Kejadian 8
8
1Weik mekwen deiamuka ati daulamuka ani, Allah arye, Nuh ap, el mapu silip ap, sik ap neika unmek ning, kam ning ayala-yala nirya ati tuba teninmokce, elce nyapdeibukba, weik mok piripna dobukba, amekwen ara, mitik anun arye, cepnin banmok. 2Ura, laut mekwen pum bisik uamuk mek pu ap, im deice arye, dolkwetenmok mekwen ap ara, Allah arye, nyapdeibukba, anirya cepdobukba, kum dayuk. Tonda, weik mok celamuk ning ara, kum dayukce, dou mabuk.
3-4Dou mabukopura, tukwak mutuku im sirya, mutuku sirya nirya deiamuk mekwen ara, pia cepdopnin banmok. Cepropnin banmoka ani, yupa weik, 150 sum akunum ubukba, wala tekbarye, sum ara tanggal tujuhbelas (17) sum arye, kouluka yanganmoka ani, amek lia yo babye, mekwen deice sakuka, weik mutuku dup deice tam barilyayuk. Amutuku dup si ara, Ararat mutuku nyalamik. 5Mek liya yo dabaripmok bukni, mekwen ara pia tuba cepropnin balamuka ani, taku wala bukni tanggal satu sum arye, Ararat mutuku tam ap, dup ap ara, mek pum arye, belebukce, laka kibuk.
6Amek lia yo asukumuk baripmokbuk, sumura yupa weik, 40 sum akunum ubukba, Nuh birye amek lia yo abilinga noutam potokamuk bisik jendela tonok pakibuk. 7Pakibukura, tonok maka, el si ara, Ambun maka lopdeibukba, amaka arye dou tam abinapna ani, atam tamubuka ayanapna kibuka, apia kwelamuka ani, mekwen akunum cepdobuk talak ara, tukwak sakuka bindobuk. 8Amaka ara, pia lakda banauk, unmoka anya arye, yuk sum ara, Nuh birye Yalma maka atonun ton, lobuka dopkwetebukba, lakuka biyuk. Ara, ‘Mekwen nirya akunum ceproliba, tukwak mutuku laka kiptuba, bulbitu do, kum do?’ tenen, amaka dopkwetebuk.
9Yalma maka arye, ‘Dan sukum buktinye do?’ tenen, pia lakuka epdabanmoka ani, dana-dana tam nirya dipdinin biyuk buk, tukwak mutuku im sirya, mutuku sirya nirya ara, mekwen tuba uamuka ati, Nuh el mek lia yo aik unmokak uk, tamubuka yayuk. Nuh birye ajendela bisik noutam aryuk, el taruk buru tam dopkwetebukba, amaka ara, el taruk deice yanuka bulyayukba, tomobuka aik pum tamuk deibuk. 10Winibukopura, Nuh bira tek sum tonap, talye daunmok bukni, tek sum akunum ubukura, yalma maka atonun ton dobuka, jendela bisik arye buru tam dopkwetebuk.
11Beren tam talak dopkwetebukba, Nuh birye keting noutamak nirya ara, amaka ton kum eibuk bukni, keting kumupnuyuk talak ara, amaka tamubuka yayukba, Nuh dipdeyukce, el si bama pum ara, winiryuk papmok yo bok ton si bikmokba eibuk. Ayo bok eibuka deice arye, ‘E, wini talak tukwak mutuku deice deibuk mekwen nirya akunum cepropmale’ tenen, bikuk. 12Nuh bikukce, ‘Tek sum deice arye, tonap talye daunamne’ tenebukce, daunmok bukni, tek sum akunum ubukura, ayalma maka atonun tonap lopdongobukba, lakuka biyuk. Biyuk bukni, atalak ara, amaka Nuh dam tamubuka kum yayuk.
13Nuh bira, keting tamun yupa weik, 601 tahun akunum kibuk sum, wala tonok tanggal satu kibuk sum ara, amekwen nirya pia ceprobukce, sirya kum dayukba, tukwak mutuku im sirya, mutuku sirya nirya mikrobukce, telebuk kibuk. Mikrobukopura, Nuh birye, mek lia yo deice domuk aik aruma nirya ulubukabukce, tukwak tam dana-dana dipdeyukce, ‘E, tukwak nirya ara, akunum mikropmale, teleb uple,’ tenebuk. 14Ara, wala bitinye bukni, tanggal 27 deice ara, tukwak mutuku im sirya, mutuku sirya nirya akunum mikuka anya arye, telebuk kibuk. 15Teleb ubuka anya arye Allah arye, Nuh biti nyabuk. 16“An ap, an kil ap, an mapu ap, sikce domik kilapu ap, anggun nirya ara, amek lia yo deice domlum aik batakuka, tuku tam talye mangkau asa sakuka yalulume.
17Yamunye talak ara, anggun ap neika umunye ning, maka ap, kam ulye ning ap, tuku deice balamle ning ap, aning ayala-yala nirya aulye touk dobuka buru yanulume. ‘Aning-aning nirya ara, yopdakirye, sik mapu weika arye, deibikiba, yupa pia weik upra banamak’ tenen, aning-aning nirya lopdeiplyame,” nyabuk. 18Allah arye, nyapdeibuk ati, Nuh ap, el kil ap, sik mapu ap, sikce domik kilapu ap, mek lia yo pum bisik arye, tuku tam sakuka yayik.
19Tonda, atalak anyuk ara, tukwak mutuku ulamuk kam ning nirya ap, tuku deice yanibuka balamuk ning ap, maka ap, aning-aning tukwak mutuku ulye ning, ayala-ayala nirya yuk-yuk bukni, tuku tam sakuka yayikce, bindobik. 20Winibukba, Nuh birye, ‘Allah elti, si ereipnun’ tenen, pala keil yangabuka deibukce, Allah el si Yahweh, el arin ning ati kintinibuk. Ara, min talak Allah arye, “Akam ulye ning telebe, amaka yala ara telebe,” nyapdeibuk yala ninguk, mitik anun arye, dobuka, obukce, pala keil yangabuka deipmoka deice, uku sekukce, aning nirya uku dabuk.
21Nuh birye, Allah el si erena ati, aning nirya uku dongobukba, uku dinmokce, nintong teleb ning welebukba, Allah el si Yahweh kekebukce, “Telebe,” tenebuk. Utenebukce, Allah el talima pum arye aning ton tenebuk. “Ura, wini talak arye, dipdongobuka doryanganamle talak noutamak nirya ara, ninye tukwak ninye ati, tukwak mutuku tonap ikin ning deibuka, malye kum updeipnamne.
Ninye tukwak ninye nirya ara, winiryuk deibikce talak arye, dipdongobuka, sik kam unamak talak noutamak nirya ara, sik kanye tenenamak ning ap, sik talima patalamle ning nirya ap ara, pia malye unamle bukni, tukwak mutuku ara, tamubuka tonap malye kum kipdeipnamne. Tukwak mutuku nirya ati, tonap tamubuka kum supnamne. Tonda, tukwak mutuku kam ulye ning ayala-yala nirya, obuka kum daneipman touk, yuk talak ara, tup tamubuka tonap kum winipnamne.
22Tukwak mutuku im sirya, mutuku sirya nirya, tuba unamle talak noutamak nirya ara, pia kum winipnamle ning nyapnune. Ara, yala ning koun talak ap, engopliba linamak talak ap, moul li ap, buppu li ap, dou malamle talak ap, kaipye yo kita polamlirye mok denelamle talak ap, keting noutam ap, lukunyan ap, aning-aning nirya, pia tuba wininamle. Tukwak mutuku tuba unamle talak ara, aning kum winipnamle.” Allah arye, el kanye talima noutamak tenebuk.
தற்சமயம் தேர்ந்தெடுக்கப்பட்டது:
Kejadian 8: EIPA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023, Wycliffe Bible Translators, Inc. All rights reserved.