Enzũko 27
27
Yakobo akĩba omũyĩsa
1Neryo Ĩsaka abere abibya mũsyakulu, nʼameso wuwe isiakilangira ndeke, mwabirikira mugala wuwe wʼerĩmbere, Esaũ, mwamubwira ati, Mugala wage. Naye mwamũsũbĩrya ati, Nandi hano. 2Naye mwabũga ati, Lebaya lino, indi mũsyakulu, Sĩnyasĩ ekiro kyʼoluholo lwage. 3Lino, nyiti. Wĩmaye ebindu byawe, olubo lwawe nʼobuta bwawe, ugende omolĩ, unyihigire akanyama. 4Ũnyĩkokoteraye akalyo kasĩhĩre, ngoko nyazĩre, unyiretereko, nyiryeko, omutima wage akutsumule nde nahola.
5Neryo Rebeka mowa omugulu Ĩsaka abya akabũga na Esaũ mugala wuwe. Neryo Esaũ mwagenda omolĩ akayahiga esyonyama nʼeriretasyo. 6Na Rebeka mwabũga na Yakobo mugala wuwe ati, Lebaya, namowa tata wawe akabũga na Esaũ, mugala wenyũ ati, 7Unyiretere eyĩswĩ, ũnyĩkokoteraye akalyo kasĩhĩre, inalya, nʼerikutsumula embere syʼOmwami Mukulu emuliro wʼoluholo lwage. 8Neryo lino, mugala wage, wowe omulenge wage oko kyo ngakuhana. 9Ugende lino omo kihangulo, unyiretere ebyana bibiri byʼembene, ebyowene. Nage ngandĩkokoterya tata wawe yʼakalyo kasĩhĩre, ako anzĩre. 10Nawe ukanditwalirako tata wawe, alye, neryo akutsumule embere wʼoluholo luwe. 11Nĩkwa Yakobo mwabwira Rebeka koyo wuwe ati, Lebaya, Esaũ, mugala wetu, ni mundu wʼobweya, nage indi mundu utendere. 12Kwamũhwa tata wage asyanyĩtũlako, inabya ngʼomũtebya. Inayiretera eritakira butsira omũyĩsa. 13Na nyĩnya wuwe mwabũga naye ati, Eritakirwa lyawe libye kwĩngye, mugala wage. Ekiguma kisa, wowe omulenge wage, wendebyo. 14Neryo mwendabyo, mwaleterabyo nyĩnya wuwe, na koyo wuwe mwakokotya akalyo kasĩhĩre, ngoko tata wuwe abya anzĩre. 15Na Rebeka mwĩmya esyongimba syowene sya Esaũ mugala wuwe, mukulu, esyabya omo nyũmba, mwambalyasyo Yakobo mugala wuwe mulere. 16Kandi mwaswika esyongobĩ syʼebyana byʼembene oko byala biwe nʼoko bĩkya biwe ahatendere. 17Neryo mwahĩra akalyo kasĩhĩre ako nʼobundu obo atsumba, omo byala bya Yakobo mugala wuwe.
18Neryo Yakobo mwasa uku tata wuwe, mwabũga ati, Tata wage. Naye mwabũga ati, Nandi hano. Ulindi kwehĩ mugala wage? 19Na Yakobo mwabũga nʼĩse wuwe ati, Ĩngye indi Esaũ akambere kawe. Nabirikola ngoko gulyanyihana. Ngakũbũlaya nyiti, uhangane, Wĩkale ulye oko byʼobuhiyi bwage, omutima wawe atoke erinzumula. 20Na Ĩsaka mwabũga na mugala wuwe ati, Wamabanasyo uti lũba, mugala wage? Naye mwabũga ati, Kusangwa Omwami Mukulu wawe abĩrĩngwatĩkya eribanasyo lũba. 21Neryo Ĩsaka mwabwira Yakobo ati, Ngakusaba nyiti, Wase hakũhĩ, nyikukoleko, mugala wage, nga nina we, mugala wage Esaũ kwenene, kutse iyihi. 22Neryo Yakobo mwasegera ahali tata wuwe Ĩsaka, naye mwamũtũlako mwabũga ati, Omulenge ni wa Yakobo, nĩkwa okuboko ni kuboko kwa Esaũ. 23Nĩkwa mwatamuminya, kusangwa okuboko kuwe kwabya kʼobweya, ngʼokuboko kwa mugala wabo Esaũ, neryo mwamutsumula. 24Kandi mwabũga ati, Kwenene nina we mugala wage Esaũ kwehĩ? Naye mwabũga ati, Nĩna ngye. 25Neryo mwabũga ati, Uletesyo hakũhĩ nage, ngandirya obuhiyi bwʼomugala wage, omutima wage atoke erikutsumula. Naye mwaletasyo hakũhĩ naye, neryo mwalya, kandi mwamuletera ebĩnyũ, mwapũlya. 26Na Ĩsaka, ĩse wuwe mwabũga naye ati, Lino Wase hakũhĩ, unyilyatsirire, mugala wage. 27Neryo mwasa hakũhĩ mwamulyatsirira. Naye mwakumbirwa olukimba luwe, mwamutsumula ati,
Ĩsaka akatsumula Yakobo
Lebaya, erikumba lya mugala wage
Riri ngʼekikumbo kyʼeririma eryo
Mwami Mukulu abiritsumula:
28Nyamuhanga akuhe ekimi kyʼelubula,
Nʼomuboga wʼekitaka,
Nʼengano nyingi, nʼebĩnyũ bihya-bihya
29Kandi abandu bakukolere
Ebihanda byũname embere syawe;
Ubye mukama uku bagala benyũ,
Nʼabagala ba koyo wawe bakũnamire;
Atakirawe oyukakutakira,
Nʼobuli mundu oyukakutsumula atsumulawe.
