Bhaa-bhaana 3
3
Maanusia Amandawu i Nuncana Dosa
3:1-24
1O ulo satotuuna binata mokoʼakalana minaaka i sagala binata momaila ipamembalina KAWASANA OPU Aulataʼala. Saangu wakutuu aabhakimo o ulo i bhawine sumai, "Atotuu Aulataʼala afirimani, 'Bholi ukandea bhake minaaka i puu opea uka i nuncana i inawu sii?' "
2Apogaumo bhawine sumai i ulo sumai, "Bhake minaaka i manga puuna kau i nuncana inawu sii membali ingkami takandea, 3maka to bhake minaaka i puuna i tanga-tangana inawu sii, Aulataʼala afirimani, 'Bholi ingkomiu ukande bhake sumai tee bholi ingkomiu udhingkua, ara umate.'"
4Kasiimpo apogaumo o ulo sumai i bhawine sumai, "Ingkomiu inda sampeampearo bheumate. 5Roonamo, Aulataʼala amataua ande i eo ingkomiu ukandeakea matamiu bheatobungkale, tee ingkomiu bheumembali mboomo Aulataʼala, umataua to momalapena tee momadhakina."
6Bhawine sumai akamata ande bhakena puu sumai amalape to atokande tee amakesa kamataana. Tee uka, puu sumai amakesa roonamo aumbaaka akala malape. Sumaimo, aalamea bhake sumai kasiimpo akandea. Sapadhana sumai adhawuakamea uka i umanena mopobhawana, tee umanena uka akandemea. 7Sanampuu, atobungkalemo matana rua mbalia tee manga incia amataua ande akalealea. Kasiimpomo manga incia atapi-tapi manga tawana puuna ara#3:7tawana puuna ara: Mboomo tawa momaoge tee amaewa. to apamembalia katutubhina auratina.
8Kasiimpo manga incia arango ande KAWASANA OPU Aulataʼala alingka i inawu i wakutuuna ngaluna konowia, maka maanusia tee bhawinena sumai abuniakamo karona minaaka i aroana KAWASANA OPU, i tanga-tangana manga puuna i nuncana inawu. 9Maka KAWASANA OPU Aulataʼala agoraaka maanusia sumai tee aabhamo, "Iapai ingkoo?"
10Lawanina, "Wakutuuna iaku kurango suaramu i nuncana inawu sii, kumembali kumaeka roonamo kukalealea. Sababuna itu, kuopo."
11Firimanina, "Incema mopaumbako ande ukalealea? Mboona ukande bhake minaaka i puu mopadhana iparintangiakaku bholi ukandea?"
12Alawanimo maanusia sumai, "Bhawine idhikamu i saripiku, inciamo modhawuakaaku bhakena minaaka i puuna kau, sumaimo kukandea."
13Kasiimpomo KAWASANA OPU Aulataʼala aabhamo i bhawine sumai, "Opea ipewaumu sii?" Lawanimo bhawine sumai, "O ulo sumai mogau-gauaku, sumaimo kukandemea bhake sumai."
14Sabutuna, afirimanimo KAWASANA OPU Aulataʼala i ulo sumai,
"Roonamo ingkoo upewau mboo sumai,
kutundako molabhina sagala kadhambaaka tee binata maila.
Ingkoo bheupondele tee kompomu,
tee ingkoo bheukande ngawuna tana saʼumurua dhadhimu.
15Iaku bhekupadhaangia pomusuia i tanga-tangana ingkoo tee bhawine sii,
i tanga-tangana siwulumu tee siwuluna.
Siwuluna bheapahancurua bhaamu,
tee ingkoo bheapekambelaia korontunguna."
16Firimanina i bhawine sumai,
"Iaku bhekupekabharia kanarakaamu i wakutuuna ubhawa-bhawa,
tee karasaimu ingkoo bheupalaahiriaka anaana.
Moomini mboo sumai, ingkoo bheusadia gaumu to umanemu,
tee incia bheakokuasa i bhawona ingkoo."
17Kasiimpomo firimanina i Adamu,
"Roonamo uperangoia pogauna bhawinemu
tee ukande bhake minaaka puu mopadhana iparintangiakaku i ingkoo, 'Bholi ukandea,'
sumaimo atotundamo tana roonamo ingkoo.
Tee umarasaiakea ingkoo bheukande hasilina, saʼumurua dhadhimu.
18Tana bheatuwuaka rumpu mokorui tee kau mokorui to karomu,
tee manga penembula i tana bheamembali kinandemu.
19Tee umarasaiakea ingkoo bheupeelo kinandemu
sampe ingkoo umbuli pendua umembali tana, roonamo minaaka iwe siitu ingkoo aalako.
Sababuna ingkoo satotuuna o ngawu,
tee bheupendua membali ngawu."
20Maanusia sumai asarongiakea bhawinena Hawa#3:20 Hawa: I nuncana pogauna Ibrani oni incia sii akomaʼana "dhadhi." sababuna inciamo inana minaaka bhari-bharia modhadhina.
21KAWASANA OPU Aulataʼala akarajaa pakea minaaka i kulina binata to maanusia tee bhawinena sumai, kasiimpomo apapakeakea i manga incia. 22Kasiimpomo afirimanimo KAWASANA OPU Aulataʼala, "Satotuuna maanusia sumai padhamo amembali mboomo sala saangu minaaka Ingkami, momatauna kalape tee kadhaki. Rampaakanamo sumai, bholi ara incia apaulu limana tee aalea uka bhakena puuna idhadhiaka sumai kasiimpomo akandemea, saanampuu incia dhadhi saʼumurua." 23Sababuna sumai KAWASANA OPU Aulataʼala atumpua alimba minaaka i Inawuna Eden to akarajaa tana, tampa asalana incia aalea. 24Incia awulu maanusia sumai alimba, kasiimpomo i wetana timbu i Inawuna Eden tee adhikaakea rua mia malaaʼekatina kerub#3:24 malaaʼekatina kerub: Kaomu malaaʼekati motandaina umbaana tee kamuliana Aulataʼala. tee samata hancu mokarore-rorena tee mopekapatiina i sagala rope to mojaganina dhala moporopena i puu idhadhiaka sumai.
தற்சமயம் தேர்ந்தெடுக்கப்பட்டது:
Bhaa-bhaana 3: KMW
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Ongoing © Wycliffe Bible Translators, Inc