Matteiu 4
4
CAP. IV.
1Allora Ghiesù fu cundottu da lu Spiritu in lu desertu, per essa tentatu da lu diavulu.
2Ed avendu dighiunatu quaranta ghiorni, e quaranta notti, a la fine li venne la fame.
3Ed essendusi avvicinatu lu tentatore li disse: Se tu sei u figliolu di Diu, dì, che queste petre divenghinu pani.
4Ma ellu li rispose: È scrittu: L’ omu nun vive sulamente di pane, ma di tutta parola, che sorte da la bocca di Diu.
5Allora lu diavulu lu cullò in la città santa, e lu piazzò su la cima di lu tempiu,
6E li disse: Se tu sei lu figliolu di Diu, ghiettati in ghiù. Perchè è scrittu: Ch’ ellu mandarà li so’ agnuli versu di te, e ch’ elli ti pigliarannu nele so’ mani, perchè tu nun inciampi cun lu to pede in qualche petra.
7Ghiesù li rispose: È ancora scrittu: Nun tentarè Iddiu lu to Signore.
8Di bel novu lu diavulu lu portò sopra un monte altissimu: e li fece veda tutti i regni di lu mondu cun la loru gloria,
9E li disse: Ti darò tutte ste cose, se t’ inchini, e mi adori.
10Allora Ghiesù li disse: Vaitine, satanassu: perchè è scrittu: Adurarè u Signore to Diu, e nun servirè che ellu.
11Allora u diavulu lu lasciò: ed eccu che li agnuli s’ avvicinonu, e lu servinu.
12Ghiesù poi avendu intesu, come Ghiuvanni era statu incarciaratu, si ritirò nela Galilea.
13E lasciata la città di Nazarette, andò ad abità Cafarnaum, città maritima, su li cunfini di Zabulon, e di Neftali:
14Affinchè s’ adempisse quellu, ch’ era statu dettu da Isaia prufeta:
15La terra di Zabulon, e la terra di Neftali, strada di lu mare in là di lu Ghiurdanu, Galilea di le nazioni,
16Lu populu, che ghiacia nel’ uscurità, ha vidutu una gran luce: e la luce s’ è alzata per quelli, che ghiacianu in lu locu di l’ ombra di la morte.
17Da quellu mumentu incuminciò Ghiesù a predicà, ed a dì: Fate penitenza: perchè lu regnu di li celi è vicinu.
18E caminandu Ghiesù vicinu a lu mare di Galilea, vidde dui fratelli, Simone, che è chiamatu Petru, e lu so fratellu Andria, che ghittavanu in mare le so’ rete (eranu piscatori),
19E li disse: Vinite daretu a me, ed eiu vi faragghiu piscatori d’ omini.
20Ed elli, avendu subitu lasciatu le rete, lu seguitonu.
21E da culà andandu innanzi, vidde dui altri fratelli, Ghiacumu di Zebedeiu, e Ghiuvanni lu so fratellu, che stavanu in una barca cun Zebedeiu lu loru babbu, accunciandu le so’ rete: e li chiamò.
22Allora elli, avendu subitu lasciatu babbu e rete, lu seguitonu.
23E Ghiesù ghirava tutta la Galilea, insignandu nele sinagoghe, e predicandu lu vanghielu di lu regnu, e curandu tutti i langori, e tutte l’ infirmità in lu populu.
24E si sparse la so riputazione in tutta la Siria, e li presentonu tutti quelli, che avianu malanni, quelli, che avianu di li langori e di li dulori, quelli, che avianu lu diavulu in corpu, i lunatichi, i paralatichi, e li guarì tutti:
25E lu seguì molta ghiente da la Galilea, da la Decapoli, da Ghierusalemme, da la Ghiudea, e da lu paese, che si ritrova in là di lu Ghiurdanu.
தற்சமயம் தேர்ந்தெடுக்கப்பட்டது:
Matteiu 4: CORS1861
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Published in London in 1861.