30Enyũma wʼaho, Ĩsaka abere abibuga eritsumula Yakobo, na Yakobo abere abĩlũa embere sya Ĩsaka ĩse wuwe, neryo Esaũ mugala wabo mwasa akalũa omo buhiyi buwe. 31Naye mwakokotya akalyo kasĩhĩre, mwaleterako tata wuwe. Mwabũga na tata wuwe ati, Tata wage, ahangane alye esĩswĩ syʼobuhiyi bwa mugala wuwe, omutima wawe atoke erinyitsumula. 32Na Ĩsaka tata wuwe mwabũga naye ati, Uwendi kwehĩ? Naye mwabũga ati, Ĩngye indi mugala wawe, akambere kawe, Esaũ. 33Neryo Ĩsaka mwatitimana kutsibu, mwabũga ati, Ko nindi yulyanyiretera esĩswĩ syʼobuhiyi kwehĩ? Nage nabirirya oko byosĩ ute wasa nʼerimutsumula, ega, naye asyatsumulwa. 34Omugulu Esaũ owa ebĩnywa bya tata wuwe, mwalira nʼekiriro kinene ekĩkalĩre, neryo mwabũga na tata wuwe ati, Nage unyitsumule, uwe tata wage. 35Neryo mwabũga ati, Mugala wenyũ mwakasa nʼamenge, abiriheka omũyĩsa wawe. 36Neryo mwabũga ati, Erĩna liwe molitahulwa mo Yakobo kwenene kwehĩ? Kusangwa abĩrĩmya omwanya wage esyongendo ĩbĩrĩ esĩ. Mwaheka obukulu bwage, kandi lebaya lino abiriheka nʼomũyĩsa wage. Neryo Esaũ mwabũga ati, Sulitanyibikira omũyĩsa kwehĩ? 37Ĩsaka mwasũbĩrya mwabũga na Esaũ ati, Lebaya, nabirimuyira mo mukama wawe, nabirimuha bagala benyũ bosĩ eribya bagombe buwe. Nabĩrĩmũsĩkya omo ngano nʼebĩnyũ bihya-bihya. Nawe, mugala wage, ngandisyakukolerakĩ kwehĩ? 38Neryo Esaũ mwabũga nʼĩse wuwe ati, Tata wage, uwite omũyĩsa muguma musa kwehĩ? Unyitsumule nage; uwe tata wage. Neryo Esaũ mwasumba omulenge wuwe, mwalira. 39Neryo Ĩsaka ĩse wuwe mwamũsũbĩrya mwabũga naye ati,
Lebaya obwĩkalo bwawe, bwasyabya hali oko muboga wʼekitaka!
Nʼekimi kyʼelubula ekĩkalũa endata, kyasyabya hali!
40Kandi wasyabyaho busana nʼomũyalĩ wawe,
Nawe wasyakolera mugala wenyũ;
Neryo kikandisyabya omugulu wasyaluha,
Wasyalũsya engomo yiwe yʼoko bĩkya byawe.
Obusu bwa Esaũ uku Yakobo
41Neryo Esaũ mwakwa Yakobo yʼobusu busana nʼomũyĩsa ogo tata wuwe amutsumulamo. Neryo Esaũ mwabũga omo mutima wuwe ati, Ebiro byʼeririra tata wage biri hakũhĩ; neryo enyũma wʼaho nasyĩta Yakobo mugala wetu. 42Neryo omugulu babwira Rebeka yʼebĩnywa bya Esaũ mugala wuwe mukulu, Rebeka mwatumira uku Yakobo mugala wuwe mulere, mwabũga naye ati, Lebaya! Mugala wenyũ Esaũ akayĩsebelaya omo mutima wuwe busana nʼerĩkwĩta. 43Na lino, mugala wage, wowe omulenge wage. Uhangane, utibite eyiri Labanĩ mugala wetu eHaranĩ. 44Kandi ubyeyo haguma naye biro bike erĩhĩka aho ekĩnĩga kya mugala wenyũ kyasyahwera. 45Erĩhĩka aho ekĩnĩga kya mugala wenyũ kyasyakũlũĩrako, inibirirwa ekyo wabirimukolera, neryo nasyakutumirako. Busana nakĩ nangakwĩrwa Ĩnywe babiri bosĩ kiro kiguma kwehĩ?
46Neryo Rebeka mwabũga na Ĩsaka ati, Omutima wage amaluha busana bali ba Hetĩ. Yakobo amĩmya omũkalĩ oko bali ba Hetĩ ngʼaba, abali bʼekihugo, engebe yage iyasyangasirakĩ kwehĩ?
தற்சமயம் தேர்ந்தெடுக்கப்பட்டது:
Enzũko 27: KB80
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible in Kinandi © Bible Society of the Democratic Republic of Congo, and Bible Society of Uganda, 1980.