Luka 3
3
Lɩm Sɔʋ Sɔnzɩ Laɖʋ Yohanɛɛsɩ heyi ɛyáa se pɛlɛɣzɩ pa-laŋa
(Mat 3.1-12; Mrk 1.1-8; Yoh 1.19-28)
1Lɛɛlɛɛyɔ, pɩlabɩ pɩnzɩ hiu nɛ kagbaanzɩ ɛzɩ Tiibɛɛrɩ caɣʋ kewiyaɣ kpelaɣ yɔɔ yɔ. Pɔɔnsɩ Pilaatɩ kɛ Yudee egeetiye ñʋʋdʋ. Eroodi Antipasɩ ñɔcɔŋnɩ Galilee ñɩnɖɛ yɔɔ. Ɛ-ɖalʋ Filiipu cɔŋaɣnɩ Ituuree nɛ Traakooniti pa-ageeta yɔɔ nɛ Liisaniyaasɩ ñɔcɔŋnɩ Abiilɛɛnɩ ñɩnɖɛ yɔɔ. 2Ana nɛ Kayifu paakɛ cɔjɔnaa ñʋndɩnaa. Alɩwaatʋ ńdʋ́ tɩ-taa Ɛsɔ ɖʋzɩ ɛ-tɔm Zakaarii pɩyalʋ Yohanɛɛsɩ nesi taa lakʋ taa. 3Ɛsɔ ɖʋzɩ Yohanɛɛsɩ nesi taa ɛ-tɔm ḿbʋ́ lɛ, ɛpazɩ cɔʋ hɔɔlɩŋ weyi ɩwɛ Yɔɔrdaŋ pɔɔ nɔɔ yɔ ɩtɩŋa ɩ-taa nɛ esusuu ɛyáa se: «Ɩlɛɣzɩ wɛtʋ nɛ palabɩ-mɩ lɩm sɔʋ sɔnzɩ nɛ Ɛsɔ kpeɣ-mɩ mɩ-kɩwɛɛkɩm.» 4Ɛ-tɔm náyʋ Ezaayii ma Ɛsɔtɔm Takayaɣ taa se:
«Nɔɔyʋ susuu lakʋ taa se
pɔñɔɔzɩ Kɩpaɣlʋ nʋmɔʋ nɛ
pala nɛ kʋtʋʋzɩ camɩyɛ!
5Posuyi kajalanzɩ tɩŋa nɛ
pɔyɔlɩsɩ pʋŋ nɛ petiti nɛ pʋwɛɛ ɖeyi ɖeyi.
Patʋʋzɩ ɖenɖe ɖenɖe habɩyɛ kotaa yɔ nɛ,
pɔñɔɔzɩ nʋmɔŋ weyi ɩwɛɛkaa yɔ camɩyɛ
6nɛ paa weyi ɛna ɛzɩma mbʋ́ Ɛsɔ yakɩ ɛyáa ñʋʋ yɔ.»
7Yohanɛɛsɩ yɔɔdaɣ ḿbʋ́ lɛ, ɛyáa samaɣ woki ɛ-cɔlɔ nɛ ɛlakɩ-wɛ lɩm sɔʋ sɔnzɩ. Peeɖe eheyi-wɛ se: «Đʋmaa mɩ! Aheyi-mɩ se ise Ɛsɔ pana wena akɔŋ-mɩ kpanaʋ yɔ? 8Ɩla lakasɩ nzɩ́ sɩwɩlɩɣ se ɩlɛɣzɩ wɛtʋ yɔ. Ɩtaamaɣzɩ se mɩ-cɔzɔ lɛ Abraham yɔ, pɩtɛma. Mbʋ́ pʋyɔɔ yɔ, meheyiɣ-mɩ se Ɛsɔ pɩzɩɣ ɛla nɛ pɛɛ anɛ apɩsɩ Abraham liɖe taa ñɩma.» 9Peeɖe etuu-wɛ eduuye se: «Halɩ pɛtɛm kpaɣʋ laɖɩyɛ se pɛsɛtɩɣ tɩŋ nɛ ɩ-tɛɛ: tɩʋ ŋgʋ́ kɩɩlʋlʋʋ pee kɩbana yɔ, pɛsɛtɩɣ-kʋ nɛ paɖʋ miŋ taa.»
