Matiyu Fwa ekwafya
Fwa ekwafya
Ende è bá afketa Fwa Esese ena ángá, a Matiyu. Gè no ya a Esǝrela, akan mo be etsonchi mo Yeso. Fwa Esese hon a Matiyu è bá ángá tú anga jan Yeso a Tì (Kristi) hon nwene a bè senvǝ no a tswa Dwavǝ Esenm Ehwe ángá. A ge ga ende a be ya a Yahuda è nyi tsuruku no a chu ye jan ga bwa. Kè embo embo, afketa ena jan fyanshi be ebgon mo fwa a be efojan è jan a tswa a Dwavǝ Esenm Ehwe hon ángá, Yeso è bwekǝ̀n ara be. Afketa hon efwe tú jan, Yeso nè kpe efi no ngge Ebrayi. Kè embo embo efwe ge tú jan Yeso a “Nwen mo Dawuda.” Tú anga jan, Yeso nè bwa adi e echizǝno mo Tì ángá, no tén mò akan ngge fwa a be ya a Esǝrela e chu be tsǝ́ekǝ̀n no a chu mo nó jan Yeso a Tì ángá. Be ya a Esǝrela è cha Fwa Esese hon bu fà, bi adi enò, ge tú adi ebi jan Fwa Esese mo Yeso Kristi hon a ḿ mo zǝnchaje binbin, tú anga, be ya a Esǝrela ngge be ya e fwa be be ya a Esǝrela ra. Afketa ena tú nó enggasansan jan, Yeso a etumo echa, nwene a be moetum mbwe ngge be fwa mbwe, tú adi ebi jan ge no ngge echakpo àywá, è twafǝ̀ èé mo Mosa. A tswa afketa ena, be nggakwa be moetum mo Yeso no zǝn chwen. Ekwafya a moetum mo Yeso a chu hwì, nwone e tú abu mbǝgya mo Ehwya be e no zǝno mo be ángá (di: 5—7). Efwe moetum akan no a chu abu be etsonchi mo Yeso a bwe mochi mbwe anga (di: 10). Ekǝnggwa be hú etsom embo embo e tú hufwa anga a chu zǝnotì mo Ehwya (di: 13). Adi e ndwe, a moetum a chu be yishwa fukèn a ya aduwa a ken ángá (di: 18). Adi e chwen, a moetum a chu ekpengga ekǝn-etkyen, ngge be mò a bwe atan enò ángá (di: 24—25). Ekǝn-etkyen, Matiyu è jan fwa a chu mochi echa a Yeso ti no ara, tú anga, edgon mo Fwa Esese edum.
Be mò ya e dwa a tswa afketa ena ángá
Whyá mo Yeso ngge embwam mbwe 1:1—2:23
Edgon edum mo Yohana Ya Batisǝma 3:1-12
Batisǝma mo Yeso ngge embwadim mbwe 3:13—4:11
Be mochi mo Yeso a efa mo Galili 4:12—18:35
Abu Yeso è gwa Galili n twabǝ bwa a Urishelima ángá 9:1—20:34
Mochi ekǝn-etkyen mo Yeso a Urishelima 21:1—27:31
Ekenfum mo Yeso a chu eswafǝ ngge efǝm mbwe 27:32-66
Etkyen enyim mo Yeso ngge chu ye efitum 28:1-20
தற்சமயம் தேர்ந்தெடுக்கப்பட்டது:
Matiyu Fwa ekwafya: ICH
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024 Luke Initiative for Scripture Translation