MATIYE 16
16
Kaanə Farisiyeŋ də kaanə Saduseyeŋ minti Yeesu jəə miɗi la a té
(Mat. 12.38-39; Mar. 8.11-13; Liki 11.16, 29; 12.54-56)
1Kaanə *Farisiyeŋ də kaanə *Saduseyeŋ bəŋ sar Yeesu bə bi a gulu kuɗu. Yə əsəŋ bə law ku minti wə jəə miɗi la a té cəərə karmana bə ge dər té wəra minti səɓaki nuutuŋ bəŋ haa kasi Pepeŋ da. 2Yeesu hərnəy kel minti: «Cəwaŋ dəraŋ ne minti kamraŋ tarmə ko bə apəyaŋa kəələŋ, aŋ minti: ‹Koŋ ji dibiinim holoŋ.› 3Bəbəəgaŋ haa paŋ, kamraŋ jəəne kəələŋ kas zuɓə-zuɓiŋ, aŋ pa minti: ‹Haa! Koŋ hage dayna ɗe!› Aŋ asaŋ ɓarse dər kar gə apəyaŋ də gə adawraŋ. Səma aŋ paapa gə nakə-neke bə ɓarse dər kar gə hebkənaŋ bə naanaanə mo? 4Kaa gə dogoynaŋ, yə wəra bayməlaŋ, yə paapa bə isi gud Pepeŋa ɗeketi bə gəm. Yə bele minti ten jəə karman bə ge dər la a té. Səma koo karman bə ge dər anə məna ten jəy diy ba. Yə ase tó bə minti jəŋ sar Zonasi təwa, ten jəy baalaŋ bə deŋe toŋ ba#16.4 Miɗi də minti jəŋ sar Zonasi haa bə minti wə hətəŋ soope giidə askaŋa, wə haraŋ bə kele da warda dədərgə. Haa sar kel gə minti Yeesu bə hiti yaŋ soope giidə tələŋkə, wə bə hare bə kele də warda dədərgə caw..» Kəya Yeesu yəəkənəy, wə kooroŋ faɗi.
Siipə kə kaanə Farisiyeŋ də kaanə Saduseyeŋ
(Mar. 8.14-21; Liki 12.1-6)
5Bə minti *kaa gə gud Yeesuŋ cakɗaŋ warna cəərə kan kəmtəŋ na agal naaya taŋ naŋ, yə ɗeŋ a ase minti ciiri gaŋ bay humi mappa kəəsi da. 6Kəya Yeesu əsəŋ bə wəətiya minti: «Aŋ jeɓrə la wəra pisi! Aŋ amə kusrəŋ la wəra pisi ku siipə kə kaanə *Farisiyeŋa də kaanə *Saduseyeŋ.» 7Kəya yə əsəŋ bə ce awəya aduubə də kumsi minti: «Wə waate bədoona haa gud bə minti mappa paapa kasi áŋa baŋ ɗe!» 8Yeesu asaŋ kel gə minti aduubə diŋ, wə wəətənəy minti: «Aŋ bə ce awəya aduubə də kumsuŋa minti mappa paapa kaasəŋa baŋ haa səm mo? Aŋ paapa gə nakə-neke bə ase kel kəm ba pə mo? 9Cəərəŋ paapa bə ɗiki cəərə mappa wiiɗiwa də minti ten ɓarsəna a kaa guɓ-guɓi wiiɗiwiŋ, daana cəərə kəlam də bə minti aŋ ɗustunu də guudə də minti a yaakaŋ, minti yə aniinaŋ bə mo? 10Daana mappa seeɗa'a də minti ten ɓarsəna a kaa guɓ-guɓi waaɗe'iŋ, daana cəərə titiki kəmtəŋ gə minti aŋ ɗustunu də guudə də minti a yaakaŋ, minti yə aniinaŋ bə mo? 11Bə jəŋ naanaanə minti aŋ paapa bə ase kela kəm baŋ mo minti ten waataŋ haa paapa sam mappa baŋ? Ten waatənaŋ minti aŋ amə kusrəŋ la wəra pisi ku siipə kə kaanə Farisiyeŋa də kaanə Saduseyeŋ.» 12Kəya yə əskəŋ kel kəm, minti wə waataŋ té haa paapa minti té amə kusrə té la sar siipə də dər mappaŋa ba, té amə kusrə té la haa ku hate kə kaanə Farisiyeŋa də kə kaanə Saduseyeŋ.
