Yohana 2
2
Kangwaal A Kana Nɨ A Galilii
1A kum na taalɔ, jǝ maa kangwaal lɛ a tuulɔ Kana nɨ a tǝm Galilii. Nyɨya Yesui wo. 2Yesu jǝbɔ bɛtɔ mɛlalɨ gǝnɔ ja jo ji tʌji. 3Mwɛ fogfogigɔ jǝ nɔɔ lɛɨ a dɨmɨ, nǝngɔ nyɨya Yesui a sʊwa gǝn gɔ, “Mwɛ fogfogigɔ a dɨm jim.”
4Nǝngɔ Yesu a sʊwa nɛnɛ gɨɨ gɔ, “Nɛnɛ, ka sʊwa ɨ lɛ jʊ mǝ maa lɛɨ. Kwama mǝndɨ lǝga bɔ a la.” 5Nǝngɔ nyɨya Yesui a sʊwa nǝb maajɨgɨɨ gɔ, “Gwam jʊ nɨ a sʊwa jen gɔ jǝ́ maaɨ, bɛ jǝ́ maa.”
6Nǝn dɔɔm a daagɔ, sɛbǝlɔ wo nukun wʊnɨ ja mɔba nǝn tɛlɨ, gwam jinɔ jǝ do do suul mwɛmɔ fʊltiyo a yɔ nǝn a fʊtǝtaal. N sɛbǝl nɨ Yahudawagɔ gǝ talǝm mwɛ saaltǝm bʊtɔ lɛɨ na jǝ maa kaam jǝfʊlǝntɨn jinɔ lɛɨ. 7Nǝngɔ Yesu a sʊwa nǝb maajɨgɨɨ gɔ, “Jǝ́ yii sɛbǝlɔ nǝn mwɛ.” Nǝngɔ ja yiilo nǝn sǝgǝr sǝgǝrɨ. 8Nǝngɔ a sʊwa ji gɔ, “Jǝ́ dʊwa ya jǝ́ nǝ dʊʊ kangwaalɔ.” Nǝngɔ ja maa nyɨɨ.
9Nǝngɔ dʊʊ kangwaalɔ a twɨ mwɛ nɨ wʊnɨ a yǝlam mwɛ fogfogii. A nyǝm bɔ daagɔ ja bɛm nǝnɨ, n nǝb maajɨ nɨ a bɛ gǝm nǝnɨ a nyǝm daagɨɨ. Nǝngɔ a jo nʊ nɨ a naa nɔɔlɨgɨɨ a keli, 10nǝngɔ a sʊwa gǝn gɔ, “Nǝbɔ gǝ tǝl bɛtǝmɔ nǝn mwɛ fogfogi nɨ a lǝm dangǝnɨ. Na nǝbɔ a nɔɔ a boi, sǝla ja bɛ nǝn a wʊnɨ a bǝmtǝn a lǝmɨgɨɨ. N wɛ a bwɨ mʊ yʊ a nyanɔ la mʊ bɛ lɛ nǝn kǝngkɨɨ?”
11Wʊnɨ nǝn gɔ jǝ laatǝm kang tɨkǝgagɔ Yesu a tǝl maatǝmɔ a tuulɔ Kana nɨ a tǝm Galilii, wʊnɨ gǝ nʊng dʊʊlǝn gǝnɔ. Bɛtɔ mɛlalɨ gǝnɔ a nǝ bɨlǝngkɛl a daa gǝ woi.
12Nǝngɔ Yesu a shu a Kafarnahum jǝbɔ nɛnɛ gɨɨ, jǝbɔ kɛtǝlam gǝnɔ, jǝbɔ bɛtɔ mɛlalɨ gǝnɔ. Ya ja maa kumtɨn wo dǝmɨ.
Yesu A Kaa Nǝb Dʌbogɔ A Kan Kwaaman
(Mat 21:12,13; Mar 11:15-17; Luk 19:45,46)
13Kwama Dikulom Yabtǝm Yahudawagɔ a dwamaɨ, nǝngɔ Yesu a gwi a shu a Urushalimaɨ. 14Nǝngɔ Yesu ya nya nǝbɔ miyo nɛɛtɨn nɛ, jǝbɔ kwamɨtɨn, jǝbɔ baatitɨn, jǝbɔ nǝb fʌtotǝm kemʌnɔ yǝmam a daa yɨmtɨn jinɔ gǝm, a mʊgɔ talɨ Kan Kwaaman. 15Nǝngɔ Yesu a mʊl banjangɨgɔ nǝn dwangɨ, a kaa nǝbɔ gwam a mʊgɔ Kan Kwaamanɨ, jǝbɔ kwamɨtɨnɔ jǝbɔ nɛɛtɨnɔ. A tʊngam tebur nǝb nɨ fʌto kemʌn nɛɨ, a watam kemʌn jinɔ fʌleni. 16Nǝngɔ a sʊwa nǝbɔ miyo baatitɨn nɛɨ gɔ, “Jǝ́ jǝg kanjǝl nɨ a yooli, ka jǝ́ do lɛ lɔ Tɛtɛ mɨ a yǝlam jem gamdʌbo.” 17Jʊ nɨ a bwɨ nyɨɨ, nǝngɔ bɛtɔ mɛlalɨ gǝnɔ a bʊʊla nǝn daa langǝn bwangǝnɔ a sʊwa gɔ, “Swɨtǝm nɨ mǝ maa lɔ mʊnɔ gǝm lɛɨ, twɨ ɨ lɛ a mʊgɔ nǝl na kǝla.”
18Nǝngɔ nǝb dʊʊm Yahudawagɔ a bʌ Yesu gɔ, “N jǝ laatǝm kang wɛ mʊ nʊng nǝn nɛɨ, wʊnɨ a nʊng mɔ nǝn fɔlɔn nɨ mʊ maa jʊ nɨ?” 19Nǝngɔ Yesu a sʊwa ji gɔ, “Jǝ́ wul Kan Kwaaman nɨ, mǝ gung gung tʌgo a mʊgɔ kumɔ taal.”
20Nǝngɔ Yahudawagɔ a bʌ gǝn gɔ, “A do jolɔ fʊltǝnaal jeli nukun na jǝ mɔ Kan Kwaaman nɨ lɛɨ, sǝla ń sʊwa mɔ mʊ gung gung a mʊgɔ kumɔ taal ka?”
21Kan Kwaaman nɨ Yesu sʊwa lɛɨ, gǝ sʊwa bʊtɔ gǝn. 22Nǝn kwama ja gung Yesu a bwaaɨ, nǝngɔ bɛtɔ mɛlalɨ gǝnɔ a bʊʊla nǝn jʊ Yesu a sʊwaɨ, nǝngɔ jǝ nǝ bɨlǝngkɛl a mʊlalɨ kɛl Kwaamaɨ, jǝbɔ kɛl nɨ Yesu a sʊwaɨ.
Yesu A Nyǝm Nǝl Nǝbɨɨ Gwam
23Nǝn kwama Yesu a mʊgɔ Urushalimaɨ a di Dikulom Yabtǝmɨ, nǝbɔ a lada a nǝ bɨlǝngkɛl a daa gǝ woi a dul kanjǝl laatǝm kang nɨ ga maa a nu jini. 24Yesu a jǝla bɔ jǝbɔ ji a bʊm, jʊ a bwɨɨ a nyǝm ji dangǝn. 25A swɨ bɔ kaa nǝl a sʊwa gǝn kɛl a dul nǝfitʌmi, jʊ a bwɨɨ a kwɛl a nyǝm jʊ a nǝl nǝfitʌmi.
தற்சமயம் தேர்ந்தெடுக்கப்பட்டது:
Yohana 2: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation