1 Mose 30
30
1Mu thangu Lakheli kamona ti kakadi butila Yakobi bana, Lakheli wuzinina khomba andi Leya. Wukamba Yakobi: «Wuphana bana, ti ka buawu ko mu kedika mandifua.» 2Vayi Yakobi wufuemina Lakheli ayi wunkamba: «Ndilenda ba va fulu ki Nzambi kembo kuvana mbutu?» 3Yandi wuvutula: «Tala sielo kiami Bila, bundana nitu ayi niandi muingi kabutila va makuma mami ayi minu phe ndibaka bana mu nzila andi.» 4Wumvana Bila, sielo kiandi, muingi kaba nketo andi. Buna Yakobi wuyiza kudi niandi.
5Bila wubaka buemba ayi wubutila Yakobi muana wubakala. 6Lakheli wukamba: «Nzambi wundungisini! Wuphangidi mandombidi ayi wupheni muana bakala.» Diawu wuntedila Dani#30.6 Mu ki Ebeleo dizina di Dani difuanikini banga diambu dibangudulu vava sambusu..
7Bila, sielo kinketo ki Lakheli, wubaka buemba bunzole, buna wubutila Yakobi muana wunzole wu bakala. 8Lakheli wukamba: «Ndueni mvita yingolo ayi khomba ami yinketo ayi ndungini.» Wumvana zina: Nefatali.
9Leya bukamona ti ka kakadi bue buta, wubonga Zilipa, sielo kiandi kinketo, wumvana kudi Yakobi muingi kaba nketo andi. 10Buna Zilipa, sielo kinketo ki Leya, wubutila Yakobi muana bakala. 11Leya wukamba: «Phila ndunzi!» Wumvana zina Ngadi.
12Landila momo, Zilipa, sielo kinketo ki Leya, wubutila Yakobi muana wunzole wubakala. 13Ayi wukamba: «Phila mayangi kudi minu! Bila bana bandumba mabakamba ti ndidi nketo wumayangi.» Ayi wuntedila Aseli.
14Lumbu kimosi, mu thangu ngionzoko, Lubeni wuyenda ku nsitu mu kuetombi makundi mantedolongo ti mandangolo Natini mawu ngudi andi Leya. Buna Lakheli wukamba Leya: «Ndikubombidila, wuphani makundi ma mandangolo ma muana aku.» 15Leya wuvutula: «Dikadi fuana kudi ngeyo bu wunziona bakala diami? Buabu tidi diaka bonga makundi ma mandangolo maneti muana ami!» Buna Lakheli wuvutula: «Bika Yakobi kabundana yaku nitu builu buabu mu viakasana makundi ma luzolo ma muana aku.»
16Mu masika, thangu Yakobi kame ba kunsitu, Leya wumbuana ayi wunkamba: «Mawiza kudi minu bila ndibeki bu tuviakisini makundi ma luzolo ma muana ami.» Yakobi wubundana yandi nitu builu buna. 17Nzambi wuwila Leya. Leya wubaka buemba buntanu ayi wubutila Yakobi muana. 18Leya wukamba: «Nzambi wupheni mfutu bu bupheni sielo kiami kinketo kudi bakala diami.» Wuntedila Isakali#30.18 Mu ki Ebeleo, Isakali dibangudulu mfutu ami.
19Leya wubaka diaka buemba ayi wubutila Yakobi muana wunsambanu wu bakala. 20Buna Leya wukamba: «Nzambi wuphangidi ma mbote, buabu bakala diami madi ba diami veka bila mbe kumbutila bana basambanu ba babakala ayi wumvana zina Zabuloni#30.20 Mu ki Ebeleo, Zabuloni dibangudulu makanzitisa» 21Buna wubuela buta muana wu nketo, wumvana zina Dina.
22Ku zimunina, Nzambi wubambukila Lakheli moyo, wumwila ayi wumvana mbutu. 23Wubaka buemba, wubuta muana wu bakala ayi wukamba: «Nzambi botudi bosi tsoni ziami.» 24Wumvana zina Yosefi#30.24 Mu ki Ebeleo, Yosefi dibangudulu kaphana diaka ayi ndombolo yayi: «Bika Nzambi kambuela muana wunkaka wubakala.»
Yakobi wuvuama
25Diadi diyiza bua, Lakheli bu kabuta Yosefi, Yakobi wukamba Labani: «Wuphani nsua ndivutuka ku buala buami, ku tsi ami. 26Wuphani baketo bami ayi bana bami, bobo bandisadidi muingi tuenda bila mu kedika ngeyo zebi mbote phila kisalu mbekusadila.» 27Labani wunkamba: «Ti mbonokono nlemvo va meso maku, ndikubombidila, Nzambi zami zimbonisini ti Yave wutsakumuni mu diambu diaku. 28Wukhambi mfutu wutidi, ayi mandi futa thalu beni.» 29Wumvutudila: «Nge veka zebi mbote bue ndikusadidi ayi bue bibulu biaku bimeniekina mu diambu diami. 30Ndambu kimvuama kiba yaku tekila ndiza kiniekini. Yave wukusakumuni tona ndikota mu nzo aku. Disi fuana ko minu phe ndiesadi mu diambu di nzo ami?» 31Buna Labani wukamba: «Kima mbi fuiti kuvana?» Yakobi wuvutula: «Kadi kuphana kadi kima. Ti wuphangidi ma ndieka kunkamba, mandi vutuka buela dikila ayi sunga bibulu biaku. 32Mandivioka lumbu kiaki muamo muidi bibulu biaku bifioti, vengumuna memi didio di mbakala didi matona mafioti ayi maneni ayi dioso dimemi di mbakala di mfunzi va khati ka bana ba mamemi ma mbakala, ayi kioso bulu kidi na matona va khati ka zikhombo. Tona lumbu kiaki, wowo mawuba mfutu#30.32 Bi buku 32-34 bisi ko bivisakana mbote vayi diambu di ngudi disuemi mu bibuku beni dinsonga ti Yakobi wulutila Labani mu nduenga nate kasekula mfutu andi kumi di zikhumbu, ( 31.7,41) ami. 33Lunungu luami luela kuthela kimbangi kioso lumbu ki tidi kuiza mu fiongunina mfutu ami, kioso bulu kiela kambu matona mafioti voti matona mambuaki va khati ka zikhombo voti ma ndombe va khati ka mamemi ma mbakala, buna bibulu bi buivi ti bimonikini mu biami.» 34Buna Labani wunkamba: «Bufueni! Bika diba banga bukembi.»
35Kina kiawu lumbu Labani wuvengumuna zikhombo zimbakala ziba zinzila-nzila ayi matona, ayi zikhombo zizio zikheto ziba matona ayi mateti mateti, bibio biba matona maphembi, ayi bibio biba bi mfunzi va khati ka bana ba mamemi ma mbakala, wumavana kudi bana bandi ba babakala, 36Bosi wuvanga luvambanu lu lumbu bitatu bi ndiatulu mu malu va khati niandi ayi Yakobi, Yakobi wutatamana dikila ndambu bibulu bi Labani bisiala.
37Yakobi wukibongila minti-nti minlangu, bimimpese-mpese, bibimbombo ayi bipelatani. Botudi minsinga mifioti mu lula lunti muingi zinzila zimpembe zitotuka. 38Va zimunina, wutula bitini bi minti bika tubula va ntuala bibulu, mu mimbuinga, mu fulu binuiwunungu nlangu biwala nlangu vaba kuiza nuinanga bibulu nlangu, muingi bayimita mu thangu babakuizanga ku nua nlangu. 39Bibulu biyimita va ntuala bitini bi minti, buna bibulu bibuta bana baba zinzila-nzila, matona matona ayi mateti mateti. 40Yakobi wuvambisa bana ba mamemi ma mbakala ayi wutadisa ntu mi bulu ku ndambu yi mamemi maba nzila-nzila ayi ma mfunzi mu nkangu bibulu bi Labani.
Bosi wuvasa makamba mandi ayi kasimatula ko fika-fika ayi makamba ma bibulu bifioti bi Labani 41Tala mambu mabua, Thangu zizio bibulu bivokuta biba yimitanga, Yakobi wubatulanga bitini bi minti mu mimbuinga, va ntuala bibulu, muingi ba yimita fika-fika ayi bitini bi minti. 42Vayi ti bibulu bidi bilebakana, kaba bitulanga ko. Diawu, bilebakana biba kaka bi Labani, vayi bivokuta biba bi Yakobi.
Yakobi tinini Labani
43Buna Yakobi wutatamana vuama, wuvua bibulu biwombo, bisadi bibaketo, bibabakala, zikamela ayi ziphunda.
தற்சமயம் தேர்ந்தெடுக்கப்பட்டது:
1 Mose 30: YOM-CD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Seed Company in coordination with Forum Communautaire des Traducteurs de la Bible et Alphabétisation