लूका 3
3
यहून्ना का खत्त
(मत्ती 3:1–12; मरकुस 1:1–8; यूहन्ना 1:19–28)
1कैसर तिबिरियुस्सा के राज-पाठ्ठा के पंदरवें साल्ला म, जिद यहूदिया का बड़ा अधिकारी पुन्तियुस पिलातुस थिया, अर आपके बाप्पा के राज-पाठ्ठा के चौथ्थे भाग्गा के हिस्से म गलील देस्सा म हेरोदेस्सा का राज थिया, अर इतूरैया अर त्रखोनितिस्सा पर उसका भाईय्या फिलिप्पुस राजा थिया, अर अबिलेन्ना पर लिसानियस्सा का राज थिया। 2अर उन्ही दिनै म हन्नाह अर कैफा महायाजक थिये, जिधी जंगला म परमेश्वरा का वचन जकरयाह के बेट्टे यहून्ना धौरै पौंहच्या। 3अर यहून्ना यरदन नदिया क धौरै के सारे परदेस्सैं म इस बात्ता का प्रचार करया-करया कि, लोक पाप्पैं कु छोड्डी दवैं, अर पाणिया का बत्तीस्मा लैं, ताकी परमेश्वर उनके पाप्पैं कु माफ करी दै। 4जिदाकि याशायाह नबीया किया किताब्बा म लिखोड़ा है कि,
“जंगला म कोइ उंच्चे शब्दा थ कैहया करता है कि,
प्रभुआ का रस्ता त्यार करो, अर उसकियाँ सड़काँ सिद्धियाँ करो।
5हर एक घाट्टी भरी दी जाग, अर हर एक पहाड़ अर पहाड़ीयाँ थल्लै करे जाँग,
अर जो टेढ्ढे-मेढ्ढे रस्ते हैं, वो सिद्धे, अर जो उंच्चे-निच्चे हैं, वो चौरस करे जाँग।
6अर हर एक जणा परमेश्वरा के उद्धारा कु देक्खगड़ा।”
7 #
मत्ती 12:34; 23:33 बड़ी भीड़ यहून्ना धौरै बत्तीस्मा लैणै बाहर निकळी आत्ती थी, उनथै वो कैहता थिया, “हे साँप्पा के टाबरों! थमकु किनु चिताया कि परमेश्वरा के आउणैं आळे रोष्षा थ भाज्जो? 8#यूह 8:33इब थारै काम्मैं थ पता चाल्लै कि थमु पाप करना छोड्डी दिया अर आपके मनैं म या ना सोच्चो कि थारा बाप अब्राहम है, क्योंकि हूँ थमकु कैहता हैं, कि परमेश्वर इन पथरैं थ भी अब्राहम्मा वास्तै उलाद जाम्मी सक्ता है। 9#मत्ती 7:19अर इब कुहाड़ा दरखतैं कियैं जड़ैं पर धरीज्जी गया है, इसकरी जिस दरखता पर आच्छा फळ ना फळैं वो काट्टीकना आग्गुम घाल्ली दिये जाँग।”
10पिछैं लोक्कैं उसथै बुझ्झया, “तो फेरी हम इब क्या कराँ?”
11उनु उनथै कैहया, “जिस्कै धौर दो कुड़ते होवैं, वो उसकु जिस्कै धौर कोइन उसकै सात्थी बांट्टी लै। अर जिस्कै धोर रोट्टी है, वो भी इदा ही करै।”
12 #
लूका 7:29
अर चूंगी लैणै आळे भी उसकै धौर बत्तीस्मा लैणै आये, अर उसथै बुझ्झया। “हे गुरू, हम क्या कराँ?”
13अर उनु उनथै कैहया, “जितना ठहराओड़ा है, उसथै ज्यादा ना लियो।”
14अर सैनिकैं भी उसथै बुझ्झया, “हम क्या कराँ?”
उनु उनथै कैहया, “किसी थ जबरदस्ती वस्सुल्ली ना करो, अर ना किसी पर झुठ्ठी बदी लगाओ, अर आपकिया मजदूरीया थ सन्तुष्ट रहो।”
15अर इब सारे लोक्कैं म या आस घणी होई गई, अर सारे आपकै-आपकै मनैं म यहून्ना के बारे म, या सोच्या करे, कि क्या आणैं आळा मसीह कड़ी याही तो कोइना? 16जिधी यहून्नै सारैं कु या बात कही जवाब दिया, “हूँ तो थमकु पाणिया थ बत्तीस्मा देत्ता हैं, पर वो आणैं आळा है, जो मेरै थ भी शक्तिशाल्ली है, अर हूँ तो इस लायक भी कोइन कि हूँ उसके खल्लैं के फित्ते खोल्ली सकैं। वो थमकु पवित्र आत्मा थ अर आग्गू थ बत्तीस्मा दैग। 17उसका छाज उसके हात्था म है, अर आपकी गेहूँ साफ करी उसकु आपके गौदाम्मा म धरगड़ा, पर फुस्सा कु उस आग्गू म घाल्लग जो किधी भुजै कोइन।”
18अर ऐसीयैं होर भी कई बात्तैं थ वो लोक्कैं कु शुभसमाचार सुणाउता रैहया।
हेरोदेस्सा का यहून्ना कु जेल्ली म घालणा
19 #
मत्ती 14:3,4; मर 6:17,18 यहून्नै चोथ्थे भाग्गा के देस्सा के राजा हेरोदेस्सा कु इस वास्तै झिड़क्या कि उनु आपके भाइय्ये किया लुगाइय्या हेरोदियास्सा कु आपकी लुगाई बणाया, अर उसके सारे बुरे काम्मैं के बारे म भी जो उनु करे थे। 20अर इसकरी, इनथै भी बुरा काम उनु याह करया, कि उनु यहून्ना कु जेल्ली म घाल्ली दिया।
यहून्ना का यीशुआ कु बत्तीस्मा दैणा
(मत्ती 3:13–17; मरकुस 1:9–11)
21 जिद यहून्ना सारे लोक्कैं कु बत्तीस्मा देया करया, उसी वक्त यीशु भी बत्तीस्मा लेइकना प्रार्थना करया-करया, अर आसमान खुली गया। 22#मत्ती 3:17; मर 1:11; लूका 9:35अर पवित्र आत्मा कबुतरा ज़ू उसपर उतरया, अर आसमान्ना माहली या अवाज़ आई, “तौं मेरा प्यारा बेट्टा हैं, हूँ तेरै थ घणा खुश है।”
यीशुआ कियाँ पीढ़िया
(मत्ती 1:1–17)
23जिद यीशु खुद वचनैं कु सिखाणैं लाग्या, उस वक्त लगभग यीशु तीस्सैं साल्लैं का थिया। अर लोक सोचते थिये कि यीशु यूसुफा का बेट्टा थिया। यूसुफ एलीआ का बेट्टा थिया। 24अर एली मत्तात्ता का, अर मत्तात लेवीआ का, अर लेवी मलकिआ का, अर मलकी यन्ना का, अर यन्ना यूसुफा का, 25अर यूसुफ मत्तित्याह का, अर मत्तित्याह आमोस्सा का, अर आमोस नहूम्मा का, अर नहूम अस्सल्याह का, अर असल्याह नोगाह का, 26अर नोगह मात्ता का, अर मात मत्तित्याह का, अर मत्तित्याह शिमिआ का, अर शिमी योसेक्खा का, अर योसेख योदाह का, 27अर योदाह यहून्ना का, अर यहून्ना रेस्सा का, अर रेस जरुब्बाबिल्ला का, अर जरुब्बाबिल शालतियेल्ला का, अर शालतियेल नेरीआ का, 28अर नेरी मलकिआ का, अर मलकी अद्दीआ का, अर अद्दी कोसाम्मा का, अर कोसाम इलमोदाम्मा का, अर इलमोदाम एरा का, 29अर एर येशूआ का, अर येशू इलाजारा का, अर इलाजार योरीम्मा का, अर योरीम मत्तात्ता का, अर मत्तात लेवीआ का, 30अर लेवी शमौन्ना का, अर शमौन यहूदाह का, अर यहूदाह यूसुफा का, अर यूसुफ योनान्ना का, अर योनान एलयाकीम्मा का, 31अर एलयाकीम मलेआह का, अर मलेआह मिन्नाह का, अर मिन्नाह मत्तत्ता का, अर मत्तत्ता नातान्ना का, अर नातान दाऊदा का, 32अर दाऊद यिशै का, अर यिशै ओबेद्दा का, अर ओबेद बोआज्जा का, अर बोआज सलमोन्ना का, अर सलमोन नहशोन्ना का, 33अर नहशोन अम्मीनादाब्बा का, अर अम्मीनादाब अरनीआ का, अर अरनी हिस्रोन्ना का, अर हिस्रोन फिरिसा का, अर फिरिस यहूदाह का, 34अर यहूदाह याकुबा का, अर याकूब इसहाक्का का, अर इसहाक अब्राहम्मा का, अर अब्राहम तिरह का, अर तिरह नाहोरा का, 35अर नाहोर सरुग्गा का, अर सरुग रऊआ का, अर रऊ फिलिग्गा का, अर फिलिग एबिरा का, अर एबिर शिलह का, 36अर शिलह केनान्ना का, केनान अरफक्षद्दा का, अर अरफक्षद्द शेम्मा का, शेम नूहा का, नूह लिमिक्का का, 37अर लिमिक मथूशिलह का, अर मथूशिलह हनोक्का का, अर हनोक यिरिद्दा का, अर यिरिद महललेल्ला का, अर महललेल केनान्ना का, 38अर केनान एनोश्शा का, अर एनोश शेत्ता का, अर शेत आदमा का अर आदम परमेश्वरा का बेट्टा थिया।
தற்சமயம் தேர்ந்தெடுக்கப்பட்டது:
लूका 3: Sansi
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
New Life Literature