Juan 17
17
Káꞌánꞌ Jesús jín Tátáꞌ re̱ꞌ jie̱ꞌe̱ꞌ rá ñɨvɨ yɨ́ꞌɨ́ nu̱u̱nꞌ re̱ꞌ
1Jee sáá nkuvi nkachiꞌ Jesús rá tu̱ꞌun yaꞌá, jee nna̱neꞌen nu̱u̱nꞌ re̱ꞌ ne̱ antivɨ́ súkún, jee nkachiꞌ re̱ꞌ:
―Tátáꞌ ni̱ꞌ, vitan jee ya̱ nkenta tiempúꞌ ya̱ kunoꞌo ni̱ꞌ, jee stúvi ya̱ kúñáꞌnú ni̱ꞌ ya̱ kúvi ni̱ꞌ Se̱ꞌya nú, jee sáva nuꞌuꞌ suni stúvi ni̱ꞌ ya̱ maánú kúvi ya̱ kúñáꞌnú nasɨ́kuitɨꞌ ka̱ꞌ. 2Chi ntaji nú tiñu níso ni̱ꞌ ya̱ tátúníꞌ ni̱ꞌ nu̱u̱nꞌ ntáká ñɨvɨ ñɨ̱vɨ́, sáva ntáká rá ñɨvɨ ya̱ ntaji nú nu̱u̱nꞌ ni̱ꞌ kɨꞌɨ ráa nu̱u̱nꞌ ni̱ꞌ, ni̱ꞌi̱nꞌ ráa ya̱ kutekuꞌ ráa nɨ́ɨ́nkání jín‑ó saꞌá ni̱ꞌ. 3Jee suꞌva kúvi ya̱ kutekuꞌ ñɨvɨ nɨ́ɨ́nkání jín‑ó: ya̱ kuniꞌ ráa iniꞌ noꞌó, ya̱ métúꞌún maánú vá kúvi nijia maá Ndiosíꞌ nijia, jín ya̱ suni kuniꞌ ráa iniꞌ nuꞌuꞌ, ya̱ maáníꞌ vá kúvi Jesús ya̱ níso ni̱ꞌ tiñu Cristo ya̱ nchu̱ichí nú nuꞌuꞌ va̱ji ni̱ꞌ jín tiñu ntaji nú níso ni̱ꞌ.
4’Nstúvi ni̱ꞌ nu̱u̱nꞌ rá ñɨvɨ íyó iniꞌ ñɨ̱vɨ́ yaꞌá ya̱ maánú ví ya̱ máá kúñáꞌnú nasɨ́kuitɨꞌ ka̱ꞌ, chi ya̱ nsi̱jínu ni̱ꞌ ntáká tiñu ya̱ ntaji nú nu̱u̱nꞌ ni̱ꞌ saꞌá ni̱ꞌ maa. 5Vitan jee noꞌó, Tátáꞌ ni̱ꞌ, nasaꞌá tuku ya̱ kuñáꞌnú tuku ni̱ꞌ ne̱ nu̱u̱nꞌ nééꞌ nú, kuéntáꞌ kua̱ꞌ kúñáꞌnú ni̱ꞌ jín nú ne̱ sáá ntiáꞌan kɨ̱ko̱o ñɨ̱vɨ́ yaꞌá.
6’Chi rá ñɨvɨ nka̱ji nú iniꞌ ñɨ̱vɨ́ yaꞌá ya̱ ntaji nú ráa nu̱u̱nꞌ ni̱ꞌ, jee nstúvi ni̱ꞌ noꞌó nu̱u̱nꞌ ráa. Rá ñɨvɨ nú nkuvi ráa jee ntaji nú ráa nu̱u̱nꞌ ni̱ꞌ, jee ntɨɨn ráa ñúꞌún iniꞌ ráa tu̱ꞌun nú. 7Jee vitan jee jíníꞌ ráa ya̱ ne̱ nu̱u̱nꞌ maánú va̱ji ntáká rá tiñu ntaji nú nu̱u̱nꞌ ni̱ꞌ sáꞌá ni̱ꞌ jín rá tu̱ꞌun káchíꞌ ni̱ꞌ. 8Chi ntáká rá tu̱ꞌun ya̱ ntaji nú nu̱u̱nꞌ ni̱ꞌ, jee njia̱ꞌa ni̱ꞌ maa nu̱u̱nꞌ ráa. Jee ntɨɨn ráa ñúꞌún iniꞌ ráa maa, chi nku̱káꞌnú iniꞌ ráa ya̱ máá naáꞌ nijia kúvi ya̱ ne̱ nu̱u̱nꞌ maánú nkene ni̱ꞌ va̱ji ni̱ꞌ, jee suni ni̱nu̱ꞌ iniꞌ ráa ya̱ maánú nchu̱ichí nú nuꞌuꞌ va̱ji ni̱ꞌ jín tiñu sáꞌá ni̱ꞌ.
