Soma Biblia Kila Siku 11/2020Mfano

Bwana Yesu atakasa hekalu. Kwa tendo hilo, twaona kama kwa njia ya mfano kazi yake ya kutakasa mioyo ambayo ni hekalu la Roho Mtakatifu. Akemea uovu, na kutangaza utakatifu unaotarajiwa kwa waitwao kuwa wake. Awapa vipofu nuru kuonyesha awezavyo kufumbua watu macho ya rohoni, wamfahamu yeye na mapenzi yake. Awatia nguvu wasiojiweza kwa jinsi ileile atutiavyo nguvu na uweza kumtumikia. Na kama hatumzalii matunda atangaza hukumu (Yn 15:16, Si ninyi mlionichagua mimi, bali ni mimi niliyewachagua ninyi; nami nikawaweka mwende mkazae matunda; na matunda yenu yapate kukaa; ili kwamba lo lote mmwombalo Baba kwa jina langu awapeni). Mwisho, afundisha wanafunzi uweza ule atakaowavika wote watakaomwamini (Yn 14:12, Amin, amin, nawaambieni, Yeye aniaminiye mimi, kazi nizifanyazo mimi, yeye naye atazifanya; naam, na kubwa kuliko hizo atafanya, kwa kuwa mimi naenda kwa Baba).