GENESIS 11
11
An Tore nin Babilon
1Kaidto, saro sana an lengwahe kan mga tawo sa kinaban. 2Sa pagparalakaw kan mga tawo sa sirangan, nakaabot sinda sa sarong kapatagan sa daga kan Babilonia asin duman na sinda nag-erok. 3Nag-orolay-olay sinda, “Gumibo kita nin mga ladrilyo asin lutoon ta nin marahay.” Kaya nagkaigwa sinda nin mga ladrilyo embes na gapo asin aspalto embes na semento. 4Dangan nagsabi sinda, “Gumibo kita nin sarong syudad, na igwa nin tore na abot sa langit, tanganing mabantog kita asin dai magkasiriblag sa bilog na kinaban.”
5Naghilig an Kagurangnan tanganing hilingon an syudad asin an tore na ginibo kan mga tawo. 6Nagtaram siya, “An mga tawong ini nagkakasararo asin saro sana an saindang lengwahe; iyo ini an kapinonan kan saindang mga gigibohon. Dai mahahaloy magigibo na ninda an ano man na saindang mawoton. 7Magduman kita asin ribongon ta an saindang lengwahe tanganing dai na sinda magkasinarabotan.” 8Kaya iwinarak nin Kagurangnan an mga tawo sa bilog na kinaban asin binayaan kan mga ini an pagtugdok kan syudad. 9An syudad nginaranan Babilon,#9 BABILON: Sa Hebreyo Babel, na sa pandangog nakakaarog kan Hebreyong tataramon na Balal na an boot sabihon ribong. huli ta duman rinibong nin Kagurangnan an lengwahe kan gabos na tawo, asin hale duman iwinarak niya sinda sa bilog na kinaban.
An mga Kapagarakian ni Sem
(1 Mga Cro. 1:24-27)
10Iyo ini an mga kapagarakian ni Sem. Duwang taon pakatapos kan baha, kan sanggatos na an edad ni Sem, nagkaigwa siya nin aking lalaki na iyo si Arpaksad. 11Dangan nabuhay pa siya sa laog nin kinyentos na taon asin nagkaigwa pa nin ibang mga aki.
12Kan treynta y singkong taon na si Arpaksad, namundag an aki niyang si Sela. 13Dangan nabuhay pa siya sa laog nin kwatro syentos tres na taon asin nagkaigwa pa nin ibang mga aki.
14Kan treyntang taon na si Sela, namundag an aki niyang si Eber. 15Dangan nabuhay pa siya sa laog nin kwatro syentos tres na taon asin nagkaigwa pa nin ibang mga aki.
16Kan treynta y kwatrong taon na si Eber, namundag an aki niyang si Peleg. 17Dangan nabuhay pa siya sa laog nin kwatro syentos treyntang taon asin nagkaigwa pa nin ibang mga aki.
18Kan treyntang taon na an edad ni Peleg, namundag an aki niyang si Reu. 19Dangan nabuhay pa siya sa laog nin dos syentos nwebeng taon asin nagkaigwa pa nin ibang mga aki.
20Kan treynta y dos na an edad ni Reu, namundag an aki niyang si Serug. 21Dangan nabuhay pa siya sa laog nin dos syentos syeteng taon asin nagkaigwa pa nin ibang mga aki.
22Kan treyntang taon na an edad ni Serug, namundag an aki niyang si Nahor. 23Dangan nabuhay pa siya sa laog nin dos syentos na taon asin nagkaigwa pa nin ibang mga aki.
24Kan beynte y nwebeng taon na an edad ni Nahor, namundag an aki niyang si Tera. 25Dangan nabuhay pa siya sa laog nin syento dyes y nwebeng taon asin nagkaigwa pa nin ibang mga aki.
26Kan setenta na an edad ni Tera, namundag an mga aki niya na iyo si Abram, si Nahor asin si Haran.
An mga Kapagarakian ni Tera
27Iyo ini an mga kapagarakian ni Tera, na ama ni Abram, Nahor asin Haran. Si Haran iyo an ama ni Lot. 28Naenot na nagadan si Haran ki sa ama niyang si Tera, duman sa dagang namundagan niya, sa Ur kan Babilonia. 29Naagom ni Abram si Sarai asin naagom ni Nahor si Milca na aki ni Haran asin tugang ni Isca. 30Alagad baog si Sarai kaya dai siya nagkaaki.
31Kan maghale si Tera sa Ur kan Babilonia tanganing magduman sa Canaan, ipinag-iba niya si Abram na saiyang aki, an makoapo niyang si Lot na aki ni Haran asin an manugang niyang si Sarai; alagad kan makaabot sinda sa Haran, duman na sinda nag-erok. 32Nagadan si Tera sa Haran sa edad na dos syentos singkong taon.
Iliyochaguliwa sasa
GENESIS 11: BPV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Philippine Bible Society, New Testament © 1981, Bible © 1992