San Juan 6
6
Jesús okitlakualtij makuijli mil tlakatl
(Mt. 14.13-21; Mr. 6.30-44; Lc. 9.10-17)
1Sakin ijkuak ijkon yonochiu, Jesús oyaj ipan okse ilado on mar itoka Galilea yejuan no itoka Tiberias. 2Sanoyej miyek tlakatl yaya iuan, pampa yokitakaj on milagros* yejuan okichiu ika okimpajtij on kokoxkej. 3Kemaj Jesús otlejkok ipan sen tepetl niman ompa onotlalij iuan inomachtijkauan*. 4Ipan on tonaltin ye nisiu katka para on hebreos* kichiuaskej on iluitl itoka Pascua*. 5Niman Jesús okitak iyeualkan ika miyek tlakatl kinisiuiyaya. Yejua ika okijlij Felipe:
—¿Kanon tikouaskej tlakuajli para nochimej in tojlamej?
6Jesús kuajli kimatstikatka tlinon kichiuas, pero yejua ijkon okijlij san para kitas tlinon kijtos Felipe. 7Niman Felipe okijlij:
—Se tlakatl noneki tekitis kanaj ome ciento tonaltin para uelis kouas pan para nochimej in tojlamej. Maski Ijkon kichiuaskia xkajxilis nion siquiera para cada se kikuas se pitentsin.
8Kemaj Andrés, yejuan semej on inomachtijkauan niman yejuan ikniu Simón Pedro, okijlij:
9—Nikan nemi sen tlakakonetl yejuan kipiya makuijli pan tlachijchitli ikan cebada niman ome michintsitsimej. Pero ¿tlinon kijtojtikaj in achijtsin tlakuajli para in miyek tlakatl?
10Kemaj Jesús okijlij:
—Xkimijlikan ma noseuikan nochimej.
Ne kampa nemiyaj onkatka miyek sakatl niman ompa onotlajtlalijkej. On tolamej katkaj kanaj makuijli mil tlakamej. (On siuamej xteuan okimpojkej.) 11Kemaj Jesús okontilan on pan niman, ijkuak yokimakak tlaxtlauijli Dios, okinmakak on inomachtijkauan*, niman on nomachtijkej* okinxelouilijkej nochimej on yejuan ompa yejyeuatikatkaj. Sano ijki okichiu ika on michimej niman nochimej yejuamej otlakuajkej san kech kinekiyaj. 12Ijkuak yoixuikej, Jesús okinmijlij on inomachtijkauan*:
—Xsentlalikan nochi on tlen onokau para maka itlaj ma ixpoliui.
13Ijkon tej, okisentlalijkej on tlatlajkotsitsin yejuan onokau itech on makuijli pan tlachijchijtli ikan cebada niman okitemiltijkej majtlaktli uan ome chikiutin. 14Kemaj ijkuak on tlakamej okitakej on milagro yejuan Jesús okichiu, okijtojkej:
—Melauak in yejua tiotlajtojketl yejuan ye onkatka para uajlaskia ipan in tlaltikpaktli.
15Kemaj Jesús okimat ika kinekiyaj kasiskej para kalaktiskej inrey. Yejua ika, oksejpa onejkuanij niman iselti oyaj ipan on tepetl.
Jesús onejnen ipan mar
(Mt. 14.22-27; Mr. 6.45-52)
16Ijkuak otlayouak on inomachtijkauan* Jesús otemotoj itech on mar. 17Niman otlejkokej ipan sen barco niman opeu kipanauiyaj on mar para ajsiskej ne Capernaúm. Ye tlayoua katka niman Jesús sanken* xe uajlaya intech. 18Niman opeu chikauak ajaka, niman tejmotij koxoniya on mar. 19Niman ijkuak yokinejnenkej kanaj makuijli noso chikuasen kilómetros, okitakej Jesús nejnentiu ipan on atl niman ye kinisiuijtiaya on barco. Niman yejuamej onomojtijkej. 20Pero yejua okinmijlij:
—¡Nejua niJesús, maka xmomojtikan!
21Kemaj, yejuamej ikan paktli okiselijkej ipan on barco, niman sa okitakej yoajsikej ne atlatenko kampa yayaj.
On tlakamej okitejtemojkej Jesús
22Uajmostla, on tlakamej yejuan onokajkaj ipan on okse itenko on mar okimatkej ika on nomachtijkej* oyajkej ipan on san ika nochi barco yejuan ompa nemiya, niman ika Jesús xinuan oyaj. 23Pero saniman oyejkokej sekimej barcos yejuan oualejkej ipan on ueyikalpan itoka Tiberias. Yejuamej oyejkokej ne kampa nisiu okuajkej on pan ijkuak toTEKO okimakak tlaxtlauijli Dios. 24Niman ijkuak on tlakamej okitakej ika xompa nemiya Jesús nion inomachtijkauan*, okalakkej impan on barcos niman oyajkej okitejtemotoj ne Capernaúm.
