Luk 1
1
Yọọn Ọduọk-mmuŋ Amana
1Akua odod ukpono Tiọfidọs uwak owom ama odomo ndiwed mbaaŋa mme mkpọ nkoro eketibede ke otu nnyin nte Abasi ekewuŋede. 2Mmọ ewed ukem-ukem nte eketibede, nte mmanimi ekedede ntienche totooŋo ke editooŋo ekedọhọde mmọ. Mman ntienche nken ekede mme isuŋ-utom ekekwọrọde ikọ abaaŋa se eketibede, emi ekeyakde ọnọ nnyin. 3Ami k'idem mi mma nduọhidem nnam nduŋọde mbaaŋa mfifien mkpọ se eketibede toto ke ntooŋo. Ndien mme mek iwed nnehede-nnehede ibad utom se eketibede nnọ fin. 4Man otodo ofo ọdiọŋọ ke se mmọ ekedọhọde fin abaaŋa Yisọs ekede akpanikọ.
Nkukud Abaaŋade Emana Yọọn Ọduọk-mmuŋ.
5K'ini ọbọọŋ Erọd ekedede ọbọọŋ ke Ikpehe ukara Yudia, ama odu oku Abasi keen emi ekekerede Sakaraya. Enye ekesine ke otu nka oku eke Abiya; ŋwan ise Edisabed eketo ubon Erọn. 6Abasi ekebad mmọ ke ndinen owom, ke ntak mmọ ama onum ibed ise anyaŋ anam se ibed ise ọdọhọde. 7Ede mmọ ikinyineke eyen, ke ntak Edisabed ekede ada, mmọ ama anyaŋ okpon owom ke isua emana.
8Usen keen nte Sakaraya ekedude ke iso Abasi ke itie-uwa ke obio Yedusedem ndinam ubiọŋ utom ise nte oku, sia nka nse ekede mme akama utom ke itie-uwa ke mme usen ikoro. 9Ekene nte ubono mkpọ mman oku edede, mmọ ama esin ukaŋ ndidiọŋọ owom ododde ndiduk itie-uwa nkefọp insen. Ndien ukaŋ ekemum Sakaraya, enye ndinam utom nte oku emi enyinede iduk itie-uwa Abasi nyaŋ mfọp insen. 10Efri otu owom ada ke esien itie-uwa ọbọọŋ akam, k'ini enye ekesuŋ ọfọpde insen ke ekid itie-uwa.
11Ndien isuŋ-utom Abasi ọwọrọ ọnọ eme ke ubọk nnamecha itiad ufọp insen. 12Ke nte Sakaraya okudde eme uted ọmum eme. 13Ede isuŋ-utom Abasi ete eme, kubaak ndik Sakaraya, sia Abasi okop akam fo. Ŋwan fo Edisabed emiyoyomo idibi inyaŋ iman eyen deen, ofo omukood eme Yọọn. 14Ofo omunyiyine idadekid ma inemekid, ekese owom emidadara ke emana ese. 15Sia enye emikpokpon ke iso Abasi, enye ibuhiwuŋ ukọd ma ọkpọsọŋ ukọd, ede emiyọyọhọ ma edisana sibidib Abasi totooŋo ke idibi nne nse. 16Ke ntoro, enye eminanam ekese ntitọŋ Isued ikabade ekid ikene Ọbọọŋ Abasi mmọ. 17Enye eminyiyine ukem Sibidib ma odudu brọfed#1:17 Brọfed ede owom eken ọbọọde etop oto Abasi anyaŋ atiŋ ọnọ ikọd Abasi Idaiya. Enye emibebem Ọbọọŋ iso idi, ndinam yak mme ette ama ntitọŋ mmọ, nyaŋ nnam ntitọŋ nchọŋ ibuod yak mmọ enyine ifiọk Abasi, ndinam yak ubon Abasi odu ke mbeŋeidem abaaŋa edidi Eyen Abasi.
18Ndien Sakaraya ebib isuŋ-utom ido ete, «Mkpọ nken emisaŋa ntewe itibe? Sia ami ma ŋwan mi ichọŋ, ŋwan mi anyaŋ ebei isua uman eyen.»
19Isuŋ-utom ọbọọrọ eme ete, «Ami nde Kebre emi ndade ke iso Abasi; Abasi ekedọŋ min yak mben eti-mbuk iken nsọk fin, emi abaaŋade eyen fo. 20Kpaŋ utọŋ, Se ami ndọhọde fin emi iwọwọrọ isu ke ekemini Abasi. Ede sia ofo unumke ikọ mi ke akpanikọ, ofo omude imuuk tutu eyen iken amana.
21K'ini Sakaraya ma Isuŋ-utom asuŋ atiŋde ikọ, idem akpa mman owom ekedude ke esien ada ebed eme. Sia enye ekpenede iwọrọ ndi ke itie-uwa. 22K'ini enye ọwọrọde edi ke itie-uwa, ikikanke itiŋ ikọ inọ mmọ ke ntak enye ama akabare imuuk, enye akama ubọk atiŋ ikọ ọnọ mmọ. Ndien mmọ ọdiọŋọ ke enye okud nkukud ke ekid itie-uwa.
23K'ini udua usen utom Sakaraya ke itie-uwa ekemde, enye onyuŋ ufọk ise ke ikpehe ukara Yudia. 24Ke mme usen ikoro ebeide, ŋwan ise Edisabed oyoomo, ede Edisabed edip idem ise ke ufaŋ ọfiọŋ ition. 25Edisabed ọdọhọ k'idem ise ete, «Ọbọọŋ ọfọn min mfọn ke Enye ndinam ami nnyine eyen. Enye eben mkpọ ndọk osio ọnọ min ke otu mman owom.»
Nkukud Abaaŋade Emana Yisọs
26Ke idibi Edisabed ọyọhọde ọfiọŋ iteken, Abasi ọdọŋ Isuŋ-utom ise Kebre yak enye akaa obio Nasaded emi esinede ọnọ ikpehe ukara Kadidii. 27Ọdọŋ eme akaa eke asaŋa-iferi ŋwan keen emi iki'diọŋọke deen akpa, emi Yosef eyen ubon ọbọọŋ Defed ekekọbide ubọk ke ndọ, enyiŋ asaŋa-iferi iken ekekere Mmedi. 28Isuŋ-utom Abasi ọduk ufọk Mmedi, ọkọm eme ete, «Dara, ke Abasi enehede ọfọn fin mfọn, Ọbọọŋ odu ma ofo, Enye ọdiọŋ fin ke otu ibaani.»
29Ede k'ini Mmedi okopde se Isuŋ-utom ọdọhọde, ekid etimede eme ke ikọ se enye eketiŋde, ma utọ ekọm ikoro. 30Isuŋ-utom Abasi ido ete eme, «Kuyak ndik anam fin, Mmedi, sia emekud mfọn ma Abasi. 31Kpaŋ utọŋ, omu uyoyomo, anyaŋ aman eyen deen, ofo omukood eme Yisọs. 32Enye emide ọkpọsọŋ owom, mmọ emikood eme eyen nkoŋ nkan Abasi. Abasi emiyayak itie ubọọŋ eta-eta ise Defed inọ eme nte enye ekenwuŋede. 33Enye emikara ubon Yekọb ke nsinsi, itie ubọọŋ ise ibuhi inyine utud.»
34Ndien, Mmedi ebib Isuŋ-utom Abasi ido ete, «Mme nnam ntewe nnyine eyen sia nka ndiọŋọke deen akpa.»
35Isuŋ-utom Abasi ọbọọrọ eme ete, «Edisana Sibidib emidodoro fin k'idem, ndien odudu nkoŋ nkan Abasi emi ifufuk fin man otodo eyen eken umande ede Edisana, mmọ emikood eme Eyen Abasi. 36Kpaŋ utọŋ nnọ ikọ iken, Edisabed eyen enyinika fo oyoomo eyen deen ke oyo uchọŋ ise. Owom ido mman owom ekebede ke ede adaa asaŋa ma idibi ọfiọŋ iteken idaha iken. 37Efri mkpọ nken eketibe sia iduhe se Abasi ikemeke inam.»
38Mmedi ọbọọrọ Isuŋ-utom Abasi ete, ami nde eyen-ufọk Abasi, «yak osu ọnọ min nte ikọ fo ọdọhọde. Ndien Isuŋ-utom Abasi adaha ọkpọŋ eme.»
Mmedi Akaa Iche Edisabed
39Ke mkpọ nte usen ifaŋ ebeide, Mmedi ebeene ke usọp akaa obio ke okpukpo Yudia. 40Ke enye esimde ufọk Sakaraya, enye ọkọm Edisabed. 41K'ini Edisabed okopde ekọm Mmedi, eyen otuhede idem ke nsa nse, ndien Edisabed ama ọyọhọ ma Edisana Sibidib. 42Enye amia ke ọkpọsọŋ uyo ete, «Abasi ọdiọŋ fin ke otu ibaani, Abasi anyaŋ ọdiọŋ Eyen emi ofo omu umande.
43Mmeyọhọ ma ukpono inyine fin, eka ọbọọŋ mi, edide ediche min. 44Ndọhọ fin nte, idaha nkopde ekọm fo, eyen iken nsa mi otuhede idem ke ntak idadekid. 45Ọbọọŋ ọdiọŋ fin ke ntak emenum ke se Ọbọọŋ ọdọhọde emiwọwọrọ isu.»
Mmedi Otoro Abasi
46Ndien Mmedi ọbọọrọ ma ikuọ ete,
«Ami mme toro Abasi mi ke efri ekid mi.
47Mmekop akua idadekid ma Abasi emi anyaŋade min.
48Sia Enye ọfọnde ido,
ma ami eyen-ufọk ise,
tooŋode ke idaha iken mfifien emana emikood min owom eken Abasi ọdiọŋde.
49Sia mkpon nkan Abasi anam akua mkpọ ọnọ min,
enyiŋ ese ede Edisana,
50Mbọm Abasi odu ma mman se abakde eme,
ke mfifien emana.
51Abasi anam akua mkpọ ke odudu ese;
Enye ọsuhọde mman nkohode idem ma ekikere ekid mmọ.
52Enye ọsuhọde mme mbọọŋ ọduọk ke itie ubọọŋ mmọ,
anyaŋ ebeene mman nsuhọde idem onum ke itie ubọọŋ.
53Abasi ọnọ mman biọŋ ọdọŋde nti mkpọ ndia,
ede enye osio mme enyine mkpọ uyuŋ ubọk ikpu.
54Abasi aŋwam eyen-ufọk ise Isued,
ke enye nditei ewuŋe ese nyaŋ ntua eme mbọm.
55Nte enye eketiŋde ọnọ mme eta-eta nnyin, Ebraham ma ntitọŋ nse ke nsinsi.
Ke ntak nken ewuŋe ese ọwọrọ osu.
56Mmedi etie ma Edisabed ke mkpọ nte ọfiọŋ ita ebeide enye onyuŋ ufọk ise.
Usen Emana Yọọn Ọduọk-mmuŋ
57K'ini ekemde Edisabed ndiman eyen, enye aman eyen deen.
58Ke nte mman mbọhọiduŋ ma mman ufọk ise okopde ke Abasi ọfọn ido ma eme, mmọ ekene adara ma eme.
59K'ini eyen ikoro ọyọhọde usen itieta, mmọ eben nsek eyen ikoro edi inum mbubi. Mmọ eyem isio eme enyiŋ eta ese «Sakaraya.» 60Ede nne nse Edisabed, ete, ibuhi ikere ntoro, «Ede emikere Yọọn.»
61Ede mmọ mfifien ete eme, ede «iduhe owom ekerede utọ enyiŋ eken ke otu mman ubon mfo.»
62Ke ntoro mmọ anam mkpọ idiọŋọ ọwuri eta ese man enye atiŋ enyiŋ enye eyemde isio eyen ese. 63Sakaraya akama ubọk ọnọ mmọ idiọŋọ ete yak mmọ ọnọ eme ŋwed yak eme iwed, sia enye ekedede imuuk, mmọ ọnọ eme ŋwed ma eto-ŋwed enye ewed do, ete, «Enyiŋ ese ekere Yọọn.» Idem akpa mmọ mfifien. 64Ata idaha-idaha ikoro inua Sakaraya ọkubọde, edeme ese adiana enye atiŋ ikọ, otooŋo nditoro Abasi. 65Ndik ọmum mfifien Mbọhọiduŋ mmọ; mmọ anyaŋ atiŋi mme mkpọ nken etibede ke mfifien obod obio Yudia. 66Ekese owom okopde mbuk eyen eken, ekere ke ekid mmọ ete, «Nsutọ owom ke eyen iken emide?» Sia ke akpanikọ ubọk Abasi odu ma eme ke saŋa-saŋa usuŋ.
Sakaraya Atiŋ Ikọ Nkukud
67Sakaraya iyọhọde ma Edisana Sibidib, ndien enye ọnọ etop otode Abasi ete;
68«Itoro enyine Ọbọọŋ, Abasi nnyin mman Isued ikponode.
Sia enye emididi idinyaŋa ubon ise.
69Abasi osuŋ ọdọŋ enyine odudu owom yak enye ediyaŋa nnyin.
Enye emito ubon eyen-ufọk ise, ọbọọŋ Defed.
70Abasi anam ukem-ukem nte enye ekedọhọde ke eme iminanam ke oyo edem k'ini enye eketiŋde ọnọ ikọd ise ebei ke mme edisana brọfed ise.
71Enye ọnọ nnyin anyaŋa owom yak edifak nnyin osio ke ubọk Anam-idiọk ma mme asua nnyin.
72Abasi ekenam emi man enye atua mme eta-eta nnyin mbọm
ke ndinam se Enye ekewuŋede ke eme iminanam ke edisana ediomi ise.
73Enwuŋe ido emi Enye ekenamde ma eta-eta nnyin Ebraham.
74Enye ete, «Ami mme mfafak fin nsio ke ubọk mme asua fo
man otodo ofo okpono Min ke una ndik.
75Enye eyem nnyin inam akpanikọ ma eme
inyaŋ inam ibed Ise ke nte nnyin idude uwem.»
76Ke ofo, «Eyen mi, mmọ emikood fin brọfed ata nkoŋ nkan Abasi,
sia ofo omubebem iso uka ukutum mme owom idem ọnọ edidi Ọbọọŋ.
77Ofo omunwawam ubon Abasi yak mmọ ọdiọŋọ ke Ọbọọŋ osuŋ edi
inyaŋa mmọ ke ndifen mme idiọk mkpọ mmọ.
78Abasi eyem inyaŋa nnyin sia enye ede ọfọn mfọn ma atua mbọm Abasi.
Ntak ikoro anam yak enye ọdọŋ Anyaŋa owom iken oto onyuŋ edinwam nnyin.
79Enye emibeben unwana isọk mman ikoro inyineke Abasi ke uwem mmọ, ma mman se abaakde mkpa.
Enye emida nnyin usuŋ mman nnyin iduŋ ke emem ma Abasi.
80Ke ntoro eyen ido, Yọọn, ọkọri anyaŋ ọchọŋidem ke sibidib. Enye ekeduŋ ke nnauded k'ini enye okponde tutu ekem idaha enye otoŋode ikwọrọ ikọ aŋwa-aŋwa ọnọ mman Isued.
தற்சமயம் தேர்ந்தெடுக்கப்பட்டது:
Luk 1: ITM
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Itu Mbon Uzo Bible by Beyond Translation is licensed under Creative Commons Attribution-ShareAlike 4.0 License.