9’Jee jíkánꞌ táꞌvíꞌ ni̱ꞌ nu̱u̱nꞌ nú jie̱ꞌe̱ꞌ ráa. Nsú jie̱ꞌe̱ꞌ rá ñɨvɨ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ ni̱ꞌ jíkánꞌ táꞌvíꞌ ni̱ꞌ. Chisaꞌ jíkánꞌ táꞌvíꞌ ni̱ꞌ jie̱ꞌe̱ꞌ rá ñɨvɨ ya̱ ntaji nú ráa nu̱u̱nꞌ ni̱ꞌ kɨꞌɨ ráa nu̱u̱nꞌ ni̱ꞌ, chi ñɨvɨ nú ví ráa. 10Chi ntáká ya̱ yɨ́ꞌɨ́ xi̱ntíín nuꞌuꞌ, jee suni yɨ́ꞌɨ́‑ɨ xi̱ntíín nú, jee suni ntáká ya̱ yɨ́ꞌɨ́ xi̱ntíín nú, jee suni yɨ́ꞌɨ́‑ɨ xi̱ntíín nuꞌuꞌ. Jee nstúvi ráa ya̱ kúñáꞌnú nasɨ́kuitɨꞌ ni̱ꞌ.
11’Jee nsáꞌ kuneeꞌ ni̱ꞌ ka̱ꞌ iniꞌ ñɨ̱vɨ́ yaꞌá. Jee suviráa kino̱o ráa kuneeꞌ ráa iniꞌ ñɨ̱vɨ́ yaꞌá, jee nuꞌuꞌ chi kua̱najiaaꞌ ni̱ꞌ nu̱u̱nꞌ nú, Tátáꞌ ni̱ꞌ ya̱ ííꞌ nasɨ́kuitɨꞌ. Jee jíkánꞌ táꞌvíꞌ ni̱ꞌ nu̱u̱nꞌ nú ya̱ kumaꞌñu kusava nú ráa jín fuersáꞌ ííꞌ nú ya̱ ntaji nú nu̱u̱nꞌ ni̱ꞌ, #17:11 Suni sa̱naanꞌ káchíꞌ rá tu̱ꞌun yaꞌá: jee jín fuersáꞌ ííꞌ nú jíkánꞌ táꞌvíꞌ ni̱ꞌ nu̱u̱nꞌ nú ya̱ kumaꞌñu kusava nú ráa ya̱ ntaji nú nu̱u̱nꞌ ni̱ꞌ. Suni kúvi káchíꞌ‑ó suꞌva versículo 17:12. sáva saꞌá nú ya̱ ɨɨn ni kuvi ráa kuéntáꞌ kua̱ꞌ maánú jín nuꞌuꞌ. 12Chi ni nééꞌ ni̱ꞌ jín ráa iniꞌ ñɨ̱vɨ́ yaꞌá, jee nñu̱maꞌñu ñusava ni̱ꞌ ráa jín fuersáꞌ ni̱ꞌin ííꞌ níso nú ya̱ ntaji nú nu̱u̱nꞌ ni̱ꞌ. Jee nñu̱maꞌñu ñusava ni̱ꞌ ráa saáva ni ɨɨn ráa ntu ñánaanꞌ ráa, chisaꞌ métúꞌún ɨɨn ráa ni vá ña̱naanꞌ chi saá íyó kɨ̱naanꞌ re̱ꞌ, sáva nsi̱kúnkuvi nu̱u̱nꞌ káchíꞌ tu̱ꞌun nééꞌ nu̱u̱nꞌ Tutuꞌ ya̱ níso Tu̱ꞌun Ndiosíꞌ.
