Luka 2
2
Yesu lʋlʋʋ tɔm
(Mat 1.18-25)
1Alɩwaatʋ ńdʋ́ʋ́ Room wiyaʋ sɔsɔ Ogustɩ ha nɔɔ se pakalɩ ɛyáa mbá ɛcɔŋnɩ pɔ-yɔɔ yɔ patɩŋa. 2Kɩkalʋʋ ŋ́gʋ́ kɩkɛnɩ kajalaɣ ñɩŋgʋ. Alɩwaatʋ ńdʋ́ tɩ-taa ɖɔɖɔ Kiriiniyuusi cɔŋaɣnɩ Siirii egeetiye yɔɔ. 3Peeɖe paa weyi ewokaɣ ɛ-tɛ se pama ɛ-hɩɖɛ. 4Pʋ-yɔɔ Yozɛɛfʋ kʋyɩ Nazarɛɛtɩ, Galilee egeetiye taa se ewoki Bɛtlɛhɛm, Yudee egeetiye taa ɖenɖe paalʋlɩ wiyaʋ sɔsɔ Daaviidi yɔ. Mbʋ́ pʋyɔɔ yɔ, ɛkɛ Daaviidi liɖe taa tʋ. 5Ewokaɣ se pama ɛ nɛ e-kususaɣ Maarɩɩ weyi ɛhaɣ howa yɔ pa-yɩla. 6Patalɩ Bɛtlɛhɛm nɛ pɛwɛɛ lɛ, pɩtalɩ se Maarɩɩ ɛlʋlɩ. 7Peeɖe ɛlʋlɩ ɛ-kajalaɣ pɩɣa, kɛkɛ abalɩbɩɣa. Ɛlʋlɩ-kɛ wondu kalakʋ taa nɛ ɛɖʋ-kɛ pɩsaʋ taa nɛ ɛhɛzɩ-kɛ ɖenɖe paɖʋʋ wondu tɔɔnaɣ yɔ. Mbʋ́ pʋyɔɔ yɔ, pataahiɣ ɖɩsʋyɛ agɔmaa ɖɩɣa taa.
Ɛsɔ tiyiyu nɔɔyʋ heyi ninɖiɣyaa laŋhʋlʋmɩyɛ tɔm
8Ninɖiɣyaa nabɛyɛ kɛwɛ hɔɔlɩŋ ɩnʋ ɩ-taa. Paawɛ tɛyɛ yɔɔ ɖoó ana a-taa nɛ paɖaŋ pe-heŋ. 9Peeɖe Kɩpaɣlʋ tiyiyu nɔɔyʋ lɩ pɔ-cɔlɔ nɛ Kɩpaɣlʋ ñalɩmɩyɛ ñalɩ pɔ-yɔɔ nɛ sɔɔndʋ kpa-wɛ pɩtɩɩfɛyɩ. 10Ɛlɛ́, tiyiyu ɛnʋ eheyi-wɛ se: «Sɔɔndʋ ɛtaakpa-mɩ, mbʋ́ pʋyɔɔ yɔ, mɔnkɔm se meheyi-mɩ laŋhʋlʋmɩyɛ tɔm natʋyʋ. Tɩkɛdɩɣnɩ ɛyáa tɩŋa payɩ.» 11Ńdʋ́ lɛ se palʋlɩ-mɩ Ñʋʋ Yaɖʋ ɖoó anɛ a-taa Daaviidi tɛ Bɛtlɛhɛm. Ɛnʋ lɛ Kɩpaɣlʋ, ɛnʋ lɛ Weyi Ɛsɔ Lɩzaa Yɔ. 12Ɩɩnaɣ mbʋ́ pɩwɩlɩɣ-mɩ nɛ ɩtɩlɩ yɔ: ɩtalɩɣ lɛ, paɖʋ pɩɣa pɩcɩɩcɩyɩm ɛnʋ pɩsaʋ taa nɛ pɛhɛzɩ-kɛ ɖenɖe paɖʋʋ wondu tɔɔnaɣ yɔ.
13Kpaagbaa ḿbʋ́ lɛ, Ɛsɔ tiyiyaa samaɣ tii pɔsɔzɩ tiyiyu ɛnʋ ɛ-yɔɔ nɛ pasaŋ Ɛsɔ nɛ hendu se: 14«Pasa Ɛsɔ ɖooo ɛsɔdaa nɛ ɛ-laŋhɛzɩyɛ wɛɛ tataa ɛyáa mbá ɛsɔɔlɩ-wɛ yɔ pɔ-cɔlɔ.»
