GÉNESIS 2
2
1Diosca jahua pachatapish, cai pachatapish, chaipi tucui imalla tiyashcatapish ruhuanataca tucuchircami. 2Diosca pai ruhuana cashcataca canchis punzhapimi tucuchirca. Tucuita ruhuashpaca, canchisniqui punzhapica samarircami. 3Chai canchisniqui punzhatami Diosca bendiciashpa, paipaclla cachun ruhuarca. Chai punzhapimi Diosca tucui cai pachapi ruhuanata tucuchishpa samarirca. 4Chashnami cai pachapish, jahua pachapish callarirca.
Edén huertapi Adanta Dios churashcamanta
Mandac Dios cai pachata, jahua pachata ña ruhuashca quipaca, 5manarac tamyarcachu. Chaimantami cai allpapica ima yurapish, quihuapish manarac huiñarca. Shinallatac allpata allichic runapish manarac tiyarcachu. 6Shina cacpipish, allpamanta samai shina yacu llucshishpami, tucui allpataca jucuchicurca. 7Chaimantami Mandac Diosca ñuto allpamanta runata ruhuashpa, singapi causaita cuc samaita pucurca. Chaimantami runaca causaiyuc carca.
8Chai quipami Mandac Diosca inti llucshic ladopi Edén huertata ruhuashpa, pai ruhuashca runataca chaipi churarca. 9Mandac Diosca chai huertapica tucuilaya sumac micunalla granocunata pucuc yuracunatami huiñachirca. Shinallatac huerta chaupipica causaita cuc yuratapish, alli cashcata, mana alli cashcata yachachic yuratapish huiñachircami.
10Chai Edén huertata parcungapacca shuc jatun yacumi llucshicurca. Chai yacumi chuscu ladota chaupirishpa ricurca. 11Chai chaupirishca shucniqui yacuca Pisonmi. Chai yacumi curi tiyac tucui Havila llactata muyun. 12Chai allpapi tiyac curica mai allimi. Chai allpapica bedelio yuracunapish, ónice rumicunapish tiyanmi. 13Ishcainiqui yacuca Gihonmi. Chai yacumi tucui Cus llactata muyun. 14Quimsaniqui yacuca Hidekelmi. Chai yacuca Asiria llactamanta inti llucshic ladotami ricun. Chuscuniqui yacuca Eufratesmi.
15Mandac Diosca chai Edén huertapimi pai ruhuashca runataca trabajashpa, cuidashpa causachun churarca. 16Chashna churashpami, Mandac Diosca chai runataca: «Tucui huertapi tiyac yuracunapi pucushcata micui pudinguimi. 17Ashtahuanpish alli cashcata, mana alli cashcata yachachic yuramantaca ama micunguichu. Ima punzhami chai yuramanta micungui huañunguitacmi» nirca.
18Chai quipaca Mandac Diosca: «Carica pailla causanaca mana allichu. Chaimanta paipac allipac shuc ayudacta ruhuasha» nirca. 19Mandac Diosca allpamantami tucui cai pachapi causac animalcunatapish, jahuata volac animalcunatapish ruhuarca. Chashna ruhuashpami, shutita churachun, Adanpacman apamurca. Tucui animalcunaca Adán shutichishcami. 20Chashnami Adanca sacha animalcunatapish, jahuata volac animalcunatapish, shinallatac charina animalcunatapish shutichirca. Chashna shutichishpapish paipac allipac ayudactaca mana charircachu.
21Chaimantami Mandac Diosca Adanta yallita sueñuchishpa, shuc costillasta llucchishpa, aichataca allichirca. 22Carimanta llucchishca costillasmantami Mandac Diosca shuc huarmita ruhuashpa, Adanman curca. 23Chaimantami Adanca:
«Caica ñuca tullumanta,
ñuca aichamanta ruhuashcami.
Paica carimanta ruhuashca cashcamantami
“Huarmi” canga» nirca.
24Chaimantami carica taita mamata saquishpa, paipac huarmihuan tandarishpa, shuclla tucunga.
25Adanpish, paipac huarmipish lluchullami carca. Shina cashpapish, mana pingarcacunachu.
தற்சமயம் தேர்ந்தெடுக்கப்பட்டது:
GÉNESIS 2: QCA10
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.