Umatiu 2
2
Bibi-ashi bendi be nde undi-likpan
1Be ma hwan Ujeso he Ubetelehem he kubọng Ujudia, he kunyọng ahwu Uherọd a ma yi usu ha. Ki gbe kigbe ye, bendi abe be bilishi abe be ma ngye gbe le ikpen, be ma bo le he kigie kipi libwee li fem gye he Ujeruselem. 2Be bii le, “Unwaa angwu be hwan le u kwu usu Ijuus u yi kung a? Li nde ukpen uma a fem le kigie he kipi libwee li fem. Li be le li be fe-e.”
3Nyọng Usu Uherọd a gyo ashin gyo-gyo, ufung a maa fel waa he kitaa kimen le bendi puu he Ujeruselem. 4A ko bekandi puu abe be shang Unim le bitisha Iten be he kiteng ken. A bii abe le, he kung be be hwan Ukristi? 5Be fan he le, “Be ba hwan he he Ubetelehem he kubọng Ujudia.” “Kife na utye-ugie kisọm Unim a fee le-iti le:
6“ ‘Ukpọ men bendi Ubetelehem he kubọng Ujuda,
men na ma zen hwo bekandi abe he Ujuda puu ye,
likọye le he lishi limen na unwaan ken u be kwu usu,
angwu u be kam bendi begi, Izwel.’#2:6 Umaika 5:2, 4”
7Uherọd a ko begaa-ndi abe be ma be le he kigie kipi libwee li fem ana gye azu he kundyel le bii abe kunyọng ahwu ukpen a fem. 8A ha sọm abe gye he Ubetelehem le uteb angwun. A de le, “Ma le shun unwaa umen angwun tyuo-tyuo-tyuo. Gbe ma nde-e, ma tem be de-m he mi ọ titi, mi le fe-e.”
9Nyọng be ma gyo ashi Usu a kọng, be gbe, ukpen umen angwu be ma nde le he kigie ashi libwee li fem ana, a teng abe kpam le wu he kiteng kimen ashi unwaa a ma yi. 10Be ma yi le igọ kaang na be ma nde ukpen ana. 11Be gye he afee ushọm le nde unwaa le anam, Umeri. Be tim anung he itang fe unwaa. Be ngwee abwo he ibam ibel, ke-e beke bekandi. Beke abe be ke-e be yi kinde ashi ki ngbeb kunung hwo puu ashi be ko le igold, le behwu abe be nung nyin, abe be ko le ifrankinsens le imyrr. 12Unim a ma shwa abe kubwo he kutyung he itam le be tem le gbe he kipi Uherọd ye. Be fel gbe he kukwo kususo a gye he kubọng kubel.
Abu-ale hwaa gye he Igypt
13Nyọng be ma gbe, itam i ma shi Ujosef. He itam udengel Ada a be hwaa le he de-e le: “Bo kinaa, kung unwaa le anam buu le be gye he kubọng Igypt le kwu ha kpam a be de-e le be bo le ha. Uherọd u ba kee unwaa he u gwu-e.”
14Ujosef a wum le he kunde, a bo kinaa kung unwaa befe le anam nya le kusu bo ndo he Igypt. 15A ma kwu ha kpam Uherọd a gbe hwo. A shi nya ana Ada a ma kọng gbe ha utye-ugie kisọm kima le-iti. A ma kọng le: “Mi be le Unwa-agi le he Igypt.”#2:15 Uhosia 11:1
16Uherọd a nde le begaa-ndi abena be lam he. A fel he ingyo kaang. A kung uten tye le be gwu mbee bebwaa bengikye abe kung le he aze afee be he itang abe he Ubetelehem le ashi abọng angi a yi gwaa ha abe. A ma shi ashi kee ha kunyọng ahwu begaa-ndi be ma de-e le be nde ukpen. 17He kukwo kumen i na kiwọm ki shi nya ana Ujerimaya utye-ugie kisọm Unim a ma kọng le-iti.
18A ma kọng le: “Be gyo kihwu-hwee he Urama,
kihwu-hwee kukye le kimbwee ikandi
Urachel u kya bebwaa-ma.
U kya kaang bọng le be tie le he ye,
likọye bebwaa-ma be hwo mbee.”#2:18 Ujerimaya 31:15
Be tem gye he Unazaret
19Nyọng Uherọd a hwo, itam i ha shi Ujosef ha he Igypt, udengel Ada a be 20de-e le: “Bo kinaa he wo kung unwaa befe le anam tem gye he kubọng Izwel. Abe be ma kee unwaa le he be gwu-e be hwo ma.”
21Ujosef a wum le he kunde, a bo kinaa kung unwaa befe le anam tem gye he kubọng bendi Izwel. 22A gyo le unwaa Uherọd angwu be ko le Akelus a fel usu he lishi atyam he Ujudia. He atan-lengi angwun a maa fel shel na u le nde ha. Itam isuso i mbee shi-e. Unim a ma ke-e uteb, a bo gye he kubọng Ugalili, 23le nde he kipi ashi be ko le Unazaret. Ki shi nya ana bitye-ugie kisọm Unim bi ma kọng le-iti a. Bi ma kọng le bendi be ba kọng le u yi Unazarin a.
Iliyochaguliwa sasa
Umatiu 2: KUIL
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.