Soma Biblia Kila Siku 12Mfano

Kabla Yesu hajaja, waumini huhitaji faraja na maonyo juu ya kusimama imara katika imani (ni maonyo hayo yaliyoandikwa katika 2:13-3:15). Imani isiyolegea yawezekana tu tunapolishika Neno la Mungu, tukikubali kuipenda ile kweli. Maana kwa njia hiyo Mungu hutuita tuwe watu wake (m.14: Aliwaitia ninyi kwa injili), hututakasa (m.13: Mungu amewachagua tangu mwanzo mpate wokovu, katika kutakaswa na Roho. Hulingana na Yesu alivyoomba katika Yn 17:17, Uwatakase kwa ile kweli; neno lako ndiyo kweli), hutupa tumaini jema, na kutufariji (m.16-17: Mungu Baba yetu, aliyetupenda akatupa faraja ya milele na tumaini jema, katika neema, awafariji mioyo yenu, na kuwafanya imara katika kila neno na tendo jema). Hivyo tutaimarika kiimani, na maisha yetu yote ya kila siku yatashuhudia neema na wema wake Mungu. Tafakari pia aya hizi zinavyomshuhudia Paulo. Ndiye mfano mzuri wa neno katika 1 The 5:17 linalosema, Ombeni bila kukoma.