10Peeɖe ɛyáa samaɣ pɔzɩ-ɩ se: «Ɛzɩma pʋwɛɛ se ɖɩla yɔ?» 11Ecosi-wɛ se: «Nɔɔyʋ ɛwɛnɩ tokonaa naalɛ yɔ, ɛpasɩ lɛɛkʋ nɛ ɛha weyi ɛfɛyɩna yɔ. Yee nɔɔyʋ ɛwɛnɩ tɔɔnaɣ yɔ, ɛha ɖɔɖɔ weyi ɛfɛyɩna yɔ.» 12Pɩkpɛndɩnɩ tikee mʋyaa nɛ powolo ɛ-cɔlɔ se ɛlabɩ-wɛ lɩm sɔʋ sɔnzɩ nɛ pɔpɔzɩ-ɩ se: «Wɩlɩyʋ, ɛbɛ pʋmʋnaa se ɖɩla?» 13Peeɖe ecosi-wɛ se: «Ɩtaapɔzɩ ɛyáa nɛ pɩɖɛɛ mbʋ́ paɖʋwa se pɛhɛyɩ yɔ pʋ-yɔɔ.» 14Sɔɔjanaa ñɔpɔzɩ-ɩ ḿbʋ́ ɖɔɖɔ se: «Nɛ ɖa yɔ, ɛbɛ pʋmʋnaa se ɖɩla?» Ecosi-wɛ se: «Ɩtaakpa nɔɔyʋ nɛ ɩmʋ e-liidiye yaa ɩtaacɛtɩnɩ nɔɔyʋ taa yem. Ɛlɛ́, mɩ-laŋa ɩhʋlʋmɩnɩ mbʋ́ pɛhɛyɩɣ-mɩ yɔ.»
Yohanɛɛsɩ yɔɔdʋʋ weyi ɛkaɣ kɔm yɔ ɛ-tɔm
15Yohanɛɛsɩ cosi ɛyáa samaɣ ŋ́gá ḿbʋ́ lɛ, kɛtɛzɩ maɣzʋʋ se: «Yaa ɛnʋ lɛ Weyi Ɛsɔ Lɩzaa Yɔ?» Peeɖe paa weyi ɛɖaŋ kpam se pʋyʋ sɔsɔ nɔɔyʋ kɔŋ labʋ. 16Ɛlɛ́, eheyi patɩŋa se: «Ma lɛ, malakɩ-mɩ lɩm sɔʋ sɔnzɩ. Ɛlɛ́, nɔɔyʋ kaɣ kɔm, ɛ́lɛ́ kɩlɩ-m. Mantatɩɩmʋna se mɛyɛɖɩ ɛ-naataŋgbala tɔnzɩ maɣmaɣ. Ɛkɔŋ-mɩ labʋ sɔnzɩ ńzɩ́ nɛ Fezuu Kiɖeɖeu ɖoŋ nɛ miŋ. 17Ɛwɛ ɛzɩ falɩyʋ ɖɔkʋʋ ɖaakuɖe nɛ ɛfalɩɣ nɛ esuu pee kpou taa nɛ piyele ɛɖʋʋ lɔtʋ miŋ weyi eeɖeŋ wiɖiyi kaʋ yɔ ɛ-taa yɔ.»
18Tɔm ńdʋ́ nɛ lɛɛtʋ sakɩyɛ Yohanɛɛsɩ sazaɣnɩ ɛyáa samaɣ nɛ ɛwɩlɩɣ-kɛ Laŋhɛzɩyɛ Tɔm.
