JOHN 5
5
1Cu hnu ah Judah mi Thô pakhat a um i Jesuh cu Jerusalem khua ah a kal. 2Jerusalem ah Tuu kutka timi pawngah tidîl a um i cucu Hebru holh in Bethesda tiah an ti i deu panga a um. 3Cu deu ah mizaw, mitcaw, kebei, mizeng hna nih tidîl a cangh cân kha hngakin an um. 4Zeitintiah tidîl ah khan vanmi an ra i ti kha an canghter tawn. Ti a cangh hnu i â paih hmasa bik kha zeibantuk zawtnâk le fahnâk zong an dam tawn. 5Cuka ah kum 38 a ngawrmi a um. 6Jesuh nih cuka hmun i a ih ko kha a hmuh i a zawt cân a sau cang ti a hngalh i a sinah, “Damter na duh maw” tiah a ti. 7Mizaw pa nih, “Ka pu, ti a cangh lio ah chiatu ka ngei lo, ka vung zuan lio ah midang nih anka phâk kanh tawn,” tiah a ti. 8Jesuh nih, “Tho law, na ihphah la law, kein kal cang,” tiah a ti. 9Cupa cu a dam cawlh i a ihphah â lak i a kal. Cuni cu Sabbath a si. 10Cucaah Judah mi nih a dammi pa sinah, “Sabbath ni a si, na ihphah nalâk hi phungning a si lo,” tiah an ti. 11Anih nih, “Aka damtertu nih, na ihphah la law, kein kal aka ti,” tiah a leh hna. 12Annih nih, “Na ihphah la law, kein kal, an titu cu ahodah a si?” tiah an hal. 13Asinain damter a simi pa nih ahodah a si a hngal lo, zeitintiah cuhmun ah mi an tam tuk i Jesuh nih le â zuk cang fawn. 14Hnu deuh ah Jesuh nih cupa cu ṭempal ah a hmuh i a sinah, “Ngaihmanh, na dam cang hih. Thilṭhalo chin chin nih an tlunh hnawh sual nâkhnga lo sualnâk va tuah ti hlah,” tiah a ti. 15Mipa cu a vakal i Judah mi kha aka damtertu cu Jesuh a si tiah ava chim hna. 16Sabbath ni ah cubantuk thil a tuah ruangah Judah mi nih Jesuh cu an serhsat i thahnâk ding lam kha an kawl. 17Asinain Jesuh nih, “Ka pa, nih atu tiangin rian a ṭuan i kei zong nih ka ṭuan ve,” tiah a ti hna. 18Judah mi nih thah an timh chin chin, zeicatiah Sabbath a buar lawng si loin, Pathian khi ka Pa, a ti ruangah le Pathian tlukah â ruah ruangah a si. 19Jesuh nih, “Biataktein, biataktein kan chimh hna, Fapa nih Amah lawngin zeihmanh a tuah kho lo, Pa nih a tuahmi a hmuhmi dah ti lo cu, Pa nih a tuahmi pauh, Fa zong nih a tuah. 20Zeitintiah Pa nih Fapa a dawt i a tuahmi vialte kha a zohter tawn, mak nan ti awkah, hi thil hna nâk in a ngan deuhmi zong a hmuhsak chin chin lai. 21Zeitintiah Pa nih mithi kha a thawhter i a nunter bantukin, Fapa zong nih a duhmi pauh a nunter tawn. 22Zeitintiah Pa nih ahohmanh an bia a ceih ballo, biaceihnâk vialte cu Fapa sinah a pêk cang, 23Mi vialte nih Pa an upat lai i Fapa zong an upat nâkhnga. Fapa a upat lomi pauh cu a thlahtu Pa upat lo a si. 24“Biataktein biataktein, kan chim hna, ka bia a thei i aka thlahtu a zummi pauh cu zungzal nunnâk a ngei cang, biaceihnâk ah a phân lai lo, thihnâk in a chuak cang i nunnâk ah a lan cang. 25Biataktein biataktein, kan chimh hna, mithi hna nih Pathian Fapa aw an theih cân a phân lai, atu hi a phân ko cang, a theimi pauh an nung lai. 26Zeitintiah Pa nih Amah ah nun a ngeih bantukin Fapa zong Amah ah nun a ngeihkhawhnâk a pêk, 27cun Mi Fapa a si ruangah a sinah biaceih dingin nawlngeihnâk zong a pêk. 28Hihi nan khuaruah har hlah seh, thlân i a ummi vialte nih a aw an theih cân a phân lai, 29cun cu aw a theitu pauh cu an chuak lai i ṭhatnâk a tuahtu kha nunnâk co dingin an tho lai i Ṭhatlonâk a tuahtu kha thiamlo co in an tho lai. 30Keimah lawngin zeihmanh ka tuah kho lo, hnâ i ka theih ning tein bia ka ceih tawn. Mah duhnâk i um loin aka thlahtu Pa duhnâk i um ka timh peng caah. 31“Ka kong hi Keimah lila nih hngalhter ning law, ka hngalhtermi bia cu a dik lai lo. 32Ka kong hngalhtertu midang a um, Amah nih ka kong a hngalhtermi cu a dik ti ka hngalh. 33Nannih nih Johan sinah mi nan thlah i anih nih biatak a rak hngalhter hna. 34Minung sinin hngalhpinâk hi ka hmuhmi a si lo, asinain khamh nan si khawh nâkhnga hi thil hi ka chimmi an si. 35Johan cu a ceu tak takmi meiin a si, a ceunâk tang i i lawmh zong nan duh rih. 36Asinain hngalhternâk ka ngeihmi hi Johan hngalhternâk nâk in a ngan deuh. Pa nih ka lîm awkah a ka pêkmi rian ka ṭuan liomi nih hin Pa nih a thlahmi ka si hi a hngalhter. 37Cun aka thlahtu Pa zong nih ka kong hi a hngalhter cang. Nannih nih zeitikhmanhah a aw nan thei ballo, a mui zong nan hmu bal lo. 38A bia zong nan chungah a hmun lo, a thlahmi nan zumh lo ruangah. 39Cathiang cu nan dothlat lên ko, zeicatiah cuka ah zungzal nunnâk kan hmuh hmanh maw, tiah nan ruah, hi hna hi ka kong hngalhtertu an si. 40Asinain nunnâk ngei dingin ka sin rat nan duh lo. 41Minung conglomh ka cohlang lo. 42Nannih kan hngalh hna, nan chungah Pathian dawtnâk nan ngei lo. 43Ka Pa minin ka ra i nan ka cohlang lo, midang anmah min in ra hna sehlaw, nan cohlan hna lai. 44Nannih mah le mah â conglawmmi hna. Pathian in a chuakmi conglomhnâk kawl loin zeitindah nan zumh khawh lai? 45Pa sin ah sual kan puh hna lai kha zum hlah u, nanmah sualpuhtu cu pakhat lawnglawng a um, nan i bochanmi Moses hi a si. 46Zeitintiah Moses nan zumh ahcun Keimah zong nan ka zumh awk a si, zeitintiah amah nih Keimah kong pei a ṭial cu. 47A ṭialmi nan zumh lo ahcun zeitindah ka bia nan zumh khawh lai?
தற்சமயம் தேர்ந்தெடுக்கப்பட்டது:
JOHN 5: HAKABSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.