मत्ती 13
13
लू थरबजे उखान
मर्कूस ४:१-१२; लूका ८:४-१०
1हम्ब दिनने येशू कीम्दे योङ्देबे गालीलजे समुद्र नने टूङ्दे। 2#लूका 5:1-3होर्दे येशूट्याने सोरो फत्या कूम मीहुल रूप् क्यूत्दे, होरेक्यूत्देबे डुङ्गात्याने येशू टदेबे टूङ्दे, होर्दे मीयू क्वाने समुद्रजे नने मेर्दे। 3येशूदे थमयूने उखानत्या पूत्देबे कूम पो स्योम्मीदे।
ङूदे यदे, “लू थरब मीत्या रङ्ने लू थरने गीली। 4होर्दे लू थर्ब कोइ लू लम्तेले पर्दीइ, मेस्ये ययू रदेबे हम्ब चेकदे। 5कोइ लू लूङ्सने पर्दीइ, हैयाने स कूम त्वोदेबे हम्ब छ्योटोने फीट्टदे। 6तर मीया प्ल्यारमेस्ये हम्ब ङ्यालाङ्-ङ्यूलूङ् क्यूत्देबे छ चेलाबे च्व अम्प्रेत्देबे हम्ब खरी। 7सूजो लूयू चोपोङ्यू नङ्ने पर्दीयी, तर चोपोङ्यू ठोङ्रदेबे हम्बने चेलाबे ठोङ्से अम्पीन् चीत्दे। 8सूजो लू ज्य-सने पर्दीइ, मेस्ये कोइ लूदे सैत्या, कोइ लूदे सोम्लङ्, कोइ लूदे सूम्च्यूगुणा थेप् से ल्वोदे। 9पो ङ्यीनब मीदे चेलाबे ङ्यीन्स्य!”
10होर्दे स्यूस्स्यायू रदेबे येशूने लोत्दे, “चेने नदे थमयूप्रे उखानयू पूत्देबे क्यम?”
11येशूदे जवाफ पीन्दे, “स्वर्ग-राज्यजे नङ्सू पोयूजे ज्ञान नमयूने स्येसे पीन्दे, तर थमयूने ब अम्पीन ख्यङ्। 12#मत्ती 25:29; मर्कूस 4:25; लूका 8:18; 19:26चेनेयलो सूप्रे ख्यङ्, ङूने अझ पीन्क्य, मेस्ये ङूप्रे बेस्से कूम क्यूक्क्य। तर सूप्रे त्वो, ङूप्रे ख्यबये लेन्कीय। 13येरेक्यूत्देबे ङ थमयूप्रे उखान पूत्देबे क्यम्क्य:
‘चेनेयलो थमयूदे लेब लेक्क्य तर तङ्स्ये त्वो,
ङ्यीनब ङ्यीन्क्य तर कोस्ये त्वो।’
14 #
यशैया 6:9,10 यशैयादे यब परमेश्वरजे वचन थमयूने पूरा क्यूक्क ख्यङ्:
‘ङ्यीनब नमयूदे ङ्यीन्क्य, तर कलङ्बेये अङ्को, लेब लेक्क्य, तर कलङ्बेये अन्तङ्।
15चेनेयलो अम्ब मीयूजे सेम् पो क्व-अङ्ख्व क्यूरे ख्यङ्,
थमयूजे न नाक्तूङ् क्यूरे ख्यङ्, थमयूदे रङ्से म्या च्यूम् चे ख्यङ्, नत्र थमयूजे म्यादे तङ ख्यङ्दे, थमयूजे नदे तख्यङ्दे, सेम्दे पो क्व ख्यङ्दे, थमयूजे रङ्से सेम् ङैतेले ल्वार ख्यङ्दे, मेस्ये ङैदे थमयूने तम् चीम्मे ख्यङ्दे।’
16 #
