KAOBAK 12
12
Abram Ngabü
1 #
Ykj 7.3 Bunyubouei Abram to laukei, “Kaibü kaonyek ka hoba kaibü chempen ka hoba kabou chem ka meimeijung ngei ka la lenlabü kaonyek to hauashi.
2Hobaje ngei ka ka phang yaangbü che yeitikulabü,
hoba no haükulabü;
hoba ngei kaibü nyen yaangentilabü,
3 #
Gal 3.5 Hobaje aoyouei no haükulaje ngei haoen haükulabü,
hoba aoyouei ka to khüklauoklaje ngei haoen la
shedsikhau kulabü,
hoba no danko kaodak phangshuong pendou haükulabü.”
4Hibü Bunyubouei hao to laubü tegü, Abram haukei; hoba Lot hao yoa haukei. Hobaje Haran ka meimeijinei Abram bukbü po anjinleito ngao kikei. 5Hobaje Abramei haoyak Sarai si shoumo Lot hoba haoenei thansheibü haoenei kibü pendou hoba haoenei Harana müt lajuche leisheikei, khübü pendou leian haukei; hoba haoen Kanan kao to meimeikei hoba haoen khonei sühlangkei. 6Hobaje Abram kho kaophei saabü Shekhema More kaoena saopobü bulong sühko loukei. (Kheijinei Kananbü kho kaonyua kiteikei). 7Hobaje Bunyubou Abram jungto longan laukei, “Kaibü lilabü la ho kaoen kulabü.” Hibü khonei hao la longan lenbou Bunyubou shanga haoei laangshong lemshon yaükei. 8Hobaje haoei kho ka Bethel chaangbou aenei hoba Ai chaangbou aenei apyoan haoei haoeibü neichem dangkei. Hobaje khünei haoei Bunyubou shanga laangshongei lemshon yaüan Bunyubou to lembei. 9Hobaje Abram Kanan yungthang aeto wakou athakko meimeijung haukei.
Abram Ijepa
10Hobaje kho kaonyeka mühsinou kikei hoba Abram Ijepa kila yankei, aieilausi kaonyeka kaangbüsekbü mühsinou kikei. 11Hobaje haoei Ijep to atla nyangko loujinei haoei haoyak Sarai to laukei, “Chühashi, no chühla saomaibü yaksa dogo ngei ngekei. 12Ladang Ijepbüei no haplaje haoenei laulabü, ‘Ho haoyak.’ Kheijinei haoenei ngo haitilabü, lausikei no langtilabü. 13No küna dogo haoen la lenshi; khei yingsije ka laüa kü to thounoulabü hoba kü langkei püetlabü.” 14Ladang Abram Ijep kaodak to loukei, Ijepbüei yaksa kho sao aeibou maietnyu hapbei. 15Hobaje Faraoeibü yaangenbü atei sao hapan Farao la sao hemaisaomai shangabü sangan lenkei hoba Farao chem to leibakei. 16Hobaje sao laüa haoei Abram to maian jungeikei, hoba hao la sanlon, masu, gadu pisipaang, sambü bousu, yaksa hoba ut dogo kukei.
17Lausikei Bunyubouei Abrameibü yak Sarai hangshong Farao hoba haoeibü chemdang shatlim yaangei sühtikei. 18Kheijinei Faraoei Abram ngaan laukei, “Nyi kü to kümbü kho ai? Sao kayak dogo aila alen? 19Nyi aila ‘Sao küna’ dogo laukei? Khoei ong ngei sao küyak la lekei. Kayak hanei kia, sao leilangashi!” 20Hobaje Faraoei Abram shangabü hao mütshuong la ngühkhüm kuan hao hoba yak hoba haoei kibü pendou yoan Ijep ka sattikei.
தற்சமயம் தேர்ந்தெடுக்கப்பட்டது:
KAOBAK 12: CHANGBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.