Ninɖiɣyaa woba Bɛtlɛhɛm
15Pʋwayɩ lɛ, Ɛsɔ tiyiyaa kʋyɩ ninɖiɣyaa cɔlɔ nɛ papɩsɩ ɛsɔdaa. Ɛlɛ́, ninɖiɣyaa ḿbá pɔyɔɔdɩnɩ ɖama se: «Đɩkʋyɩ ɖiwolo Bɛtlɛhɛm peeɖe nɛ ɖɩna mbʋ́ pɩlaba nɛ Kɩpaɣlʋ tiyiɣ se peheyi-ɖʋ yɔ.» 16Peeɖe pakpaɣ seya nɛ powolo pamaɣnɩ Maarɩɩ nɛ Yozɛɛfʋ nɛ pɩɣa pɩcɩɩcɩyɩm ɛnʋ. Pɛhɛzɩ-ɩ ɖenɖe paɖʋʋ wondu tɔɔnaɣ yɔ. 17Pana-ɩ lɛ, papazɩ kɛdʋʋ ɛ-tɔm ndʋ́ Ɛsɔ tiyiyu keheyi-wɛ yɔ. 18Peeɖe pɩlabɩ ɛyáa mbá patɩŋa panɩ tɔm ndʋ́ pɛkɛdaa yɔ piti. 19Ɛlɛ́, Maarɩɩ ɖɔkɩ tɔm ńdʋ́ tɩtɩŋa payɩ nɛ ɛmaɣzɩɣ tɩ-yɔɔ siŋŋ. 20Ninɖiɣyaa ḿbá pana-wɛ lɛ, pakpaɣ nʋmɔʋ kpem yɔɔ nɛ pasaŋ Ɛsɔ nɛ pɛɖɛyɩɣ-ɩ mbʋ́ pɩtɩŋa panɩwa nɛ pana yɔ pʋ-yɔɔ. Mbʋ́ pʋyɔɔ yɔ, pɩtɩŋa pɩlabɩ ɛzɩ Ɛsɔ tiyiyu kɛkɛdʋʋ-wɛ yɔ.
Yesu pɛlʋʋ tɔm
21Kɩyakʋ lutozo ñɩŋgʋ wiye lɛ, pɩtalaa se pɛpɛlɩ pɩɣa ŋ́gá nɛ paha-kɛ hɩɖɛ nɖɩ́ Ɛsɔ tiyiyu keheyi ko-ɖoo nɛ pʋcɔ ɛhaɣ-kɛ yɔ: ńɖɩ́ lɛ Yesu.
Maarɩɩ nɛ Yozɛɛfʋ powoni Yesu Ɛsɔ ɖɩɣa taa
22Pʋwayɩ lɛ, alɩwaatʋ talɩ se pala cɩɖɩcɩɖɩ wɛtʋ sɔnzɩ ɛzɩ paɖʋʋ Mooyiizi paɣtʋ taa yɔ. Peeɖe pakpaɣ pɩɣa ŋ́gá nɛ powoni Yeruusalɛm se paɖʋzɩ-kɛ Kɩpaɣlʋ Ɛsɔ nesi taa. 23Mbʋ́ pʋyɔɔ yɔ, paɖʋ Kɩpaɣlʋ paɣtʋ taa se: «Paa abalɩbɩɣa kajalaɣ ñɩŋga ŋgá lɛ, pasɩɩ-kɛ nɛ hɔɔlʋʋ nɛ kɛkɛ Kɩpaɣlʋ ñɩŋga.» 24Peeɖe Maarɩɩ nɛ Yozɛɛfʋ palaba ɛzɩ paɖʋʋ ɖɔɖɔ Kɩpaɣlʋ paɣtʋ taa se palaa ahowa naalɛ yaa halikukunaa cikpema naalɛ yɔ.
