मती 6
6
दान-धरमके बारेमे सिक्छा
1 येसु चेलासबके कहैतगेलै, “होसियार रह, लोकसबके देखाबैलै धरम-करम तुसब नै कर। नै त स्वरगमे रहैबला पितासे तोरासबके कोनो इनाम नै भेटतौ। #
मती २३:५
2 “जब तुसब दान दैचिही त, आपनेसे ढोल नै पिट, जनङ कपटीसब सभाघरसब आ रस्तामे लोकसबसे आपन परसन्सा पाबैले करैछै। साँचे हम तोरासबके कहैचियौ, ओइसबके आपन इनाम भेटगेलछै। 3महज जब तु दान दैचिही, तोहर देहना हाथ कथी कैर-रहलछै से बमा हाथके थाह नै हेबे। 4तोहर दान गुप्तमे हेबे आ सब चिज देखैबला परमेस्वर तोरा इनाम देतौ।
परथनाके बिसयमे सिक्छा
(लुका ११:२-४)
5 “जब तुसब परथना करैचिही त, तखुन कपटी जखा नै बन, कथिलेत उसब सभाघरसबमे आ रस्ताके कात-करौतके लोकसब देखे कैहके ठरा भ्याके परथना करैछै। साँचोके, हम तोरासबके कहैचियौ, उसबके आपन इनाम मिलगेलछै। #
लुका १८:१०-१४ 6महज जब तुसब परथना करैचिही त, आपन भितरी कोठलीमे जो आ केबार लग्याके आपन पिता जकरा कोइ नै देखेसकैछै तकरसे परथना कर। जे गुप्तमे करल काम देखैछै ओह्या पिता तोरा इनाम देतौ।
7 “परथना करैतखिना तुसब गैर-यहुदीसब जखा बेकारमे बर-बराइत नै रह। कथिलेत बहौत बात बजलासे ओकर परथनाके सुनबाइ हैछै से बातके उसब बिचार करैछै। 8अहैलेल तुसब ओकरासबके जखा नै हो। कथिलेत तोरासबके पिता तोरासबके माङैसे पैहनैये बुझ्हैत रहैछै, कि तोरासबके कोन-कोन चिज चाही। 9तुसब अनङके परथना कर-
‘हे स्वरगमे रहैबला हमरासबके परमेस्वर पिता,
अहाँके नामके आदर हेबे।
10 अहाँके राज आबे,
अहाँके इक्छा जनङ स्वरगमे छै, तैहनङे पिरथिबीयोमे पुरा हेबे।
11 हमरासबके आइके भोजन दिय।
12 हमरासबके अपराध छमा करु,
जनङ हम्हुसब आपन अपराधीसबके छमा करनेचियै।
13 हमरासबके पापमे फसाइबला बातसबसे दुर राखु आ दुस्टसे बचाबु।
[कथिलेत राज, पराकरम आ महिमा जुगो-जुग तक अहैके चियै,
आमेन।’]
14 “यदि तुसब लोकसबके अपराध छमा करबिही त स्वरगमे रहैबला पिता ओहो तोरोसबके अपराध छमा करतौ। #
मरकुस ११:२५-२६ 15महज तुसब लोकसबके अपराध छमा नै करबिही त ओहो तोरासबके अपराध छमा नै करतौ।
उपासके बारेमे सिक्छा
16 “जब तुसब उपास बैठैचिही तब कपटी जखा उदास चेहरा नै देखा। कथिलेत लोकसबके उपास बैठल देखाइले उसब आपन मुह मलिन करने रहैछै। साँचे हम तोरासबके कहैचियौ, ओकरासबके मिलैबला पुरे इनाम मिलगेलछै। 17महज तु उपास बैठैत खिना मुरीमे तेल लगा आ आपन हाथ-मुह धुवा। 18तोहर उपास लोकसबके खातिर नै, महज गुप्तमे रहैबला तोहर पिता देखे आ सब चिज देखैबला परमेस्वर तोरा इनाम देतौ।
स्वरगके धन-सम्पतीके बारेमे सिक्छा
(लुका १२:३३-३६, १६:१३)