लूका 10:23,24 तर नमयूजे म्यादे असी प्रेक्क्य, चेनेयलो हम्बदे तङ्क्य, होर्दे नमयूजे ङ्यीनब नयूदे असी प्रेक्क्य चेनेयलो हम्बदे तैय। 17तम्दम्ने, ङ नमयूने यीय, नमयूजे म्यादे तङब सेयू अगमवक्तायूदे मेस्ये धर्मीयूदे सोरो लेब सेम् चेख्य, तर थमयूदे तङ अम्प्रे, नमयूदे तैकब पो सोरो ङ्यीन्तीङ् रख्य, तर ङ्यीनये अम्प्रे।
उखानजे अर्थ
मर्कूस ४:१३-२०; लूका ८:११-१५
18“लू थरब उखानजे अर्थ ङ्यीन्। 19कोइ मीदे परमेश्वरजे राज्यजे वचन ङ्यीनब ङ्यीन्लीने, हम्ब वचन क्व-अङ्खू। होर्दे थमयूजे सेम्ने हीतेब पो दुष्ट रदेबे लेन्कीय। येर खल्जे मीयू लम्तेले पर्दीयेब लूप्र ख्यङ्। 20लूङ्सने पर्दीयेब लूजे अर्थ अम्ब ख्यङ्, थमयूदे वचन ङ्यीन बितीकै सूग्देबे हम्ब मन्दीय। 21तर ङूजे रङ्सेजे छ त्वोदेबे हम्ब खात्यात्या टीक्तीय, मेस्ये वचन मन्देब कारणदे सकस् या सतनम् पर्तीरबीतीक्ने थमयूदे अम्ब वचनने विश्वास अन्चे क्यूप्पीय। 22चो पोङ्जे नङ्ने पर्तीयेब लूजे अर्थ अम्ब ख्यङ्। थमयूदे परमेश्वरजे वचन ङ्यीन्देबेये अम्ब संसारजे सूर्त, मेस्ये सीर-सम्पत्तिजे मायादे हम्ब वचनने चेलाबे काम चीस्से अम्पीन्, मेस्ये हम्बदे चै फलये पीन अङ्खू। 23तर ज्य सने पर्दीयेब लूजे अर्थ अम्ब ख्यङ्, सूदे वचन ङ्यीन्क्य, मेस्ये हम्ब वचनने चेलाबे क्व ख्वब क्यूत्देबे ङूदे तम्दम्ने फल पीन्क्य। हम्ब थरेब लूदे सैत्या, सोम्लङ् मेस्ये सूम्च्यू गुणा थेप् फल पीन्क्य।”
सामा स्यूजे उखान
24येशूदे फेरि थमयूने सूजो उखान त्या स्योत्दे: “स्वर्गजे राज्य अम्ब मीप्र ख्यङ्, ङूदे रङ्सेजे रङ्ने सोरो ज्य लू थरीदे। 25तर मीयू ङ्यूम्नब बीलने मून्दे ङूजे शत्रु रदेबे हम्ब ह्वजे अन्द्र-अन्द्रने सामा स्यूजे लू थर्देबे गीली। 26कन्छ्वाब ह्व पोङ् ठोङ्रदेबे सेजे ल चङ्रदे हन्छ्वाब सामा स्यूये योङ्रदे।
27“कीम् नोबोजे त्वोयू रदेबे ङूने यदे, “नदे रङ्से रङ्ने सोरो ज्य लू थर ते? हैयाने सामा स्यू केर्दे फीट्टदे?’
28“कीम् नोबोदे थमयूने यदे, “कोइ शत्रुयू रदेबे येर चे ख्यङ्।’
त्वोयूदे ङूने यदे, ‘ङी प्रदेबे हम्ब सामा स्यू ह्वाबीता?’