13’Soo vitan jee kua̱najiaaꞌ ni̱ꞌ nu̱u̱nꞌ nééꞌ nú, soo ni nééꞌ ni̱ꞌ ntíꞌ ka̱ꞌ iniꞌ ñɨ̱vɨ́ yaꞌá jee káchíꞌ ni̱ꞌ rá tu̱ꞌun yaꞌá, sáva chitú ya̱ kusɨ̱ɨ̱ꞌ nasɨ́kuitɨꞌ iniꞌ ánímaꞌ ráa, kuéntáꞌ kúsɨ́ɨꞌ iniꞌ nuꞌuꞌ. 14Jee njia̱ꞌa ni̱ꞌ tu̱ꞌun nú nu̱u̱nꞌ ráa, soo rá ñɨvɨ ñɨ̱vɨ́ yaꞌá ya̱ ntu yɨ́ꞌɨ́ rává xi̱ntíín nú jee táꞌvi iniꞌ rává néꞌyá rává ráa, chi ntu íñɨ́ ráa ichi jiáꞌnu rává, kuéntáꞌ su jín nuꞌuꞌ ya̱ ntu̱ví yɨ́ꞌɨ́ ni̱ꞌ ñujiínꞌ rá ñɨvɨ ñɨ̱vɨ́ yaꞌá.
15’Soo nsáꞌ jíkánꞌ táꞌvíꞌ ni̱ꞌ ya̱ tavaꞌ nú ráa iniꞌ ñɨ̱vɨ́ yaꞌá, chisaꞌ káchíꞌ ni̱ꞌ ya̱ kumí nú ráa nu̱u̱nꞌ maá kui̱ꞌna̱ꞌ kúñáꞌnú. 16Chi ntu íñɨ́ ráa ichi jiáꞌnu rá ñɨvɨ ñɨ̱vɨ́ yaꞌá, kuéntáꞌ sú nuꞌuꞌ ntu yɨ́ꞌɨ́ ni̱ꞌ nu̱u̱nꞌ ñujiínꞌ ñɨvɨ ñɨ̱vɨ́ yaꞌá. 17Jee saꞌá ya̱ kusɨ́ɨ́n ráa ya̱ nkɨ́ꞌɨ ráa ka̱ꞌ nu̱u̱nꞌ ya̱ niva̱ꞌa jee kɨtíñú ráa nu̱u̱nꞌ nú jie̱ꞌe̱ꞌ ya̱ naáꞌ nú, chi tu̱ꞌun nú máá tu̱ꞌun na̱a̱ꞌ kúvi‑i. 18Chi kuéntáꞌ kua̱ꞌ nchu̱ichí nú nuꞌuꞌ va̱ji ni̱ꞌ iniꞌ ñɨ̱vɨ́ yaꞌá jín tiñu ntaji nú saꞌá ni̱ꞌ, jee nuꞌuꞌ suni sukuán chúichí ni̱ꞌ ráa nu̱u̱nꞌ rá ñɨvɨ ñɨ̱vɨ́ yaꞌá jín tiñu njia̱ꞌa ni̱ꞌ saꞌá ráa. 19Jee yɨ́tíñú ni̱ꞌ nu̱u̱nꞌ noꞌó sáva kuvi ya̱ váꞌa nu̱u̱nꞌ ráa, sáva suni kúvi kɨtíñú ráa nu̱u̱nꞌ nú jie̱ꞌe̱ꞌ ya̱ naáꞌ.