19 “आपन खातिर पिरथिबीमे धन-सम्पती नै ढेरिया, जते ओकरा किरा आ बिज लाइगके नास कैरदैछै। जते चोरसब सिन कोइरके ओकरा चोरालैछै। #
याकुब ५:२,३ 20बरु आपन खातिर स्वरगमे धन-सम्पैत ढेरिया, जते नै किरा, नै घुन लाइगके नास हेतौ, नै त चोरे सिन काइटके चोराइले सक्तौ। 21कथिलेत जते तोहर धन रहतौ, ओतै तोहर मन रहतौ।
22 “आँख देहके लेल डिबिया चियै। यदी तोहर आँख असल छौ त तोहर पुरे देह इजोत हेतौ। 23महज तोहर आँख खराब छौ त, तोहर पुरे देह अन्हार भ्याजेतौ। अहिनङे तोहर भितरके इजोत अन्हार हेतौ त, उ केहन अन्हार खोट-खोट हेतौ।#६:२३ यहुदी समाजमे, तोरा “असल आँख” छौ कहैके मतलब कोनो दोसर लोकके उद्धार करैले सकैछेलै, यदी “खराब आँख” छौ कहैके मतलब कोनो दोसर लोकके उद्धार करैले नै सकैछेलै।
24 “दुइटा मालिकके सेबा कोइ नै करे सकैछै। कथिलेत उ एकटाके घिरना करतै आ दोसरसे परेम करतै। उ एकटाके मान-दान करतै आ दोसरके खराब समझतै। तुसब परमेस्वर आ धन दुनुके सेबा करे नै सकबिही।
चिन्ता नै कर
(लुका १२:२२-३१)
25 “अहै खातिर हम तोरासबके कहैचियौ, ‘आपन परानके लेल कथी खेबै आ कथी पिबै’ आपन देहके खातिर ‘कथी पिन्हबै’ कैहके फिकिर नै कर।” कि खाइ-पियैसे परान आ बस्तरसे देह बेसी मोलके नै हैछै? 26अकासमे उरैबला चिरै-चुरगुनसबके देख। नै त उसब छिटैछै, नै कटनी करैछै, नै बखारीमे अन राखैछै, महज तैयो स्वरगके पिता ओइसबके खियाबैछै। कि तुसब ओइसबसे बेसी मोलके नै चिही? 27तोरासबमेसे के एहेन छै जे चिन्ता कैरके आपन औरदामे एकोरति थपे सकैछै?
28 “बस्तरके खातिर तुसब कथिले फिकिर करैचिही? चौरीमे फुल्याल फुलासबके देख, उसब कनङके फुलाइछै। नै त उसब खटैछै, नै पिन्हैले बस्तर बुनैछै। 29महज हम तोरासबके कहैचियौ, रजा सोलोमनके बहुतो धन-सम्पती रहितो पर आपनके फुलासब जखा सिङारैले नै सकल छेलै।#१ रजा १०:४-७, २ इतिहास ९:३-६ 30जब परमेस्वर चौरीके घास, जे आइ छै काइलके आइगमे जराएल जेतै, तकरा अहिनङ सिङारैछै त, ए कमजोर बिस्बास करैबलासब कि तोरासबके औरो बेसीसे नै सिङगारतौ?
31 “अहै खातिर तुसब फिकिर नै कर, ‘जे हमसब कथी खेबै? कथी पिबै? आ कथी पिन्हबै?’ 32कथिलेत गैर-यहुदीसब यि सबचिज ताकैछै, महज तोरासबके पिता जे स्वरगमे रहैछै, उ तोरासबके यि सब चिज चाही से जानैछै। 33महज सबसे पैहने ओकर राज आ धारमिकताके खोजि कर तब उ सबचिज तोरासबके खातिर औरो बेसीसे देतौ। 34काइलके खातिर चिन्ता नै कर, कथिलेत काइलके दिन आपन फिकिर आपने करतै। आइके दुख आइके लेल बहौत छै।”
தற்சமயம் தேர்ந்தெடுக்கப்பட்டது:
मती 6: MTH
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024 (Active), Wycliffe Bible Translators, Inc. All rights reserved.