‌دیر و دونیادان دانیشیر. او کی گؤیدن گلئر هامیدان باشدیر. 32او، گؤردویونه و اشئتدئیئنه شهادت ورئر، آمّا هچ کئم اونون شهادتئنی قبول اله مئر. 33اونون شهادتئنی قبول اله‌ین آدام تارینین دوغری اولدوغونا مؤهور باسیر. 34تاری طرفئندن گؤندَ‌رئلمئش آدام تارینین کلامینی دیئر، چونکی تاری موقدّس روحی اؤلچی ائنن ورمئر. 35آتا اوغولی سوئر و هر شیی اونون ائختئیاریندا قویوب. 36اوغولا ائمان گتئره‌نئن ابدی حیاتی وار؛ آمّا اوغولدان ائطاعت اله مه‌ین آدام حیات گؤرمه‌یه‌جک، بلکی تارینین قضبی اونون اوستونده قالار.»
Iliyochaguliwa sasa
یوحنّا روایت 3: CAB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
@ 2024 Korpu Company