LUG 9
9
Yeso laa jar peele ɓe ma hwal ti ɓogn wo siɗ wãã re
(Mat 10.5-15; Mark 6.7-13)
1Yeso raw tay ti jar ma wer ɓe ma hwal ti ɓog wo no, raw hã egre ne hara ma niɗ sõõre wo go ɓuy, ma peɗ jar cege wo go lay. 2Blam sen á raw laa rage wo ga á mo see wo siɗ wããre twaywaŋ mani Baan go ne jare, mo peɗ wo jar cegè wo go lay. 3Á raw riŋ rage ga : Hoo we fẽẽre raŋ ge doo ɓay wa, hayba graw, ndare, rege, solay, hoo we doo wa. Hor we õõbe doo ɓay ɓog ɓog wa lay. 4Ti ngel ma honla ɓuy ga jar sen yãã wo waare ɓay we ni mo ɓuy, lag we ɓi tiŋ po boŋ hãã go ti wur maga nday wo ge go men ngel sen mono. 5Ti ngel ma honla ɓuy ga jar sen day wo we yãã waare ɓay ni ga mo ɓuy no, ni nday men we ɓi leege ɓaaran go, poɗ we ɓurgi ma ɓaale ɓay go, ma kaŋ nen jar wo ga á yãã wo waare ɓay gà. 6Jar ma wer ɓen raw wo raw ge, raw wo raŋ sirn wo go ɓuy siɗ Wããre ma de Cõõre no, peɗ wo jar cege wo go ti ngel ɓuy lay.
Wããre yeɗ nen Herod go
(Mat 14.1-12; Mark 6.14-29)
7Herod waŋ wo laa wããre maga á joŋ wo mo deŋ, ɗiggi raw yeɗ nen ɓe go, werga jar po wãɗ wo ga : Jaŋ ma joŋ batem jar fer le go birgi. 8Jar ma la wãã wo pa ga : Á diŋ Eli naa nen le, jar ma tigriŋ wãã wo pa ga : Á diŋ jobo yoo jar ndar nen wããre Baa go ma ɓaan wo, fer le kal ge go ciŋ tenen. 9Ama Herod raw wãã ge ga : Ndi hay caa ti Jaŋ we go pa lay. Day je sen mokay diŋ wose ga à wãã re sen mo deŋ ti ɓe mo pa ɓa? Herod da ga se mo ko Yeso.
Jar ndar dwee Yeso hã hoole hara
(Mat 14.13-21; Mark 6.30-44; Jaŋ 6.1-14)
10Jar peele Yeson raw wo ferge le riŋ Yeso ti joŋre maga saara joŋ ne wo mo ɓuy no. Yeso raw hoo rage, raw wo raw ge de see ɓaara tawa ɓi leege maga à ɗen ga Betsayda. 11Ama ngaɓan wo wo laa wããre sen mokay, á raw wo maŋ blam ɓe. Yeso raw yãã rage go ɓil feh, raw sii wããre ne jar ti twaywaŋ mani Baa no, raw peɗ jar maga wo de dage ga peɗ saara go wo go lay.
12Wur raw go coŋ ge mokay, jar ma hwal ti ɓogn raw wo yaʼge see Yeso riŋ gi ɓe ga : Men jarn wo dus gi ɓi leege kiɗ fẽẽre rege wo de ngel suuli, werga ngel sen la go se tiŋ hãã lay. 13Ama Yeso raw riŋ rage ga : Hã mbay rege ne hara diŋ nday tuu. Á raw wo riŋ gi ɓe ga : Hoole doo wùr la dwee de cẽẽ ti ɓog koɗe, day ndo da ga wùr mo wo yee rege ne ngaɓa jarn wo mo deŋ ɓuy no? 14(Ngaɓa jarn ɓuy werpiiri wo nen ndar dwee.) Yeso raw riŋ jar ma wer ɓen wo ga : Lag we jarn gesiŋ, car ra go taʼ taʼ nen jar doo dwee doo dwee. 15Jar ma wer ɓen raw wo yãã jag ɓe, raw wo lag jarn gesiŋ ɓuy lay. 16Yeso raw hoo hoole ma dwee wo de cẽẽ ma ɓog no, raw maŋ nen ɓe ciŋ, raw wii Baa wo ti hoole no, raw car ge ɓe go, raw hãge ɓe ne jar ma wer ɓen wo ga á mo ɓes wo go ne ngaɓan no. 17Á re wo ɓuy, wùu wo lay. Á raw wo bag yããge de nen ɓe maga gwaʼ go ni hwal ti ɓog pa.
Piyer ɓoʼ wer Yeso go ga á diŋ Mesi
(Mat 16.13-19; Mark 8.27-29)
18Ti wurpo Yeso hay go tos ge de see ɓe tawa, jar ma wer ɓen raw wo age see ɓe, á raw wii jag ɓaara ga : Ngaɓan wii wo ti ɓi ga ndi diŋ wose ɓa? 19Á raw wo fer wããre ne hẽn ga : Jar po wo ga : ndo diŋ Jaŋ ma joŋ batem jar no, ma la wo ga : ndo diŋ Eli, ma la wo pa ga : ndo diŋ jobo yoo jar ndar nen wããre Baa go ma ɓaan wo, day ndo fer le birgi. 20Ama Yeso raw wii rage ga : Ma ɓay, nday wii ɓayn ti ɓi ga ndi diŋ wose lay? Piyer raw fer wããre ne hẽn ga : Ndo diŋ Mesi mani Baa no.
Yeso ga se huu gi go, se fer ge bir gi
(Mat 16.20-28; Mark 8.30—9.1)
21Yeso raw ruu rage de egre debaŋ ga á mo riŋ wo jobo go de wããre sen mokay wa. 22Á raw riŋ rage ga : Nen da ga à mo joŋ bon wel je táabayn debaŋ. Jar kluurin wo, waŋre ma siɗ jag wo, de jar ma ndar wer wããre Baa mo tobn wo go, mo iin wo go, day wur síilí ma de swaʼ á mo fer ge go bir gi. 23Blam sen Yeso raw riŋ ngaɓan wo ga : Je maga da we ga se maŋ blam ɓi no, ni á mo men ɗig ti see ɓe go, á mo hay go de gragge ti naw tum ga se mo huu mbe go ti re ɓi, ni á mo maŋ blam ɓi so. 24Werga je maga da ga se mo ʼwar se se go ti re ɓi wa mono, sen bas ge see ɓe go bas ge so yaw, ama je maga yãã re ɓi, da ʼwar see ɓe mbe go wer ɓi mono, sen joŋ ge tenen caw tum so. 25Je tabay mo daʼ bà horogre ma ti tamsir wo go la ɓuy ma ɓe layblaʼ, ama hayga á bas see ɓe we go, noga ɓlag see ɓe we go, day horogre se ma ti tamsirn la day joŋ wo may yaŋ ne hẽn ne? 26Ama wosela joŋ sõõre we ti ɓi, joŋ sõõre ti wããre ɓin lay mono, wel je táabayn wo ge le ferge de gragge de woore doo Pan ɓe wo de jar peele mani Pan ɓen wo wurpo la, joŋ sõõre ti wããre je sen lay. 27Kidolgi ndi riŋ we, jar po yaŋ wo yoo jar ma lag wo la huɗ gi wo go taŋgu ga, say saara ko twaywaŋ mani Baa go ɗa.
