Enzũko 17
17
Abramu amahulwa mo Abrahamũ
1Neryo omugulu Abramu abya wʼemyaka makũmĩ mwenda nʼomwenda Omwami Mukulu mwamuhulukira, mwabũga naye ati, Ĩngye indi Nyamuhanga Omũtokĩ Wʼebyosĩ. Ulendere embere syage, ũhĩkane. 2Nage nasyayira endagano yage omo katĩkatĩ kage nawe, nasyakũkanyĩrĩrya kutsibu. 3Neryo Abramu mwalambama, neryo Nyamuhanga mwakanĩa naye ati, 4Nĩkwa ĩngye, lebaya, endagano yage iri haguma nawe, Wasyabya ĩse wʼebihanda bingi. 5Kandi erĩna lyawe siryendisyaswahulwa mo Abramu, nĩkwa erĩna lyawe lyasyahulwa mo Abrahamũ kusangwa nabirikuyira mo tata wʼebihanda bingi. 6Neryo nasyakũkanyĩrĩrya kutsibu, kandi nasyakuyira mo bihanda, nʼabami basyatsũka ukʼuwe. 7Neryo nasyahanganĩa endagano yage omo katĩkatĩ kage nawe nʼoko bana bawe enyũma syawe oko syondengo syabo busana nʼendagano ya kera na kera, eribya Nyamuhanga ukʼuwe nʼoko bana bawe enyũma wawe. 8Kandi nasyakuha, nʼoko bana bawe enyũma wawe, ekihugo ekyo wabirirenderamo mo mubunga, ekihugo kyosĩ kyʼeKanana, eribya bũsokĩ bwawe bwa kera na kera, nage nasyabya Nyamuhanga wabo.
Endagano yʼerĩbanĩa
9Kandi Nyamuhanga mwabwira Abrahamũ ati, Nĩkwa uwe, wasyateya endagano yage, uwe, nʼabana bawe enyũma wawe oko syondengo syabo syosĩ. 10Eyĩ ni ndagano yage, eyo mwasyateya, omo katĩkatĩ kage nawe nʼabana bawe enyũma syawe, obuli mulume omo katĩkatĩ kenyũ asyabanĩbwa. 11Nenyũ mwasyabanĩbwa omo mubiri wʼengoba, nʼekyo kyasyabya kiminyikalo kyʼendagano omo katĩkatĩ kage nenyũ. 12Nʼoyo wamabya wʼebiro munani omo katĩkatĩ kenyũ asyabanĩbwa, obuli mulume omo katĩkatĩ kʼesyondengo syenyũ, omubutwa omo nyũmba, kutse oyukagulawa oko franka oko bandu bʼehandi ate oko bana bawe. 13Oyukabutawa omo nyũmba yawe, nʼoyukagulawa oko franka, atolere ĩnĩabanĩbwa. Neryo endagano yage yasyabya omo mubiri wenyũ mo ndagano ya kera na kera. 14Omulume oyutabwene omo mubiri wʼengoba, omundu oyo iniahigwa erĩlũsĩbwa oko bandu buwe, abiriketa endagano yage.
Saraĩ amahulwa mo Sara
15Neryo Nyamuhanga mwabũga na Abrahamũ ati, Nĩkwa busana na Saraĩ mũkalĩ wawe, siwendisyaswahula erĩna liwe mo Saraĩ, nĩkwa erĩna liwe lyasyabya Sara. 16Nasyamutsumula, nʼakandi nasyakuha omugala ukwʼiye, ega, nasyamutsumula, naye asyabya nyĩnya wʼebihanda, nʼabami bʼebihanda basyatsũka ukwʼiye. 17Neryo Abrahamũ mwalambama, mwaseka, mwabũga omo mutima wuwe ati, Omwana asyabutwa oko wʼemyaka erĩgana kwehĩ? Na Sara naye, oyũ wʼemyaka makũmĩ mwenda, asyabuta kwehĩ? 18Neryo Abrahamũ mwabũga na Nyamuhanga ati, Kumbe Ĩsĩmaelĩ iwabyaho embere syawe! 19Neryo Nyamuhanga mwabũga ati, Iyihi, nĩkwa Sara mũkalĩ wawe asyakubutira omugala, nawe wasyahula erĩna liwe mo Ĩsaka. Nage nasyahanganĩa endagano yage haguma naye oko ndagano ya kera na kera busana nʼabana buwe enyũma wuwe. 20Nĩkwa busana na Ĩsĩmaelĩ, nabĩrĩkowa, lebaya, nabirimutsumula, nasyamũkanyĩrĩrya nʼerimutomekera kutsibu. Asyabuta abakama erĩkũmĩ nʼababiri, kandi nasyamuyira mo kihanda kinene. 21Nĩkwa endagano yage nasyahanganĩayo na Ĩsaka, oyo Sara asyakubutira oko mugulu ono, oko mwaka owakasa. 22Neryo Nyamuhanga abere abibuga erĩkanĩa na Abrahamũ, Nyamuhanga mwahetuka akalũa uku Abrahamũ.
23Neryo Abrahamũ mwĩmya Ĩsĩmaelĩ mugala wuwe, nʼabosĩ ababutawa omo nyũmba yiwe nʼabosĩ abagulawa oko franka, obuli mulume omo katĩkatĩ kʼabalume bʼenyũmba ya Abrahamũ, mwabanĩa omubiri wʼengoba yabo oko kiro ekyo, ngoko Nyamuhanga amubwira. 24Neryo Abrahamũ abya wʼemyaka makũmĩ mwenda nʼomwenda, omugulu abanĩbawa omo mubiri wʼengoba yiwe. 25Na Ĩsĩmaelĩ omugala wuwe abya wʼemyaka ĩkũmĩ nʼĩsatu, omugulu abanĩbawa omo mubiri wʼengoba yiwe. 26Ekiro ekyo Abrahamũ mwabanĩbwa, na mugala wuwe Ĩsĩmaelĩ. 27Nʼabalume bosĩ bʼenyũmba yiwe, nʼababutawamo, nʼabagulawa oko franka oko bandu bʼehandi, mobabanĩbwa haguma naye.
தற்சமயம் தேர்ந்தெடுக்கப்பட்டது:
Enzũko 17: KB80
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible in Kinandi © Bible Society of the Democratic Republic of Congo, and Bible Society of Uganda, 1980.