Luke 15
15
{Sipisipi} hokahi ulano
(Mat 18.12-14)
1Komaꞌi nakama aoao na{kakisi} ia ma nakama haisala uo aꞌe Jesus nohalono nakakala aia la. 2Kena naFarasi ma nakama polopolo nakuaa la ukamumu, “Kama nei eko nakama haisala noꞌai maia.” 3Kena iko Jesus ime aꞌe nakama la kakala hulihuli nei.
4“Poi hekama okou eisi huikalau na{sipisipi}, kena {sipisipi} hokahi elano, kama la mekiaꞌi kipusivo ma sivo na{sipisipi} la, kena ihaele nosee {sipisipi} hokahi elano la. Kama la mesesee ilave aia {sipisipi} la. 5Ia keualoko kama la melave {sipisipi} la, kama la mehihia lo, kena ihapili kemanu la iluna panaua aia. 6Kena ivaꞌai i hale noanaa aꞌe nasoa aia ma nalave ana aia la, ‘Omai hahihia manau. Maikinimea anau ulave ke{sipisipi} kela anau nilano la.’
7“Anau eme aku okou. Na{enselo} kevaelani la ehihia lo, keualoko kekama haisala uui ikaha ma nahaisala aia la. Elaꞌa iluna ma kipusivo ma sivo nakama ekonu kahi kela sehakaꞌoko ma lakou meui ikaha ma nahaisala lakou la.
Sileni hokahi ulano
8“Poi hehine eisi sehui nasileni, kena sileni hokahi elano, kama la mehaula keahi, kena ihakaa valoko hale. Isesee hapulu ma ilave sileni hokahi elano la. 9Kena keualoko kama la nilave, kama la meanaa aꞌe nasoa aia ma nalave ana aia la, ‘Omai hahihia manau, maikinimea anau ulave sileni kela anau nilano la.’
10“Keualoko kekama haisala uui ikaha ma nahaisala aia, na{enselo} ialuna ehihia imua Keakua pela hoi.”
Kaupeala hokahi ulano
11Kena iko Jesus ikakala aꞌe, “Kela hekama eisi sakaupeala aia. 12Kama soliꞌi la eme aꞌe kamana aia la, ‘Ko mai kuhana anau la.’ Ko kamana koꞌolua la ivae naheaꞌu la i lakonu sakaupeala aia la.
13“Kena imuli elava naaho, kaupeala soliꞌi la ehaꞌuku naheaꞌu aia la hakoa noholau henua emao lo. Kena kama la meme puamu namoni la i nakahao aia la. 14Ia keualoko namoni aia la nioki, keone la ukae aꞌe henua la, kena kama la ukuku haeꞌo. 15Kena kama la ume mo manu sili kela kekama henua la. Kena kama la uhaunalia kaupeala la nololosi na{piki} iloko paupaꞌu aia la. 16Kaupeala la uhiꞌai namanunu na{piki} la meꞌai, ia sehikama au aꞌe namea aia iꞌai.
17“Kena kaupeala la umakino pela aia evale haeꞌo, kena ihakaꞌoko pela nakama heheaꞌu kamana aia la ekomaꞌi naꞌai eꞌai. Ia aia ukapili imake kanahiꞌai. 18Kena kaupeala la ehakaꞌoko kevaꞌai muli kamana aia la, kena ime aꞌe kama la, ‘Kamana. Anau ehaisala i namaisu Keakua, ia haisala i namaisu aꞌoe. 19Anau sekau kenoho inei poi hekama aꞌoe. Ia ko anau poi hekama heheaꞌu aꞌoe.’ 20Kena iko kaupeala la ivaꞌai muli kamana aia la.
“Ia keualoko kaupeala la nihamai imao, kamana aia la uꞌike kama la, kena ualoha haeꞌo kaupeala aia la. Kena ikele aꞌe nopulu kama aia la novaisoni. 21Ko kaupeala la ime aꞌe, ‘Kamana. Anau ehaisala i namaisu Keakua, ia haisala i namaisu aꞌoe. Anau sekau kenoho inei poi hekama aꞌoe.’
22“Kena iko kamana aia la ime aꞌe nakama heheaꞌu la, ‘Au mai vave nipamalo kaualeꞌa ma kaupeala nei ileleu. Au mai hoi kemoni ikalo kemakalima kama nei. Ia ko mai nakapuae ikalo navae kama nei. 23Kena ukaa punua {bulumakau} la, iꞌai kakou ihahihia ma kama nei. 24Anau ehakaꞌoko pela kaukama nei namake avale, ia vahonei eꞌila pela kama nei uola muli. Kama nei ulano, ia vahonei kakou ulave muli kama nei.’ Kena nakama la uhahihia ma kaupeala soliꞌi la.
25“Vahola, kaupeala makua la enoho iloko paupaꞌu la. Ia keualoko aia nisasaika aꞌe kehale la, kama la elono kemaha polepole keulue. 26Kena iko kama la ime aꞌe kekama heheaꞌu aia la, ‘Kela heulue ea?’ 27Ko kama heheaꞌu ime aꞌe, ‘Kaina aꞌoe la uvaꞌai mai muli. Kamana aꞌoe la ukaa punua {bulumakau} la noꞌai kakou, maikinimea kaina aꞌoe la ukae laoi mai.’
28“Kena kaupeala makua la uloko haeꞌo, usehihai kehaele noꞌai keꞌai la. Kena kamana aia la uhaele aꞌe nokakala laua. 29Ia kaupeala la eme aꞌe kamana aia la, ‘Anau eheheaꞌu maꞌoe komaꞌi nahekau. Anau halono kahi nakakala aꞌoe la hakoa. Ia aꞌoe seau mai punua {nanikoti} soliliꞌi ipena heꞌai iꞌai anau ma nasoa anau la. 30Ia kamaliꞌi soliliꞌi aꞌoe la ememe puamu namoni aꞌoe la i nahine hai huli. Ia keualoko kama la nivaꞌai mai muli, aꞌoe ekaa punua {bulumakau} eniu la, iau aꞌe kama la noꞌai.’
31“Ko kamana kama la ime aꞌe, ‘Kaukama, aꞌoe enoho kahi manau. Namea hakoa anau, nimea aꞌoe. 32Kakou iꞌai hahihia. Maikinimea kakou uhakaꞌoko pela kaina aꞌoe la umake, ia vahonei kama la uola. Kama la ulano, ia vahonei kakou ulave muli kama la.’ ”
தற்சமயம் தேர்ந்தெடுக்கப்பட்டது:
Luke 15: ojv
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 1999, Wycliffe Bible Translators, Inc. All rights reserved.