Jesús sano yejua pan yejuan kitemaka nemilistli para nochipa
25Ijkuak on tlakamej oajsikej ipan on okse ilado on mar, okinextitoj Jesús, niman okitlajtoltijkej:
—Temachtijketl, ¿kamanon otejkok nikan?
26Pero Jesús okinmijlij:
—Ika tlen melauak nemechijlia nemejuamej nennechtejtemouaj xpampa onenkajsikamatkej tlen kijtosneki on milagro yejuan onikchiu yaloua ijkuak onemechtlakualtij, yej san pampa onentlakuajkej hasta kampa onemixuikej. 27Maka xtekitikan ipampa on tlakuajli yejuan saniman tlami, yej xtekitikan ipampa on tlakuajli yejuan kisa itech Dios yejuan kitemaka nemilistli para nochipa. Nejua yejuan oninochiu Tlakatl nemechmakas in tlakuajli pampa noTajtsin onechmakak tlanauatijli para ijkin nikchiuas.
28Kemaj okitlajtoltijkej:
—¿Tlinon noneki tikchiuaskej para tikchiuaskej on tlajtlamach* yejuan Dios kineki ma tikchiuakan?
29Niman Jesús okinmijlij:
—On tlen Dios kineki xchiuakan sano yejua in: Xnechneltokakan nejua yejuan onechajtitlan.
30Niman kemaj ijkin okitlajtoltijkej:
—¿Tlen tlamauisojli titechititis para ijkuak yotikitakej timitsneltokaskej? ¿Tlinon tej, tikchiuas? 31On Yektlajkuilojli kijtoua ika ne xalpatlajkan on toachtojtajuan okuajkej on maná. Ijkin tej, kijtoua on Yektlajkuilojli: “Dios okintlakualtij ika on pan yejuan ne iluikak ualeua.”
32Jesús okinmijlij:
—Ika tlen melauak nemechijlia: Moisés xejua okitemakak on pan yejuan ualeua iluikak. Yej noTajtsin yejua kitemaka on pan yejuan melauak ualeua iluikak. 33On pan yejuan Dios kitemaka sano yejua on pan yejuan ouajtemok de ne iluikak niman kinmaka nemilistli on tlaltikpaktlakamej.
34Kemaj okijlijkej:
—ToTEKO, nochipa xtechmaka on pan.
35Niman Jesús okinmijlij:
—Nejua nipan yejuan kitemaka nemilistli. Yejuan notech uajlau xkaman apismikis, niman yejuan nechneltokas xkaman amikis. 36Pero ken nejua yonemechijlij, nemejuamej xnennechneltokaj maski yonennechitakej. 37Nochimej on kech nechinmakas noTajtsin uajlaskej notech, niman on yejuan uajlaskej notech nikinselis. 38Ijkin nikchiuas pampa nejua oniualeu iluikak xpara nikchiuas tlen nejua nikneki, yej para nikchiuas on tlen kineki on yejuan onechajtitlan. 39Niman noTajtsin yejuan onechajtitlan xkineki nikpolos nion se on yejuan onechinmakak, yej ipan on sa ika nochi tonajli ma nikinyoliti niman ma nikinketsteua ipan intlalkon. 40Yejua kineki para nochimej on yejuan kimatij akin nejua yejuan niiKoneu Dios niman nechneltokaj, ma kipiyakan nemilistli para nochipa. Niman nejua nikinyolitis niman nikinkuiteuas ipan intlalkon ipan on sa ika nochi tonajli.
41On hebreos* opejkej tlamach xkuajli kijtouiliaj Jesús pampa ijkin okijtoj: “Nejua nipan on yejuan ne iluikak oniualeu.”
42Niman okijtojkej:
—¿Tlen in xejua Jesús, on ikoneu José? Tejuamej tikixmatij itataj niman inanaj. Yejua ika, ¿man tline aman kijtoua ika ualeua iluikak?
43Kemaj Jesús okinmijlij:
—Maka sa tlamach xkijtojtiakan tlen xkuajli. 44Xakaj ueli notech uajlau tla xkinotsa noTajtsin. Niman nejua nikyolitis niman nikuiteuas ipan itlalkon ipan on sa ika nochi tonajli. 45Ipan intlajkuilolamauan on tiotlajtojkej ijkin kijtoua: “Dios kinmachtis nochimej.” Ijkon tej, nochimej yejuan kitenkakij toTajtsin niman kiseliaj on tlen yejua kinmachtia, notech uajlauij. 46Xakaj okitak on noTajtsin, yej san nejua yejuan itech oniualeu onikitak yejua. 47Ika tlen melauak nemechijlia, ika on yejuan nechneltoka kipiya nemilistli yejuan para nochipa. 48Nejua nipan on yejuan kitemaka nemilistli para nochipa. 49On nemoachtojtajuan okuajkej on maná ne kampa xalpatlajkan. Maski okuajkej, xonenkej para nochipa, yej omikkej. 50Pero on yejuan kikuaskej on pan yejuan ualeua iluikak xmikiskej. 51Nejua nipan yejuan kitemaka nemilistli niman yejuan oniualeu iluikak. Yejuan kikuas in pan nemis para nochipa. On pan yejuan nejua nikmakas sano yejua nonakayo yejuan nikuentlalis para on tlaltikpaktlakamej ueliskej nemiskej para nochipa.
