Mata 4
4
Satan 'Ya Sǝr Nkǝrti ala Yɛsu
(Mar 1:12-13; Luk 4:1-13)
1 #
Ibr 2:18; 4:15 Antǝ Mambǝl ni ka mwari aka Yɛsu akwa ntaku akuya ka Satan nkǝrti tǝni. 2Aghǝla tǝ Yɛsu tara 'ya asam ɓukǝtsi fwaɗǝthlani aka vǝr fwaɗǝthlani, dzǝ ka nga mi. 3Ndǝr nkǝrti ni ka si adzǝni ka nkǝrɛ, “Ma apǝri gǝ Zǝr Hyal dzá, nkǝrɛ ala paya yarni ka dar 'ya mantsǝkǝl.”
4 #
Mab 8:3
Yɛsu ka sǝnau, “Rǝbwa-rǝbwa apǝri: ‘Ndǝ adi ata ndzai ka mantsǝkǝl ɗiɗi wɛ, ama atar ndǝrɛ nam ada sǝba akwa nya Hyal.’ ”
5Antǝ Satan ni ka kǝtǝ tǝni ka tǝra aka dza akwa Ursalima Mǝlmǝr Hyal ba dzǝ ka lǝti aka dza ata vui nam dzǝgam ta sang nǝr fǝr Hyal ni, 6#Zab 91:11,12ba dzǝ ka nkǝrɛ apǝri, “Ma gǝ Zǝr Hyal, ɗǝghǝl tǝ kǝrngɛ asǝgǝl. Akuya rǝbwa-rǝbwa:
“ ‘Dzǝ ata tsau ala ndzǝr hyantǝrni ata kǝra gɛ,
ka dar kathlǝti tǝngɛ akwa tsiya dar,
ani ka kura paya awa tsa thlǝla gɛ.’ ”
7 #
Mab 6:16
Yɛsu sǝnau alari, “Rǝbwa-rǝbwa tsuwɛ: ‘Gǝ adi ata hau Hyal Thlakǝr ngɛ akwa nkǝrti wɛ.’ ”
8Satan ka kǝtǝ tǝni kadamwa dzǝ ka tǝra aka dza ata kǝra paya nam dzǝgam ba dzǝ ka tsanti alari sanga kuhyikur yarɛ nǝr dunya ni ba mbǝlǝr dar. 9Dzǝ ka nkǝrɛ, “Əni sang Yi ata la gɛ, ma gǝ zǝɗi ka vǝkǝr sǝlai alai.”
10 #
Mab 6:13
Yɛsu ka nkǝrɛ alari, “Tǝra adzǝra, Satan! Akuya rǝbwa-rǝbwa: ‘Vǝkǝr sǝlai ala Thlaku Hyalǝr ngɛ, ba ka gǝ 'ya kǝthlǝr alari ɗiɗi.’”
11Antǝ Satan ka ngyar tǝni, ba ndzǝr hyantǝr Hyal si ka 'ya kǝthlǝr alari.
Yɛsu Baditsǝni Nkǝr Ndǝrɛ
(Mar 1:14-15; Luk 4:14-15)
12 #
Mat 14:3; Mar 6:17; Luk 3:19,20 Sakatǝ Yɛsu tara ngati apǝri ndǝ hau Yawhana akwa fǝrsǝna, dzǝ ɓiti alǝkwa Galili. 13#Yaw 2:12Dzǝ ngyar Nazarat, dzǝ ka mwara lǝka ndzai akwa Kafarnahum, di nam kudzǝghɛ aka manda, akwa dabwa diyir Zibulun aka Nafǝtali— 14Ka ghǝiyaba sǝ nam tǝ ndǝ tara nkǝrɛ atar nabi Isaya:
15 #
Isa 9:1,2 “Diyir Zibulun ba diyir Nafǝtali,
whal nam ada mwari akwa kyagha, ka lǝba ata Urdun,
Galili nǝr ndzǝ kura Yahudi—
16ndzǝ nam ada ndzai akwa kuthlɛ
dar wula paraku nam ngga;
ndzǝ nam ada ndzai akwa diyir sanguraiyir nti
paraku kǝ sǝba ala dar.”
17 #
Mat 3:2
Akwa saka ǝnda antǝ Yɛsu baditsǝni nkǝr ndǝrɛ, “Tubiyamɛ, akuya kuhyikur nam atahyal kǝ 'ya kudzǝghɛ.”
Kǝga Ndzǝr Nuwɛ nam Tangkǝma
(Mar 1:16-20; Luk 5:1-11)
18Sakatǝ Yɛsu ata kǝra mwari ata nya mandar Galili, dzǝ ka wula madar mama sǝɗɛ, Simaun (nam tǝ ndǝ ada kǝga tǝni aka Bitrusu) aka zǝrangǝri Andǝrawusu. Dar ata kǝra tamwɛ kulfa akwa kyagha, aka lambusǝr akuya dar ndzǝr fa kulfa. 19Yɛsu ka nkǝrɛ, “Azǝramɛ, ka gǝr nu tǝra, Yi ata mǝrti tǝ gǝri ndzǝr fa ndzi.” 20Tǝkǝma dar ka ngyar lambusǝr dar yarɛ ka nuti tǝni.
21Sakatǝ dzǝ lǝkǝma dzǝ wula madar mama sǝɗɛ, Yakubu zǝr Zabadi aka zǝrangǝri Yawhana. Dar akwa sar kaka tada dar Zabadi, ada dzǝgu lambusǝr dar. Yɛsu ka kǝga tǝ dar, 22kura aka santa saka dar ngyar sar ni ba tada dar ba dar ka nuti tǝni.
Yɛsu Mbǝti Ndzǝ Kura Kalang ni
(Luk 6:17-19)
23 #
Mat 9:35; Mar 1:39 Yɛsu kǝ dlǝti sanga diyir Galili, tǝ dzǝ ada hyipɛ ala dar akwa fǝr vǝkǝr sǝlai ala Hyal, tǝ dzǝ ada nkǝr ndǝrǝr Hyal nam sǝɗa nǝr kuhyikur Hyal, ba mbǝti kǝlara kasuwa aka kura kalangkur akwa ntsa ndzi. 24Labar ata kǝrari ka kikilntadzi akwa sanga diyir Siriya, ba ndzǝ ka si akǝri alari sanga ndzǝ nam kura kalang kaka kasuwa yarɛ, ndzǝ nam ada ɗar bwanai aka kalɛ nam dzau, ndzǝ nam aka mambǝl yarɛ nam kulɗa, ndzǝ nam aka bwali, ba ndzǝ nam masǝkǝn, ba dzǝ ka mbǝti tǝ dar. 25Dlamiyir ndzǝ hang akwa Galili, Dikapaulis ni,#4:25 Nam ani, Mǝlmɛ Kumɛ yarni. Ursalima, Yahudiya, ba mǝlmɛ nam abǝla tǝbwanda Urdun ka nuti tǝni.
தற்சமயம் தேர்ந்தெடுக்கப்பட்டது:
Mata 4: CKL
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2023 Seed Company in collaboration with Language Developers and Bible Translators Association