Eroodi Antipasɩ kpa Yohanɛɛsɩ nɛ ɛɖʋ-ɩ salaka
19Alɩwaatʋ ńdʋ́ʋ́ ɛkalɩ wiyaʋ sɔsɔ Eroodi, mbʋ́ pʋyɔɔ yɔ, ɛɛlɛɣ e-neu halʋ weyi payaɣ se Eroodiyaadɩ yɔ nɛ ɛla kɩwɛɛkɩm lɛɛbʋ ɖɔɖɔ sakɩyɛ. 20Peeɖe ɛtasɩ kɩwɛɛkɩm lɛɛbʋ labʋ. Ḿbʋ́ lɛ se eyebi pakpa Yohanɛɛsɩ ɛnʋ nɛ paɖʋ-ɩ salaka.
Yesu lɩm sɔʋ sɔnzɩ tɔm
(Mat 3.13-17; Mrk 1.9-11)
21Yohanɛɛsɩ labɩ ɛyáa tɩŋa payɩ lɩm sɔʋ sɔnzɩ nɛ pɩtɛ lɛ, Yesu wolo ɖɔɖɔ nɛ ɛlabɩ-ɩ-sɩ. Ɛtɛm-ɩ-sɩ labʋ lɛ, Yesu sɛɣ Ɛsɔ nɛ ɛsɔdaa tʋlɩ 22nɛ Fezuu Kiɖeɖeu lɩɩ kitiki ɛ-yɔɔ nɛ panaɣ-kʋ ɛzɩ halikuku yɔ. Peeɖe pʋyɔɔdʋʋnɩ ɛsɔdaa se: «Ña lɛ man-Pɩyalʋ kʋsɔɔlʋ, maahʋʋ ñɔ-yɔɔ kaʋ.»
Yesu liɖe tɔm
(Mat 1.1-17)
23Yesu kɛwɛnɩ ɛzɩ pɩnzɩ niidozo yɔ nɛ pʋcɔ ɛpazɩ ɛ-tʋmɩyɛ. Ɛyáa maɣzaɣ se ɛkɛ Yozɛɛfʋ pɩyalʋ. Yozɛɛfʋ ñɛkɛ Helii pɩyalʋ, 24Helii ñɛkɛ Mataatɩ pɩyalʋ, Mataatɩ ñɛkɛ Leevi pɩyalʋ, Leevi ñɛkɛ Mɛlkii pɩyalʋ, Mɛlkii ñɛkɛ Yanayi pɩyalʋ, Yanayi ñɛkɛ Yozɛɛfʋ pɩyalʋ, 25Yozɛɛfʋ ñɛkɛ Matatɩyaasɩ pɩyalʋ, Matatɩyaasɩ ñɛkɛ Amoosi pɩyalʋ, Amoosi ñɛkɛ Nahum pɩyalʋ, Nahum ñɛkɛ Eslii pɩyalʋ, Eslii ñɛkɛ Nagayii pɩyalʋ, 26Nagayii ñɛkɛ Maatɩ pɩyalʋ, Maatɩ ñɛkɛ Matatɩyaasɩ pɩyalʋ, Matatɩyaasɩ ñɛkɛ Semeyiini pɩyalʋ, Semeyiini ñɛkɛ Yozɛɛkɩ pɩyalʋ, Yozɛɛkɩ ñɛkɛ Yodaa pɩyalʋ, 27Yodaa ñɛkɛ Yoaanaanɩ pɩyalʋ, Yoaanaanɩ ñɛkɛ Reezaa pɩyalʋ, Reezaa ñɛkɛ Zorobaabɛɛlɩ pɩyalʋ, Zorobaabɛɛlɩ ñɛkɛ Salaatɩyɛlɩ pɩyalʋ, Salaatɩyɛlɩ ñɛkɛ Neerii pɩyalʋ, 28Neerii ñɛkɛ Mɛlkii pɩyalʋ, Mɛlkii ñɛkɛ Adii pɩyalʋ, Adii ñɛkɛ Koozam pɩyalʋ, Koozam ñɛkɛ Ɛlmaadam pɩyalʋ, Ɛlmaadam ñɛkɛ Ɛɛrɩ pɩyalʋ, 29Ɛɛrɩ ñɛkɛ Yesua