LUG 11
11
Yeso de had jar ɓen wo de tos ge
(Mat 6.9-13; 7.7-11)
1Ti wurpo Yeso hay tos ge ti ngel po, á wo taw tos gen go mokay, jobo yoo jar ma wer ɓen wo, raw ɗe ge ɓe ga : Waŋkluu, had wùr de tos ge doo ga Jaŋ had jar ma wer ɓen wo no lay no. 2Á raw riŋ rage ga : Nday leʼ tos ge we, ni nday tos we gana :
Pan wùr,
Daga jar ɓuy mo ko ɗúu ɓo go ga ndo diŋ Baa boŋ.
Á le hay ge Waŋ wùri.
3Hã rege ne wùr ti naw tum
4Men ɗig re ɓlagge wùrn go ne wùr ti,
Doo ga wùr men go ne jar maga joŋ wo wùr de ɓlagge go no lay no.
Men wùr wo ge nen re ma de raw egre wùr wa.
5Yeso raw riŋ rage tigriŋ pa ga : Hayga jobo yoo ɓay la, wo daʼ bar ɓe gesiɗgi suŋ ga bar ɓen mo hã ɓaare hoole ne se ɓèere swaʼa, 6bar se ma tigriŋ hay le go raŋ ge nduu ni se, day fen maga se mo kaŋ ne hẽn pel bay wa. 7Bar ɓe ma tiŋman mbe ma fer wããre le ne hẽn ga : Gay me wa. Jag tiŋ ɓin go de tẽg ge de lakel, wùr de suuli de weere ɓi. Ndi kãã ma ur gi go ciŋ maŋ hoole mo gà. 8Ndi de riŋ nday ga mbe de sen ɓuy hayba ga á ur we go ciŋ hãge ɓe ne hẽn wer bargen ga layblaʼ no, ama á ur gi go ciŋ hã fẽẽre maga sãy ɓaara ti ɓe mo ɓuy ne hẽne, werga hayga á day we ur gi go ciŋ ga : bar ɓen men ge wii gi ɓe gà. 9Day ndi de riŋ nday ga : wiɗ we, á hã yaŋ ne nday, kiɗ we ni nday daɗ yaŋ, mbar we jag tiŋ, ni á buln yaŋ go ne nday. 10Werga wosela maga yaŋ wiɗ gi mo ɓuy á hã ne hẽne, je maga yaŋ kiɗ gi, daʼ, á bul jag tiŋ yaŋ go ne je mbar jag tiŋ lay. 11Pan wel hon yoo ɓay la ga wel ɓe wii cẽẽ, á raw hãge ne hẽn diŋ cwe ga diŋ cẽẽ ne? 12Noga á wii pããre kagge, á raw hãge ne hẽn diŋ dáya ga diŋ pããre kag ne? 13Hayga nday jar se ma de ɓlaggen nday yaŋ de ko hã fẽẽre ma de el ne weere ɓay wo yaw no, Pan ɓay ma ciŋ hã ge Nenterse ma bay ɗag ne jar maga wiɗn wo de daŋ sen so yaw.
Joŋre Yeso bay de tayge de Belsebul wa
(Mat 12.22-30; Mark 3.20-27)
14Yeso nii sõõ maga kol jobo go mbululum go, sõõn wo go kal ge mokay, je mbululum raw tĩĩ wer wãɗ wããre, ngaɓan raw wo ngrisgi. 15Ama jar po raw wo wãã ge ga : Hã egre ma niɗ sõõren wo go ne hẽn diŋ Belsebul waŋ sõõren wo. 16Jar lan raw wo wii gi ɓe ga á mo joŋ fen mbuɗgi ma kaŋ nen jar ga egre ɓe á le ni Baa, ni saara mo baan de wããre. 17Ama Yeso raw ko ɗiggi ɓaara go, raw ga : Hayga jar ma ɓi sir waŋ po yaŋ wo leɗ kããra no, sir waŋ sen ɓlag go, sirn jwag wo go ti kããra hãd hãd lay. 18Hayga Manhúulí ur we ciŋ dur see ɓe de see ɓe, egre ɓe kãã ma joŋge gà so. Day nday raw ga ndi niɗ sõõren go diŋ de egre Belsebul wer may la? 19Hayga ndi yaŋ niɗ sõõren wo go diŋ de waŋ sõõren wo mono, ni te ɓayn niɗ ra wo go de egre wo se lay la? Wersen te ɓayn wo de see ɓaara riŋ wo nday yaŋ ga nday wãã ni gà. 20Kidolgi ndi niɗ sõõren wo go diŋ de egre Baa ga fen sen de kaŋ nen ɓay ga twaywaŋ mani Baan á we go see ɓay so.
21Je egre grag we go gor tiŋ ɓe de jawre ma dur gi doo yeʼ no, fẽẽre ɓen lag wo de ele. 22Ama hayga je ma de egre daŋ ge ɓe nduu we ti ɓe, sen kal rawge ɓe egre, raw yãɗ jawre ɓe maga á hay ɗig ga se yãã see ɓe de ɓe go, raw ɓes fẽẽre ɓe maga se yãɗ ra doo ɓe go ɓuy.
23Je maga tay we de ɓi ga no, diŋ je hee ɓi, day je maga bay kay mege tay ti horog wa mono, de dus horog ɓin wo go dus gi lay.
Sõõ kal go fer fer le pa
(Mat 12.43-45)
24Sõõ kal we le go ɓil je tabay no, á raw raŋ ge ti ngel ma de heg, kiɗ ngel ig see ɓe. Á wo we daʼ ngel ga no, á raw wãã ge ga : ndi fer ɓi tiŋ ɓi maga ndi hay le ni mono. 25Á wo le ferge mokay, á daʼ tiŋ ɓen go de tor ge, go de kneʼ ge lay. 26Blam sen á kal raw ge hoo kããre ɓe sõõre ma de ɓlagge daŋ ge ɓe wo le wer ɓe renam pa, raw wo age laa ge ti ɓe, lag wo ni. Je sen raw kol ge go blam sen de ɓlagge daŋ ma taŋgun so.
Yeso ga jar coʼ sug wããre Baa woo ge wo yaŋ cwãy
27Yeso de wãã wããren deŋ ɗa, wãy po raw maŋ gẽẽge ɓe le ciŋ yoo ngaɓan wo kloŋ riŋ Yeso ga : Wãy maga biŋ mo go, ga ndo jo pãã ɓe, woo we wer ɓo. 28Ama Yeso raw fer wããre ne hẽn ga : Woo ge diŋ jar maga coʼ wo sug wããre Baa, ɗawn wo ɓil ɓaara mo yaw no.
Jar wiɗ wo ga Yeso mo joŋ fen mbuɗgi
(Mat 12.38-42)
29Jar raw le tayge see Yeso ngaɓa debaŋ, á raw tĩĩ wer riŋ rage ga : Wer jar se de ɓlaggen wo wara wiɗ wo fen mbuɗgi maga jar mo ko ni. Ama ti joŋre Baa ndi joŋ ge fen mbuɗgi ma tigriŋ po ne hara ga : taw de maga joŋ Jonas je ndar nen wããre Baa go no. 30Werga fen mbuɗgi maga joŋ Jonas joŋ diŋ ga jar Ninif mo ko wo see ɓe, re maga wel je táabayn day joŋ sen maga jar ma waran mo ko wo see ɓe doo sen no lay. 31Wãy po diŋ waŋ, se le nen ɓaŋ ni wãybane, ti wur Cagge Wããre wer jar ma waran wo, wãy sen la ur yaŋ go ciŋ deŋ wãã ge ga ren de baa jar se ma waran wo, werga á hay ur le ɓi sir ɓe le go hãã ma laa wer ko ge re mani Salomoŋ no, ko we nen ɓay je ma de daŋ Salomoŋ kluu yaŋ la. 32Jar Ninif hoo wo yaŋ le ciŋ ti wur Cagge Wããren wer jar ma waran wo mono, jar Ninif hoo wo yaŋ ciŋ deŋ wãã ge ga ren de baa jar se ma waran wo werga ɓaaran á hay ɓoɗ wo jag go wer wããre maga Jonas sii go mono, ko we nen ɓay je ma de daŋ Jonas kluu yaŋ la.
Nen jobo diŋ gér ma tee ngel go ne see ɓe ti
(Mat 5.15; 6.22-23)
33Jobo doʼ gér ɓe go doʼ fer kaŋ ge ɓe ɓi mopo go de yoŋre ga, noga kuɓ hãn hẽn ti gà. Ama á kaŋ gérn go ciŋ ti fen kaŋ ge ɓe, maga jar laa wo we le tiŋman mo ko wo nen go poɗage. 34Nen ɓo diŋ gér ma ler ngel go ne see ɓo ti, hayga nen ɓo yaŋ go de el no, hõõgese ɓo ma ɓuy joŋ go feh lay. Ama hayga nen ɓo yaŋ go de cege no, see ɓo ma ɓuyn joŋ de suŋgu lurum lurum lay. 35Wersen joŋ see ɓo de el ga nen ɓo maga go de ler ge mo ti mo poɗag deŋ mo kol go de suŋgu wa. 36Hayga see ɓo yaŋ go ko ge poɗag, ga suŋgu bay ni meʼ wa no, see ɓo ma ɓuyn raw koge wo go de ler ge doo gér maga ler ngel go kẽg kẽg nono.
Yeso ruu jar ma ndar wer wããre Baa wo de Farisiyẽẽ wo
(Mat 23.1-36; Mark 12.38-40)
37Yeso wo taw wããren go mokay, Farisiyẽẽ po raw wiigi ɓe ga á mo wo rege ni se. Yeso raw kalge liŋ ni ɓe, raw hayge rege. 38Farisiyẽẽ wo ko ge ga Yeso yog doo go taŋgu seŋ gà mono, á raw ngrisgi. 39Yeso raw riŋgi ɓe ga : Nday Farisiyẽẽ no, nday yog faale hããre ma jo bii wo go de faale hããre hoolen wo, ama ɓil ɓay go de bag ge de fẽẽre freŋ ɓayn wo de wer ɓlagge wo. 40Nday jar se de loɗge no. Baa je joŋ faale fẽẽren wo, bay de joŋ ɓil ɓaaran diŋ se wa an yawla. 41Ama hã we go ne jar coo wo diŋ fẽẽre ma ɓi hããre bii wo de hããre hoolen wo, ni fẽẽren kol wo yaŋ go de fãã ge bay ɗag ne nday.
42Re ti ɓay Farisiyẽẽ wo, nday hã ma de hwal fẽẽre ɓay maga nday jeɗ ra wo doo sug nee ma re gen wo ɓuy ne Baa, ama re ma ti ngel ɓe de deele maga Baa da sen, nday men sen wo go. Mokay diŋ maga nday hay nen joŋ rage, de lan wo mo ɓuy lay no.
43Re ti ɓay Farisiyẽẽ wo, werga nday da lagge ti paale ma peln wo ɓi tiŋ tosge wo, nday da ga her jag we de horge sug ti ti ngel lumo wo. 44Re ti ɓay, werga nday doo tipaale maga wo go de sah ge, jar see go ti ɓaara bay ko rage nono.
45Jobo yoo jar ma pel jar had jar de wããre Baa wo boŋ raw ɗe ge ɓe ga : Waŋ, ndo wãã doo sen no mokay, ndo ɗar wùr lay mo pa la.
46Yeso raw fer wããre ga : Re ti ɓay lay, nday jar ma pel jar had jar de wããre Baa no, werga nday kaŋ fẽẽre ma de põõre wo ne jar ti. Nday de see ɓay nday day kay rage maŋ glog fẽẽre sen wo ne hara ciŋ de we doo ɓay boŋ draʼ gà. 47Re ti ɓay. Nday bor tipaale jar siɗ wããre ma jag Baa wo go de woore, pa ga id ra go diŋ pããre ɓay wo dog gà. 48Kidolgi nday diŋ jar kaŋ nen jar go ti joŋre pããre ɓay wo, nday de tayge de ɓaara lay, werga pããre ɓay id wo jar siɗ wããre ma jag Baa wo go, nday ɓay de bor tipaale ɓaara lay. 49Wersen Baa ma de ko ren ɓuy hay wãã we go ga : Ndi laa jar siɗ wããre ma jag ɓin go wo de jar peele ɓin wo yaŋ le we, day nday id maapo wo yaŋ go, nday joŋ bon maapo wo yaŋ lay. 50Werga cíi jar ndar nen wããre Baa go maga nday kag ra le go ti tĩĩgi wer sirn le mo hãã, wii gi jag wer jar se ma waran wo yaŋ ti ɓe, 51tĩĩ wer de cíi Abel, hãã go de cíi Sakari maga nday ii go ti holaŋ tiŋ ma sii jag wo de tiŋ Baa mono. Kidolgi ndi riŋ we ga : à joŋ bon wer jar se ma waran wo yaŋ ti bol id gi jar maga á id ra wo go mono.
52Re ti ɓay nday jar ma pel jar had jar de wããre Baa no. Werga faage maga jar kãã wo ma laa ge ko wããre Baa ni, nday tẽgn go, nday de see ɓay nday bay laa ge ni wa lay. Jar maga da wo ga saara laa ni, nday dig ra go lay mono.
53Yeso wo le go kal ge mokay, jar ma ndar wer wããre Baa wo de Farisiyẽẽ raw wo naa nen go de waŋ de hãã lag, raw wo wiɗ jag ɓe ti wããre ma tigriŋ sar sar debaŋ. 54Á raw wo lam jag ɓe de wããre ga da ga jag ɓe mo raw de wããre ma de ɓlagge, ni saara mo kii wããre ne hẽn ti.
தற்சமயம் தேர்ந்தெடுக்கப்பட்டது:
LUG 11: TUP
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Tupuri Bible © Bible Society of Cameroon, 2016. All rights reserved.