GENESIS 12
12
Inapod nin Dios si Abram
1Tinaraman nin Kagurangnan si Abram, “Bayaan mo an saimong daga, an saimong mga kadugo asin an harong kan saimong ama dangan magduman ka sa dagang ipapahiling ko saimo. 2Gigibohon takang sarong dakulang nasyon, bebendisyonan taka asin gigibohon kong bantog an saimong ngaran tanganing ika magin sarong bendisyon.
3Bebendisyonan ko an mga mabendisyon saimo,
Asin isusumpa ko an mga masumpa saimo;
Sa paagi mo, bebendisyonan ko man an gabos na nasyon sa daga.#3 sa paagi mo, bebendisyonan…daga; o mahagad sako an gabos na nasyon na bendisyonan ko sinda siring na benendisyonan taka.
4Kaya kan setenta y singko na an edad ni Abram, binayaan niya an Haran sosog sa itinaram saiya nin Kagurangnan; nag-iba saiya si Lot. 5Ipinag-iba ni Abram si Sarai na saiyang agom, asin an sobrino niyang si Lot patin an mga oripon na napasainda sa Haran; dara man ninda an gabos nindang pagsadiri. Dangan naglakaw sinda pasiring sa daga nin Canaan.
Pag-abot ninda duman, 6nagpadagos pa sa paglakaw si Abram sagkod na makaabot siya sa sagradong kahoy nin More, an banal na lugar sa Shekem. (Kaidtong panahon duman pa nag-eerok an mga Cananeo.) 7Nagpahiling an Kagurangnan ki Abram asin nagtaram saiya, “Iyo ini an daga na itatao ko sa saimong mga kapagarakian.” Kaya naggibo siya duman nin altar para sa Kagurangnan na nagpahiling saiya. 8Dangan nagpasiring siya sa mabulod na lugar sa sirangan kan Betel asin itinugdok an saiyang tolda sa pagultanan kan Betel na nasa solnopan asin kan Ai na nasa sirangan. Guminibo siya duman nin altar asin nagsamba sa Kagurangnan. 9Dangan nagpadagos sa paglakaw si Abram pasiring sa habagat na parte kan Canaan.
Si Abram sa Egipto
10Nagkaigwa nin gutom sa Canaan, asin makuring gayo an gutom duman, kaya nagpasiring sa Egipto si Abram tanganing duman ngona mag-erok. 11Kan malaog na siya sa Egipto, sinabihan niya si Sarai na saiyang agom, “Saro kang magayon na babae. 12Kun mahiling ka kan mga Egipcio, sasabihon nindang agom taka kaya gagadanon ninda ako alagad bubuhayon ka. 13Sabihan mo sindang tugang taka tanganing huli saimo magin marahay an pag-ako ninda sako asin dai ninda ako paggadanon.” 14Kan maglaog na si Abram sa Egipto, nahiling kan mga Egipcio na talagang magayon an saiyang agom. 15Nahiling man siya kan mga opisyal kan hade nin Egipto#15 Hade nin Egipto; o Faraon Kaidtong panahon, Faraon an apod sa hade nin Egipto. asin inosip ninda saiya na talagang magayon si Sarai, kaya dinara ninda ini sa palasyo. 16Huli ki Sarai, nagin marahay an pag-ako ki Abram kan hade. Tinawan siya kaini nin mga karnero, kanding, baka, asno, oripon asin kamelyo.
17Alagad huli ta kinua kan hade si Sarai, siya asin an mga yaon sa saiyang palasyo pinadarahan nin Kagurangnan nin mga makangirhat na helang. 18Kaya ipinaapod kan hade si Abram asin hinapot, “Ano ining ginibo mo sako? Tano ta dai ka nagtaram na agom mo an babaeng ini? 19Tano ta nagsabi kang tugang mo siya, kun kaya kinua ko siya na magin agom ko? Uya an agom mo; kuaha siya asin hale na kamo!” 20Nagboot an hade sa mga tawohan niya manongod ki Abram, kaya pinahale ninda ini sa Egipto kaiba an saiyang agom asin an gabos niyang rogaring.
Iliyochaguliwa sasa
GENESIS 12: BPV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Philippine Bible Society, New Testament © 1981, Bible © 1992