52Kemaj on hebreos* opejkej sano yejuamej nokamauisojkij. Kijtouayaj:
—¿Kenijki tej, uelis sano inakayo techkualtis?
53Jesús okinmijlij:
—Nejua yejuan onochiu Tlakatl ika tlen melauak nemechijlia, tla nemejuamej xnenkikuaj nonakayo niman xnenkonij noyesyo, xnennemiskej para nochipa. 54Yejuan kikua nonakayo niman koni noyesyo kipiya nemilistli para nochipa, niman nejua nikyolitis niman nikuiteuas ipan itlalkon ipan on sa ika nochi tonajli. 55Ijkon nochiuas pampa nonakayo yejua melauak tlakuajli, niman noyesyo yejua melauak tlaonijli. 56Yejuan kikua nonakayo niman koni noyesyo nemis san sekan nouan, niman nejua no ninemis san sekan iuan. 57NoTajtsin yejuan onechajtitlan kipiya nemilistli, niman nejua itechkopa ninemi. Niman no ijki tej, yejuan kikuas nonakayo, san nopampa nemis para nochipa. 58Nejua nipan yejuan oualeu iluikak. In pan xijki ken yejua on maná yejuan okuajkej nemoachtojtajuan niman omikkej. Yejuan kikuas in pan yejuan nikteneua, nemis para nochipa.
59Jesús okitemachtij in tlajtlamach* ipan on sinagoga* yejuan onkaj ne Capernaúm.
Itlajtol Jesús kitemaka nemilistli yejuan para nochipa
60Ijkuak miyekej inomachtijkauan* ijkon okakkej, okijtojkej:
—Yejua in tlen tikijtoua sanoyej* ouijtikaj* para tikseliskej. ¿Akinon uelis kiselis in temachtijli?
61Jesús okimat ipan iyojlo ika tlamach xkuajli kijtouayaj, niman ijkin okintlajtoltij:
—¿Mechtlauelkuitia on yejuan onikijto? 62¿Tlinon nenkinemiliskiaj tla nennechitaskiaj nejua yejuan oninochiu Tlakatl nitlejkoua ne kampa achtoj ninemiya? 63Ialma sen tlakatl yejua kimaka nemilistli itlalnakayo. Itlalnakayo xitlaj* kijtosneki tla kipoloua ialma. On notlajtol yejuan yonemechijlij mechmaka nemilistli para nochipa ijkon ken ialma sen tlakatl kimaka nemilistli itlalnakayo. 64Pero nemotsajlan sanken* nemij sekimej yejuan xe tlaneltokaj.
Jesús tej, ye kimatstikatka akinomej on yejuan xtlaneltokayaj, niman akinon on yejuan kitemaktilis. 65Niman okijtoj:
—Yejua ika, yejua ika yonemechijlij xakaj uelis notech uajlas, tla noTajtsin xkitlalia ipan iyojlo para ma uajla.
66Desde ijkuakon opeu miyekej on yejuan kuikatinemiyaj onokuepkej, niman xok iuan okistinenkej. 67Yejua ika, Jesús okintlajtoltij on majtlaktli uan ome inomachtijkauan*:
—¿Nemejuamej no nenkinekij nennechtlalkauiskej?
68Pero Simón Pedro okijlij:
—NoTEKO, ¿akinon uelis tiaskej itech? San motlajtoltsin yejuan tikijtoua yejua kitemaka nemilistli yejuan para nochipa. 69Niman aman tejuamej yotikneltokakej niman ye tikmatstokej ika tejua tiCristo, tiiKoneu Dios yejuan nochipa nemi.
70Jesús okinmijlij:
—Maski onemechtlapejpenij nemejuamej majtlaktli uan ome, nemotsajlan nemi se yejuan kitekipanoua on diablo*.
71Ijkuak Jesús ijkon okijtoj, kitenejtikatka Judas Iscariote, ikoneu Simón, pampa Judas kitemaktiliskia maski yejua teuan tlapouajli intech on majtlaktli uan ome nomachtijkej*.
தற்சமயம் தேர்ந்தெடுக்கப்பட்டது:
San Juan 6: nguNT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 1987, 2012 Wycliffe Bible Translators, Inc. All rights reserved.