Luka 11
11
1KOKO ayoonde nd’itenel’imo, ko aki’nd’osizaka, omo owa bakimi’akae aolokela, Nkolo, otolak’iso wae toonde mbaonda, ngoki Yoane olakaka bakimi’akae. 2Ko aolakela, A iny’oonda, lokela, Fafa ekiso [ole nda loola], kela lina likawe limemyame. Kela likulaka likawe liye. [Kela wango bokawe bokelame nd’okili elenge ekelama boko nda loola.] 3Otokaya toma tokiso ta wengi mbile. 4Ko ototungole lima baoyi’obe bakiso, el’iso totungola iy’auma bale l’embale l’iso. Ko tototombake nda lomeko, [lolo ototungole lim’ele Ow’obe].
5Ko aolakela, Nkina bont’om’okinyo aata lilongo; ko aocwa el’ende nd’onkeke w’otso, ko aolokela, Lilongo, onsombya mampa isato, 6la ncina wae lilongo likami aoya el’emi lima lokendo, ko mpa la toma to em’olekez’ende; 7ko ende aolamba lim’etei, aokela, Tontumolake; ekuke ekombi, ko bana’akami bale l’emi nda ntange; afoonge wae mbetswa okoka. 8Nsangel’inyo, Mpeka la afaetswa oka nd’ewela wae ende ale lilongo likae, lolonde nd’ewela ea loncinji lokae, ifoetswa, ko ifoka toma touma tondel’ende. 9Ko nsangel’inyo, Luola, ko ifokaem’el’inyo; lasa, ko lifotana; lokunda, ko ifokombwa el’inyo. 10Ele wengi’onto onduola ifamba, ko ondasa ifena, ko ifokombwa el’ende okunda. 11Nkina bona ow’onto alomb’ise ioko, ise ifoka ende ekenje nde? ko nkin’ende alomb’ise nse, ifoka ende njwa nd’eloko ea nse nde? 12Ko nkin’ende alomb’ise bokele, ifoka ende nkoto nde? 13Nkin’inyo, bant’obe, lea lokaya bana’akinyo nganji y’olotsi, Ise ekinyo ole nda loola afolekola lokaya iyo baond’ende Bolimo w’olotsi nde?
14Ko ayoza demona ea lokisi. Koko aki demona oolaka, bonto owa lokisi aotefela, ko banto ba etukuluku baokamwa. 15Lolonde bamo baokela, Ende ozaka bademona la Balazebuba, bokulaka owa bademona. 16Ko bamo baolasa lotaza lokande lima loola, wae bomeke. 17Lolonde ende aolea nkai ikiyo, ko aolakela, Wengi likulaka likafwana likomongo jomelengana: ko ilongo ikangwana l’ikomongo ifosila. 18Ayaka Satana aooza Satana, ende ayakangw’omongo, ko likulaka likande limonga ngamo? el’inyo lokela wete njozaka bademona la Balazebuba. 19Ayaka ndoza bademona la Balazebuba, bana’akinyo baoza la na? Nd’ewel’eko, iyo bifoyalema juges bakinyo. 20Lolo ng’emi ndoza bademona la bosai wa Nzakomba, wae likulaka ja Nzakomba joy’el’inyo. 21Wenaka bonto owa mpamba la bifeko nsatela aesanya ilombe ikae, baumba’akae bale o ko; 22lolo wenaka omo olekol’ende la mpamba aoy’el’ende, ko aoloumba, ifolofonola bifeko bikae bi’etumba biuma biki’nd’oilaka botema, ko ifokafa baumba baki’nd’ofongaka. 23Ende of’el’emi aonsuk’isuki: ko ende otatakanyaka l’emi afalanganyaka. 24Aki demona ea linyamo oole lim’el’onto, oko ayolande nd’okili wa kotukotu, ayase jomo, lolo afene. Ko akela, Njute nd’ilombe ikami iki’mi wolaka; 25ko aki’nd’okit’eko, atan’iko o mpampa, ioombama, ko iotandema. 26Lim’ako aocw’okol’el’ende mongo bademona bamo nsambo bandekol’ende la bobe; bako baolotswa, ko baoyal’eko; ko elenge ea bont’oko ea nsukela eolekola eki joso la bobe.
27Koko aki’nde otefele baoyi’ako, bomot’omo aobeleza lim’etukuluku, aolokela, Likunju likootaki, ko l’aele bakolomyaki baosakema l’okako wa swa. 28Lolo aokela, Onde, lolo banto bandoka joi ja Nzakomba, ko bafonga liko baosakema l’okako boleki.