29“तर ङूदे यदे, ‘छ्यो होरे अन्चील्लाची, चेनेयलो नमयूदे सामा स्यू ह्वाब छ्योल्देबे ह्व पोङ्ये ह्वागीय। 30बली तोल बील अन्क्यूत्दासेमे ह्वप्रे सामा स्यू थर ङ्हीनेने प्रे-प्रे ठोङ्से पीन्। से-तामेस्ये बली तोलब मीयूने यीय, ‘मीने नेम्बेने खूम् सामा स्यू ह्वादेबे बोन् ची, तर ह्वब ङैजे माङ्काने सीक’।”
रोयो ल मेस्ये क्यङ् पूला चेब खमिरजे उखान ङ्ही
मर्कूस ४:३०-३४; लूका १३:१८-२१
31येशूदे फेरि सूजो उखान थमयूने यदे, “स्वर्गजे राज्य रोयोजे ल-प्र ख्यङ्। हम्ब ल मीत्यादे टेल्गीदेबे रङ्से रङ्ने थरीदे। 32हम्ब सूजो लूयूयली पात्ता चीद क्यूक्क्य, तर कन्छ्वाब पोङ् ठोङ्रीय, हन्छ्वाब सूजो ङू-पोङ्यूयली थेप् केन् क्यूक्क्य मेस्ये ठोङ्देबे तङ्बो-प्र केन् क्यूक्क्य। मूने स्यूनब ययू रदेबे हम्बजे हाँगायूने चङ् बन्दीय।”
33येशूदे थमयूने सूजो उखान यदे, “स्वर्गजे राज्य क्यङ् बूलाबे चेब खमिरप्र ख्यङ्, हम्ब मदीत्यादे खमिर टेल्देबे पच्चीस किलो ताने च्यूम्देबे क्यूप्रे च्योप्दे, होर्दे हम्ब ता छ्योङ्ब टक्कने अम्पूरता नैत्याने येत्दे!”
34अम्ब पोयू क्वाने उखान पूत्देबे येशूदे मीयूने यदे। ङूदे थमयूने उखान अम्पूल्लाबे चैत्याये अन्-य। 35#भजनसंग्रह 78:2अगमवक्तादे येरे येयेब वचन पूरा क्यूत्दे: “ङ उखानयू पूत्देबे क्यम्क्य, मेस्ये संसार बन्देब बीलदे छोमेस्येजे नङ्सू पोयू यीय।”
सामा स्यूजे उखानजे अर्थ
36होर्दे मीहुल पोङ्गीदेबे येशू कीम्ने गीली, “रङ्ने फीन्नब सामा स्यूजे बारेने स्य्वेब उखानजे अर्थ ङीयूने स्योम्मी।” यदेबे ङूजे स्यूस्स्यायू ङूट्याने रदे।
37येशूदे थमयूने जवाफ पीन्दे, “ज्य लू थर्ब मीब मीजे च ख्यङ्। 38रङ् ब संसार ख्यङ्। होर्दे ज्य लूब परमेश्वरजे राज्यजे छगूम्-पूर्गूम् ख्यङ्, मेस्ये सामा स्यूब दुष्टजे छगूम्-पूर्गूम् ख्यङ्। 39सामा स्यूजे लू थरब शत्रुब शैतान ख्यङ्। बली तोल बीलब अम्ब जूग्जे न्यायजे दिन ख्यङ्। बली तोलयूब स्वर्गदूतयू ख्यङ्।
40“सामा ह्वादेबे केर्बे मीने नेम्बीय, अम्ब संसारजे न्यायजे दिननेये होरप्रने क्यूक्क्य। 41हम्ब दिनने मीजे चदे रङ्से दूतयूने कूल्बीय मेस्ये थमयूदे ङूजे राज्यने पाप चीस्से पीनब साप्ता सेयू मेस्ये दुष्ट काम चेबयू क्वाने रूप् पूक्क्य, 42मेस्ये थमयूने प्ल्याङ्नब मीजे भोप्रोने छाबीय। हैयाने मीयू ङूय मेस्ये स कीटीटी चीक्क्य। 43होर्दे धर्मी मीयू रङ्से पजे राज्यने मीयाप्र छालाला तङब क्यूक्क्य। पो ङ्यीनब मीदे चेलाबे ङ्यीन्स्य।
