1 Mose 46
46
Yakobi wuyenda ku Ngipiti
1Isaeli ayi batu bandi babo ba kavua bayenda ayi batula ku Beli-Seba, ayi wuyoka minkayilu kudi Nzambi yi se diandi, Isaki. 2Buna Nzambi wumokana ayi Isaeli mu mona-meso, va builu. Wukamba: «Yakobi! Yakobi!» Yakobi wuvutula : «Minu niandu, ndilembo kuwe» 3Nzambi wubuela tuba : «Minu Nzambi, Nzambi se diaku yi se diaku. Kadi mona tsisi mu kulumuka ku Ngipiti, bila kuna mandikitula kanda diaku dineni. 4Minu veka mandikulumuka yaku ku Ngipiti ayi minu veka phe ndiela buekukumisa mu kedika ayi Yosefi wela zima meso maku.»
5Landila mambu momo, Yakobi wutelama ayi wuyenda ku Beli-Seba ayi bana ba babakala ba Isaeli banata Yakobi, se diawu, bana bawu, ayi bakazi bawu, mu makalu momo Falao kafidisa mu ku banatina. 6Diaka, banata bibulu biawu ayi bima biawu, biobio bi bakupika mu tsi Kanana. Ku zimunina, batula ku Ngipiti#46.6 Dedikisa Mav 7.15. . Yakobi ayi nkuna andi ayi niandi. 7Wukotisa ayi niandi ku Ngipiti ayi bana bandi bababakala, ayi batekolo bandi bababakala, bana bandi babaketo ayi batekolo bandi babaketo, inga, nkuna andi wuwo.
Kanda di Yakobi
8Tala mazina ma bana ba babakala ba Isaeli, bana bobo ba Yakobi, bakota ku Ngipiti : Yakobi ayi bana bandi ba babakala: muana wu bakala wuthete mu butuka wu Yakobi wuba Lubeni.
9Ayi bana ba babakala ba Lubeni baba: Hanoki, Palu, Heseloni, Kalami.
10Ayi bana ba Simeoni baba: Yemueli, Yamini, Ohadi, Yakini, Sohali, Sauli, muana bakala wubuta nketo muisi Kanana.
11Ayi bana ba babakala ba Levi baba: Ngelesoni, Kehati ayi Melali.
12Ayi Bana bababakala ba Yuda baba: Ele, Onani, Sela, Pelesi, Zela. Vayi Ele ayi Onani bafua mu tsi Kanana. Ayi bana ba Pelesi baba: Heseloni ayi Hamuli.
13Ayi bana ba Isakali baba: Tola, Puva, Yobi ayi Similoni.
14Ayi bana ba Zebuloni baba: Seledi, Eloni ayi Yaheleli.
15Bawu bana ba Leya kabutila Yakobi ku Padani-Alami, ayi muana andi wunketo Dina. Miela mimio mi bana bandi ba babakala ayi bana bandi ba baketo miba thalu makumi matatu ayi miela mitatu.
16Bana ba Ngadi baba:Tsifioni, Hangi, Suni, Eseboni, Eli, Alodi ayi Aleli.
17Bana bababakala ba Aseli baba: Yimina, Yisiva, Yisivi ayi Belia ayi Sela wuba busi kiawu. Ayi bana ba Belia baba: Hebeli ayi Malakieli.
18Bawu bana ba Zilipa, niowo Labana kavana muana andi wunketo Leya. Mu thangu yilanda Zilipa wubutila Yakobi bana: kumi miela misambanu.
19Bana ba babakala ba Lakheli, nkazi Yakobi baba: Yosefi ayi Benyamini.
20Ayi Yosefi wubuta mu tsi Ngipiti: Manase ayi Efalayimi bobo bambutila Asinati, muana wu nketo wu Potifela, nganga nzambi yi Oni.
21Ayi bana ba Benyamini baba: Bela, Bekeli, Asabeli, Ngela, Naamani, Ehi, Losi, Mupimi, Hupimi ayi Aladi. 22Bawu bana ba babakala ba Lakheli kabutila Yakobi. Miela mimio miba thalu, kumi ya.
23Ayi muana wu bakala wu Dani: Husimi.
24Ayi bana ba Nefatali baba: Yaheseli, Nguni, Yeseli ayi Silemi.
25Bawu bana ba babakala ba Bila, niowo Labani kavana kudi muana andi wu nketo Lakheli. Mu thangu yilanda, wubavana kudi Yakobi, miela mimio miba thalu tsambudi.
26Miela mimio miyiza kudi Yakobi mikota ku Ngipiti miba miomio mitotukila mu bunda bunda diandi, mu kambu tanga bakazi ba bana ba babakala ba Yakobi. Miela mimio miba thalu makumi ma sambanu ayi sambanu. 27Ayi bana ba babakala ba Yosefi ba butukila: miela miole. Miela mimio mi nzo Yakobi mikota ku Ngipiti miba thalu lusambudi.
Yakobi ayi kanda diandi bakala ku Ngipiti
28Ayi wufidisa Yuda ku ntuala andi kudi Yosefi mu kunkamba tsangu ti tuemi ku Ngoseni. Ku landa, bakota mu tsi yi Ngoseni. 29Buna Yosefi wukubikisa dikalu ayi wukuma mu kuebuani Isaeli se diandi, ku Ngoseni. Bu katula va ntuala andi mu thangu yo yawu, wunzinga mu dinga ayi wudila va mioko miandi mu thangu yinda. 30Ku zimunina, Isaeli wukamba Yosefi: «Buabu, khubamene mu fua, mu thangu yayi mbemona zizi kiaku, bila wukhidi moyo.» 31Buna Yosefi wukamba bankhomba ziandi zi babakala ayi basi dikanda di se diandi: «Bika ndikuma mu kuelubula Falao ayi ndinkamba ti bakhomba ziami zi babakala ayi dikanda di se diami, babedi mu tsi Kanana, bizidi kuaku kudi minu. 32Babakala bobo badi mimvungi ayi mintuidi mi bibulu ayi baneti kuaku bibulu biawu bi fioti ayi bibulu biawu bineni, ayi bibio biawu. 33Ayi tala malenda kuiza: Mu thangu Falao ma kalutela, inga mu thangu makatuba bisalu mbi lunsalanga, 34lunkamba ti sielo luidi mintuidi mi bibulu tona kimuana kieno nate buabu, beto banga bakulu beto, mu diambu di lukala mu tsi Ngoseni, bila woso mvungi mameme kazolakananga ko kudi basi Ngipiti.»
தற்சமயம் தேர்ந்தெடுக்கப்பட்டது:
1 Mose 46: YOM-CD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Seed Company in coordination with Forum Communautaire des Traducteurs de la Bible et Alphabétisation