Luk 24
24
Arhiọkpaegbe
(Matiu 28:1-10; Mak 16:1-8; Jọn 20:1-10)
1Vbe owiẹ vbirrivbirri ọghe Ẹdẹ uzọla nọkhua, avbe ikhuo ni keghi hẹ ori ne ọ winhin mwẹ, iran na gha rrrie idin. 2Iran ghi do ghe, a werriẹ okuta hin unu idin rre. 3Iran keghi la uwu ẹre sokpan iran ma miẹn ikun Jesu. 4Ugbẹn vbe iran ghi mudia, vbe iran ma rẹn vbene emwi rhọkpa ghi ye hẹ, udomwurri, ikpia eva ni yọ ẹwu ni fi wain wain keghi do mudia ke iran. 5Ohan mu ikhuo ni ẹsẹse, iran keghi mu ẹko rhu otọ vbe odaro iran, ikpia ni keghi tama iran wẹẹ, “Vbọzẹ ne uwa na gualọ ọmwa ne ọ rre agbọn vbe uwu ẹbu avbe orinmwi? 6Ẹ i rre emwa na, ọ rhiọkpaegbe nẹ, wa yerre vbe ne ọ khama uwa hẹ ẹghẹ ne ọ na rre Galili wẹẹ, 7‘A gha rhie Ovbi Ọmwa yan avbe emwa orukhọ obọ, a gha kan rẹn mu ugbugbe, sokpan a gha vbe huẹn ọnrẹn kpaegbe vbe ikpẹdẹ ne ogieha.’ ”
8Ikhuo na keghi do ye ẹmwẹ ọnrẹn rre. 9Iran keghi ke idin werriegbe gha dee, iran keghi do na iyẹn emwi na hia ma iran ne erhuanegbe owọrọ kevbe iran ni dekẹe hia. 10Avbe ikhuo na keghi re Meri Magdalen, Joana, kevbe Meri ne iye Jems. Ke iran kevbe ikhuo ni deba iran, iran keghi do na iyẹn na ma avbe erhuanegbe. 11Sokpan avbe erhuanegbe keghi tie ẹmwẹ ne avbe ikhuo nii do ta ẹmwẹ eghẹrẹ, iran ma vbe yayi. 12Sokpan Pita kpaegbe, ọ na rhulẹ gha rrie idin, ọ keghi vbẹrre, ọ ma bẹghe emwi ọvbehe gberra ukpọn ne a ya vbuẹ ọre mu ye idin. Rẹn keghi werriegbe gha rrie owa vbene emwi ne ọ sunu ma na giee rẹn otọ ẹre.
Iran Ni Yo Emaọs
(Mak 16:12-13)
13Vbe ẹdẹ nii zẹẹ, eva vbe uwu iran kegha rrie igue ọkpa ne a tie ẹre Emaọs ne ọ re omwa ibiriki ihinrọn ke Jerusalẹm gha khian. 14Iran keghi na iyẹn vbe ekpa emwi ne ọ sunu. 15Vbene iran wa tae ya gha iyẹn khian, Jesu keghi vba iran, ọ na gha lele iran khian. 16Iran bẹghe ẹre sokpan iran ma wa rẹn ọnrẹn. 17Jesu keghi khama iran wẹẹ, “De ẹmwẹ ne uwa ta ne uwa gbe yo gbe rre vbe uwa khian na yi?”
Iran mudia, iran keghi suku aro ua. 18Ọkpa vbe uwe iran ne a tie ẹre Kleopas keghi nọ rẹn wẹẹ, “Vbe uwu emwa ni rre Jerusalẹm hia, ugha ghe wẹ ọkpa ọre ọ ma he rẹn avbe emwi ni sunu vbe evba vbe ne ẹdẹ eso na.”
19Ọ nọ rẹn wẹẹ, “Vbọ khun emwi?”
Iran wanniẹn wẹẹ, “Avbe emwi ni sunu vbe egbe Jesu ne ovbi e Nazarẹt nọ vbe gha re akhasẹ, ne Osanobua kevbe emwa ne agbọn ka ye ọmwa nọkhua vbe ẹmwẹ ne a guan kevbe emwi ne a ru. 20Avbe igie ohẹn ima kevbe iran ni khaemwisẹ keghi rhie ẹre ladian ne a bu ohiẹn uwu gbe ẹe, iran keghi kan rẹn mu ugbugbe. 21Ma te wa rhie aro yọ ighẹ rẹn ọre ọ ra do miẹn ivbi Izrẹl fan, sẹhia sẹhia, nẹghẹdia ọre avbe emwi na hia ghi sunu. 22Eso vbe uwu avbe ikhuo ni rre otu ima keghi vbe rre do rueghe ima orhiọn. Iran yo idin vbe owiẹ na. 23Iran ma miẹn ikun ẹnrẹn. Iran keghi gha dee do tama ima ighẹ iran miẹn avbe odibosa ni tama iran wẹ ọ rre agbọn. 24Eso vbe uwu ima na vbe gha rrie nene idin, iran keghi miẹn ọẹn vbene ikhuo ni wa kha, sokpan iran ma miẹn irẹn tobọ ẹre.”
25Jesu wanniẹn tama iran wẹẹ, “A miẹn vbe uwa kọn hẹẹ! A miẹn vbe ọ kpẹ uwa obọ hẹẹ ne uwa ya ẹmwẹ ne avbe akhasẹ tae yi! 26Ọ ma te kei ra ne Mẹzaia rrioya emwi na hia ne ọ vbe la uwu uyi ẹre?” 27Jesu keghi rhan otọ ẹmwẹ hia ne Ebe tae vbekpa irẹn ma iran. Ọ keghi suẹn vbe ebe Mosis rhinrin ya sẹ emwi ne avbe akhasẹ gbẹnnẹ.
28Iran keghi do sẹ ọkpẹn igue ne iran rrie. Jesu keghi ru vbe ọmwa ne ọ ra gberra evba. 29Sokpan iran keghi daeyi wẹẹ, “Gu ima tota, te ebi ghi ra ro, ebiebi vbe so nẹ.” Rhunmwuda ọnii rẹn keghi la owa ne ọ ya tota ke iran. 30Ọ ghi gu iran tota vbe eteburu, ọ mu ebrẹd, ọ ghi kpọnmwẹ nẹ, ọ keghi gia ẹre viọ ne iran. 31Aro iran keghi rhan, iran keghi rẹn ọnrẹn sokpan rẹn keghi ru gbẹnnẹ vbe aro iran. 32Iran keghi gu egbe iran guan wẹẹ, “Ẹ i re te ọ gha giẹn vbe uwu ima vbe erhẹn vbe ọ guan, ẹkpo ne ọ na gha rhan otọ ebe ne ọ huanrẹn ma ima ban vbe odẹ!”
33Iran keghi guakpao ọwarọkpa, iran na werriegbe gha rrie Jerusalẹm, evba iran na do vba iran ne erhuanegbe owọrọ vbe iran si koko gha kha wẹẹ, 34“Nọyaẹnmwa gele rhiọrre, Saimọn miẹn ọẹn nẹ.”
35Iran eva nii keghi vbe do na iyẹn emwi ne ọ sunu vbe odẹ kevbe vbene iran do rẹn ọnrẹn hẹ vbe ọ gia ebrẹd.
Jesu Rhie Egbe Ma Avbe Erhuanegbe
(Matiu 28:16-20; Mak 16:14-18; Jọn 20:19-23; Iwinna 1:6-8)
36Ugbẹn vbe iran ghi wa na iyẹn na ma iran, Nọyaẹnmwa keghi wa mudia ye adesẹneva iran vbe udomwurri, ọ wẹẹ, “Ọfumwegbe gu uwa rrọọ.”
37Ohan keghi mu iran, orrirri gbe ku iran, iran te ro ighẹ iran miẹn ẹrinmwi. 38Sokpan rẹn tama iran wẹẹ, “Vbọzẹ ne uwa na fian afianma yi. Vbọzẹ ne uwa na bọ iro eva vbe ekhọe uwa? 39Wa ghe obọ mwẹ ne uwa miẹn ehe na rẹn ighẹ mẹ tobọ mwẹ nọ. Wa ya obọ mu mwẹ, wa gha vbe miẹn wẹ ẹrinmwi i mwẹ ifun egbe kevbe ugboloko zẹ vbene uwa miẹn wẹ mẹ mwẹ na.”
40Ọ ghi ta ọna nẹ, ọ mu obọ kevbe owẹ ọre ma iran. 41Iran ma ye yayi rhunmwuda iran vuọn ne oghọghọ, Ọ keghi yan iran unuan, rhunmwuda ọnii, ọ keghi nọ iran wẹẹ, “Wa mwẹ evbare vbe emwana ra?” 42Iran keghi rhie ehẹn ne avbiẹvbiẹe nẹẹn. 43Ọ miẹn iran re, ọ keghi sirra iran hia rriọe.
44Ẹkpo nii ọre ọ na khama iran wẹẹ, “Emwi ne I tama uwa vbe I gu uwa rrọọ ẹghẹ nii ọre ena khin: emwi ne a gbẹnnẹ ye otọ vbekpa mwẹ vbe Uhi e Mosis, kevbe avbe akhasẹ kevbe ebe Psalm, te a gha mu ẹn sẹ.”
45Ọ keghi rhie ẹwaẹn ye iran ekhọe ne iran miẹn ehe na rẹn otọ avbe Ebe ni. 46Ọ tama iran wẹẹ, “Vbe nian ọre a gbẹn ọẹn wẹẹ Mẹzaia gha rri oya, a gha vbe huẹn ọnrẹn kpao vbe idin vbe ẹdẹ ne ogieha. 47Kevbe wẹẹ, eni ẹnrẹn ọre a gha ya kpe orhu a roiro fi uyinmwẹ werriẹ kevbe a yabọ orukhọ ma uhunmwu ẹvbo hia, Jerusalẹm ọre a gha ke suẹ ọnrẹn. 48Wa ọrọre osẹe avbe emwi na hia. 49Mẹ gha tobọ mwẹ rhie emwi ne Evbavba yan eyan rẹn ne uwa. Sokpan wa ghi mudia vbe adesẹ ore ẹvbo rhinrin ẹtin te ke odukhunmwu rre do hin yan uwa.”
A Tọn Jesu Mu Gha Rrie Odukhunmwu
(Mak 16:19-20; Iwinna 1:9-11)
50Ọ keghi viọ iran ladian ke ore ẹvbo ya sẹ Bẹtani, ehe ne ọ na viọ obọ ghe odukhunmwu, ọ keghi fiangbe iran. 51Vbene ọ wa fiangbe iran ni, ọ kpao sẹ iran rae, a keghi tọn ẹn mu gha rrie odukhunmwu vbe ẹrinmwi. 52Iran keghi ya uhunmwu rhanmwẹ otọ nẹẹn, iran na dọlegbe gha rrie Jerusalẹm. Iran vuọn ne oghọghọ nọkhua. 53Iran keghi wa gha rre uwu Ọgua Osa, iran na gha rhie ekpọnmwẹ ne Osanobua.
தற்சமயம் தேர்ந்தெடுக்கப்பட்டது:
Luk 24: EDO96
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
@ The Bible Society of Nigeria, 1996