Luk 11
11
Vbekpa Erhunmwu
(Matiu 6:9-13; 7:7-11)
1Ẹghẹ ọkpa, Jesu kegha na erhunmwu vbe ihe ọkpa. Ọ ghi dobọyi nẹ, ọkpa vbe avbe erhuanegbe ẹre tama rẹn wẹẹ, “Nọyaẹnmwa, ma ima vbene a na erhunmwu hẹ, zẹ vbene Jọn vbe ma avbe erhuanegbe ẹre re.”
2Jesu wanniẹn, “Ọna ọre erhunmwu ne uwa ghaa na:
“ ‘Evbavba:
Gia ya ọghọ ne eni ruẹn, gie Arriọba ruẹ rre.
3Rhie evbare ne ọ sẹe ne ima ẹdẹgbegbe, 4ye orukhọ mwa bọ mwa,
rhunmwuda ma vbe yabọ emwa ni ru ima khọ.
Ghẹ ye emwi ne ọ wo vbe egbe danmwẹ mwa ghe.’ ”
5Jesu keghi khama avbe erhuanegbe ẹre wẹẹ, “De ghẹ ọkpa vbe uwu uwa bu ọse ẹre gha rrie owa vbe asọn ya khama rẹn wẹẹ, ‘Ọse mwẹ viọ ebrẹd eha mẹ mọmọ. 6Ọse mwẹ ọkpa ne ọ ke ehe dee rrie owa mwẹ banbanna, I ma zẹdẹ miẹn evbare rhọkpa rhie nẹẹn.’ 7Deghẹ ọse ruẹ nii ghi vbe nien urhu ke uwowa khama ruẹn wẹẹ, ‘Ghẹ kpokpo mwẹ, a khui urho nẹ, mẹ vbe ivbi mwẹ ọre ogba rre ukpo, I i sẹtin kpaegbe rhie emwi rhọkpa miẹn.’ 8Vbe a ghi ra wẹ ọ khin? Ne I tama ruẹn, a deghẹ ọ ma la ekpa ọghe ọse wa khin kpaegbe do viọ ebrẹd nii nuẹn, te ọ gha kpaegbe viọ emwi hia ne u ho nuẹn rhunmwuda ighe ekhue ma mu uwẹ, u na rhiegba yọ nọ rẹn. 9Ne I tama uwa nian: Nọ, ogha su ẹe obọ, gualọ, u gha miẹn, so obọ, a gha kie nuẹn. 10Rhunmwuda ọmwa ne ọ rhirhi nọọn, ọ gha sẹ ọre obọ, ne ọ gualọe gha miẹn, a gha kie ne ne ọ sobọ. 11Wa ne erha, wa rhie ẹyẹn ne ọ ọmọ ne ọ nọ eka ra? 12Ra ne a rhie ekpakpahuangan ne ọmọ ne ọ nọ ekẹn ọkhọkhọ? 13Vbene uwa ghi vbe rhia sẹ, wa rẹn ya gha viọ emwi esi ne ivbi uwa. Vbe uwa ghi ye Erha uwa ne ọ rre ẹrinmwi khẹ, ẹ i re te ọ gha rhie Orhiọn Ne Ọ Huanrẹn ne iran hia ne ọ vbu vbe obọ ẹre!”
Jesu Kevbe Bẹlzibọb
(Matiu 12:22-30; Mak 3:20-27)
14Jesu kegha khu orhiọn esu ne odin ọkpa ladian, orhiọn esu ni ghi ladian nẹ, okpia ni keghi suẹn gha guan. Unu keghi yan emwa hia. 15Sokpan eso vbe uwu iran keghi kha wẹẹ, “Bẹlzibọb ne ọkaolotu avbe orhiọn esu ọre ọ rhie ẹtin nẹẹn ne ọ ya gha khulo avbe orhiọn esu ladian.” 16Emwa ọvbehe eso ni gualọ ẹre ẹmwẹ ne unu keghi tama rẹn wẹ ne ọ winna iwinna ọyunnuan ọkpa ya rhie maa ighe Osanobua kue ye iwinna ne ọ winna. 17Jesu rẹn ehe ne iran ghae yi, ọ na tama iran wẹẹ, “Ẹvbo ọkpa gha ghi wannọ egbe ye dọmwadẹ oka gha gu egbe khọn nẹ, ẹ i ghi tọ, ẹgbẹe ne ọ wannọ egbe, gha zagha. 18A deghẹ arriọba Setan gha egbe ye otu gha gu egbe khọn nẹ, vbe ọ gha na tọ hẹẹ? Wa khare ighe Bẹlzibọb ọre ọ rhie ẹtin mẹ ya gha khulo avbe orhiọn esu ladian. 19A deghẹ erriọ mẹ ya khulo iran ladian, vbe avbe ekpayẹ uwa ya khulo iran ladian hẹẹ? Ekpayẹ uwa ọre ọ ghi gia miẹn ugbaro ẹre nian ighe te uwa ba odẹ ku. 20Ugbẹn vbe a ghi miẹn nian ighe ẹtin Osanobua ọre I ya khulo avbe orhiọn esu ladian, ọnii rhie maa ighe Arriọba Osanobua hu uwa rre nẹ.
21“Ọmwa ne ọ wo vbe egbe gha gbalọ emwi igbinna gha khẹ owa ẹre, emwi rhọkpa i ru emwi ne ọ mwẹ. 22Sokpan ọmwa ne ọ wo vbe egbe sẹ ọre gha dekun ẹnrẹn, ọ na so ẹe gọọ, ọ ghi miẹn re emwi igbinna ne ọ te ya khẹ egbe, ọ ghi ya ghae emwi ne ọ do hẹẹ.
23“Ọmwa ne ọ ma yaba mwẹ, te ọ gun mwẹ gbinna, ọmwa ne ọ ma deba mwẹ si koko, te ọ du ẹe ọre kua.
A Dọlegbe Rre Ọghe Orhiọn Dan
(Matiu 12:43-45)
24“Orhiọn dan gha lahin uwu ọmwa rre nẹ, ọ ghi gha lele otọe ni sohie khian gualọ ehe ne ọ gha dia, adeghẹ ọ ma miẹn, ọ ghi wẹẹ, ‘I gha dọlegbe gha rrie owa mwẹ ne I ke kpao!’ 25Rhunmwuda ọnii, ọ ghi dọlegbe gha rrie owa nii, ọ ghi do vba ighe a kpolo ẹe, a mwamwa ẹn ye otọ. 26Ọ ghi ladian ya viọ orhiọn dan ihinrọn ni rhia sẹ irẹn ba egbe, iran ghi do yin evba. Egbe ihe ne ọmwa ni ghi ye nian ghi rhia sẹ vbe ne ọ te ka ye vbe omuhẹn.”
Ọyẹnmwẹ Ẹmwata
27Jesu ghi ta ẹmwẹ na nẹ, okhuo ọkpa keghi niẹn urhu ke uwu ẹbu rre wẹẹ, “U miẹn egie ne ọ ye ighe okhuo nẹ ọ biẹ ọ kevbe ne ọ koko uẹ!”
28Sokpan Jesu wanniẹn wẹẹ, “Gie ta ẹe vbe nian wẹẹ, umiẹn egie ne iran ye ighe iran ni họn ẹmwẹ Osanobua iran na vbe ya ẹe ru emwi.”
Iran Nọ Iwinna Ọyunnuan Vbe Obọ Ẹre
(Matiu 12:38-42)
29Ugbẹn vbe emwa hia ghi vbe mama rhu Jesu, rẹn keghi kha wẹẹ, “Orre na rhia gbe. Iran gualọ iwinna ọyunnuan zẹ vbe ama ne a ya rhie maa ighe Osanobua ya obọ yọ. Sokpan a i ra rhie maa iran gberra iwinna ọyunnuan ọghe Jona. 30Zẹ vbene Jona gha re ama ne emwa Ninevi, erriọ Ovbi Ọmwa ra gha re ama ne orre na. 31Ọ gha sẹ Ẹdẹ Ibuohiẹn, Ọba ne okhuo ne ọ rre odẹ ekẹn, gha guakpao ba orre na ifi ẹzọ rhunmwuda rẹn ke arriavbehe gha dee do họn iruẹmwi ẹwaẹn Solomọn. Ne I tama uwa ighẹ emwi ne ọ sẹ Solomọn rre emwa na. 32Ọ gha sẹ Ẹdẹ Ibuohiẹn, emwa Ninevi gha kpaegbe ba uwa ifi ẹzọ, rhunmwuda iran zobọ vbe orukhọ vbe iran họn ikporhu e Jona, ne I tama uwa ighẹ emwi ne ọ sẹ Jona rre emwa na.
Uwanmwẹ Egbe
(Matiu 5:15; 6:22-23)
33“Ọmwa i ra rhukpa nẹ ne ọ rhie okpan rhuẹe ginna otọ, sokpan uhunmwu erhan ọmukpa ọre ọ mu ẹn yan, ne emwa ni la owa miẹn ehe na ya ẹe gha dẹghe. 34Te aro ruẹ yevbe ukpa ne egbe ruẹ. Aro ruẹ gha hian, egbe ruẹ hia ghi vuọn ne uwanmwẹ, sokpan deghẹ aro ruẹ ẹi ma an, egbe ruẹ hia ghi gha rre ebiebi. 35Rhunmwuda ọnii, wẹ mwẹ ẹwaẹn ne uwanmwẹ ne ọ rre uwu uwa ghẹ do khian ebiebi. 36A deghẹ egbe ruẹ hia vuọn ne uwanmwẹ, vbene ehe ne ọ so ebiebi ọkpa i na rrọọ, uwanmwẹ ghi gba ehia, zẹ vbene ukpa rhie awanwan ye ọmwa egbe vbe ọ a gha baa.”
Jesu Ba Avbe Farisi Kevbe Iran Nimaemwa Uhi Ifi Ẹzọ
(Matiu 23:1-36; Mak 12:38-40)
37Jesu ghi dobọ ẹmwẹ ne a guan yi nẹ, e Farisi ọkpa keghi tie ẹre ne ọ do gu iran rrie evbare vbe owa. Ọ ghi sẹ evba, ọ keghi tota ne ọ rri evbare. 38Ọ na wa yan e Farisi ni unuan wẹ Jesu ma kpe ọ kegha rri evbare. 39Rhunmwuda ọnii Nọyaẹnmwa tama rẹn wẹẹ, “U ma miẹn, wa ne Farisi ghi gha kpe iyeke ukpu kevbe ọkpa, sokpan uwu uwa vuọn ne ọkpankpan kevbe emwi dan. 40Wa ne akpa! Ẹ i re Osanobua ne ọ yi iyeke ẹre ọ re ọ vbe yi uwu ẹre. 41Wa viọ emwi ni rre uwu ọkpan kevbe ukpu ne uwa mwẹ ne ivbiogue, erriọ ọ gha na huan ne uwa.
42“Ọ suaa, wa ne Farisi! Wa ghae avbe emwi uwọnmwẹ negiẹrẹ hia vbe ihe igbe, rhie obọkpa ne Osanobua, avbe itehie kevbe akpọkọ kevbe avbe ebe ni dekẹe hia, wa keghi yangbe ẹmwata ne a ta, kevbe ne a gha ho ẹmwẹ Osanobua. Ọ te kei ne uwa ru ena vbe ne a i na yangbe ni dekẹe.
43“Ọ suaa, wa ne Farisi, Aga ni maa sẹ vbe Ọgua ediọn, ọre ọ yẹ uwa. Wa ghi vbe gha ho ne a gha kpee tuẹ uwa vbe ẹki. 44Umiẹn agbọn ne uwa ye! Wa yevbe idin ne a ma ye ama yi, emwi ghi gha nanaẹn gberra vbene iran ma na rẹn.”
45Ọkpa vbe uwu iran ni ma emwa Uhi keghi tama rẹn wẹẹ, “Ọmamwaemwi, vbe ne u tae na, te u vbe zan ima ba ẹre!”
46Jesu wanniẹn wẹẹ, “Ọ vbe sẹ uwa, wa ni ma emwa Uhi, wa kun ihẹ ne ọ khua, kevbe ne ọ lọghọ umumwẹ yan emwa uhunmwu, sokpan ukpẹ ihiẹn obọ uwa ma dekan ihẹ ni ne a ya gu iran mu ẹn. 47U miẹn agbọn ye uwa ye! Wa mannọ idin avbe akhasẹ mose mose, avbe erha uwa odede ọre ọ gbele iran. 48Te uwa ghi ye ọ na kha ighẹ wa yobọ yọ ighẹ emwi esi ọre avbe erha uwa ru, rhunmwuda, iran gbele avbe akhasẹ nẹ, wa na do mannọ idin iran. 49Ọ na ọre ọ si ẹe ne Ẹwaẹn Osanobua na kha wẹ, ‘I gha gie avbe akhasẹ, kevbe odibo mwẹ bu iran, iran gha gbele eso ua vbọ, iran gha zẹ nekpa kpokpo.’ 50Rhunmwuda ọnii, a gha rri orre na oya ye ẹmwẹ avbe akhasẹ ne a he gbele ua ke ne a bu agbọn tu agbọn gha dee. 51Ke egbe Ebel gha dee do sẹ egbe Zẹkaraia ne iran gbe ye ẹkpo Ogiukpo kevbe ehe ne ọ huanrẹn. Ẹn ẹn, I tama uwa a gha rria orre na ikhi ye ehia.
52“Ọ sẹ uwa, wa ni ma emwa Uhi! Wa rhie isanhẹn urho irẹnmwi mwẹ, wa tobọ uwa ma la owa, wa ma gie ne ọ ho ne ọ la owa, la owa.”
53Jesu ghi kpao vbe evba re nẹ, avbe Farisi kevbe iran ni ma emwa Uhi keghi suẹn gha kpankan ẹre ẹmwẹ, iran na gha nọ ẹre ọta vbekpa emwi ni bun. 54Iran kegha gualọ ọre ẹmwẹ ne unu ne a ma miẹn ẹmwẹ dan ọkpa ke ye ọre owẹ ighẹ rẹn ọre ọ tae.
தற்சமயம் தேர்ந்தெடுக்கப்பட்டது:
Luk 11: EDO96
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
@ The Bible Society of Nigeria, 1996