Juan 7
7
Mga sulsug ni Jesus, ega gasiꞌ i pamayaꞌ nirat kanya
1Ega naꞌlay napanaw siꞌ na Jesus, nanlekep-lekep it Galilea. Pagtemden yang ega paꞌ paꞌaduꞌun it Judea ka kuꞌimatayen kanyat mga pagbayaꞌen it mga Judio duꞌun. 2Temed iyan masepek nay pistaꞌ nirang pagpangaranat Pistaꞌ it Mga Ardung, 3inaat si Jesus it mga sulsug ya, “Unuka daꞌka na magliꞌi-liꞌid situ? Kaꞌilangan paꞌaduꞌun kat Judea isaꞌun maltegan it mga pagtulduꞌan mu duꞌun i pagbuwaten mu. 4Sabap egay taw nga magtaguꞌ it pagbuwaten ya in talagang ireg ya nga matanug kanya. Kaꞌilangan, mga pagbuwaten mu ngaytung mga bagay, ipamuya mu nat muꞌsang katataawan.” 5Atkayti i ampang it mga sulsug ngayti ni Jesus ka maski sira, egay pamayaꞌ nirat kanya.
6Maat i tubag ni Jesus it kanira, “Ega paꞌ kayti i ibinggay it aken nga iꞌaduꞌun. Iyan imyu, maski unu nga timpu mapakay nga paꞌaduꞌun kamu. 7Kamu, ega yan mapakay nga isgan it katataawan. Temed aku, pagꞌisgan nira, sabap it ipagpaliꞌwan ku i mga buwat nira nga mararaꞌe-raꞌet. 8Muꞌna kamu nay pakipistaꞌ. Aken, ega na daꞌan, ka subung nat inaat ku, ega paꞌ kayti i ibinggay it aken nga timpu.” 9Aypaꞌ nagpatuduꞌ kanya nga matuud duꞌun it Galilea.
Ipagpamatuud ni Jesus nga muꞌsang ipagpanulduꞌ baw pagbuwaten ya, purus kaꞌirgan it Ampuꞌang Diyus
10Pagkagaring it mga sulsug ya ngayti, ega naꞌlay napanaw na si Jesus nga pakipistaꞌ. Temed subung it magpaliped-liped lamang i buwat ya. 11Duꞌun it pistaꞌan, pagtulusun kanya it mga Judio. “Ariyen bay taw ngayan?” maat nira.
12Dakel-dakel na nga runding it mga taw pasar it kanya duꞌut mga linge-lingeb. May pirang magꞌaat nga “Bilaꞌ, magayen kanya nga taw.”
Temed iyan beken, magꞌaat nga, “Bilaꞌ, ega bayan! Pagbuwaten ya ngayan, pagteꞌag-teꞌagen yay kadakel.” 13Temed yanayti, ega ipagpabusak-busak nira duꞌun it kadadaklan ka magꞌiꞌlam sirat mga pagbayaꞌen nira.
14Iyan nanlubukan nay pistaꞌ, siminled si Jesus duꞌun it Templo baw nanulduꞌ kanya duꞌun. 15Naliluꞌ i mga Judio. Maamaatan sira, “Ari garing it kiyaꞌrutan it itung taw it ega naga nakapagꞌadal kanya?”
16Tiyubag sira ni Jesus, nga magꞌaat, “Ipagpanulduꞌ ku ngaytu, egaytu sadili ku, in daꞌga garing tu duꞌut kanya nga nagtaꞌeg it aken ita paꞌasitu. 17Kumpur magꞌireg sumunud it kaꞌirgan it Ampuꞌang Diyus, matantuwan tu nira in unu, garing talaga duꞌun it Ampuꞌang Diyus i ipagpanulduꞌ ku ngaytu, u in kat sadi-sadili ku na lamang. 18Ka iyan nga magpanulduꞌ it sadili yang pasepsep, egay beken nga pagpaꞌresan ya, bantugun kanyat katataawan. Temed iyan ngayan nga pagpaꞌresan yat magpanulduꞌ, bantugun i nagtaꞌeg it kanya, purus matuud i kanya baw egay antap it nakem ya nga maraꞌe-raꞌet. 19Daꞌga baꞌ si Moises i nagbegay it imyu it mga urdin? Temed maski siyu it imyu, ega talagay kamatuudan nga pagsunud it mga urdin ngayti. In talagang kamatuudan i pagsunud mi, unuka kuꞌimatayen mi aku?”
20Maat it kadakel ngayti, “Pagsasaruman ka baytut maraꞌe-raꞌet! In daꞌga pagsasaruman ka, siyuy kuꞌimatay it imu?”
21“Esa lamang nga bagay i binwat ku it Aldaw it Kapaꞌnaan,#7:21 Kapitulu 5:1-18. temed daꞌkamu na mamagkabaraꞌan baw naliluꞌan mi na,” maat siꞌ ni Jesus ngayti. 22“Ibinggay ni Moises it imyu i urdin nga pasar it pagturiꞌ. (Egaytu maat garing it ki Moises. Garing nagaytut mga kagiyaringanan mi paꞌ.) Bawnga pagbuwaten mi it maski Aldaw it Kapaꞌnaan.#7:22 Genesis 17:11-12. 23In magpanuriꞌ kamu it maski Aldaw it Kapaꞌnaan, isaꞌun lamang masunud mi i ipiyagꞌurdin ngayti ni Moises, ta unuka pagꞌisgan mi aku sabap duꞌun it pagpagayen ku ngayti it magsarut kat Aldaw it Kapaꞌnaan? 24Kaꞌilangan kat kataldengan i ipagꞌukuman mi, ega kuꞌaw-kuꞌaw nga ukuman.”
Nabagiꞌ-bagiꞌ i pikir it kadakel sabap it ki Jesus
25Iyan magpanulduꞌ na ngayti si Jesus, maamaatan nay beken nga taga Jerusalem, maat nira, “Daꞌga baꞌ itu nay taw ngayan nga kuꞌimatayen nira? 26Kayti, waytu na, magpanulduꞌ na kanya kat kadadaklan, temed ega nagay pagꞌampangen nira nga kuntraꞌ it kanya. Barang magkakilalaan nat mga pagbayaꞌen tami nga kanya nay paꞌaaten ngayang Cristo nga isiyanggup it Ampuꞌang Diyus. 27Temed daꞌga baꞌ egay magkaꞌrut in ariyen i garingan it Manriribring Adiꞌ ngaytung isiyanggup nga paꞌasitu? Takaꞌ in itung taw, urut tami nga muꞌsa i giyaringan ya.”
28Ta it atkayti, nanggaꞌmaran na si Jesus ngayti, nga magpanulduꞌ duꞌun it Templo. Maat ya, “Unu baꞌ, magkakilalaan mi aku? Unu, magkaꞌrutan mi in ari talagay giyaringan ku? Yay matuud, egaytu naꞌasitu aku it sadi-sadili ku na lamang, in daꞌga may timnaꞌeg it aken. Purus kamatuudan i kanya ngaytu temed ta, ega magkakilalaan mi kanya. 29Temed aku, kilala ku kanya, ka duꞌun i garing ku, baw kanya i nagtaꞌeg it aken it paꞌasitu.”
30Pagkagneg it mga taw ngayti, pagkudakpen nira si Jesus, temed ega naga nabwat nira, sabap ega paꞌ miyabut i ipiyabetang-betang nga timpu. 31Temed dakel naga sira nga magpakimatuud it kanya. Maamaatan sira, “Unu sadaw, in paꞌasitu na ngayan i Cristo ngayang paꞌaaten, makabwat kanya it mga tandaꞌanan nga kalililuꞌang bagay nga subraꞌ paꞌ it magkabwat it itung taw?”
32Naringid-ringidan it mga Pariseo i pamagrundingen it mga katataawan ngayti pasar it ki Jesus. Aypaꞌ binwat it mga Pariseo ngayti baw mga pagbayaꞌen it mga sasirduti, piyapaꞌaduꞌunan nira it mga taawan nira nga guwardiya it Templo ka dakpen si Jesus ngayti. 33Ta it atkayti, maat ni Jesus, “Maꞌiba-iba mi paꞌ aku it sang dekeyeꞌ nga timpu bawnga muliꞌ aku nayan duꞌun it nagtaꞌeg ngaytit aken it paꞌasitu. 34Tegelen mi yan aku it tulus, temed ega nayan maparagan mi aku, ka ega yan kaꞌaduꞌun kamu it uliꞌan ku ngayti.”
35Namagrunding-rundingen siꞌ i mga Judio ngayti, “Ay ari tuy aduꞌunan it taw ngaytu nga ega maparagan tami? Barang duꞌun i aduꞌunan ya it mga kaꞌibaan ta ngayan nga mga Judio nga nagpakilaꞌuk-laꞌuk nat mga Griego duꞌut banwa nira, ka duꞌun nat kanira i panulduꞌan ya. 36Unu yan i ireg sugiden it iyan ngayang sugi-sugid ya nga maat, ‘Tegelen mi yan akut tulus, temed ega nayan maparagan mi aku, ka daꞌkamu kaꞌaduꞌun it uliꞌan ku ngayti’?”
37Iyan kiyaꞌpusang aldaw nga kamataan it pistaꞌ, timnindeg si Jesus baw nanggaꞌmaran it dadakulaꞌ, nga magꞌaat, “Patpad sinit aken i kumpur pagbaꞌnekan ka minum. 38Ka ituy kaꞌulugan it ampang nga magbebtang duꞌut kasuratan ngayang ampang it Ampuꞌang Diyus. In siyuy magpamayaꞌ baw magsarig it aken, may tumumbud nga magbegay it matuud nga kaꞌgenan, nga garing duꞌut seled ya, subung nagat pagtumbud it danum.” 39Pagpapuntuꞌan it ampang ya ngayti, Espiritu Santo nga pasarum duꞌut kumpur mamayaꞌ baw sumarig nat kanya. Lamang iti nga timpu, ega paꞌ magsasarum kat bilug it mga taw. Ega paꞌ tiyaꞌeg kanyat pasarum ka ega paꞌ nakaꞌuliꞌ si Jesus duꞌut langit nga tumanggap it kabantugan nga areg it Amaꞌ ya.
40Iyan beken, pagkagneg nirat iti nga inaat ni Jesus, maat nira, “Talagang egaytuy belag, Prupitaꞌ na ngayan.”#7:40 Deuteronomio 18:15-18.
41Iyan kat beken, maat nira, “Itu na baytuy Cristo ngayang Manriribring Adiꞌ nga isiyanggup it Ampuꞌang Diyus.”
Temed iyan kat beken, maat nira gasiꞌ, “Ta unu bayan, duꞌut Galilea i garingan it Adiꞌ ngayan? 42Ka daꞌga baꞌ nakabtang ngayan duꞌut siyubli-subli tami nga kasuratan ngayang ampang it Ampuꞌang Diyus, nga magꞌaat, ‘Iyan Cristo ngaytu, liꞌwanan ya kat mga tungtung-inapuꞌ ni David, baw garingan ya duꞌun it Betlehem nga lansangan ni David ngaytu.’” 43Aypaꞌ sabap it itiꞌen ngayti, nabagiꞌ-bagiꞌ i pikir it kadakel sabap it kanya. 44Iyan beken, ireg nira dakpen na kanya, temed subuk magꞌaliꞌ paꞌ sira.
Kadakel it mga pagbayaꞌen it mga Judio, talagang ega magpamayaꞌ it ki Jesus
45Namagꞌuliꞌ na i mga tiyaꞌeg ngayting mga guwardiya it Templo duꞌun it namagtaꞌeg ngaytit kanira nga mga pagbayaꞌen it mga sasirduti baw mga Pariseo. Pagꞌabut nira, inaat sirat namagtaꞌeg ngaytit kanira, “Ta ari nay itiyaꞌeg namen ngayat imyu? Unuka egay magbabayaꞌ nga kanya?”
46Katubag sira, maat nira, “Kagalang-galang it imyu, yanaytuy kaꞌlay, egay taw nga atkayan nang gayen it pagꞌampangen.”
47“Talagang pati palan kamu, nateꞌag-teꞌag na gasiꞌ!” maat it mga Pariseo ngayti. 48“Kami ngaytu nga mga pagbayaꞌen baw mga Pariseo, siyuy namuyaan mit amen nga may pamayaꞌ it kanya? Daꞌga ega? 49Iyan lamang i magpamayaꞌ it kanya, iyan kadakel it mga raꞌyat ngayan nga egay uru-urut nira it mga kaꞌurdinan ta. Daꞌga baꞌ mga taw ngayan, siyumpaan it Ampuꞌang Diyus nga rigaen ya?”
50Nadnganan nga duꞌun si Nicodemo, namasyar ngayti duꞌut ki Jesus it magpapuꞌun paꞌ si Jesus it manulduꞌ, ka kanya Pariseo naga. Iningkut ya i mga kaꞌibaan ya ngayti, maat ya, 51“Daꞌga baꞌ kuntraꞌ kat mga kaꞌurdinan tami nga ega basta-basta betanganan it ukuman i esang taw in ega paꞌ naꞌimbistigar nga napakaꞌrutan it magayen in unuy pagbuwaten yang kamaliꞌ?”
52“Aa bilaꞌ,” maat i tubag it mga kaꞌibaan ya ngayti. “Unuytu? Unu, pati ikaw, esa nagat mga sisindiren ngayting taga Galilea? Saꞌup-saꞌupun mut masa i mga kasuratan tami, mamuyaan mu yan asan nga egay prupitaꞌ nga manggaring kat Galilea.”
Tiyaban duꞌut ki Jesus i pagꞌaꞌasawaen nga babay nga may lalaki ya
53Nagsigꞌuliꞌ nay natingped ngayting mga katataawan.
தற்சமயம் தேர்ந்தெடுக்கப்பட்டது:
Juan 7: TBWONT
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 1992, Wycliffe Bible Translators, Inc. All rights reserved.