29Ko aki banto ba etukuluku otakana el’ende, aanga lokela, Eotswelo ene el’eotswelo e’obe; iyo bayase lotaza; ko lotaza lofaokaema el’iyo, imola nko lotaza loki Yona. 30Ele Bona ow’onto ifoyalema lotaza el’eotswelo ene, ngoki Yona oyalemaka lotaza ele Ba-Ninewe. 31Bokulaka ow’omoto owa roi owa sud ifemala nd’etenelo e’akambo la banto b’eotswelo ene, ko ifaumba; eki’nd’oyaka lima nsukela e’okili wae okoza baoyi ba wanya ba Solomona; ko bala, ondekola Solomona al’ane. 32Banto ba Ninewe bifemala nd’etenelo e’akambo la banto ba eotswelo ene, ko bifaumba; ek’iy’oututalaka baoyi’obe la lilako ja Yona: ko bala, ondekola Yona al’ane.
33Aambol’onto itswa, afil’iko nda lifoku, la nd’ase b’eoko, lolonde aolil’iko nd’ilelo, wae iy’andotsw’eko bene fole. 34Itswa ya jonge ile liso; nd’ewel’eko, ayaka liso likawe joyalema senzelele, jonge likawe liuma lifofolala. Lolo nkina liso likawe lile bobe, jonge likawe liuma lile wae wilima mongo. 35Nd’ewel’eko, loalaka, nyango fole ele nd’etei ekinyo efoyale wilima. 36Ayaka jonge like liuma likama la fole, nk’itenela ya wilima iciki, lifoyala jonge liuma fole, o ngol’itswa ingesa, iokofolaza we fole.
37Nk’atefel’ende, Bofalusi omo aoloeta wae ale toma l’ende; ko aolotswa, ko aokit’ase nda mesa ea toma. 38Ko aki Bofalusi oenaka wete ntok’asi nda joso ja toma, aokamwa la joi liko. 39Ko Nkolo aolokela, Inyo Bafalusi lofetola bafeka b’ekala la ba lokongo; lolonde nd’etei ekinyo lokama l’ekembi la baoyi’obe. 40Inyo belole, ondemaki bafeka, ntemaki etei o ngoko nde? 41Lolo lolekya baoyi bale nd’etema’ekinyo nganji ya liota, ko bala, baoyi’auma bafetswa el’inyo.
42Lolo elo el’inyo Bafalusi! el’inyo lolekya minti la lu ko la njunda iuma nda mpoji, ko lofenda etenelo e’akambo ea ci, l’eefe ea Nzakomba: sik’inyo lotokela baoyi’ane, ko ntalotocika bankina nk’okela. 43Elo el’inyo Bafalusi! el’inyo lolanga mbata ya joso nda basunagoga, la biuo bia nsambela nda totenela ta bisombe. 44Elo el’inyo! el’inyo lole ngole beomba befenya, ko banto bamatel’eko bafea wae bel’eko.
45Ko om’owa batefeji ba bisekyelo aolamba, aolokela, Bolaki, atefela we joi line, otofel’iso o ngoko. 46Ko aokela, Elo el’inyo, batefeji! el’inyo lotombya banto belito mongo beleki eefe nda ntatomba, ko inyo mongo lofofomwa belito l’osai’okinyo’omoko. 47Elo el’inyo! el’inyo lotonga tolombe ta nkakunda ea bateli bawei, ko baise’akinyo baolaoma. 48La ngoko inyo lole wae temoins, ko lolimeza beketo beki baise’akinyo: ek’iy’oomaka bateli, ko inyo lotonga tolombe tokiyo ta nkakunda. 49Nd’ewel’eko, wanya wa Nzakomba bokela, Njifatomel’iyo bateli la bikima; ko bifooma bam’akiyo, ko bifonyokol’ankina, 50wae likambo ja balongo b’ateli bauma bandutelaki lim’iango y’okili lifofotama ele banto b’eotswelo ene; 51lim’alongo b’Ebele elaka nk’alongo ba Zekalaya, oomamaki ndatsa nkinda ea mbeka l’itenela ibuzama nd’oeko; onde, nsangel’inyo, bako bifofotama el’eotswelo ene, 52Elo el’inyo, batefeji! el’inyo lotombaki nsete ea wanya; ntalotswa inyo mongo, ko losukaki iy’andotswaki.
53Ko aki’nd’oimane lim’eko, bakoci b’enkanda l’afalusi baanga lokam’el’ende la bolo, baolotumola wae atefele baoyi’auke; 54ko baoloonga la jongo, wae boat’ende la joi limo lim’omwa bokae.
தற்சமயம் தேர்ந்தெடுக்கப்பட்டது:
Luka 11: NTMN58
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bonkanda Wa Nzakomba W’aeyoko © Aliiance Biblique de la RD Congo, 1958.