20’Soo nsú kua̱chi kuitɨꞌ jie̱ꞌe̱ꞌ rá ñɨvɨ yaꞌá ví ya̱ jíkánꞌ táꞌvíꞌ ni̱ꞌ nu̱u̱nꞌ nú, chi suni jíkánꞌ táꞌvíꞌ ni̱ꞌ jie̱ꞌe̱ꞌ rá ñɨvɨ ya̱ sukuán kuneí iniꞌ ráa nuꞌuꞌ jie̱ꞌe̱ꞌ tu̱ꞌun kachitu̱ꞌún rá te̱e yaꞌá jie̱ꞌe̱ꞌ nuꞌuꞌ. 21Jee jíkánꞌ táꞌvíꞌ ni̱ꞌ jie̱ꞌe̱ꞌ ráa ya̱ ɨɨn ni kuvi ráa, kuéntáꞌ maánú, Tátáꞌ ni̱ꞌ, chi yɨ́ꞌɨ́ nú iniꞌ nuꞌuꞌ, jee yɨ́ꞌɨ́ ni̱ꞌ iniꞌ noꞌó, jee suni sáva sukuán kɨꞌɨ ráa nu̱u̱nꞌ‑ó, sáva kuniꞌ rá ñɨvɨ ñɨ̱vɨ́ jee ji̱nu̱ꞌ iniꞌ ráa ya̱ maánú ví ya̱ nchu̱ichí nú nuꞌuꞌ va̱ji ni. 22Jee suni kuéntáꞌ ntaji nú tiñu kúñáꞌnú nu̱u̱nꞌ nuꞌuꞌ, jee suni sukuán njia̱ꞌa ni tiñu kúñáꞌnú nu̱u̱nꞌ ráa kuniso ráa, sáva ɨɨn ni kuvi ráa, kuéntáꞌ maánú jín nuꞌuꞌ. 23Nuꞌuꞌ, jee yɨ́ꞌɨ́ ni̱ꞌ iniꞌ ráa, jee noꞌó, yɨ́ꞌɨ́ nú iniꞌ nuꞌuꞌ, sáva kenta kuna̱a̱ꞌ nuún koo iniꞌ ráa, sáva kuniꞌ rá ñɨvɨ ñɨ̱vɨ́ ya̱ maánú nchu̱ichí nú nuꞌuꞌ, jín ya̱ ñúnúunꞌ nú ráa kuéntáꞌ ñúnúunꞌ nú nuꞌuꞌ.
24’Tátáꞌ ni̱ꞌ, jee rá ñɨvɨ ya̱ ntaji nú nu̱u̱nꞌ ni̱ꞌ, jee kuíni ni̱ꞌ ya̱ suni maáráa kuneeꞌ ráa jín nuꞌuꞌ nu̱u̱nꞌ kuneeꞌ ni̱ꞌ, sáva kuniꞌ ráa na̱ja viiꞌ nasɨ́kuitɨꞌ kúñáꞌnú ni̱ꞌ ya̱ ntaji nú nu̱u̱nꞌ ni̱ꞌ, chi ñúnúunꞌ nú nuꞌuꞌ ne̱ ntiáꞌan ka̱ꞌ nsa̱ꞌá nú ñɨ̱vɨ́.
25’Tátáꞌ ni̱ꞌ, noꞌó chi na̱a̱ꞌ nasɨ́kuitɨꞌ kúvi nú. Soo rá ñɨvɨ ñɨ̱vɨ́ chi ntu̱ví jíníꞌ ráa iniꞌ noꞌó, soo nuꞌuꞌ chi jíníꞌ ni̱ꞌ iniꞌ noꞌó, jee jíníꞌ rá ñɨvɨ yaꞌá ya̱ noꞌó nchu̱ichí nú nuꞌuꞌ va̱ji ni. 26Ni̱stúvi ni̱ꞌ noꞌó nu̱u̱nꞌ ráa jee istúvi ni̱ꞌ ka̱ꞌ noꞌó, sáva kuéntáꞌ kua̱ꞌ ñúnúunꞌ nú nuꞌuꞌ, jee suni sukuán kunu̱u̱nꞌ ráa rá táꞌán ráa, jee kɨꞌɨ ni̱ꞌ iniꞌ ráa ―nkachiꞌ Jesús.
தற்சமயம் தேர்ந்தெடுக்கப்பட்டது:
Juan 17: meh
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2022, Wycliffe Bible Translators, Inc. All rights reserved.