San Lucas 1
1
Pakauna
1Patgek a Teofilo,
Adun ti nagsurat maipapan kadagiti napaspasamak kadatayo, 2kas nadamagtayo kadagidi nakakita kadagitoy manipud idi damo ken kadagidi nangikasaba iti mensahe. 3Kalpasan ti panangadalko a naimbag kadagitoy manipud panangrugida, napanunotko nga isurat kenka ti naurnos a pakasaritaanda. 4Kayatko ngamin a maammoam ti amin a kinapudno maipapan kadagiti amin a naisuro kenka.
Maipakaammo ti Pannakayanak ni Juan a Mammuniag#Mammuniag; wenno Bautista. Nailawlawag daytoy iti Mateo 3.
5Idi#1 Cron. 24:10. a ni Herodes ti ari idiay Judea,#5 JUDEA: ti entero a daga ti Palestina. adda padi nga agnagan Zacarias a kameng ti bunggoy dagiti papadi nga ipanguloan ni Abias. Elisabet ti nagan ti asawana a nagtaud met iti kaputotan ni Aaron a padi.
6Iti imatang ti Dios, nagbiag a sililinteg dagiti agassawa. Awan pagkurangan ti panagtungpalda kadagiti amin a paglintegan ken bilin ti Apo. 7Awan anakda agsipud ta lupes ni Elisabet. Maysa pay, lakay ken baketdan.
8Iti maysa nga aldaw, dimteng ti batang ti bunggoy ni Zacarias nga agserbi iti Templo, ket madama nga ar-aramidenna ti rebbengna a kas padi.
9Kas kadawyan dagiti papadi, nagbibinnunotda no siasino ti sumrek iti Templo ti Apo a mangpuor iti insenso iti altar. Napagasatan ni Zacarias ket simrek iti Templo ti Apo.
10Bayat ti pannakapuor ti insenso iti uneg, agkarkararag met dagiti tattao iti ruar.
11Maysa nga anghel ti Apo ti nagparang ken ni Zacarias. Nagtakder iti makannawan ti altar a pakapupuoran ti insenso. 12Nariribukan ni Zacarias idi makitana ket nagbuteng iti napalalo. 13Ngem kinuna ti anghel kenkuana, “Dika agbuteng, Zacarias! Impangag ti Dios ti kararagmo. Aganakto ni Elisabet nga asawam. Lalakinto ti anakyo ket panaganamto iti Juan. 14Agragsakkanto iti kasta unay, ket adunto met ti agragsak iti pannakaipasngayna. 15Ta#Num. 6:3. naindaklanto a tao iti imatang ti Apo. Masapul a dinto uminum iti arak wenno uray ania a makabartek. Mapnonto iti Espiritu Santo uray adda pay laeng iti tian 16ket adunto kadagiti Israelita ti pagsublienna iti Apo a Diosda. 17Umun-unanto#Mlk. 4:5-6; Sir. 48:10-11. a maibaon ngem ti Apo. Nabileg ken mannakabalinto a kas ken ni profeta Elias. Pagtutunosennanto manen dagiti amma ken dagiti annak. Pagsubliennanto iti kinalinteg dagiti nasukir. Isaganananto dagiti tattao a maipaay iti Apo.”
18“Kasanonto ti pannakaammok a mapasamak daytoy?” sinaludsod ni Zacarias iti anghel. “Lakayakon ket baket metten ni asawak.”
19-20“Siak#Dan. 8:16; 9:21; Tob. 12:15. ni Gabriel,” kinuna ti anghel. “Agserserbiak iti imatang ti Dios a nangibaon kaniak a makisao ken mangidanon kenka iti daytoy a damag. Ngem dika met mamati iti mensahek a matungpalto iti naituding a tiempo. Gapu ta dika mamati, agumelkanto ket dikanto makasao agingga iti aldaw a matungpal dagiti sinaok.”
21Kabayatanna, masmasdaaw dagiti tattao nga agur-uray ken ni Zacarias agsipud ta nabayag unay ti kaaddana iti Templo. 22Idi rummuar, saanen a makasao, ket daytoy ti nakaammoanda nga adda nagparang kenkuana iti Templo. Gapu ta saanen a makasao, nagsensenias lattan kadakuada.
23Nagawid ni Zacarias kalpasan ti batangna nga agserbi iti Templo. 24Iti saan a mabayag, nagsikog ni Elisabet nga asawana, ket lima a bulan a di rimrimmuar iti balay.
25“Kamaudianna, tinulongannak ti Apo,” kinuna ni Elisabet. “Inikkatnan ti pakaibabainak#25 PAKAIBABAINAK: maibilang a pakaibabainan no lupes ti Judio nga asawa a babai. iti imatang ti tao.”
Maipakaammo ti Pannakayanak ni Jesus
26Iti maikanem a bulan ti sikog ni Elisabet, imbaon ti Dios ni Gabriel nga anghel a mapan iti maysa nga ili ti Galilea,#26 GALILEA: iti amianan, maysa kadagiti probinsia ti pagilian. a managan Nazaret. 27Naibaon#Mat. 1:18. ni Gabriel iti maysa a birhen a naitulag a mayasawa iti lalaki nga agnagan Jose a nagtaud iti kaputotan ni Ari David. Maria ti nagan ti balasang.
28Nagparang ti anghel ken ni Maria ket kinunana, “Kappia koma ti adda kenka. Agragsakka ta agtaeng ti Apo kenka ket naindaklan ti bendisionna.”#28 Inayon ti sumagmamano a kadaanan a patarus: Sika ti nainggasatan kadagiti babbai.
29Napalalo ti pannakariribuk ni Maria iti insao ti anghel. “Ania ngata ti kaipapanan daytoy?” kinunana iti bagina.
30Ngem kinuna ti anghel kenkuana: “Dika agbuteng, Maria, ta pinaraburannaka ti Dios. 31Agsikogkanto.#Mat. 1:21. Ipasngaymonto ti maysa a lalaki, ket panaganamto iti Jesus. 32Naindaklanto.#2 Sam. 7:12, 13, 16; Is. 9:7. Maawaganto iti Anak ti Kangatoan. Pagbalinento ni Apo Dios nga ari, a kas ken ni David a kapuonanna. 33Iturayannanto iti agnanayon dagiti kaputotan ni Jacob, ket dinto agpatingga ti panagarina.”
34Kinuna ni Maria iti anghel: “Kasano a maaramid daytoy idinto a maysaak a birhen?”
35“Umayto kenka ti Espiritu Santo,” insungbat ti anghel. “Salinongannakanto ti pannakabalin ti Dios. Daytoy ti gapuna a nasantoanto ti ubing, ket maawaganto iti Anak ti Dios. 36Malagipmo ni kabagiam nga Elisabet a kunkunada a lupes? Masikog nupay baket unayen. Innem a bulanen ti sikogna. 37Ta#Gen. 18:14. awan ti saan a kabaelan ti Dios nga aramiden.”
38“Adtoyak nga adipen ti Apo,” kinuna ni Maria. “Maaramid koma kaniak, kas insaom.”
Ket pimmanaw ti anghel.
Sarungkaran ni Maria ni Elisabet
39Iti saan a mabayag, nagrubbuat ni Maria ket nagdardaras a napan iti maysa nga ili iti kabambantayan ti Judea. 40Napan iti balay ni Zacarias ket kinablaawanna ni Elisabet. 41Apaman a nangngeg ni Elisabet ti kablaaw ni Maria, naggaraw ti ubing iti tianna.
Napno ni Elisabet iti Espiritu Santo. 42“Sika ti kagasatan kadagiti amin a babbai!” impukkawna. “Nagasat ti ubing nga ipasngaymonto. 43Anian a pannakapadayawko, ta umaynak sarungkaran ti ina ti Apok! 44Ta apaman a nangngegko ti kablaawmo, naggaraw ti ubing iti tianko gapu iti ragsakna. 45Wen, nagasatka ta mamatika a matungpalto ti insao kenka ti Apo!”
Kanta a Pagdayaw ni Maria
46Kinuna#1 Sam. 2:1-10. ni Maria:
“Toy pusok idaydayawna ti Apo,
47Ket agragsak toy kararuak gapu iti Dios a Mangisalakan kaniak.
48Ta#1 Sam. 1:11. nalagipnak, siak a nanumo nga adipenna,
Ket manipud ita, awagandakto a nagasat dagiti amin a tattao,
49Gapu kadagiti naindaklan a bambanag nga inaramid kaniak ti Mannakabalin a Dios.
Nasantoan ti naganna;
50Kaasianna dagiti agbuteng kenkuana,
Manipud iti maysa a kaputotan
agingga kadagiti sumarsaruno.
51Imparangna ti pannakabalin ti takkiagna,
Ket winarawarana dagiti natangsit a tattao ken amin a gandatda.