Siimeyɔɔ saŋ Ɛsɔ Yesu yɔɔ
25Alɩwaatʋ ńdʋ́ lɛ, abalʋ nɔɔyʋ wɛ Yeruusalɛm, payaɣ-ɩ se Siimeyɔɔ. Ɛɛkɛ ɛyʋ kʋtʋʋzʋ nɛ ɛlakɩ mbʋ́ Ɛsɔ liu wɛɛ yɔ. Ɛɛɖaŋ weyi ɛkɔŋ hɛzʋʋ Izrɛɛlɩ ñɩma laŋa yɔ. Fezuu Kiɖeɖeu kɛwɛ ɛ-cɔlɔ 26nɛ keheyi-i se ɛnaɣ Weyi Kɩpaɣlʋ Lɩzaa nɛ etiyi-i yɔ nɛ pʋcɔ ɛsɩ. 27Puwiye lɛ, Fezuu Kiɖeɖeu keti Siimeyɔɔ ɛnʋ nɛ kiwoni-i Ɛsɔ ɖɩɣa taa. Pɩɣa caa nɛ ko-ɖoo powoni-kɛ se pala kɔ-yɔɔ mbʋ́ Mooyiizi kaɖʋ ɛ-paɣtʋ taa yɔ. 28Peeɖe Siimeyɔɔ mʋ-kɛ nɛ ɛsɛɛ Ɛsɔ se: 29«Kɩpaɣlʋ! Lɛɛlɛɛyɔ ŋlabɩ mbʋ́ ŋɖʋwa se ŋlakɩ yɔ. Pʋ-yɔɔ lɛ, ŋpɩzɩɣ ŋyele nɛ pɩkpaɣ ña-tʋmlaɖʋ ma laŋhɛzɩyɛ taa. 30Mbʋ́ pʋyɔɔ yɔ, ma-maɣmaɣ mana Ñʋʋ Yaɖʋ nɛ mɛ-ɛsɛ, 31ɛnʋ ŋñɔɔzaa nɛ ɛyáa tɩŋa naɣ-ɩ. 32Ɛnʋ lɛ ñalɩmɩyɛ nɖɩ́ ɖɩwɩlɩɣ ajɛya kpeekpe nʋmɔʋ yɔ. Ɛnʋ yekina nɛ patɩŋa pasɩm-ŋ nɛ Izrɛɛlɩ ñɩma hɩɖɛ sɛɛ.»
33Siimeyɔɔ yɔɔdɩ ḿbʋ́ lɛ, pɩɖɩɣzɩ Yesu caa nɛ e-ɖoo pɩtɩɩfɛyɩ. 34Pʋwayɩ lɛ, ɛwazɩ pa nɛ Yesu pɔ-yɔɔ nɛ eheyi Yesu ɖoo Maarɩɩ se: «Ɛsɔ lɩzɩ pɩɣa kanɛ se Izrɛɛlɩ ñɩma sakɩyɛ ɛtɔlɩ nɛ lɛlaa hiɣ ñʋʋ yabʋ. Ŋ́gá wɩlɩɣnɩ ɛyáa mbʋ́ Ɛsɔ liu wɛɛ yɔ nɛ paatisiɣ kɔ-tɔm. 35Peeɖe eyeki nɛ pukuli mbʋ́ pɩtɩŋa payɩ ɛyáa sakɩyɛ maɣzɩɣ mɛsaɣ tɛɛ yɔ pʋ-yɔɔ nɛ paa weyi ɛna. Ña ko-ɖoo lɛ, ŋkɔŋ nɩʋ siziŋ ña-lɩmaɣza taa ɛzɩ pɔsɔbɩ-ŋ sɩɣa yɔ.»
Ana saŋ Ɛsɔ Yesu yɔɔ
36Náyʋ halɩñɩnʋ nɔɔyʋ kɛwɛ Ɛsɔ ɖɩɣa taa peeɖe ɖɔɖɔ. Payaɣ-ɩ se Ana. Ɛkɛ Asɛɛrɩ liɖe taa tʋ Fanʋyɛɛlɩ pɛlɛ, ɛkpadɩyɩ koŋgonoo. Abalʋ weyi ɛɛcɛbɩ ɛ-pɩsatʋ yɔ, ɛ nɛ ɩ pacaɣ pɩnzɩ lʋbɛ lɛ, ɛ́lɛ́ ɖɛɛ ɛsɩ. 37Peeɖe ɛcaɣ lelitu nɛ ɛkɔɔ ɛtalɩ pɩnzɩ nɩɩnʋwa nɛ niidozo nɛ naanza. Ɛɛwɛɛ Ɛsɔ ɖɩɣa taa alɩwaatʋ kpeekpe nɛ ɛsaŋ-ɩ wɩsɩ nɛ ɖoó nɛ ɛhɔkʋʋ nɔɔ nɛ ɛsɛɣ-ɩ. 38Siimeyɔɔ wazaɣ Yesu nɛ ɛ-ñɩma pɔ-yɔɔ ḿbʋ́ lɛ, ewolo pɔ-cɔlɔ nɛ ɛsaŋ Ɛsɔ nɛ eheyiɣ mbá paaɖaŋaa se Ɛsɔ ɛkɔɔ ɛya Yeruusalɛm ñʋʋ yɔ Yesu ɛnʋ ɛ-tɔm.
