लुका 1
1
लुकाले येसुक बारेम थियोफिलसका निख्ल खुसिक खबर
1आदरनिय थियोफिलस हमर्सिक बिचम जुन घट्ना घटिक पुरा भेल छो ओक्र बारेम थुप्रे मानुकस्या निख्लाहार कोसिस कर्ल छो।
2यि बात सुरुवेस आप्ने आँखिस देख्ल आ ओक्रे बारेम खुसिक खबर सुनाइलाहार्स्या हमर्सिका कहल स्यो। 3हम आप्नि पनि यि सभे घट्नाका सुरुवेस अस्लिमे जाँच् कर्ल स्यो। ओहेस हे आदरनिय थियोफिलस तोर लागि एगो-एगो घट्नाक बारेम निख्ति स्यो। 4ताकि तुइं सुन्ल घट्नाक बातसब साँच्चेक स्यो कहिक तोरा थाहा हउस।
बप्तिस्मा देल्हार युहन्नाक जनमक बारेम अगमबानि
5यहुदिया पर्देसक रजा हेरोदक समैम अबिया दलक जकरिया कहलाहार एक जना पुजारि छले। ओक्र बहुक ना एलिसिबा छले। उ हारुनक बंसक छले।#१ इतिहास २४:१० 6ओकर्स्या दुनु जनाले पर्मेसोरक नजरम जे ठिक ओहे करेक। अनि पर्मेसोरक सभे आग्या आ नियमका कह्याहु नाइ बिस्राइ पालन करेक। 7तर ओकर्सिका एकोगो सन्तान नाइ छले किरकि एलिसिबा बाँझि छले आ दुनु जना बुर्भा-बुर्ह्या भइसक्ल छले।
8एक दिन् अबिया दलक पुजारिसिका मन्दिरम काम कर्लाहार पालो एले त जकरिया पनि ओइलग छले। 9अनि पुजारिसिक चलन अन्सार चिठा घालल्के त पर्मेसोरक मन्दिरम ढुकिक धुप बार्लाहार काम जकरियाका पर्ले। ओहेस जकरिया धुप बार लागि मन्दिर भित्रि गेले। 10धुप बार जुमा बाहारम धेर्याइल सभे मानुकस्या पर्थना कर्ति छले। 11ओहे जुमा परमप्रभुक सोर्गदुत धुप बार्लाहार बेदिक दहिना काटम जकरियालग देखा पर्ले। 12जकरियाले सोर्गदुतका देखिक अताल्ले आ डरस लद-लद काप लग्ले। 13तर सोर्गदुतले ओक्रा एनामे कहल्के, “ए जकरिया, तुइं नाइ डेरा किरकि पर्मेसोरले तोर पर्थना सुन्ल छो। ओहेस आब् तोर बहु एलिसिबाले तोर लागि एगो बेटाका जनम देतो। अनि तुइं ओक्र ना युहन्ना राख्ह्य। 14उजुमा तुइं खुसिस लबर्ब आ अरु थुप्रे मानुकसब पनि ओक्र जनमम लबर्तो। 15किरकि उ परमप्रभुक नजरम महान हेतो। ओइले अङ्गुरक मध आ अरु कुन्हुँ मध नाइ पितो। उ मतारक कोखेस पबित्र आत्मास भोर्ल रहतो।#गन्ति ६:३ 16ओइले थुप्रे इस्राएलिसिका ओकर्सिक आप्न पर्मेसोरभर घुमाइक आन्तो। 17उ एलिया अगमबक्ताक जक्याहि पर्मेसोरक आत्मा आ सक्तिम प्रभुक अगा-अगा जाइक बापक मन बेटा-बेटिसिभर आ पापिसिक मन पर्मेसोरक आग्या पालन कर्लाहार बुद्धिमान मानुकसिभर घुमाइक पर्मेसोरक लागि एगो मन पर्लाहार जात तयार कर्तो।”#मलाकि ४:५-६
