Ləwke 3
3
Ghena nya zlapete Zhaŋe Batiste
(MAT 3.1-12; MRK 1.1-8; ZHŊ 1.19-28)
1Te kwa meŋe mcɛfeghəmbe ta va ta Sɛzar Tibɛre mbe meghe, nya nza Ponse Pilate kaŋgwamna te hɛɗia Zhəwdɛ, Hɛrode kameghe te hɛɗia Galilɛ, wəza meghekɛa Filipe kawəndə nya te ghəa Itərɛ ba'a Trashonitide, Lizaniyas kameghe nya mbe Abilɛne, 2te və nya nza yɛ Ane le Kayife kambelia jama ta ka dzeghe Shala ne, pa Shala gezete nda ghena ke Zhaŋe, wəzege ta Zakari kwamte te ɓerama. 3Ntake Zhaŋe kadzasle hɛɗi nya dzeyi mɛa Zhəwrdɛŋe. Ma ke sha zlape nda ghena ke mbeli: «Zhɛre mə nza ta ŋayɛ yitea mene ŋayɛ batɛme mbeli, katekele jaɗafa ta ŋayɛ Shala te wənə.» 4Kwa nza ŋkɛ ma ke rafete geva mbe palepa ta Ɛzayi, nde mɛ ŋkwa:
«Ma ke kwete wəndə sha zlape ghena kwamte te ɓerama:
Hele nda mə hweŋkwa ke Mahwətə,
hi nda mə yɛ hweŋkwa tiɗiɗia tiɗiɗia.
5Katezhiɓə geva yayata zlərə,
Katenza yayata ghweme ba'a yayata wəmbə kaŋwela.
Katenza hweŋkwa nyi mendale mendale tiɗiɗi tiɗiɗi.
Katezhɛre hweŋkwa nyi kebeze beze ɓerayɛ ɓerayɛ.
6Tagha gɛ, katenewe mbele ŋkwa ta Shala mbeli pɛtɛ.»
7Kwele kwele mbeli nyi kese sha Zhaŋe kezha mene batɛme. Ma ke sha hɛ: «Ŋwalea mentsape, wa nde tekete ŋayɛ wərə yɛ kambele va hwepe wənə ta Shala wa? 8Mene mə wəshi nyi kenza kancɛte nahe yɛ kezhɛrete nza ta ŋayɛ kaganda. Dambeghəma ŋayɛ yɛ kageze: Nahe Abraham kenza kashia n'yɛ, pe yɛ ma. Kaganda ne, ma 'ya sha gheyɛ: wərə Shala kazhɛrete pelɛ nyi kaka shihɛnyɛa Abraham. 9Wa nya tseyɛ nya te slərəa wəfe kezha tsasle, yayata wəfe nya keɗema kaya ndeɗekə ne, katetsasle ŋkɛ mbeli kadzemɛa ghwə.»
10Ma ke mbeli 'yɛwete va Zhaŋe: «Wa wəsə nya hi n'yɛ kamene wa?» 11Ma ke sha hɛ: «Ma wəndə nya nza lekwesa bake ve ne, nta nda ŋkɛ kenya ɗema nde ve. Ma wəndə nya nza wəshi kezeme ve ne, neheve ŋkɛ le kweci mbeli.» 12Pa le ka tsehe jaɓeregwale kese sha Zhaŋe kezha mene batɛme, ma ke hɛ shɛ: «Nde sleke n'yɛ, wa yahi n'yɛ kamene wa?» 13Ma ke sha hɛ: «'Yɛwema wəsə yɛ za ma ke nya sləyi yɛ ma.» 14Ma ke ka sewajɛ 'yɛwakɛ ve perə: «Take ghen'yɛ, wa wəsə nya hi ghen'yɛ kamene wa?» Ma ke sha hɛ: «Mba yɛ kezləgwə cɛdɛa wəndə le berete ba'a le mbəɗəkwə, ama zlama mə te wəsə nya ŋki ŋayɛ mbeli.»
15Pɛtɛ mbeli nyi ketsenete geva kaneghe. Ma ke hɛ sha zəzə mbe wənəa nci: «Ya kwete nahe Zhaŋe kenza kaMɛsi na?» 16Ma ke Zhaŋe sha hɛ pɛtɛ: «Ma 'ya ne, le yɛmə mene ŋayɛ batɛme 'ya. Ama wəndə nya berete ma ke 'ya nde se tsetsenya, kenza 'ya wərə kawəndə nya kepele zewe nyi mbe tsahwa ta ŋkɛ we. Ma gheŋkɛ le ŋa ŋkɛ ne, le Sefəa Shala ba'a ghwə temene ŋayɛ batɛme ŋkɛ. 17Yitea dzeve 'yɛmbe ve kezha mehe ha. Katetsene ha ŋkɛ kwa tame ta ŋkɛ, katendə cɛkəvə ŋkɛ le ghwə nya keɗema kamte kaghala ghala.»
18Le kweci ntsehwele kwele kwele gezete nda Ghena kwatenca nya ganyɛ Zhaŋe ke mbeli. 19Ama nahe Zhaŋe keŋelete ŋgwamna Hɛrode va nya wəmehwe Hɛrodiyade, male ta menənyɛ ŋkɛ ba'a va jaɗafa nyi kwele kwele nyi menete ŋkɛ. 20Pa Hɛrode menete jaɗafa nya za ma ɓiyitsa: pa veyi Zhaŋe kwa daŋgayɛ.
Zhaŋe kamene nda batɛme ke Yɛsə
(MAT 3.13-17; MRK 1.9-11)
21Ma kwa menete nda batɛme Zhaŋe ke mbeli pɛtɛ ne, pa ŋkɛ menete nda ke Yɛsə perə. Ma vəa ŋkwa nya səkwə ghə Yɛsə ne, pa ŋkwa nya pelɛ ghweme ghwenemte geva. 22Pa Sefəa Shala sawa kala gheɗepe kadzeghəa Yɛsə. Ma ke ghena gezete geva sawa pelɛ ghweme: «Gha ya kaWəzege ta ɗa, kazlama 'ya te gha kwele kwele.»
Ka shihɛnyɛa Yɛsə
(MAT 1.1-17)
23Gare mahekenemsə va ta Yɛsə nda ghate slene ta ŋkɛ ŋkɛ. Ma zəzə mbeli ne, nahe ŋkɛ kenza kawəzege ta Zhozɛf, wəzege ta Ɛli, 24wəzege ta Matat, wəzege ta Lɛvi, wəzege ta Mɛlki, wəzege ta Janay, wəzege ta Zhozɛf, 25wəzege ta Matatiyas, wəzege ta Amos, wəzege ta Nahəwm, wəzege ta Ɛsli, wəzege ta Nagay, 26wəzege ta Ma'at, wəzege ta Matatiyas, wəzege ta Sɛmɛyin, wəzege ta Zhozɛk, wəzege ta Zhoda, 27wəzege ta Yohanan, wəzege ta Rɛza, wəzege ta Zorobabɛl, wəzege ta Shɛyaltiyɛl, wəzege ta Nɛri, 28wəzege ta Mɛlki, wəzege ta Adi, wəzege ta Kosam, wəzege ta Ɛlmadam, wəzege ta Ɛr, 29wəzege ta Yɛshəwa, wəzege ta Ɛliyɛzɛr, wəzege ta Zhorim, wəzege ta Matat, wəzege ta Lɛvi, 30wəzege ta Simɛyon, wəzege ta Zhəwda, wəzege ta Zhozɛf, wəzege ta Zhonam, wəzege ta Ɛliyakim, 31wəzege ta Mɛlɛya, wəzege ta Mɛna, wəzege ta Matata, wəzege ta Natan, wəzege ta David, 32wəzege ta Zhɛsɛ, wəzege ta Obɛd, wəzege ta Bowoz, wəzege ta Sala, wəzege ta Nashon, 33wəzege ta Aminadab, wəzege ta Admin, wəzege ta Arni, wəzege ta Hɛsron, wəzege ta Pɛrɛs, wəzege ta Zhəwda, 34wəzege ta Zhakob, wəzege ta Izak, wəzege ta Abraham, wəzege ta Tɛra, wəzege ta Nahor, 35wəzege ta Serəwg, wəzege ta Rɛwə, wəzege ta Pɛlɛg, wəzege ta Ɛbɛr, wəzege ta Shɛla, 36wəzege ta Kɛnam, wəzege ta Arpaksad, wəzege ta Sɛm, wəzege ta Nowɛ, wəzege ta Lɛmɛk, 37wəzege ta Matəsalɛm, wəzege ta Ɛnok, wəzege ta Yɛrɛd, wəzege ta Malalɛyɛl, wəzege ta Kɛnam, 38wəzege ta Ɛnos, wəzege ta Sɛt, wəzege ta Adam, wəzege ta Shala.
தற்சமயம் தேர்ந்தெடுக்கப்பட்டது:
Ləwke 3: BEK12
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
La Bible en langue Kapsiki avec les livres deutérocanoniques © Alliance Biblique du Cameroun 2012.