Yesu paɣlɩ Nazarɛɛtɩ
39Yesu ñɩma tɛm labʋ mbʋ́ pɩtɩŋa paɖʋ Kɩpaɣlʋ paɣtʋ taa yɔ lɛ, pakpaɣ pa-pɩɣa nɛ papɩsɩ pɛ-tɛ Nazarɛɛtɩ, Galilee egeetiye taa. 40Pɩɣa ŋ́gá, kapaɣlaɣ nɛ kɛtɛzɩɣ kpaʋ ɖoŋ. Kaawɛnɩ lɔŋ pɩŋŋ nɛ Ɛsɔ lootiye wɛɛ kɔ-yɔɔ.
Yesu wɛna pɩnzɩ hiu nɛ naalɛ lɛ, ewolo Ɛsɔ ɖɩɣa taa Yeruusalɛm
41Paa pɩnaɣ ŋgá lɛ, Yesu caa nɛ e-ɖoo powokaɣ Yeruusalɛm Yuda ñɩma Paska Kazandʋ tɔɔʋ. 42Yesu wɛnɩ pɩnzɩ hiu nɛ naalɛ nɛ powoki kazandʋ ńdʋ́ ti-ɖeɖe ɛzɩ patɩɩwokuu yɔ lɛ, pɛkpɛndɩnɩ-ɩ. 43Kazandʋ tɛma lɛ, ɛ-ñɩma kpaɣ nʋmɔʋ se pekpeŋ. Naze lɛ, pɩɣa Yesu ɛnʋ, ɛcaɣ Yeruusalɛm nɛ peteɖiɣzina. 44Paawɛ yem se ɛwɛ pa-taabalaa nʋmɔɖɔnaa lɛlaa cɔlɔ nɛ pɔɖɔ kɩyakʋ nɛ kɩ-tɛɛ pilim, patana-ɩ. Peeɖe papazɩ-ɩ ñɩnʋʋ pa-ñɩma nɛ pa-taabalaa pɔ-cɔlɔ. 45Ɛlɛ́, patana-ɩ ɖɔɖɔ. Peeɖe pakpaɣ-ɩ ñɩnʋʋ ka ka ka nɛ papɩsɩ Yeruusalɛm. 46Pɩlabɩ kɩyakɩŋ naadozo lɛ, pana-ɩ Ɛsɔ ɖɩɣa taa. Ɛcaɣ paɣtʋ wɩlɩyaa hɛkʋ taa nɛ ewelesiɣ nɛ ɛpɔzʋʋ-wɛ tɔm. 47Ɛyáa mbá paawɛ peeɖe nɛ pewelesiɣ yɔ, panɩ ḿbʋ́ lɛ, pɩla patɩŋa piti nɛ ɛ-lɛɣtʋ nɛ ɛ-tɔm cosuu. 48Ɛ-ñɩma na-ɩ ḿbʋ́ lɛ, pɩɖɩɣzɩ-wɛ ɖɩɣ ɖɩɣ nɛ e-ɖoo pɔzɩ-ɩ se: «Man-pɩɣa! Pɩlabɩ ɛzɩma nɛ ŋlabɩ-ɖʋ ḿbʋ́? Sɔɔndʋ kpa ma nɛ ña-caa siŋŋ nɛ ɖɩwɛ-ŋ ñɩnʋʋ yɔɔ.» 49Ɛlɛ́, Yesu pɔzɩ-wɛ se: «Pɩlabɩ ɛzɩma nɛ ɩñɩnɩɣ-m? Ɩtatɩlɩ se pʋmʋnaa se mɛwɛɛ man-Caa ɖɩɣa taa yaa we?» 50Ɛlɛ́, patanɩɩ tɔm ndʋ́ ɛpɔzɩ-wɛ yɔ tɩ-tɔbʋʋ.
51Pʋwayɩ lɛ, pa nɛ ɩ pakʋyɩ papɩsɩ pɛ-tɛ Nazarɛɛtɩ. Yesu ɛnʋ, ɛñaŋ ɛ-caa nɛ e-ɖoo camɩyɛ. Mbʋ́ pɩtɩŋa payɩ pɩlaba yɔ, pʋwɛɛ e-ɖoo taa nɛ ɛtɔzʋʋ pʋ-yɔɔ paa ɖooye. 52Yesu kɛwɛɛ ɛpaɣlɩɣ nɛ ɛ-lɔŋ tɛzɩɣ sɔzʋʋ kʋsɔzʋʋ nɛ ɛ-tɔm pazɩ tɩkɛdɩnɩ Ɛsɔ nɛ ɛyáa pɩŋŋ.
Iliyochaguliwa sasa
Luka 2: KABI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia