Byak 8
8
1Eryo izooba ab'ekigombe ky'abaikiriza ab'omuri Yerusalemu baatandika kuhiiganisibwa munonga. Boona, okwihaho entumwa, baataataanira omu byanga bya Buyudaaya na Samariya. 2Kwonka abantu abarikutiina Ruhanga baaziika Sitefano ogwo, baamucurira munonga.
3Saulo nawe yaakora kyona eki arikubaasa kuhwerekyereza abaikiriza, yaataaha omuri buri nju, yaakwata abashaija n'abakazi, yaaboohereza omu kihome.
Okurangirira Amakuru Marungi omuri Samariya
4Abo baikiriza abaataataine bakagyendagyenda nibabuzya Amakuru Marungi. 5Omwe omuribo ni Filipo, owaagiire omu kirorero ky'omuri Samariya, akabagambira ebya Kristo. 6Ekimbuuro ky'abantu, ku baahuriire ebi Filipo arikugamba, baareeba n'obumanyiso obu arikukora, baikiriza n'omutima gumwe ebi arikwegyesa. 7Kandi baingi abaabaire batembirwe ebyago byabarugaho nibyamuza, na baingi abaabaire bazingazingirwe n'abarema baakizibwa. 8Haabaho okushemererwa kwingi omuri ekyo kirorero.
9Kwonka omuri ekyo kirorero hakaba harimu omushaija orikwetwa Simooni, owaabaire naakora emigyereko, naatangaaza Abanyasamariya. Akaba naayeyeta omuntu mukuru, 10kandi boona okuruga aha muto okuhika aha mukuru baamwemamu, nibagira bati: Ogu niwe maani ga Ruhanga agarikwetwa Rugambwa. 11Ekyo bakakikora ahabw'okuba akaba amazire nabo omwanya muraingwa naabakorera egyo migyereko. 12Kwonka ku baikiriize Amakuru Marungi, agu Filipo yaabagambiire aha by'obukama bwa Ruhanga n'aha by'eiziina rya Yesu Kristo, abashaija n'abakazi baabatizibwa. 13Simooni nawe yaikiriza. Ku yaaherize kubatizibwa, yaaguma na Filipo naareeba obumanyiso n'eby'okutangaaza ebikuru ebi Filipo yaabaire naakora, kandi nibimutangaaza.
14Omuri Yerusalemu entumwa ku zaahuriire ngu ab'omu Samariya baikiriize ekigambo kya Ruhanga, zaabatumaho Petero na Yohaana. 15Nabo ku baahikireyo, baashabira Abanyasamariya kuheebwa Mutima Orikwera, 16ahabw'okuba hakaba hatariho n'omwe omuribo ou yaabaire yaizireho, kureka bakaba babatiziibwe, omu iziina rya Mukama Yesu kwonka. 17Batyo Petero na Yohaana baabataho engaro, baaheebwa Mutima Orikwera.
18Simooni ku yaareebire baaheebwa Mutima ahabw'entumwa kubataho engaro, yaaha Petero na Yohaana empiiha, 19naagira ati: Naanye mumpe obushoboorozi nk'obwo, weena ou ndaateho engaro aheebwe Mutima Orikwera. 20Petero yaamugarukamu ati: Haza ogira ngu ekiconco kya Ruhanga nikigurwa empiiha? Kakyengyere n'ezo mpiiha zaawe! 21Ekyo tokiinemu mugabo kandi tori w'okukibagana, ahabw'okuba omutima gwawe tiguri gye omu maisho ga Ruhanga. 22Yeteise ekyo kibi kyawe, oshabe Mukama akusaasire ahabw'okuteekateeka otyo. 23Manya nindeeba ku oitsirwe eihari, kandi ku obohirwe enjegyere z'ekibi. 24Simooni nikwo kubagarukamu ati: Naimwe munshabire ahari Mukama, ebyo ebi mwagamba hatagira ekyambaho.
25Ku baaherize kugamba ekigambo kya Ruhanga n'okukihamya, baagaruka Yerusalemu nibarangirira ab'omu byaro bya Samariya Amakuru Marungi.
Filipo okubatiza Omunyaetiopiya
26Maraika wa Nyakubaho yaagambira Filipo ati: Imuka, oze ogw'obukiizi-bwa-buryo, otoore omuhanda gw'eihamba, ogurikuruga Yerusalemu nigurunduka Gaaza. 27Atyo yaimuka yaagyenda. Mbwenu hakaba hariho Omunyaetiopiya omushaahu, owaabaire agiire Yerusalemu kuramya, ari omutegyeki omu kikaari kya Kandaake, Omugabekazi wa Etiopiya, kandi ari omubiiki we omukuru. 28Obwo akaba ari omu rugyendo rwe naagaruka owaabo. Ku yaabaire ashutami omu kigaari kye, yaashoma ekitabo kya Isaaya omurangi, 29Mutima yaagambira Filipo ati: Irooko ohikye ekigaari kiriya. 30Filipo ku yaakihikire, yaamuhurira naashoma ekitabo kya Isaaya omurangi; yaamubuuza ati: Beitu ebi orikushoma noobyetegyereza? 31Onu yaamugarukamu ati: Nimbaasa nta kubyetegyereza, ntaine orikubinshoboororera? Atyo ayeta Filipo kuza omu kigaari, ashutama nawe. 32Mbwenu ekicweka ky'omu Byahandiikirwe eki yaabaire naashoma, kikaba nikigira kiti:
Akaba nk'entaama erikutwarwa omu ibaagiro;
yaaba nk'akataama akatateeza kari
omu maisho g'orikukashara ebyoya.
Nawe nikwo ataraashamize kanwa ke.
33Akabundikwa, yaabura ow'okumurwanaho.
N'oha orishoboorora ab'oruzaaro rwe,
amagara ge omu nsi ku garaabe gaacwirweho!
34Omushaahu nikwo kuhindukira Filipo akamugira ati: Ngambira, omurangi naayegambaho, nari naagamba aha ndiijo muntu? 35Filipo yaatandikira aha kicweka ekyo eky'omu Byahandiikirwe, okuhitsya obu yaamushoboororeire eby'Amakuru Marungi ga Yesu. 36Ku baagumiizemu, baarugaho baahika aha maizi. Ogwo mushaahu yaagira ati: Amaizi ka gari aha, ekirikunzibira kubatizibwa ni ki? [ 37Ndi Filipo, ati: Ku oraabe noikiriza n'omutima gwawe gwona nikibaasika. Agarukamu ati: Niinyikiriza ku Yesu ari Omwana wa Ruhanga.] 38Atyo aragiira ab'ekigaari kwemerera. Bwanyima Filipo n'omushaahu baragara omu maizi, Filipo amubatiza. 39Ku baagatuuhuukiremu, Filipo yaatwarwa Mutima wa Mukama; omushaija ogwo omushaahu tiyaamucwa ryera bundi; yaagumizamu omuhanda ashemereirwe munonga. 40Filipo ku yaagiire kugira ati, yaayeshanga yaahikire Azooto; yaagumizamu orugyendo rwe naarangirira abantu Amakuru Marungi omuri buri kirorero, yaarugaho yaahika Kaisaariya.
Okuhinduka kwa Saulo
(Byak. 22:6-16; 26:12-18)
தற்சமயம் தேர்ந்தெடுக்கப்பட்டது:
Byak 8: RKK2008
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
The Bible with Apocrypha in Runyankore-Rukiga, new revised joint translation © The Bible Society of Uganda, 2008.