पोप्येब धन
44“स्वर्गजे राज्य रङ्त्याने पोप्येब धनप्र ख्यङ्, मीत्यादे हम्ब धन त्वमेस्ये फूदेबे येक्क्य, ङू सूग्देबे प्रीय होर्दे रङ्सेप्रे ख्यब सम्पत्ति क्वाने सोङ्क्य, मेस्ये हम्ब रङ् कीन्क्य।
कूम लू पर्देब मोती
45“फेरि स्वर्गजे राज्य सोरो ज्य मोतीयू मलब छोङ् चे-मीप्र ख्यङ्। 46कूम लू पर्देब मोती ङूदे त्वमेस्ये गीलीदेबे रङ्सेप्रे ख्यब साप्ताने सोङ्देबे हम्ब मोती कीन्दे।
ङ चूङब जाल
47“फेरि स्वर्गजे राज्य समुद्रने छाब जालप्र ख्यङ्, हम्ब जालने परीपरीजे ङयू पर्दीय। 48होर्दे जाल फ्यामेस्ये मीयूदे हम्ब जाल समुद्र नने थेन्देबे रेत्दे, मेस्ये टूङ्देबे सोरो ज्य जीती टाक्सेयूने फूङ् पूत्दे, मेस्ये अन्ज्य जीती फीने छाबीदे। 49संसारजे न्याय चेब दिनने यरप्रने क्यूक्क्य। स्वर्गदूतयू रदेबे दुष्टयूने धर्मी मीयूजे अन्द्रदे आलाक् चीक्क्य, 50मेस्ये थमयूने प्ल्याङ्नब मीजे भोप्प्रोने छाबीय। हैयाने मीयू ङूय मेस्ये स कीटीटी चीक्क्य।”
51येशूदे लोत्दे, “नमयूदे अम्ब पो क्वाने कोदा?”
थमयूदे जवाफ पीन्दे, “अँ, क्व ख्यङ्।”
52होर्दे येशूदे थमयूने यदे, “येरेक्यूत्देबे स्वर्गराज्यजे शिक्षा प्रेब पन्डेयू क्वाने कीम् त्याजे मालिकप्र ख्यङ्। ङूदे रङ्से बेङेदे कूम लूजे सर् मेस्ये ङीङ् सामानयू फीने योन्क्य।”
गेसेन् अम्प्रेब अगमवक्ता
मर्कूस ६:१-६; लूका ४:१६-३०
53अम्ब उखानयू य चेनमेस्ये येशू हैयादे गीलीदे। 54होर्दे येशू रङ्सेजे कीम् ख्यब सहरने रदेबे थमयूजे सभा-कीम्ने थमयूने यर शिक्षा पीनने सुरु चीत्दे, यी थमयू हार्मन्दीदे मेस्ये यदे, “अम्बमीदे येर बुद्धि मेस्ये हार्मन्देब कामयू चेख्वब शक्तियू केर्दे प्रेत्दे? 55अम्ब सिकर्मीजे च ते या? ङूजे मजे मीन् मरियम, मेस्ये ङूजे च्योन्यू याकूब, योसेफ, सिमोन मेस्ये यहूदा ते? 56ङूजे स्यङ्यू टक्कने ङीनप्रेने ख्य ते या? ङूदे अम्ब साप्ता पो केर्दे प्रेत्दे?” 57#यूहन्ना 4:44होर्दे थमयूदे येशूने अम्पत्ती।
तर येशूदे थमयूने यदे, “अगमवक्ताने रङ्सेजे ने मेस्ये रङ्सेजे कीम्ने गेसेन् अन्ची तर सूजो टक्क नेनेने गेसेन् चीक्क्य।” 58होर्दे थमयूदे विश्वास अन्चेब तङ्देबे ङूदे हैयाने शक्तिजे कामयू कूम अन्ची।
தற்சமயம் தேர்ந்தெடுக்கப்பட்டது:
मत्ती 13: सर् कबुल
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Ghale New Testament © Nepal Bible Society, 2011.