pɩyalʋ, Yesua ñɛkɛ Eliyeezɛɛrɩ pɩyalʋ, Eliyeezɛɛrɩ ñɛkɛ Yoorim pɩyalʋ, Yoorim ñɛkɛ Mataatɩ pɩyalʋ, Mataatɩ ñɛkɛ Leevi pɩyalʋ, 30Leevi ñɛkɛ Siimeyɔɔ pɩyalʋ, Siimeyɔɔ ñɛkɛ Yuda pɩyalʋ, Yuda ñɛkɛ Yozɛɛfʋ pɩyalʋ, Yozɛɛfʋ ñɛkɛ Yonam pɩyalʋ, Yonam ñɛkɛ Eliyaakim pɩyalʋ, 31Eliyaakim ñɛkɛ Meleya pɩyalʋ, Meleya ñɛkɛ Mɛnaa pɩyalʋ, Mɛnaa ñɛkɛ Matataa pɩyalʋ, Matataa ñɛkɛ Naataɣ pɩyalʋ, Naataɣ ñɛkɛ Daaviidi pɩyalʋ, 32Daaviidi ñɛkɛ Yesee pɩyalʋ, Yesee ñɛkɛ Obɛɛdɩ pɩyalʋ, Obɛɛdɩ ñɛkɛ Boozi pɩyalʋ, Boozi ñɛkɛ Sala pɩyalʋ, Sala ñɛkɛ Naasɔɔnɩ pɩyalʋ, 33Naasɔɔnɩ ñɛkɛ Aminaadaabɩ pɩyalʋ, Aminaadaabɩ ñɛkɛ Admini pɩyalʋ, Admini ñɛkɛ Arnii pɩyalʋ, Arnii ñɛkɛ Ɛsrɔm pɩyalʋ, Ɛsrɔm ñɛkɛ Faarɛɛzɩ pɩyalʋ, Faarɛɛzɩ ñɛkɛ Yuda pɩyalʋ, 34Yuda ñɛkɛ Yakɔɔbʋ pɩyalʋ, Yakɔɔbʋ ñɛkɛ Izaakɩ pɩyalʋ, Izaakɩ ñɛkɛ Abraham pɩyalʋ, Abraham ñɛkɛ Taaraa pɩyalʋ, Taaraa ñɛkɛ Naacɔɔrɩ pɩyalʋ, 35Naacɔɔrɩ ñɛkɛ Seruuki pɩyalʋ, Seruuki ñɛkɛ Raagoo pɩyalʋ, Raagoo ñɛkɛ Faalɛɛkɩ pɩyalʋ, Faalɛɛkɩ ñɛkɛ Eebɛɛrɩ pɩyalʋ, Eebɛɛrɩ ñɛkɛ Sala pɩyalʋ, 36Sala ñɛkɛ Kayɩnam pɩyalʋ, Kayɩnam ñɛkɛ Arfaksaadɩ pɩyalʋ, Arfaksaadɩ ñɛkɛ Sem pɩyalʋ, Sem ñɛkɛ Nowee pɩyalʋ, Nowee ñɛkɛ Laamɛɛkɩ pɩyalʋ, 37Laamɛɛkɩ ñɛkɛ Matuusalaa pɩyalʋ, Matuusalaa ñɛkɛ Enɔɔkɩ pɩyalʋ, Enɔɔkɩ ñɛkɛ Yaarɛɛdɩ pɩyalʋ, Yaarɛɛdɩ ñɛkɛ Maleleyɛɛlɩ pɩyalʋ, Maleleyɛɛlɩ ñɛkɛ Kayɩnaɣ pɩyalʋ, 38Kayɩnaɣ ñɛkɛ Enɔɔsɩ pɩyalʋ, Enɔɔsɩ ñɛkɛ Sɛɛtɩ pɩyalʋ, Sɛɛtɩ ñɛkɛ Aɖam pɩyalʋ nɛ Aɖam lɛ weyi Ɛsɔ mawa yɔ.
Iliyochaguliwa sasa
Luka 3: KABI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia