Matay 2
2
Apo do teyhesa ka ili a tomazogaw nya tao
1No kapeypanirsirngen da pa si Helote am matazak a tao si Yeso do Podiheng a ili do Yotay. O manitanita rana so mata no hanit a nimapo do teyhesa ka ili am mangay sira do Yelosaleng. 2Maniring sira am, “Wanjin jya o nimatazak a tao a panirsirngen no tao do Yotay. Ta namen nimacita o mata no hanit do daddan no araw a yongkad no kanimatazak na rana. Ori o namen nyai a yaomraralay nya.” 3Mamizing na no panirsirngen a meyngaran si Helote am marahet o onowned na. Akman sang sira o tao do Yelosaleng a mamogaw. 4Makarahan am lovoten na ni Helote o panipanirsirngen no mapatanatanang so nakem da si Ama ta do to a kano mangnanao no iwawalam na ni Ama ta do to. Maniring jira am, “Do wanjin o na katazakan no Misayya a ipanci da no panoyonoywan na so ciring ni Ama ta do to no kakwa.” 5Maniring sira am, “Do Podiheng a ili do Yotay. Ta o yadomket a ciriciring da no panoyonoywan na so ciring ni Ama ta do to am,
6‘Inyo rana tao a meyvahay do Podiheng a macinapnap do Yotay am tana ney likey na o ili nyo am ney manhama kamo a tao. Ta amyan jinyo so asa ka tao a makayokod ninyo a Isedi a tao.’ ”#2:6 Mikaya 5:2.
7Makarahan am lovoten na ni Helote a panirsirngen o manitanita so mata no hanit a tao a kapanahes na nya jira so araraw na no nipeytotwaw no mata no hanit ang. 8Makarahan am ipanci na sira mangay do Podiheng. Maniring jira am, “Pakapyahen nyo pala kalahen o kanakan ang. Si makala nyo am ipanci nyo jyaken, ta mangay ko a iraralay.”
9Mamizing da o ciring na am mangay rana sira. Makarahan am to da cita pa tomwaw o mata no hanit a nimacita da do daddan no araw a meypalanginan nira to meynonozey a mangay a someyked do nikatazakan a tao no kanakan ang. 10So nisaray da makacita so mata no hanit ang.
11Somdep sira do vahay am macita da o kanakan a kano ina na si Madiya. Am ori o nilogod da amraralay no kanakan ang. Makarahan am babahen da rana o nipalolo da ovay a kano mahangno a haneng a kano makdeng a kosozi a yazaw da sya. 12Meysinaoli sira o manitanita so mata no hanit a tao am patareken na o rarahan da ni Ama ta do to, do kanimapatateynep na jira a jyangay ji Helote a panirsirngen.
Somazok do Ayci a pongso
13Mangay rana sira am patateynepan na si Yoseyvo no tinsi ni Ama ta do to. Maniring jya am, “Peyvangon rana kangay mo nira meyina a somazok do Ayci, kato nyo ngyanan dang a meyvahay mangay no ipanci ko na inyo a komaro do dang. Ta si Helote am na kalahen o kanakan a yawakwaken.” 14Am ori o nyangayan na ni Yoseyvo nira meyina do Ayci a meyvahay do dang, 15mangay do nikawakwak ni Helote. O icyakman na sang no vazay am pangononongan na o mina ciring no panoyonoywan na so ciring ni Ama ta do to. Ta maniring am,
“Nipeysinaoli ko o anak ko a apo do Ayci.”#2:15 Hesiya 11:1.
Wakwaken na ni Helote o aro a kakanakan
16Katenngan ni Helote o kanimlita da jya no manitanita so mata no hanit am meyoyaoya. Am ori o nipanovoy na so itaysang a mangay omwakwak so anak da mahakay a mablit rana adwa so kakawakawan a kano jyablit pa so ikadwa so kakawakawan a minalikey do Podiheng a kado peycyeylilyan na, do gazagazan na so araraw no nipakacittan da so mata no hanit. 17O icyakman na sang am todey mangononong o mina ciring no panoyonoywan na so ciring ni Ama ta do to a meyngaran so Yedimi. Ta maniring am,
18“Makamizing do Lama so sivosivovoong ni Reyci a omlololos a amlavi do ananak da a jya nimakey a padnadnahen da so pahad, do kanimamimin no anak da niwakwak da.”#2:18 Yedimi 31:15.
Meysinaoli sira apo do Ayci
19Mawakwak si Helote am patateynepan no tinsi ni Ama ta do to si Yoseyvo do Ayci. 20Maniring jya am, “Peyvangon rana, kangay mo nira meyina do Isedi. Ta yarana nimawakwak o yapwa amwakwak si Yeso.” 21Makarahan am ipeysinaoli na rana ni Yoseyvo sira meyina yangay do Isedi. 22Ikongo do nimamizing na o anak ni Helote a meyngaran so Acilaw a omlit do ama na a panirsirngen no Yotay, am ori o ji na nimangai do Isedi. Am ori o nipatateynepan na pa ji Yoseyvo ni Ama ta do to. So nipananawan na no angayan da. Ori o nyangay da tomayo do Cyadidi. 23O meyngaran so Nasale a ili am ori rana o nikaplinan da meyvahay. O icyakman na sang no vazay am todey mangononong o mina ciring no panoyonoywan na so ciring ni Ama ta do to. Ta maniring sira am, “Iya rana am ngaranan da tao do Nasale.”
தற்சமயம் தேர்ந்தெடுக்கப்பட்டது:
Matay 2: snt
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
The Bible Society in Taiwan