Kejadian 12
12
1Aminyan ara, Allah el si Yahweh arye, Abram biti nyabuk. “Abram anda, an ulyam mutuku ap, an yala nang ap, an ni koprop aik unyak nang ap, anggun mapu silip nirya batakuka, narye nuknamkin mutuku binalame,” nyabuk. 2Nyabukce, anyalin yupu tonap dukdongopbuka nyabuk. Allah arye, Abram biti nyabuk yupu ara, ani. “Narye anti, pia teleb kipkinirye, narye melilamkiniba, ance deipminyeba, dadeipdanin balamica ani, deipnamak nang, pia weik upnin banamake. Aninye nirya ati, sik apu koproba kibuka unalame. Na mikip deice arye, an si weik arye, ereipkiniba, ninye nirya arye, anti kekepnamake. Narye melipkineba, an deice arye, yuk nang weika arye, teleb updeipnamne.
3Yata ninye do nirya, sikce anti, teleb yupu nyabuka, teleb kipdeibkicopura, narye anang ati, tamubuka teleb kipdeipnamne. Aning atonun, yata nang do, sikce anti, malye yupu nyabuka, an nong deice ikin ning deipkicopura, narye anang ton tamubuka, sik nong deice ikin ning delinamne. Aninye sik wenemna ati supnamne. Narye melipkineba, an deice arye, yuk ninye tukwak nang im sirya, mutuku sirya nirya ati, teleb kipdeipnamne.” Allah arye Abram biti, nyalin yupu nyapdeibuk.
4Allah el si Yahweh arye, Abram biti ayupu nyabukba, Abram bira, Haran mutuku batakuka biyuk. Ara, Allah arye, Abram biti ‘Winipnamlyame,’ nyapdeibuk touk, Abram el li, el weit koproba birye deibuk mi, Lot dobuka Haran mutuku batakuka, panabuka neika biyik. Abram panabuka biyuk talak ara, elda keting tamun 75 tahun wisi akunum danamuk.
5Tonda Abram birye, el kil Sarai ap, sik Haran mutuku noutamak taleamuk ning nirya ap, Haran mutuku noutamak neika ulamikce, sikti miliamik nang ap, aning-aning nirya dobuka, ‘Kanaan mutuku binuka upnamap’ tenen, bisik biyik. Bisik panabikce, pia banmeka ani, Kanaan mutuku biyik. 6Abram Kanaan mutuku noutamak banmoka ani, tonok mutuku si ara, Sikem mutuku bukni, ara weik yo, keramat yo tikamuk mutuku si, More mutuku biyuk. Abram amutuku noutamak balamuk talak ara, Kanaan yala nang weik amutuku tuba ulamik.
7Abram bira More mutuku biyukba, Allah el si Yahweh arye, Abram dam yanuka tikukce, ayupu nyabuk. “Abram, ance deipminyeba, dadeipdanin balamica ani, dadeipdanin binamak mapu ati, amutuku nirya arepnamne,” nyabuk. Amutuku ara, Allah arye, Abram dam yanuka tikukce, ayupu nyabuka ati, Abram birye, Allah el si Yahweh#12:7 Yahweh – Allah el si koproba ara, Yahweh ulule. Ibrani yupu nyanyak kili sal arye ‘Allah el si koproba ara, lakak arye kum nyaptibnye’ tenen, ilil ulula ati ara, sikce huruf YHWH aninguk sekenyake. Bukni, ‘YHWH’ ahuruf uk sekipyopura, ayupu nyana ara, walwal upsilyak’ tenen, nunce, ‘Yahweh’ sekenyabe. Indonesia Alkitab ara, Allah el si Yahweh ulul sukum ara, ‘TUHAN’ sekenyake. Ayupu bikna ati, laka nyan yupu nomor 49 dipdelulume. ati, el si erena ap, el arena ap ati, pala keil dobukabukce, keil yangapdeibuk. 8Yangapdeibukce, asukum panabuka bisik banmoka ani, Betel mutuku bukni, keting yangan tam ara, mutuku kon welebukce binuka, tenda cang kain aik dobuk. Betel mutuku ara, keting wekelban tam, Ai mutuku ara, keting yangan tam noutam ara, el tenda aik dobuk. Asukum ton Allah el si Yahweh ati, el si erena ap, el arena ap ati, keil pala dobukabukce, keil yangapdeibukce, Allah el si Yahweh yukubukce morobuk.
9Aning nirya akunum winibukopura, amutuku batakuka, yuk mutuku si Negeb#12:9 Negeb – Amutuku ara, Kanaan mutuku bukni, outam mutuku ulule. mutuku lyu bisik biyuk.
Abram Mesir mutuku biyuk yupu
10Atalak ara, Kanaan mutuku noutamak din nirya kum dayukba, ninye nirya ara, kwaning patalamukba kwaning bulanguk ulamik. Din ara, pia kum danamukba, ikin weik ulamuka anya arya, Abram bira, ‘Mesir mutuku kouluknirye, tia talak ati unamne’ tenen, panabuka biyuk. 11Panabuka banmoka ani, Mesir mutuku panalbinuyuk talak ara, el kil Sara ati nyabuk. “Anda urasin pia teleb kil ulyama ara, na kele.
12Mesir mutuku noutamak unyak nang eipkikirye, nyapnamake. ‘Kume, akil ara, anye dobuk kil atia,’ nyabuka eipkikirye, ‘Anye bira opnamabe. Akiluk, kam una telebe,’ tenepnamake. 13Ati ara, ance amutuku nang ati, ‘Kume, anye bira na du binya,’ nyapnamnilame. Nati, nyapniminyopura, sik kekebikirye, nati telebe nyabuka melipnamniyake. Anang arye, ‘Anye el makal kil telebe,’ tenebikirye, na kum opnamniyake,” Abram birye, Sara biti nyabuk.
14Nyabukura, sik bisik banmeka ani, Mesir mutuku koprop wekikura, sik Mesir mutuku nang arye, Sarai eibikce, ‘Se, akil ara, urasin pia teleb kil,’ tenebikce, kanye deibik. 15Aning ara, Mesir mutuku taleamuk deiyoknye, Firaun, el pil deiyok nang arye, Sarai eibikce, sik deiyoknye, Firaun biti laka nyalbiyik. “Akil ara, urasin pia telebe,” nyabuka laka nyabikba, Firaun birye, nyapdeibukba, Sarai bobuka, el aik deibikba, asukumuk unmok.
16Sara daunmoka ani, ‘Abram bira, el makal kil telebe’ tenen, sik nirya arye, Abram biti, “Telebe,” nyabuka melilamikce, kilamik. Sikce Abram biti arenmek ning ara, weike. Ara, domba basam ap, sapi basam ap, unta basam ap, keledai basam yim ning ap, kil ning ap, tonda ‘Abram el pil melinamak’ tenen, pil don nang ap, kilapu ap, weik arebikba, Abram doprobuk.
17Winibuka daunmek bukni, Allah el si Yahweh arye, Firaun bira, Abram el kil Sara ubula dopropmoka ati, Firaun el wenena ati, ikin weik uk yala arebukba, Firaun ap, el mapu silip ap nirya, uk dinmok. 18Uk dinmokba, Firaun birye, Abram yukubukba, yayuk. Yayukura, Firaun birye, nyabuk. “Anda yata ikin ning na nong deice deipmanilan do? Yata deiyok ati, kunusa dopmanumurye, ‘Akil ara, na dopse kil,’ nyabuka lak kum nyapnulum do?
19Yata deiyok ati ‘Akil ara, na makal kil uka,’ nyapnulum do? tilila nyapnulumba, dib tenepse ati, ‘Akil dopnun’ tenen, akunum dopropse. Winira ance domlum kil atia. Akil dobuka, na batakuka bindoplyame!” Firaun birye, Abram biti nyabuk. 20Nyabukopura, el pil melin nang ati, yupu nyapdeibukba, sikce Abram ap, el kil ap, sik bona nirya ap ati, amutuku bai tam dopkwetebuka, bindobik.
தற்சமயம் தேர்ந்தெடுக்கப்பட்டது:
Kejadian 12: EIPA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023, Wycliffe Bible Translators, Inc. All rights reserved.