18तर जकरियाले सोर्गदुतका एनामे पुछल्के, “यि बात साँच्चेक पुरा हेतो कहिक हम केनामे थाहा पाइबो? किरकि हम एत्का बुर्भा स्यो आ हम्र बहु पनि बुर्ह्या भइसक्ल छो।”
19तब सोर्गदुतले उत्तर दैक कहल्के, “हम पर्मेसोरक अगाम ठेर्याइलाहार गब्रिएल स्यो। हम्रा पर्मेसोरले तोरसङ बात कर आ खुसिक खबर सुनाब लागि पठाइल छो।#दानिएल ८:१६; ९:२१ 20ओहेस देख्, हम्र कहल बात ठिक समैम पुरा हेतो। तर तुइं हम्र कहल बात नाइ पत्याइल कारनस जुन दिन् तलिक यि बात पुरा नाइ हेतो उ दिन् तलिक तुइं लता हेब।”
21उजुमा जकरियाका मन्दिर भित्रि गेल थुप्रे घर्या भेल देखिक बाहारम अस्याइलाहार मानुकसिका अचम्म लग्ल छले। 22जब जकरिया बाहार एले त उ ओकर्सिसङ बज नाइ सकल्के। ओहेस ओकर्स्या बुझल्के कि अइले मन्दिरम दर्सन पाइल छो कहिक। किरकि उ बज नाइ सकिक बाहारम अस्याइलाहार मानुसिसङ हाथस इसारा करिक बज लग्ले।
23जब जकरियाक सेबा कर्लाहार पालो ओराइले त उ आप्न घर गेले। 24ओक्र कनेके दिनक भित्रिम ओक्र बहु एलिसिबा देहभारि भेले आ पाँच महिना तलिक आप्ने घरम रहले। 25अनि एलिसिबाले एनामे कहल्के, “परमप्रभुले हम्र उप्रि दया करिक यि बर्कि काम करि देल छो आ मानुकसिक बिचस हम्र अप्मानका मेटाइ देल छो।”
येसुक जनमक बारेम अगमबानि
26एलिसिबा देहभारि भेल छ महिना पुग्ले त पर्मेसोरले गब्रिएल सोर्गदुतका गालिल पर्देसक नासरत सहरम एगो कुमारि छउँरिलग पठाइल्के। 27उ छउँरिक ना मरियम छले। ओक्र बिह्या रजा दाउदक कुलम जनम भेल योसेफ कहलाहार मानुकसङ हब लागि दिन् ठेकि सक्ल छले।#मत्ति १:१८ 28सोर्गदुत ओक्रलग आइक एनामे कहल्के, “गे मरियम, तोरा सान्ति हउस! पर्मेसोरले तोरा बर्कि दया कर्ल छो आ पर्मेसोर तोरसङ छो।”
29तर सोर्गदुतले कहल बात सुनिक मरियम अताल्ले आ बुझ नाइ सकिक यि केहेन खालक बात स्यो कहिक सोच लग्ले। 30ओहेस सोर्गदुतले ओक्रा कहल्के, “गे मरियम, तुइं नाइ डेरा किरकि पर्मेसोरले तोरा बर्कि दया कर्ल छो। 31देख्, आब् तुइं देहभारि हेब आ एगो बेटाका जनम धिब। अनि तुइं ओक्र ना येसु राख्ह्य।#मत्ति १:२१ 32उ महान हेतो आ महान पर्मेसोरक बेटा कहलाइतो। अनि प्रभु पर्मेसोरले ओक्रा ओक्रे पुर्खा दाउदक जक्या रजा बनाइतो।#२ समुएल ७:१२,१३,१६; यसैया ७:९ 33ओइले इस्राएलिसिक उप्रिम सब्दिन राज कर्तो। अनि ओक्र राज्ये कह्याहु नाइ ओराइतो।”
34यि बात सुनिक मरियमले सोर्गदुतका पुछल्के, “यि केनामे हब सक्तो किरकि हम त कुमारिए स्यो?”
