Rut 2
2
Rut asoor loor nor Boas
1Ni Belem nei roo tuu kiid i ura met soi, gala Boas. Ura hii sao nor Elimeleke, Noemi ni mane baefe maet soub. Tuir room lisan ni la-ura, Boas man Noemi ni lia.
2Ni leolban iid, Rut, hiin ois rae Moabe, tuug la ura ni kai dega, "Au kai! Au leob la marao loi trigu baefe mou ni roo serbius seirgaa ni hoho ka tais? [Deis Maromak ni lei halai dega, fois roo kiak room fun manura.]#Levitiku 19:9-10; Deuteronomio 24:19; 25:5-6 Be laa fun nei roo seir atuud ni hua-lala kode ma au. Leob ka?"
Noemi ataan dega, "Leob la."
3I Rut la ni marao iid oid loi trigu baefe roo serbius seirgaa fois bael. Marao too Boas ni. Boas hii sao nor Elimeleke, Rut ni nai baefe maet soub.
4Arfiil Rut loi bael trigu, marao ubu, Boas maa ois aldeia Belem i ura asee ni artuub serbius seirgaa dega, "Saloom! NAI Maromak fois mata manhati la iim!"
Room ataan dega, "Saloom am-nai! NAI Maromak atuud Ni hua-lala kode la iit!"
5Arfiil Boas fei Rut loi bael trigu, ura tuug la ni mandoor dega, "Hiin hina sae iid la-ura, ni sao fe seen?"
6Mandoor too ataan, "Ura roo Moabe baefe hina suli futu nor senhora Noemi ois Moabe. 7Nafai bus ura ma tuug au dega, 'Xefi! Au leob laa loi trigu baefe roo serbius seirgaa fois bael ni la-ura ka tais?' I au ataan dega, 'Leob!' I ura serbius makaas soub ois bele bus rae hei kokaar raat agora uri. Ura free kaetkeen lea ni uum sarleol la-ura."
8I Boas la kase nor Rut dega, "Abii! Iit roo mata tema, kerkoed fliik ma au laad. Iit loi trigu ni uri lea, balikan muda la roo selu ni marao. Kode faklau ba leob roo ois an-hina room baefe serbius ma au ni uri. 9Fei kerkoed room doo trigu her bae, i arfiil room faklau soub hati uri, iit laa loi trigu her room hoho. Au tafaar soub la maen room ni uri oid ba leob book iit. I se iit moroo, la eun eer ni kantiil sergaa baefe room fois eer soub."
10Fliik manura, Rut diku raat rae. I ura dega, "Obrigadu, am-nai! Mahee au naa tafaar nam iid. Se am-nai taad soub, au baloos roo ois uri. Deis mansaba am-nai fois mata la au, nor atuud hua-lala kode ma au?"
11Boas ataan, "Doloo. Au taad soub. Deislaa roo ni uri tuir dega iit atuud iit hua-lala kode la iit kai arfiil iit mane maet soub. Room meit tuir dega iit fois bael iit ina-ama nor iit rae mori hati, oid ma ni roo selu ni leta, fedu ba taad room.
12Deis manura au tuug la NAI Maromak,
Israel ni NAI Maromak,
oid seul iit hua-lala kode sergaa!
Au tuug la Ura nee bensaun rini la iit,
deis iit atuud iit hua-lala kode la iit kai Noemi.
NAI Maromak fe kuidaud iit ni uri,
deis iit nae segi la Ura,
Man maun ana room koo ni maun ina ni lila sua."
13I Rut ataan dega, "Am-nai! Fedu au baloos iit artuub serbius room, am-nai fun tama soub au hua-lala, nor atuud meit iit hua-lala kode ma au."
14Arfiil room free naa aa, Boas tafaar la Rut, "Ma aa futu nor aem ni la-uri lea! Huu paun too, i se akar deum la nau too." I Rut laa medei fedeis roo serbius seirgaa. Toom ma Boas nee trigu hua seka la ura. Rut aa raat besu, i hii nei restu.
15-16Arfiil ura suli siil la marao oid loi trigu restu baefe roo serbius seirgaa fois bael, Boas tafaar la ura ni serbius ubu seirgaa dega, "Fliik kodkoed! Ba leob book ura. Fois ura loi trigu ni bae lea. Ura loi fedeis trigu hutu gaa meit, ba nei nam iid. Au ba bruis, se iim asai trigu-ai iid ka ruu baefe iim huut telo soub, fois bael la ura loi. Ba leob bruis ura, i ba leob fun suat ura."
17Rut serbius ni marao leolban tema. Arfiil leol mata naa mou soub, ura dae trigu, oid asai ni hua ois ni ai, i toer trigu hua ni boet iid benu.#2:17 Teor Ebreu halai dega, boet iid man eyfah iid. Eyfah iid kalmaan nei litru 22. 18Ura oid trigu hua ni boet too, suil siil la aldeia Belem, i atuud ni rati era ois ni serbius too la ni kai. I ura meit asai namaa restu ois namaa nafai meudia too nee la ni kai.
19I Noemi tuug la Rut, "Nafai o loi trigu iid uri ni bae? O serbius ni seen ni marao? Sorti kode Nai Maromak nee bensaun la roo baefe fun kode la o ni leolban iid uri."
Rut ataan, "Au kai, marao ubu too gala Boas."
20Noemi dega la ni hiin heu, "NAI Maromak nee bensaun la Boas. Deislaa NAI Maromak ba miliug atuud Ura ni hua-lala kode la aem baefe mori, nor meit la iit mane room baefe maet soub. Au dega la o, Boas ura iit sao fedesi. Boas fe 'nei direitu naa seul togout'." [Iid ura dega, Boas fe nei direitu kaben nor o, oid nee bei-ana la o mane baefe maet soub.]#Levitiku 25:25
21Rut ataan, "Au kai, nafai Boas meit dega ma au, 'Ada ma siil. Iit leob loi trigu fedeis au artuub serbius seirgaa raat doo trigu meit.' "
22Noemi ataan siil, "Leob lea! Ura sinaal kode. O leob serbius futu nor ni artuub hiin serbius seirgaa raat tempu doo trigu meit. Ni roo selu ni marao roo leob book o, mahee ni Boas ni marao o kode bael."
23Manura Rut loi trigu restu ni Boas ni marao fedeis hiin serbius seirgaa raat tempu doo trigu nor doo meut meit. Ni tempu la-ura, ura hii hela manhati nor ni kai.
தற்சமயம் தேர்ந்தெடுக்கப்பட்டது:
Rut 2: BMGM
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 Wycliffe Bible Translators Inc