Mateu Citsindikisi
Citsindikisi
Muzimbu Uacili uasonekele Mateu uapua umo ua mikanda iuana mu Litavasano Lialiha ije ihandeka ha vuyoye vua Yesu Kilistu. Umo ku umo yauo va utumbula nguavo “Muzimbu.” kulumbununa “Muzimbu Uacili.” Va isonekele hanima ya kutsa ca Yesu kuli Mateu, na Mako, na Luka na Yiuano. Vaka kulilongesa kuvazivuka muaka muka uje Muzimbu ua Mateu vausonekele, vuno honi casa kupua mu miaka makumi atanu na limo hanima ya kusemu ca Yesu. Naua kuvazivuka ku cihela cije vausonekelele, vuno honi vavengi vakasinganiekela nguavo hamo vausonekelele mu Palisitane kaha naua hamo mu nganda ya Yelusalema.
Muka ku usonekani ikeye vene Mateu, uje uapuile muka kutambula lisimu tele kanda Yesu amuleke ngeci apue ndongisi uendi. Naua vamuzivukile na lizina lia Levi. Mateu uapuile umo ua tunganda likumi na vavali kaha naua ua usonekelele kuli vaka kutanda Ciyunda. Eci vanacimuesa mu vitaleso hakupua makumi atanu na limo mu visoneka mu Litavasano Lialaja. Uatondele kumuesa ngue Yesu ikeye vene Kilistu, Muyoyesi uakuhangula ua Njambi, uje ivahandekele vunanguizi vua hali ikeye. Mateu naua uasonekele viavingi via Vumuene vua Njambi. Vayunda vatondele Kilistu kupua muene ua vumuene vua vimpande via mavu. Mateu uahakelele mana mukueseka viyongola vije mukulumbununa Vumuene vua vusunga vua Njambi.
Muzimbu Uacili uasonekele Mateu uapua mukanda uacili hakuputukila Litavasano Lialiha muomu lia vitaleso viauo viaku Litavasano Lialaja. Mukanda ou uanungakana Matavasano avali. Vaka kulilongesa naua vasinganieka nguavo Mateu hamo uesekele kutemunuisa cifua ca mikanda ya Mosesa, ije ikeyo yapua mikanda itanu ya kulivanga mu Litavasano Lialaja. Kuambulula ca Yesu ha munkinda (5-7) tuasa kucisetekesa ngue muje Njambi uahanene lishiko kuli Mosesa (Kuhituluka mu Mashiko 19:3; 23:33).
Muvana Vitumbikilamo:
1. Mateu aputuka Muzimbu nakuhandeka ha kusemuka ca Yesu Kilistu na maputukilo a vipangi viendi mu kapetulu (1-4).
2. Cakuhatako Mateu alumbununa vipangi via Yesu na vilongesa viendi viavingi mu kapetulu (5-25).
3. Cakumanusuila mukusoneka ca Mateu cikeco cihandeka ha vipangi via Yesu mu kutsa cendi na kusanguka cendi (26-28).
Iliyochaguliwa sasa
Mateu Citsindikisi: NNTZ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia