Byak 11
11
1Entumwa hamwe n'abanyaruganda ab'omuri Buyudaaya bakahurira ngu Abanyamahanga nabo baikiriize ekigambo kya Ruhanga. 2Petero ku yainamukire Yerusalemu, ab'ekigombe ky'abashazirwe baamuhaahuuza, 3nibagira bati: Tuhuriire ngu obaire nootaayaayira abatashazirwe kandi noorya nabo; nikwo? 4Petero yaabagarukamu naabashoboororera buri kimwe nk'oku byakurataine.
5Yaatandika ati: Eizooba rimwe ku naabaire ndi omu rurembo rwa Yopa ninshaba, naabonekyerwa ekirikushusha omwenda muhango, nikishuuma kuhika ahansi kikwatsirwe enshonda zaakyo ina. Omwenda ogwo gukahika ahansi haihi naanye. 6Ku naagwetegyereize, naareeba gurimu emiringo yoona ey'enyamaishwa ezirikugyendesa amaguru n'ezirikugyendesa enda n'ezirikugurukira omu kaabunga. 7Bwanyima naahurira eiraka eririkungira riti; Petero, imuka, oite, orye. 8Kwonka naagarukamu nti: Mbirimba, Mukama wangye! Tihakabahoga kirikuzira nari ekihagaro ekiragiire omu kanwa kangye. 9Eryo eiraka ryagamba obwa kabiri niryema omu iguru, riti: Eki Ruhanga yaayerize otarikyeeta ekirikuzira. 10Ekyo kyayekuratana kityo kashatu. Bwanyima ogwo mwenda gwanyururwa, gwagarukayo omu iguru. 11Omuri ago magingo, abashaija bashatu baahika aha nju ei naabaire nindaaramu, batumirwe nibaruga Kaisariya kuunyakiira, 12na Mutima yangambira kugyenda nabo ntarikubangaanisa. Abanyaruganda aba mukaaga nabo baagyenda naanye, twataaha omw'ogwo mushaija. 13Yaatugambira ku areebire maraika ayemereire omu nju ye, akamugira ati: Tuma omuri Yopa, oyeeteyo omuntu orikwetwa Simooni Petero, 14akwiniire obutumwa oburikwija kukujuna n'eka yaawe yoona. 15Ku naabaire ninkitandika nti kugamba, Mutima Orikwera yaabaijaho nk'oku yaatwizireho bwabiso, 16kandi naijuka ku Mukama yaagizire ati: Yohaana akabatiza n'amaizi, kwonka imwe muryabatizibwa na Mutima Orikwera. 17Obwo naamanya ekiconco eki Ruhanga abahaire, ku nikyo kimwe n'eki yaatuhaire obu twaikiriza Mukama Yesu Kristo. Mbwenu nyowe nkaba ndi oha owaakuzibiire Ruhanga? 18Ku yaabagambiire ebyo, baatuuza. Baahimbisa Ruhanga nibagira bati: Buzimazima Ruhanga ahaire n'Abanyamahanga okwegarukamu okurikutungisa amagara.
Ekigombe ky'Abakristo omuri Antiokiya
19Abaikiriza abaataataine nibahunga okuhiiganisibwa okwabaire ahari Sitefano, bakagyenda, baahika Foinikiya na Kupuro na Antiokiya, obwo nibarangirira Abayudaaya bonka ekigambo kya Ruhanga. 20Kwonka bamwe omu baarugire Kupuro na Kureene, bakaza Antiokiya, baatandikirayo kwegyesa Abaguriiki, nibabagambira Amakuru Marungi ga Mukama Yesu. 21Mukama yaabakwatsa; abantu baingi abaikiriize baakubuukira Mukama.
22Ekigombe ky'Abakristo eky'omuri Yerusalemu, ku kyahuriire ebyo, kyatuma Barinaba kuza Antiokiya. 23Ku yaahikireyo, yaareeba oku Ruhanga ahaire abo bantu emigisha, yaashemererwa. Yaabeehanangiriza boona kuguma bari abeesigwa kandi ab'amazima ahari Mukama n'omutima gwabo gwona. 24Barinaba ogwo akaba ari omushaija murungi, oijwire Mutima Orikwera n'okwikiriza. Abandi bantu baingi baayehongyera Mukama.
25Bwanyima Barinaba yaaza Taruso kusherura Saulo. 26Ku yaamuboine yaamureeta Antiokiya. Bombi baamarayo omwaka gwona bari hamwe n'ekigombe ky'abaikiriza baayo, nibeegyesa abantu baingi. Antiokiya, niyo abaikiriza baabandiize kwetwa Abakristo.
27Ku baabaire bakiri okwo, abarangi bamwe baashuuma Antiokiya nibaruga Yerusalemu. 28Omwe aharibo orikwetwa Agabo, akarangisibwa Mutima ku harikwija kubaho enjara omu nsi yoona. Haza ekyo kyabaho omu busingye bwa Kalaudio. 29Abaikiriza nikwo kucwamu kutwekyera abanyaruganda abari Buyudaaya eby'okubakwatsa, buri omwe yaahayo eki arikubaasa. 30Ekyo baakikora, baabitweka Barinaba na Saulo kubikwatsa abakuru b'omu kigombe ky'abaikiriza.
Petero okwihwa omu kihome
தற்சமயம் தேர்ந்தெடுக்கப்பட்டது:
Byak 11: RKK2008
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
The Bible with Apocrypha in Runyankore-Rukiga, new revised joint translation © The Bible Society of Uganda, 2008.