Piyer minti Yeesu haa Hulum bə minti Pepeŋ ŋəmnuŋ
(Mar. 8.27-30; Liki 9.18-21)
13Kəya Yeesu faŋ, wə kooroŋ warna maŋ sar vil də Sezare kə Filipiŋ na. Kəya wə əsəŋ bə le ku *kaa gə guuduŋa minti: «Kaŋ waate cəərə *Kormə Hulúm minti wə haa mindi mo?» 14Yə hərnu kel minti: «Sərdə kaa minti tam haa Zaŋ Batisi. Sərdə kaa kaayaŋ minti tam haa *Eli bə dayday, kaayaŋ teŋ minti haa Zeremi, ɗalba *hulum bə jogte ku mini kə Pepeŋ gud kaayaŋ gə daydaya.» 15Kəya wə ləənəy kuy gəm minti: «Aŋ gəm ta, aŋ waate cəərən minti ten haa mindi mo?» 16Kəya Simoŋ Piyer hərnu kel minti: «Tam haa Kristu, *Hulum bə minti Pepeŋ ŋəmnuŋ, Kormə Pep bə dədərgəŋ.» 17Kəya Yeesu wəətunu minti: «Simoŋ kormə Zonasiŋ, waaleŋ nəmti gud maa mo tam fəlaŋ gud kel teŋ haa paapa tam də kusrum ba, gaanam guudi wəra haa Barən bə minti apəyaŋ. 18Ten gəm ta, ten waatam minti tam haa Piyer (haa minti pərki). Cəərə pərki toŋa ha'aŋ, ten tepe cəərə kaa gə guudəna yaŋ ada keɗe. Səɓaki də meŋ neke bə ji karman sar Tapi taŋa ba anə ceki. 19Ten bə ayam lakəle bə ku kuli bə *Kumna kə Pepeŋ yaŋ kaasəma. Bədoona ana, karman bə minti tam haŋ ku kaŋ ne wəra cuuru kəna adawraŋ, apəy na tiinə Pepeŋ na ha'aŋ, kuy wəra gə haa-he cuuru faɗi gəm. Karman bə minti tam ayaŋ kəkəy ne cuuru adawra kəna a kaŋ, tiinə Pepeŋ na apəy na ha'aŋ, kəkəy bə ayə-aye cuuru a niini gəm.» 20Kəya wə wəətənəy wəra kaŋkaŋ minti yə a waate hulum minti tó kəna Kristu, Hulum bə minti Pepeŋ ŋəmnuŋ, ba.
Yeesu waate sam me du
(Mar. 8.31—9.1; Liki 9.22-27)
21Də hi toŋ faɗi, Yeesu əsəŋ bə tope bəlam də kela a *kaa gə guuduŋ minti tó kir ɗe Zeruzalem. A ko toŋ na ha'aŋ, kaa kəmtəŋ gə tiinə kaanə Ziwifiŋ, kəkamna kə *kaa kə keere Pepeŋ daana *kaa kə hate ku gili nuutuŋ bə ɗe a lese tó yaŋ ablaw, yə awe tó yaŋ wəra gəm. Dər hi bə soopeŋaŋ, tó bə hare yaŋ wəra dədərgə adordə meŋa. 22Kəya Piyer duunu wəra agəjaŋa, wə ɗeŋ a isi bə jəw gəbaŋa minti: «Paapa, Barkaŋ! Pepeŋ golom cəərəm la, kel teŋ kəya yə a ji sarəma ba.» 23Yeesu haraŋ duru anəkay, wə wəətunu minti: «*Sataŋ! kolə la wəra kerkəna! Piyer, tam haa hulum bə ɓalkan digi də minti ten bəŋ cəərəŋ, gud maa mo ɗiki nəmtiŋ paapa bə tapə-tepe də kə Pepeŋ ba, wə haa ɗiki kə kaa kəsarkaŋ anə taki faɗi.» 24Kəya Yeesu əsəŋ bə waate kaa gə guuduŋa minti: «Hulum bə minti bəlaŋ ne minti tó han bəlam dən, wə ŋoryə kusru la wəra, wə haa kəbaŋ gə larga nuutu gə meŋ la, wə tapə la guudəna nuutu ta. 25Gud maa mo hulum bə minti bele anə ɗaaməna minti tó jəə la caw saksakiŋ, wə bese dədərgə du wəra haa bese ɗaw. Səma hulum bə minti bəsaŋ dədərgə du ne wəra guudəna bə fele dədərgəŋ yaŋ faɗi. 26Yə ayə bege bə cəərə seŋkaŋ la wəra keɗe nuutu a hulum kəman ɗaw, wə kəyu a maa mo jəəne minti dədərgə du bese wəraŋ? Karman bə minti hulum miɗi dədərgə du yaŋ duuruŋ haa maa mo? 27Gud maa mo *Kormə Hulúm dər məyan kə Buruŋa bə tuuki yaŋ də *kaa kə digi nuutuŋ guudu. Kəya wə bə werke mindi mindi keɗe haa gud joŋre bə minti wə a juunuŋ. 28Gəəzi ten waataŋ, aŋ kaa gə minti hebkəna laki kənaŋ, sərdəŋ guudəŋaŋ me wəra ajew də minti yə ase Kormə Hulúm bə bi a isi a kumna nuutuŋa ba.»
தற்சமயம் தேர்ந்தெடுக்கப்பட்டது:
MATIYE 16: KERNT05
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Texte de la Bible: Kera © Alliance Biblique du Tchad, 2004.