YAPHANG 1
1
Chengmani kóktma
1Yaphango Kaitor nokharok tei hayungno snam kha.#1.1. Yaphango ... hayungno: Eba yaphango Kaitor hayungno snam kha, eba Kaitor hayungno snamna cheng phuru. 2Hayung mungsa goron kwrwi bukcha tongma se, hakhe twi kuthuk khe mwnak koboljak; tei twirokni saka-o khe Kaitorni Phola#1.2.Kaitorni phan: Eba Kaitorni phola, eba Kaitorni aroni nokbar; eba kirimasingcha nokbar. birkitingwi tongmani. 3#2Ko 4.6.Hakhe Kaitor “Pohor wng di” hwnwi sa kha, hakhe pohor wng kha. 4Tei Kaitor nuk kha a pohor kaham. Hakhe Kaitor pohor bai mwnakno swkak kha. 5Kaitor pohorno sal tei mwnakno khe hor hwnwi mung phar kha. Omo hai khe hor wng kha tei phung ai kha. Omo hai khe salsa wng kha.
6 #
2Pi 3.5. Hakhe Kaitor hai hwnwi sa kha, “Twirokno khakna bagwi twirokni kwcharo kaisa bukcha wng thung.” 7Hakhe Kaitor twirokno swkagwi o bukchani saka-o kaisa tei kháma-o kaisa khlai kha. Hakhe abo hai’-no wng kha. 8Kaitor o bukchano khe nokha hwnwi mung rw kha. Sal thángwi phung ai kha tei salnwini sal wng kha.
9Hakhe Kaitor hai hwnwi sa kha, “Nokharokni twirok kwrẃngsa-o khe thumjak thung tei hakung nukjak thung.” Hakhe ahai’-no wng kha. 10Kaitor o ha kwranno khe Hakung tei twi thumjakrokno khe Twijlangrok hwnwi mung phar kha. Hakhe Kaitor nuk kha, abo kaham. 11Hakhe Kaitor hai hwnwi sa kha, “O ha-o bebak samrok, bwchlwi gwnang samphangrok tei bwthái tháinai buphangrok achai thung.” Hakhe abo hai’-no wng kha. 12Hakhe o hayungo dal-bidal samrok, bwchlwi gwnangrok tei bwthái tháinai buphangrok wng kha tei sak sakni mangduk na kha. Hakhe Kaitor abórokno kaham nuk kha. 13Hakhe hor wngwi phung ai kha tei salthamni sal wng kha.
14Hakhe Kaitor hai hwnwi sa kha, “Nokhani bukcha-o sal bai horno swkakna bagwi pohor kaisa wng thung tei marini bagwi jorarokni bagwi salrok tei bisirokni bagwi 15tei ha saka-o pohor rwna bagwi nokha-o pohor wng thung.” Hakhe abo hai’-no wng kha. 16Hakhe Kaitor pohor kotor kainwino snam kha. Pohor kotor kaisa khe salni bagwi tei kaisa lem pohor khe horni bagwi; bo athukiriroknobo snam kha. 17Bo a pohorrokno ha saka-o pohor wngna bagwi tei nokha saka-o khe ton kha, 18tei abórokno sal tei horno tẃina bagwi tei pohor bai mwnakno swkakna bagwi ton kha, hakhe Kaitor abórokno kaham nuk kha. 19Hor thángwi phung ai kha tei salbrwi sal wng kha.
20Hakhe Kaitor hai hwnwi sa kha, “Twi-o hámung sini ya langma gwnang malrok bai kupulung wng thung tei nokha-o khe birnai tokrok kupulung wng thung.” 21Hakhe Kaitor twijlangni mal kotorrokno tei bebak twi-o tongnai langma gwnangrokno snam kha tei hámung sini ya birnai tokrokno snam kha. Hakhe Kaitor abórokno kaham nuk kha. 22Hakhe Kaitor bórokno hamari rwui hai hwnwi sa kha, “Er di tei bángwi twijlangni twirogo supung di tei tokrokbo ha saka-o er thung.” 23Hakhe hor wngwi phung ai kha tei salbani sal wng kha.
24Hakhe Kaitor hai hwnwi sa kha, “O ha saka-o bebak juda juda langma gwnang mal-matarok: Yabrwirok, ha-o malwi himnairok wng thung” hakhe abo hai’-no wng kha. 25Kaitor hayungni yabrwi mal-matarokno sak sakni sak-mang rwui bebak ha-o tongnairokno tei malwi himnairokno snam kha. Kaitor nuk kha abo kaham.
26 #
1Ko 11.7. Hakhe Kaitor hai hwnwi sa kha, “Phai di chwng bai kosol khe borokno snamnai. Chwng omo hai khe snamnai; twini árok, nokha-o birnai tokrok tei nokni, bolongni#1.26: nokni tei bolongni: Kaisa kwcham kók séma-o mal-mata, rimani tei bolongni; Hibru-o khe rimani mal-mata tei bebak ha. bebak yabrwi mal-matarok tei malwi himnairokni saka-o bórokni suar tongnai.” 27#Mat 19.4; Mar 10.6.Hakhe Kaitor borokno bono kosol khe snam kha, chwla tei bwrwi khe bórokno snam kha. 28#Yap 5.1-2.Tei Kaitor hamari rwui bórokno hai hwnwi sa kha, “Er di tei báng di, ha-o kupulung khlai di tei bórokno yapha-o ton di; phiya twijlangni árok tei nokhani toksa-toktẃirok tei ha saka-o tongnai langma gwnangrokno kók khna rwui ton di.” 29Hakhe Kaitor hai hwnwi sa kha, “Nai di ang o ha saka-o tongma bebak bwchlwi gwnang buphang-uáphangrok tei bwthái tháinai bebak buphangrokno, nini chámungni bagwi rw kha, abórokno nwng chá di. 30Ha sakani bebak malrok nokhani bebak toksa-toktẃirok, ha sakani bebak malnairok tei bebak rangma gwnangrokno ang bórokni chámungni bagwi bebak sam kwkhrangrokno rw kha.” Hakhe abo hai’-no wng kha. 31Hakhe Kaitor bo snamma bebak manwirokno naisigwi nai kha tei abórokno belai’-no kaham nuk kha. Hakhe sal tháng kha tei phung ai kha tei saldokni sal wng kha.
தற்சமயம் தேர்ந்தெடுக்கப்பட்டது:
YAPHANG 1: KOKBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.