Se Yeso kol go sara
(Mat 17.1-8; Mark 9.2-8)
28Naw raw joŋge blam wããre sen renam, Yeso raw hoo Piyer, Jaŋ wo de Jag wer ɓe, raw ɗii gi ciŋ ti húulì tos ge. 29Á de tos ge mo yeʼ, pel ɓe raw kol ge sara, õõbe ɓen raw wo kol ge sag ge depiiri kaɗaŋ kaɗaŋ lay. 30Ko la werpiiri wo ɓog wo de wãã wããre de Yeso lagge, diŋ Moyis wo de Eli, 31naa wo nen le sag ge de gragge de woore Baa deŋ deŋ, wãã wããre de Yeso, riŋ wo ga joŋre ɓen wo go baa jag diŋ de húulí ɓe ɓi leege Jerusalem. 32Piyer wo de kããre ɓen raw wo laa naa debaŋ, blam sen á wo wo pũy gi go mokay, á raw wo ko Yeso de gragge de woore deŋ, werpiiri ma ɓogn wo de gragge de woore ɓiŋ ɓe lag lay. 33Blam sen jar se ɓogn raw wo raw ge men wo Yeso go ni, Piyer raw ɗe Yeso ga : Waŋ, ngel sen la de el maga naa mo lag la ni. Wùr wo bag mburyug swaʼ, boŋ ma ɓo, boŋ ma Moyis, boŋ ma Eli lay. (Piyer wãã wããre sen bay ɗig were.) 34De maga á de wãã ren deŋ ɗa, swaare po raw naa ge le, raw yoŋ rage go, hẽẽne raw joŋ jar ma wer Yeson wo, de maga á ko wo swaaren yoŋ Moyis wo go de Eli mono. 35Gẽẽge po raw wãã ge le ciŋ nen swaaren ga : Je ma deŋ diŋ wel ɓi maga ndi maŋ gom, yãã we jag ɓe. 36Blam gẽẽgen mokay, á kal wo daʼ ge diŋ Yeso boŋ deŋ tawa. De wur sen fen maga á kon wo mokay á laa wo sii gi ɓe go ne jobo ga hase.
Yeso nii sõõ go ne wel po ti
(Mat 17.14-18; Mark 9.14-27)
37Toŋ ɓe á wo le ciŋ ti húulìn, á raw wo le go ɗii gi gesiŋ mokay, jar ngaɓa debaŋ raw wo caa pel Yeso. 38Ko la jobo raw ngar jag le yoo ngaɓan wo ga : Waŋ, ko wel ɓin de nen ɓo ɗa la, ndi kam mo kam ge, werga á mbe go doo ɓi ni no boŋ no. 39Sõõn leʼ we joŋ ge ɓe no, á kal ngar jag ɓe tuuseŋ, kal gejag ge ɓe de egre, bag defõõre go jage, joŋ bon ɓe debaŋ lay, men go gus ga, tloɓ se go hẽne. 40Ndi raw kam jar ɓo ma wer ɓon wo ga á mo nii wo sõõ sen go, ama á laa wo kãã ge gà. 41Yeso raw ndum gi ga : Hih, nday jar se ga nday bay de hã ɓil ɓay go ne Baa pah wa no, nday jar se hãy hãy mo lag no, ndi mo ig see ɓay komay ɗa pa la? Ndi mo ig soɗ we ge komay pa? Á kal riŋ bloon ga : á ɓo le de wel ɓon no. 42Weln wo le yaʼ ge mbaŋ mokay, sõõn raw ɓoʼ ge ɓe gesiŋ vbal, raw gejag ge ɓe debaŋ, ama Yeso raw caa põõ ne sõõn de egre, raw nii sõõn go ne weln ti, raw hã wel ne pan ɓe. 43Ngaɓan ɓuy raw wo ngrisgi debaŋ wer joŋre Baa wo de egre ɓe no.
Yeso fer wãã ge tigriŋ pa ga se huu yaŋ go
(Mat 17.22-23; Mark 9.30-32)
Wosela ɓuy raw ngrisgi ti fen maga Yeso joŋ ne mono, á raw riŋ jar ma wer ɓen wo ga : 44Ɗaw we wããre maga ndi de wãã ge ɓe we patalam de ele. Jar wo yaŋ go hã wel je táabayn ne jar téebeere wo doo. 45Ama á laa wo laa wer wããre sen ga : werga Baa yoŋ wer wããre sen go, maga á mo laa wo wer ɓe wa, wersen á raw wo joŋ hẽẽne wii Yeso ti wããre se no.
Jar ma wer Yeso wo ga wo se yoo saara diŋ je ma pel kããran la
(Mat 18.1-5; Mark 9.33-37)
46Jar ma wer ɓen raw wo ɓoʼ ɗee ɗig gi ti holaŋ ɓaara ga wo se joŋ ge diŋ je kluun ma wãã re jarn ɓuy mo la? 47Yeso raw ko ɗiggi ɓaaran go, á raw maŋ wel ma klee le, raw hayge ɓe ɓiŋ ɓe mbaŋ yeʼe, 48raw riŋ rage ga : Je maga yãã we klee ma doo deŋ we see ɓe werga á diŋ je ɓi no, ni á yãã diŋ ndi, je maga yãã me we see ɓe, yãã diŋ je maga ɓoʼ me le mono. Werga je maga go depẽẽre daŋ ge yoo ɓay mo ɓuy, diŋ je ma kluu daŋ gen so yaw.
Je maga bay hee de ɓay wa diŋ je ɓay
(Mark 9.38-40)
49Jaŋ raw ɗe ge ɓe ga : Waŋ, wùr ko jobo we le niɗ sõõre wo go de ɗúu ɓo la, wùr raw dig gi ɓe werga á bay de tayge de naa wa. 50Ama Yeso raw riŋgi ɓe ga : Dig we ne wa, werga je maga bay diŋ je hee ɓay wa, á diŋ je ɓay.
Jar ma ɓi leege Samari po laa wo yãã wããre Yeso ga
51Naw maga Baa maŋ Yeso wo go see ɓe raw kos ge go, á raw teŋ nen ɓe ma woge Jerusalem. 52Á raw laa jar soole wo wo pel ɓe. Jar sen raw wo raw ge, á raw wo laa ge ɓi leege po ma ɓi sir Samari kneʼ ngel go ne hẽne. 53Ama jar ma ɓi leege sen ni laa wo yãã wããre ɓe ga werga á hay wo seege nen Jerusalem.
Yeso ruu Jaŋ wo de Jag
54Jaŋ wo de Jag, jar ma wer ɓen wo wo ko sen mokay, á raw wo ɗe ge ɓe ga : Waŋkluu, ndo da ga wùr mo wii wùu le ciŋ ma a ge roɗ rage go yawla? 55Yeso raw mbuɗ nen ne hara ti, raw ruu rage de hãã debaŋ ga : [nday ɗig mokay diŋ ɗiggi mayse ma bay blam wo mokay kay la?] 56Á raw wo raw ge ɓi leege ma tigriŋ.
Jar po da wo ga saara maŋ blam Yeso
(Mat 8.19-22)
57Á wo ti faage mo tiʼ seege, jobo raw riŋ Yeso ga : Ndi da raŋ ge wer ɓo ti ngel maga ndo wo ge ni mo ɓuy no.
58Yeso raw riŋgi ɓe ga : Baygama yaŋ wo de tuu ɓaara, dweere yaŋ wo de tiŋri ɓaara lay, ama ma wel je táabay bay de ngel suuli ma ig see ɓe draʼ wa. 59Yeso raw riŋ je maapo ga : Maŋ blam ɓi. Ama á raw ga : Waŋ, men me wo ge tee pan ɓi le go ɗa. 60Yeso raw riŋgi ɓe ga : Men húulín wo ter húulí ɓaaran wo. Ma ɓo, see ɓon siɗ wããre ne jar ti twaywaŋ mani Baa no. 61Je ma tigriŋ raw ɗe ge ɓe pa ga : Waŋ, ndi da ga ndi maŋ blam ɓo raŋ ge wer ɓo lay, ama men me wo ge her jag ne pan ɓi wo ɗa an tawa. 62Ama Yeso raw riŋgi ɓe ga : Je maga laa doo ɓe ti soŋ dày, day fer mbuɗ nen blam pa, je sen bay go de gragge de el se twaywaŋ mani Baan wa.
தற்சமயம் தேர்ந்தெடுக்கப்பட்டது:
LUG 9: TUP
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Tupuri Bible © Bible Society of Cameroon, 2016. All rights reserved.