52Inikkatna#Jb. 5:11; 12:19; Sir. 10:14. dagiti mannakabalin nga ari iti tronoda,
Ket intan-okna dagiti nanumo.
53Pinennekna dagiti mabisin kadagiti agkakaimbag;
Pinagtalawna nga ima-ima dagiti babaknang.
54Tinungpalna ti karina kadagiti ammatayo;
Tinulonganna ti Israel nga adipenna,
55Ket#Gen. 17:7. nalagipna a kaasian ni Abraham,
Ken ti amin a kaputotanna iti agnanayon.”
56Agtallo a bulan a nakipagyan ni Maria ken ni Elisabet. Kalpasanna, nagawid idiay balayda.
Ti Pannakayanak ni Juan a Mammuniag#Mammuniag; wenno Bautista. Nailawlawag daytoy iti Mateo 3.
57Dimteng ti panaganak ni Elisabet, ket impasngayna ti maysa nga ubing a lalaki. 58Nadamag dagiti kaarruba ken kakabagianna ti nakaskasdaaw a kinaimbag ti Apo kenkuana. Nakipagragsakda amin kenkuana.
59Idi#Lev. 12:3. walo nga aldawnan ti maladaga, napanda pinakugit. Kayatda koma a panaganan iti Zacarias, kas ken ni amana. 60Ngem kinuna ni inana: “Saan! Juan ti maipanagan kenkuana.”
61“Ngem awan met kabagiam nga agnagan iti kasta,” kinunada.
62Sineniasanda ni Zacarias tapno ammoenda ti kayatna a maipanagan iti ubing.
63Dimmawat ni Zacarias iti pagsuratan. “Juan ti naganna,” insuratna.
Anian a siddaawda amin! 64Iti dayta met la a kanito, makasao manen ni Zacarias, ket indaydayawna ti Dios.
65Nagbuteng dagiti amin a kaarrubada. Nagwaras ti damag maipapan kadagitoy a bambanag iti amin a disso iti kabambantayan ti Judea.
66“Anianto ngata ti pagbalinan daytoy nga ubing?” kinunkuna dagiti amin a nakadamag. Nalawag ngamin nga adda kenkuana ti pannakabalin ti Apo.
Ti Padto ni Zacarias
67Napno iti Espiritu Santo ni Zacarias nga ama ni Juan ket imbagana ti mensahe ti Dios:
68“Madaydayaw ti Apo a Dios ti Israel!
Immayna tinulongan dagiti tattaona ket winayawayaanna ida.
69Inikkannatayo iti maingel a Mangisalakan
a nagtaud iti kaputotan ni David nga adipenna.
70Nabayagen nga imbagana daytoy, babaen kadagiti nasantoan a profetana.
71Inkarina nga isalakannatayo kadagiti kabusortayo,
iti pannakabalin dagiti amin a gumurgura kadatayo;
72Inkarina met a kaasianna dagiti ammatayo,
Ken laglagipenna ti nasantoan a tulagna,
73-74Ti sinapataanna a kari ken ni Abraham nga amatayo,
Nga ispalennatayo kadagiti kabusortayo,
Tapno awan pagbutngantayo nga agserbi kenkuana,
75Ket nasantoan ken nalintegtayo iti imatangna
kadagiti amin nga aldaw ti panagbiagtayo.
76“Sika,#Mlk. 3:1. anakko, managanankanto iti profeta#76 PROFETA: maysa a tao a mangipakaammo iti mensahe ti Dios. ti Dios a Kangatoan.
Ta umun-unakanto ngem ti Apo,
Tapno isaganam ti pagnaanna,
77Ken ipakaammom kadagiti tattaona a maisalakandanto,
Babaen iti pannakapakawan dagiti basbasolda.
78Naasi ken naayat ti Diostayo;
Pagbannawagennanto ti pannakaisalakantayo,
79Ket#Is. 9:2. manipud sadi langit, silnaganna dagiti agbibiag iti kasipngetan ni patay,
Ket iturongna dagiti addangtayo iti dalan ti kappia.”
80Dimmakkel ti ubing ken pimmigsa iti espiritu. Nagnaed idiay let-ang agingga iti aldaw a panagparangna a silalatak kadagiti tattao iti Israel.
தற்சமயம் தேர்ந்தெடுக்கப்பட்டது:
San Lucas 1: RIPV
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 1996 Philippine Bible Society