35तब सोर्गदुतले ओक्रा उत्तर देल्के, “पबित्र आत्मा तोर उप्रिम एतो आ परमप्रभुक सक्तिक छाहा तोर उप्रिम पर्तो। ओहेस तोर कोखस जनम भेल्हार बच्चा पबित्र हेतो आ पर्मेसोरक बेटा कहलाइतो। 36हम तोरा दस्रो बात पनि कह स्यो, तोर आप्न मानुक एलिसिबा बुर्ह्या भइक पनि देहभारि भेल छो। जक्रा बाँझि कहोक अखन ओक्र कोखम छ महिनाक बेटा छो। 37किरकि पर्मेसोरक लागि कथ्यो असम्भब नाइ छो।”#उत्पति १८:१४
38तब मरियमले कहल्के, “हम त पर्मेसोरक दासि स्यो, हम्रा तोरे कहल जक्या हउस।” तब सोर्गदुत ओक्रलगस गेले।
मरियमले एलिसिबाका भेट गेल
39सोर्गदुतले कहल कनेके दिनक पछा मरियमले अबेर नाइ करिक एलिसिबाका भेट लागि यहुदिया पर्देसक पाहारम भेल एगो गाँमम गेले। 40अनि ओत पुग्ले त मरियम जकरियाक घरम गेले आ एलिसिबाका गोरलागल्के। 41जब एलिसिबाले मरियमक गोरलाग्ल सुनल्के त ओक्र कोखक बच्चा चल्मलाइले। अनि एलिसिबा पबित्र आत्मास भोरिक, 42कस्याइक एनामे कहल्के, “जनिजात भोरिम तुइं सभेस धन्येक स्या आ धन्ये स्यो तोर कोखक बच्चा। 43पर्मेसोरले हम्रा दया करिक एतेक इज्जत देल छो कि हम्र प्रभुक मतार हम्रा भेट एलो। 44किरकि तोर गोरलाग्ल हम्र कानम पर्ति बितिन हम्र कोखक बच्चा खुसिस चल्मलाइलो। 45तुइं धन्येक स्या किरकि परमप्रभुले तोरा जुन बात कहल छलो उ पुरा हेतो कहिक तुइं बिस्वास कर्ल।”
मरियमले पर्मेसोरक पर्संसा कर्ल
46तब मरियमले कहल्के,
“हम्र आत्माले पर्मेसोरक पर्संसा कर्छो,
47आ हम्र आत्मा हम्रा मुक्ति देल्हार पर्मेसोरसङ लबर्छो।
48किरकि पर्मेसोरले आप्न दासिक नम्रताम दया कर्ल छो।
ओहेस आब् सभे पुस्ताक मानुकस्या हम्रा धन्येक कहतो।
49किरकि सक्तिसालि पर्मेसोरले हम्र लागि सभेस बर्कि काम कर्ल छो।
ओक्र ना पबित्र छो।
50पर्मेसोरले आप्न आग्या मान्लाहार्सिका
पुस्ता-पुस्ता तलिक दया कर्तो।
51पर्मेसोरले आप्न सक्तिस बर्कि काम कर्ल छो,
आ हमि स्यो कहिक घमन्ड कर्लाहार्सिका छिरोबित करि देल छो।
52अनि सक्तिसालि रजासिका राजगद्दिस हटाइक,
नम्र भेल्हार्सिका इज्जत देल छो।#अयुब ५:११
53आ भुखाइलाहार्सिका अस्लि-अस्लि खाइलाहार चिजसब दैक खुसि कर्ल छो,
तर धनिकसिका चाहिं सुधे हाथ घुमाइ देल छो।
54पर्मेसोरले आपन्सिक पुर्खासिसङ कर्ल बाचाका पुरा करिक,
आप्न दास इस्राएलिसिका सहयोग कर्ल छो।
55आ आपन्सिक पुर्खा अब्राहामसङ बाचा कर्ल अन्सार,
ओक्र सन्तानसिका दया कर कह्याहु बिस्राइल नाइ छो।”#उत्पति १७:७
56तब मरियम तिन महिना तलिक एलिसिबासङ रहले आ आप्न घर घुमिक एले।
बप्तिस्मा देल्हार युहन्नाक जनम
57पछास एलिसिबाले बच्चाका जनम देल्हार समै पुरा भेले त ओइले एगो बेटाका जनम देल्के। 58जब ओक्र आप्न मानुक आ परोसिस्या पर्मेसोरले ओक्रा बर्कि दया देखाइल छो कहिक सुनल्के त ओकर्स्या सभे जना ओक्रसङ लबर्ले।
59अनि बच्चाका जनम भेल आठ दिन् पुग्ले त यहुदिसिक चलन अन्सार ओक्र खत्ना कर लागि मानुकसब धेर्याइले आ ओक्र बापेक जक्या ओक्र ना जकरिया राख खोज्ल छले।#लेबि १२:३ 60तर ओक्र मतारले कहल्के, “नाइ, एक्र ना त युहन्ना राख पर्तो।”
61तब ओकर्स्या बच्चाक मतारका कहल्के, “तोर खन्दानम एहेन ना त कक्रो नाइ छो त।” 62ओहेस ओकर्स्या बच्चाक बापका हाथस इसारा करिक पुछल्के, “तुइं एक्र ना कथि राख खोज्ल स्या?”
63तब जकरियाले एगो निख्लाहार पाटि माङल्के आ “एक्र ना युहन्ना स्यो” कहिक निखल्के त ओकर्स्या सभे जना छक पर्ले। 64ओहे जुमा ओक्र बोलि फुट्ले अनि पर्मेसोरक पर्संसा कर लग्ले। 65यि देखिक ओक्र सभे परोसिसब डेराइले। यि बातक चर्चा यहुदिया पर्देसक पाहारम भेल सभे गाँमम फैलले। 66यि बात सुन्लाहार सभेले आप्न मनम बिचार करिक एनामे सोचल्के, “पछास यि बच्चा केहेन हेतो?” किरकि पर्मेसोरक सक्ति ओक्र उप्रिम छले।
जकरियाले पर्मेसोरक पर्संसा कर्ल
67तब युहन्नाक बाप जकरिया पबित्र आत्मास भोर्ले आ एना कहिक अगमबानि कर लग्ले,
68“इस्राएलक परमप्रभु पर्मेसोरक पर्संसा हउस,
किरकि उ आप्नि आइक आप्न मानुकसिक उद्दार कर्ल छो।
69आ आप्न दास दाउदक बंसम हमर्सिक लागि,
एक जना सक्तिसालि मुक्ति देल्हारका पठाइल छो।
70किरकि पर्मेसोरले आप्न पबित्र अगमबक्तासिक मुहस पेहेनि एनामे कहल छलो,
71ओइले आपन्सिक सभे दुस्मन्सिस
आ आपन्सिका घिलाइलाहार्सिस बचाइतो।
72पर्मेसोरले आपन्सिक पुर्खासिका दया देखाब लागि,
आ ओकर्सिसङ बाह्न्ल पबित्र बाचाका पुरा कर लागि यि काम आपन्सिक बिचम कर्ल छो।
73किरकि पर्मेसोरले आपन्सिक पुर्खा अब्राहामका बाचा करिक यि कहल छलो,
74ओइले आपन्सिका आपन्सिक सभे दुस्मन्सिक हाथस छुटाइतो।
75तब आपन्स्या बिना डेराइक पबित्र आ धर्मि जिबन बिताइक,
आप्न जिबन भोरि पर्मेसोरक सेबा कर सक्ब।”
76तब जकरियाले आप्न बेटाक बारेम एनामे कहल्के, “ए हम्र बेटा, तुइं महान पर्मेसोरक अगमबक्ता कहाइब।
किरकि तुइं प्रभुक पैरा तयार कर लागि
प्रभुक अगा-अगा जेब,
77आ पर्मेसोरले केनामे आप्न मानुक इस्राएलिसिका पाप छेमा करिक,
मुक्ति देतो कहिक तुइं ओकर्सिका सुनाइब।
78किरकि आपन्सिक पर्मेसोर दयालु भेल कारनस,
खिरिस्टका बिहान निकल्ल सुरुजक इजोत जक्या सोर्गस आपन्सिलग पठाइ देतो।
79तब पर्मेसोरका नाइ चिन्हिंक पापम हराइल आ कालक मुहम पुग्ल मानुकस्या इजोत पाइतो।
ओहे इजोतले आपन्सिका सान्तिक पैराम हिंठाइतो।”#यसैया ९:२
80तब बच्चा युहन्ना बह्र्ति गेले आ आत्माम पनि जोर्गर हब्ति गेले। अनि ओइले इस्राएलिसिक बिचम पर्चार नाइ कर्ल दिन् तलिक उजाड ठावेम रहेक।
தற்சமயம் தேர்ந்தெடுக்கப்பட்டது:
लुका 1: DANU
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024 (Active), Mother Tongue Translators Society and Wycliffe Bible Translators, Inc. All rights reserved.